Jaaloomu xintamannohu baxillu aanaati. Yihoware roore rositto deerrinni, isira noohe baxilli lexxanni haꞌranno. Maganoho noohe baxilli lexxiro, isira soqqamate noohe halchono lexxitanno. Kunino Yesuusi Kiristoosi rosaancho ikkate kakkayisannohe. (Maatewoosi 28:19) Hagiirraamma ikkitinori Yihowa Farciꞌraasine ledo mittooꞌmite, hegerera Maganu jaala ikka dandaatto. Konnira maricho assa hasiissannohe?

Maganu seerira hajajante isira noohe baxille leellishi. “Magano baxa hajajosi agadhate, hajajosino diqarrissannote.”— 1 Yohaannisi 5:3.

Rosoottore loosu aana hosiisi. Yesuusi konne lainohunni mitto lawishsha coyiꞌrino. Busulu manchi minesi kinchu aana miꞌnino. Gowwu manchi kayinni minesi shaafu aana miꞌnino. Barada xeena ganeenna, lolahu lolahita kinchu aana minamino mini milli yiikki gati, shaafu aana minaminohu kayinni coꞌo yee diigami. Yesuusi rososi macciishshite loosu aana hosiissannore minesi kinchu aana miꞌninoha busule mancho labbanno yee coyiꞌrino. Rososi macciishshite  loosu aana hosiissannokkire kayinni, minesi shaafu aana miꞌninoha gowwa mancho labbanno yiino. Hiikkonne mancho lawa hasiꞌratto?—Maatewoosi 7:24-27.

Meessaneeto Maganu fajjo assate shiqisha. Togo yaa hegerera fajjosi assa hasiꞌrattota huuccattotenni Yihowara kulate yaate. Maganu fajjo assakki Yesuusi Kiristoosi rosaancho ikkakki leellishshanno.—Maatewoosi 11:29.

Cuuama. “Gotti yite isi suꞌma woshshite cuuami, cubbo loosano aguri.”—Soqqamaanote Looso 22:16.

Maganu soqqanshora jawaata. “Assitinannire duucha mannaho ikkikkinni Yihowara yitine jawaantetenninna hagiirrunni asse.”—Qolasiyaasi 3:23, Haaro Alame Tiro.