Yesuusi reyi gedensaanni, Yooseefi yinannihu mittu dureessu manchi Philaaxoosiwa mare reeshsha aannosi gede xaꞌmiꞌri. Hakkiinni Yooseefi reeshsha dancha seemmanni kafane haaro waamma giddo madaarino. Qoleno jawu kinchinni waammate afoo cufino. Kakkalaanote roorrooti Philaaxoosiwa marte togo yitu: ‘Yesuusi rosaano reeshshasi adhite isi reyotenni kaino yite dudubbara dandiitanno.’ Konni daafira Philaaxoosi ‘Waammate maattama gantine agarre’ yiinsa.

Sasu barri gedensaanni, soodo guto meentu waammanniwa maranno woyite kinchu gongoꞌme hoꞌle no. Sokkaanchu waammate giddo heeꞌre meento togo yii: ‘Waajjitinoonte. Yesuusi reyotenni kaino. Hadhine rosaanosi Galiilaho isi ledo xaaddanno gede kullensa.’

Megidelitte Maariyaami, Pheexiroosinna Yohaannisi hassara dodanni hadhu. Hakkiinni insanni xaadduti, ‘Yesuusi reeshsha waammate giddonni fushshinohu no’ yitunsa. Pheexiroosinna Yohaannisi doddanni waammanniwa martu. Laꞌanno woyite waammate giddo noori dino; konni daafira galagalte qaensa higgu.

Maariyaami galagalte waammanniwa martanno woyite, hakko noore lame sokkaasine laꞌe insara togo yitu: “Mootichaꞌya fushshite hiikka qoltinoro diafoomma.” Hakkiinni mitto mancho laꞌu; hakku manchi gate towaaxxanni nooha laweennase, ‘Mooticha, hiikko woroottoro kulie ballo’ yitu. Ikkollana isi, “Maariyaami” yee woshshiseta, isi Yesuusa ikkinota affu. Ise wiꞌlitanni “Rosiisaancho!” yite cuꞌmite amaddusi. Hakkiinni Yesuusi Maariyaami, ‘Hadhe roduuwiꞌyara ane laoottata kulinsa’ yiise. Hakkawoyintenni Maariyaami doddanni marte rosaanote Yesuusa laꞌinota kultunsa.

Hakko barra, lame rosaano Yerusaalametenni Eemahusi yinanniwa hadhanni no. Hadhanni doogote heedheenna mittu manchi ledonsa haꞌranni, ‘Maa hasaabbinanni heedhinoonni?’ yee xaꞌminsa. Insano togo yite qoltu: ‘Sasu barri albaanni, kakkalaasinete roorrooti Yesuusa shitinota dimacciishshootto? Xa kayinni mitu meenti iso reyotenni kaino yaanni no!’ Manchu qole togo yiinsa: ‘Masaalaano coyidhinore  diammantinanni? Masaalaano “Kiristoosi reyanno; hakkiinni reyotenni kaꞌꞌanno” yitino.’ Isi Qullaawa Borro yitannore xawise kulinsa. Rosaano Eemahusi iilla rakkuti, hakkonne mancho ledo haꞌno yitusi. Hurbaate ittara huuccatto assihu gedensaanni, Yesuusa ikkinota affu. Hakkiinni isi albinsanni goꞌli.

Lamenti rosaano rakke Yerusaalame higge gamba yite noo soqqamaasinera ikkinore kultunsa. Hakkiinni insa mine heedheenna Yesuusi insa baalunkura leellinsa. Umo, soqqamaasine Yesuusa ikkinota diammantino. Hakkiinni isi togo yiinsa: ‘Kuneeti angaꞌya laꞌe; ane amammaddine laꞌe. Kiristoosi reyotenni kaꞌꞌanno yine borreessinoonni.’