Maganu, mannu uullate aana hagiirru noo heeshsho heeꞌrara hasiꞌranno. Isi uullanna aanase noore baalankare kalaqinohu mannu ooso baxannohuraati. Muli yanna giddo isi uulla woꞌmate noo manni dancha heeshsho heeꞌranno gede assanno. Isi mannu ooso qarrunni fooliishshiishanno.​—Ermiyaasi 29:11 nabbawi.

 Xaa geeshsha mannu gashshooti finqille, xibba, woy reyo hoola didandiino. Ikkollana, hagiirsiisannohu danchu duduwi no. Muli yanna giddo Maganu mannu ooso mangiste hune hakko bayicho umisi Mangiste uurrisanno. Tenne Mangistera hajajame galanno manni salaametenni heeꞌranno, hattono ordu keere afiꞌranno.​—Isayyaasi 25:8; 33:24; Daanieeli 2:44 nabbawi.

 Qarru baꞌꞌannohu Maganu bunshe assanno manna uullate aaninni hooliro callaati. (Sofooniyaasi 2:3) Kuni ikkannohu mamarooti? Maganu Qaali xaa yannara mannu ooso qarrisanni noori daannota balaxe masaalino. Yannankera uullate aana noo bunshe, Maganu tenne biddi assanno yanna gambissinota leellishshanno.​—2 Ximootewosi 3:1-5 nabbawi.

 Qaalisinni yaano Qullaawu Maxaafinni Maganunnire rosa hasiissannonke. Kuni Maxaafi baxannonke anni soyinonke sokka gedeeti. Qullaawu Maxaafi xa dancha heeshsho heeꞌneemmo gara, hattono albillitte uullate aana hegere heeshsho afiꞌneemmo gara kulannonke. Mitootu ati Qullaawa Maxaafa xiinxallattota gibbara dandiitanno. Ikkollana Maganu abbeemmo yee qaale einoti albillittete heeshsho halchishshannota ikkitino daafira togoo manni xiinxallokki aguratto gede assahera sammi yitooti.​—Lawishsha 29:25; Ajuuja 14:6, 7 nabbawi.