KURI misilete aana noori lamunku beetti mimmito dilabbanno; dihattooti? Suˈmansa afootto? Ugaaxaanchu Eesawuuti; gereewo allaalanni noohu kayinni Yaaqoobiiti.

Eesawunna Yaaqoobi, Yisaaqinna Ribiqa iltino lakkuwa oosooti. Eesawu ugaaxe ayiddisira sagale abbannohura, annisi Yisaaqi lowo geeshsha baxannosi. Ribiqa kayinni Yaaqoobi roorsite baxxanno; korkaatuno Yaaqoobi joogahonna wodanaamo beettooti.

Yaaqoobiuu ahaahi Abirahaami xaa geeshsha lubbote no; Yaaqoobi ahaahisi Yihoware kulannasi macciishsha mageeshsha hagiirsiissannosiro heda dandiineemmo. Lakkuwaho 15 diro ikkinsata, Abirahaami 175 dirisinni reyi.

Eesawu 40 diro ikkisita, Kanaˈˈaani gobbanni lame seenne adhi. Togo assasinni Yisaaqinna Ribiqa lowo geeshsha dadilli; korkaatuno kuni seenni Yihowa magaˈnannoha diˈˈikkino.

Mitto barra, Eesawu rodiisi Yaaqoobira lowo geeshsha hanqanno gede assannori kalaqami. Yisaaqi bayiriidi beettosi maassiˈranno yanna iillitu. Eesawu bayira ikkino daafira maasso adhate agadhe no. Ikkollana Eesawu maasso adhate qoosso Yaaqoobira balaxe hire kaino. Qoleno Maganu, lamunku ilantu yannara maasso adhannohu Yaaqoobi ikkinota coyiˈrino. Yannate gedensaanni Maganu yiinte gede ikki. Yisaaqi beettosi Yaaqoobi maassiˈri.

Yannate gedensaanni Eesawu tenne afiti, Yaaqoobira hanqi. Lowo geeshsha hanqino daafira Yaaqoobi shaara hasiˈrinota coyiˈri. Ribiqa tenne macciishshite lowo geeshsha yaaddu. Konni daafira ayiddaannase Yisaaqi, ‘Yaaqoobino Kanaˈˈaani seenne adhannoha ikkiro lowo geeshsha shetto ikkanno’ yitu.

Yisaaqi tenne macciishshe Yaaqoobi woshshe, ‘Kanaˈˈaani gobbanni seenne adhitooti. Hatteentenni Kaaraani gobbara heeˈrannohuwa ahaahikki Baatueeli qae haˈri. Beettisi Laaba seenni giddo mitte adhi’ yiisi.

Yaaqoobi annisi yiinota macciishshe, hakkawotenni Kaaraani heeˈranno fiixisiwa seeda doogo haˈri.