Qullaawu Maxaafiha qara qara roso konni garinni rosakki Yihowa lowonta baxatto gede assitinohe yine ammanneemmo. Kuni baxilli lophanni haꞌranno gede assiꞌra hasiissannohe. (1 Pheexiroosi 2:2) Hegere heeshsho afiꞌrattohu, Maganu Qaale xiinxallite Isiwa roore shiqqanni haꞌrittorooti.​—Yohaannisi 17:3; Yihuda 21 nabbawi.

 Magano roore affanni haꞌritto kiiro, ammanakki jawaattanni hadhanno. Ammana qolte Magano hagiirsiisate kaaꞌlitannohe. (Ibiraawuyaani 11:1, 6) Hattono, maaro eatto gedenna heeshshokki biddi assiꞌratto gede assitannohe.​—Soqqamaanote Looso 3:19 nabbawi.

 Kageeshsha rosoottore mannaho kula hasiꞌrakki digattanno; ninke baalanka dancha duduwo mannaho kula hagiirsiissannonke. Qullaawa Maxaafa xiinxallitanni haꞌritto kiiro, Yihowanna dancha duduwo ammanattota Qullaawu Maxaafinni mannaho kulatto gara rosatto.​—Roomu Sokka 10:13-15 nabbawi.

 Rooru manni dancha duduwo kula hanafannohu jaallansaranna fiixinsaraati. Kayinni kaitto gede coyiꞌrattokki gede qorophi. Insa ammaꞌno soꞌro ikkitinota kula agurte, Maganu mannu oosora uyino hexxo kulinsa. Qoleno, duucha woyite coyiꞌrattorinni roore manna baxisannohu dancha akatakki ikkinota habbooti.​—2 Ximootewosi 2:24, 25 nabbawi.

 Maganu Qaale xiinxallakki ayyaanaamittetenni lophate kaaꞌlitannohe. Galte hossanni Yihowara muli jaala ikkatto. Qolteno, maatesi widira kiirante isiha ikkatto.​—2 Qorontoosi 6:18 nabbawi.

 Maganu Qaale ganyite xiinxallattoha ikkiro, ayyaanaamittetenni gikki yitanni haꞌratto. (Ibiraawuyaani 5:13, 14) Yihowa Farciꞌraasine giddo mittu, Qullaawu Maxaafinni Maa Ronseemmo? yaanno maxaafinni Qullaawa Maxaafa xiinxallisannohe gede xaꞌmiꞌri. Roore egenno afidhanni haꞌritto kiiro, heeshshokki roore qinaabbinota ikkitanno.​—Faarso 1:1-3; 73:27, 28 nabbawi.

 Dancha duduwo kulannohu hagiirraamo Magano Yihowaati. Mannisiwa aantanni haꞌritto kiiro, isiwano roore shiqqanni haꞌratto. (Ibiraawuyaani 10:24, 25) Yihowa hagiirsiisate sharrama agurattokkiha ikkiro, halaalaancho heeshshowa yaano hegere heeshshowa higge hadhanni nootto yaate. Heeshshokki giddo assatto coyi baalunkunni roortinoti, Maganu jaala ikkate.​—1 Ximootewosi 1:11; 6:19 nabbawi.