Moote Nabukadanatsoori haaqeetenni misile laihunni shiima yanna gedensaanni, culkunni lowo misile seekki. Isi hattenne misile Duura yinanni xawira uurrisino; hakkiinni Sidiraaqi, Misaaqi, Abidinaagonna wole ayirradda manna woshshe misilete albaanni uurritanno gede assi. Moote togo yee hajaji: ‘Xurumbu, gingilaatunna suusullete huuro macciishshitinanni woyite misilete kumbuulle! Kumbuula giwanno mancho wala yite bubbanno giira giddo tunganni.’ Sasunku Ibiraawootu ooso misilete kumbuultannonso, Yihowa calla magansidhanno?

Hakkiinni Moote Nabukadanatsoori muuziiqa gannanni gede hajaji. Hakkiinni mannu baalu misilete kumbuuli; Sidiraaqi, Misaaqinna Abidinaago kayinni dikumbuultino. Mitu manni insa kumbuultinokkita lae mootete togo yee qasiisino: ‘Kuri Ibiraawootu kumbuula gibbino.’ Nabukadanatsoori insa isiwa abbisiise togo yii: ‘Xa xurumbu, maasinqotenna suusullete huuro macciishshitinanni woyite misilete kumbuulle. Gibbiniro kayinni wala yite bubbanno giira giddo tugeemmoꞌne. Angaꞌyanni gatisaꞌnera dandaanno magani dino.’ Insa togo yite qoltu: ‘Moote, ninke misilete dikumbuulleemmo. Maganinke gatisankera dandaanno. Gatisa hooginkero nafa, misilete dikumbuulleemmo.’

Hakkiinni Nabukadanatsoori lowo geeshsha hanqi. Isi olantosi togo yii: ‘Giira albinni roore lamala ero bubbanno gede asse!’ Hakkiinni, ‘Kore manna usurtine giirate giddo tugge!’ yee hajaji. Giira wala yite  bubbanni noo daafira, insa giirate giddo tuggu olanto bayichonko reyitino. Sasenka Ibiraawoota giirate giddo tungi. Nabukadanatsoori giirate giddora qole laꞌꞌanno woyite, giirate giddo kawanna kaꞌa haꞌramanni noohu sase manna ikkikkinni shoole mannaati. Isi mase togo yee xaꞌmi: ‘Giirate giddo tungummohu sase manna calla diꞌꞌikkino? Giirate giddo kayinni shoolu manni no; mittu sokkaasincho lawanno!’

Nabukadanatsoori giiranniwa shiqqi yee togo yee woshshi: ‘Woꞌmunkura Aliidi Magani soqqamaano, rakkine fultine kawa amme!’ Mannu baalu Sidiraaqi, Misaaqinna Abidinaago giirate giddonni mittoreno ikkitukki fultuta lowo geeshsha maalaꞌli. Bisinsa, dananchinsanna uddanonsa digiirantino; giirate fooli nafa dikisinonsa.

Nabukadanatsoori togo yii: ‘Sidiraaqi, Misaaqinna Abidinaago Magani galatamo! Isi sokkaasinchosi soye gatisinonsa. Insa Magani gedeehu wolu magani dino.’

Sasente Ibiraawootu ooso gede, ati lowo qarri iilliherono Yihowara ammanamatto?