Baabeeli yinanni katami mule Uuri yinanni katami no; hakko heeꞌranno manni Yihowa dimagansiꞌrannoho; insa wole haammata maganna magansidhanno. Kayinni Uuri katami giddo Yihowa calla magansiꞌrannohu mittu manchi no. Konni manchi suꞌmi Abirihaamiiti.

Yihowa Abirihaami togo yiino: “Gobbakki agurte, fiixikkinna ayiddikkiwiinni baxxite, ani leellisheemmohe gobba haꞌri.” Hakkiinni Maganu togo yiisi: ‘Lowo gosa asse maassiꞌreemmohe; qoleno baattote aana heedhanno daga baalanti ate widoonni higge maassantanno.’

Abirihaami Yihowa mamira soyannosiro diafino; ikkirono isi Yihowa ammanino. Konni daafira Abirihaami, galtesi Saara, annisi Taaranna rodiisi beetti Looxi noonsare adhite Yihowa hadhe yiinonsawa hadhino.

 Abirihaaminna maatesi Yihowa hadhe yiinonsa gobba iillitu yannara Abiraamira 75 diro ikke noosi. Hattee gobba Kanaani yinanni. Hakko martinowa Maganu togo yee Abirihaamira qaale eino: “Tenne baatto sirchikkira eemmo.” Ikkollana, Abirihaaminna Saara hatte yannara geedhino; konni daafira ooso ila didandaanno. Ikkina Yihowa yiinori woꞌmanno gede assa dandaannohu hiittoonniiti?