Muse Siina Ilaali aana heeꞌreenna, Yihowa baxxino mine minanno gede kulisi; konne mine qullaawa dukkana yinanni. Kuni Israeelete manni Magano magansiꞌranno mineeti. Insa bayichunni bayicho hadhanno woyite qullaawa dunkaana adhite hadhanno.

Yihowa Muse, ‘Israeelete manni qullaawa dunkaana minate noonsare abbannoe gede kulinsa’ yiisi. Israeelete manni culka, birra, camo, dancha kinchonna seesu uduunne abbi. Insa seesallitte uddano, saadate gogganna wole batinyere abbi. Israeelete manni lowore abbino daafira Muse ‘Xaate ikkinonna abbitinoonte’ yii.

Lowohu ogeeyye labballinna meenti qullaawa dunkaana mina kaaꞌlino. Yihowa insa konne looso loossanno gede hayyoota assinonsa. Insa giddo mitu fuutta suqqino, uduunne gowino, kinna bocino, culka daashshino, hattono haqqe karino.

Israeelete manni qullaawa dunkaana Yihowa kulinonsa garinni mini. Insa Qullaawa Darganna Qullaawa Holge badate qullaawu dunkaani giddo biifado dukko dukkitino. Qullaawu Holgira waaccotenna culkunni seekkinoonniha gondooru taawoota worroonni. Qullaawu Dargira kayinni caabbicho worranni uduunnichi, xarapheezzunna hixaana giirranni dargi no. Nafara camotenni seekkinoonni gawatenna jawu kakkalote bayichi no. Gondooru taawooti Israeelete manni Yihowara hajajammeemmo yee eino qaale qaaganno gede assannonsa. Gondooru maatiro afootto? Gondooroho yaa qaale eate.

 Yihowa, Aarooninna oososi qullaawu dunkaani giddo kakkalaasine ikkite soqqantanno gede doorino. Insa qullaawa dunkaana towaattanno, hattono hakko Yihowara kakkalo shiqishshanno. Qullaawu Holgira ea dandaannohu Kakkalaanote Biili Aarooni callaati. Aarooni isi cubbira, maatesi cubbiranna Israeelete manni cubbira kakkalo shiqishate dirunni mitte hige Qullaawu Holgira eanno.

Israeelete manni Gibitsete gobbanni fulihunni mittu diri gedensaanni qullaawa dunkaana mine gudino. Xa insa Yihowa magansidhanno bayicho afidhu.

Qullaawu dunkaani giddo Yihowa ayirrinyi woꞌmi, hattono dunkaana gomichu guggushshi. Israeelete manni gomichu qullaawu dunkaani aaninni hoꞌla geeshsha noowiinni dikaꞌꞌanno. Gomichu dunkaanu aaninni hoꞌlanno woyite kayinni kae haꞌranno. Insa qullaawa dunkaana adhite gomichu hoode hadhanno.