KURI mannooti buuto qarrantino. Noowiinni xooqa hasiissannonsa; xooqa hoogguro mannu shaansaraati. Insa Isiraeelete qotaanooti; insa kaaˈlitanni noo mancho Reaabiiti. Reaabi konni Iyyaarkote katami gimbe ledo xaadino minira heedhanno. Kuri mannooti qarrantinohu mayiraatiro hanni laˈno.

Isiraeelete manni Yordaanosi Laga tayise sae Kanaˈˈaani gobba eate qixxaawe no. Ikkollana mannu haˈrara albaanni, Iyyaasu lame qotaano soyi. ‘Hadhine gobbanna Iyyaarkote katama qotte’ yiinsa.

Qotaanono Iyyaarkote katama martuti, Reaabi minira eˈu. Ikkollana mannu Iyyaarkote nugusira, ‘Lamu Isiraeelete manni gobba qottara techcho hashsha daggino’ yee kuli. Nugusuno tenne macciishshe, Reaabiwa manna soyi; insano dagge, ‘Minekki noo manna fushshi!’ yituse. Reaabi kayinni qotaano minise hiˈri giddo maaxxe kaˈino. Iseno, ‘Mannu wote miniˈyara dayino; ikkeennano hiikkiinni dayinohoro diafoomma. Hashshara siphphi yaanna, katamu saanqa cunfikki fulte hadhino. Jawaattiniro iillitinanni!’ yitu. Mannootuno hordoffanni hadhu.

Mannootu hadhu gedensaanni, Reaabi minise giddo qotaano maaxxinowa rakke martu. Iseno qotaano, ‘Yihowa tenne gobba aannoˈneta afoomma’ yitunsa. Qolteno togo yitunsa: ‘Yihowa kiˈne Gibitsetenni fushshi wote Duumo Baara hiitto asse mooshshinoro macciishshinoommo; hattono Sewooninna Aagi yinanni nugussa shitinoonni garano macciishshinoommo. Ani kiˈnera dancha assummaˈnente gede, kiˈneno anera dancha assate eeggatena qaale eˈe. Annaˈyanna amaˈya, seennenna labballo roduuwaˈya gatisseˈˈe.’

Qotaanono ise yitinore assate qaale eˈu; ikkollana Reaabi mittore assa hasiissannose. Qotaano togo yituse: ‘Tenne duume siiwo haadhe, maskootekkira usuri; qoleno baalanka fiixakki minikkira gamba assi. Iyyaarkote katama adhate baalinke dangeemmo wote, maskootekkira wodhootta siiwo laˈne minekki nooha mittono dishineemmo.’ Qotaano Iyyaasuwa higguti ikkinore baala kultusi.