Maganu hunda Abirahaami sircho umonsa dandiitino daga asse, dirijjite ikkitanno gede assino; hattono higguwa uyinonsa. Isi tenne dagara “Isiraeele” yee suꞌma fushshino; qoleno halaalu magansiꞌranna qaalesi insara hadara wodhino. (Faarso 147:19, 20) Konni garinni Isiraeele wole gosa baalantera atoote abbitanno.​—Kalaqo 22:18 nabbawi.

 Maganu Isiraeele doodhinohu farciꞌraasinesi ikkitanno gedeeti. Isiraeelenniti hundi xagge, mitte gosa Maganu higgera hajajanturo afidhanno atoote dancha gede assite leellishshanno. (Marro 4:6) Konni garinni wole gosa Isiraeelete widoonni halaalaanchu Magani ayetiro afa dandiitanno.​—Isayyaasi 43:10, 12 nabbawi.

 Isiraeele galte hossanni Maganu ledo noonsa fiixooma huꞌnitu; konnira Yihowa insa facci asse agure Kiristaanu songo doodhino. (Maatewoosi 21:43; 23:37, 38) Xa Isiraeelete bayicho addu Kiristaani Yihoware farciꞌrannoha ikkino.​—Soqqamaanote Looso 15:14, 17 nabbawi.

 Yesuusi harunsaanosi sabbakkanno gedenna duuchante gaꞌre manna rosaano assitanno gede dirijjite assinonsa. (Maatewoosi 10:7, 11; 24:14; 28:19, 20) Alamete goofimarchi shiqe daye noote tenne yannara, sabbakate loosi lowonta iibbe loosamanni no. Yihowa mite yee lowo miliyoone ikkanno manna duuchante gaꞌrenni halaalu magansiꞌrawa gamba assinohu ninke yannaraati. (Ajuuja 7:9, 10) Addu Kiristaani dirijjite ikke mimmito jawaachishanno, hattono kaaꞌlanno. Qoleno alamete deerrinni mittu daniha Qullaawu Maxaafi roso rosanno.​—Ibiraawuyaani 10:24, 25 nabbawi.

 Boode Qullaawu Maxaafi rosaano gaamo 1870 kawa, maafame keeshshinoha Qullaawu Maxaafi halaale galagalte xawo fushsha hanaffu. Yesuusi Kiristaanu Songo dirijjite assinohu sabbakkara ikkinota buuxxino daafira, insano alamete deerrinni Maganu Mangistere duduwa hanaffu. Hakkiinni 1931nni hanaffe Yihowa Farciꞌraasine yaamante woshshantanno.​—Soqqamaanote Looso 1:8; 2:1, 4; 5:42 nabbawi.

 Umi xibbi diro, lowo gobbara heedhannota Kiristaanu songuwa albisa ikke massagannohu aliidi bisi lowore kaaꞌlinonsa; kuni aliidi bisi Yesuusi Kiristaanu songora Umo ikkinota huwatannoho. (Soqqamaanote Looso 16:4, 5) Hatteente gede xaa yannarano alamete deerrinni noori Yihowa Farciꞌraasine, giddosiinni lowo woꞌnaalsha afidhino cimeeyye amadinohu Aliidi Bisi aanno biddishshinni horo afidhanno. Kuni Aliidi Bisi Yihowa Farciꞌraasinete sinu biirora biddishsha aanno; babbaxxitinoti sinu biiro qolte Qullaawu Maxaafi aana xintantino borro 600 saꞌꞌanno afiinni tirtanno, attantanno, hattono songuwate iillishshanno. Konni garinni Aliidi Bisi alamete deerrinni noota 100,000 saꞌanno songuwa Qullaawa Borronni jawaachishanno, hattono insara biddishsha aanno. Mitte mittente songo giddo ikkado ikkino labballi cimeeyye woy aliidi laꞌꞌaano ikke soqqamanno. Kuri labballi Maganu hoshsha baxillunni allaaltanno.​—1 Pheexiroosi 5:2, 3 nabbawi.

 Yihowa Farciꞌraasine dancha duduwo sabbakatenna manna rosaano assate dirijjite ikkitino. Hundi soqqamaasine gede, ninkeno minunni mine haꞌne sabbankeemmo. (Soqqamaanote Looso 20:20) Qoleno giddonsanni halaale baxanno manna Qullaawa Maxaafa xiinxallinseemmo. Yihowa Farciꞌraasine dirijjite calla diꞌꞌikkitino. Ninke baxillaanchu Anni noonke maateeti. Ninke mimmitoho hendeemmo roduuwaati. (2 Teselonqe 1:3) Yihowa manni dirijjite ikkinohu iso hagiirsiisatenna manna kaaꞌlate ikkino daafira, uullate aana duuchunkunni roore hagiirraame maate ikkino.​—Faarso 33:12; Soqqamaanote Looso 20:35 nabbawi.