DAAWITI reyara albaanni, Yihowa minesi minnanni gara kulinosire Salamoonira kulisi. Salamooni nugusa ikkihunni shoolki diro, Maganu mine mina hanafi; konne mine lamalu dirinninna daratunni mine gudino. Maganu mine tonnu kuminni kiiramanno manni minino; konni loosira lowo woxi fulino. Korkaatuno konne mine minate lowo worqenna birra fushshinoonni.

Xaadooshshu dunkaaninte gede kuni Maganu minino lame kifile afiˈrino. Ikkollana tini kifilla xaadooshshu dunkaani kifillanni lame ero ikkitanno. Salamooni gondooru taawoota giddiidi kifilera wori; xaadooshshu dunkaanira nooha wole uduunne kayinni layinki kifilera wori.

Maganu mini miname goofita maassiˈni. Misilete aana laˈˈattonte gede, Salamooni Maganu minira albaanni guluphphe huuccatto assi. Isino togo yee Yihowa huucciˈri: ‘Iimi nafa gudisire ate haarate ajannoha ikkiro, kuni shiimu mini isinni ate haarate lowo geeshsha ajanno. Ikkeennano Maganoˈya, mannikki alba konni miniwa hige huucciˈrannohe wote eeggatena macciishshi.’

Salamooni huuccatto asse kaita, iiminni giira dirritu. Dirriteno kakkalloonnita saadate kakkalo ittu. Qoleno Yihowawiinni waraˈa yiino xawaabbi daye Maganu mine woˈmi. Tini ikkito, Yihowa macciishshanni nootanna minnoonni minenna Salamooni huuccatto baxinota leellishshanno. Maganu mini xaadooshshu dunkaaninni roore mannu Yihowa magansiˈrate daanno base ikki.

Salamooni seeda diro danchu garinni gashshi; mannuno hagiidhi. Ikkollana Salamooni Yihowa magaˈnannokkiha batinynye meento wole gobbanni adhi. Hakko meenti giddonni mitte kakkalo magansidhanna kuneeti laitto? Yannate gedensaanni, adhino meenti Salamoonino wole maganna magaˈnanno gede assisi. Salamooni wole maganna magaˈnita mayi kalaqiminoro afootto? Manna danchu garinni gashsha aguri. Kaajjado mancho ikki; mannu hagiirrino bai.

Konni daafira Yihowa Salamoonira hanqe, ‘Gashshoote atewiinni haare, woleho eemmo. Tenne asseemmohu ati lubbote heedheenna ikkikkinni beettikki gashshooti yannaraati. Ikkirono beettikki gashshootira noo manna gudise haare dihooleemmo’ yiisi. Kuni ikkinohu hiittoonniitiro hanni laˈno.