ROSO 16
Yesuusi Uullate Aana Noo Yannara Assinore
Batinyu manni Yesuusa xaano qaaqqu gede woy reyanni noo manchi gede asse hedanno; wolootu kayinni isi hayyicha masaalaanchootilla yitanno. Ikkollana, Yesuusi uullate aana heeꞌrino heeshshore xiinxallineemmo woyite, isi daafira hakkii sainore ronseemmo. Konni rosira, Yesuusi uullate aana noo waro assinoha lowo geeshsha hasiisanno coyenna tenne afakki atera kaaꞌlitannohe gara ronseemmo.
1. Yesuusi loosinohu qaru loosi hiikkoyeti?
Yesuusi loosinohu qaru loosi ‘Maganu gashshootiha Dancha Duduwo kulate.’ (Luqaasi 4:43 nabbawi.) Isi, Maganu mannu ooso qarra baalanka tirtanno mangiste woy gashshoote xintannota kulannoha dancha duduwo duduwino. a Yesuusi tenne jawaachishshanno sokka mannaho kulate, sase dironna darate diinaggaawe loosino.—Maatewoosi 9:35.
2. Yesuusi maalale loosinohu mayiraati?
Qullaawu Maxaafi, Maganu Yesuusi widoonni qole batinye jawa coye, maalalenna dhagge assinota kulanno. (Soqqamaasinete Looso 2:22) Yesuusi Maganu uyinosi wolqanni bubbe hajajino, lowo kume ikkanno manna itisino, dhiwantinore hursino, wole agurina reyitinore nafa kayisino. (Maatewoosi 8:23-27; 14:15-21; Maarqoosi 6:56; Luqaasi 7:11-17) Yesuusi loosino maalale, isi Maganu soyinoha ikkinota mannu huwatanno gede assitino. Qoleno Yihowara qarranke baala hoolate wolqa noosita leellishshanno.
3. Yesuusi heeꞌrino heeshshonni ninke maa ronseemmo?
Yesuusi Yihowara woꞌmanka woyite hajajamino. (Yohaannisi 8:29 nabbawi.) Yesuusi batinyu manni giwisirono, reyi barri geeshsha Annisi assi yiinosire baalankare ammaname assino. Isi heeꞌrino heeshsho, mannu qarru giddo heeꞌre nafa Maganoho soqqama dandaannota leellishshino. Konni garinni, Yesuusi isi faale haꞌneemmo gede, lawishsha ikkinonke.—1 Pheexiroosi 2:21.
LEDDE XIINXALLI
Yesuusi mannaho dancha duduwo kulino garanna maalale loosino gara xiinxalli.
4. Yesuusi dancha duduwo duduwino
Yesuusi dandaamisi deerrinni lowo mannira dancha duduwo kulate, buko batidhinota seeda doogo haꞌrino. Luqaasi 8:1 nabbabbe; hakkiinni aante noo xaꞌmuwa hasaabbe:
-
Yesuusi sabbakinohu macciishshara gamba yiino mannira callaati?
-
Yesuusi dancha duduwo kulanno manna afiꞌrate maa assino?
Maganu, Buuramino Moote dancha duduwo duduwannota masaalotenni balaxe kulino. Isayaasi 61:1, 2 nabbabbe; hakkiinni aante noo xaꞌmuwa hasaabbe:
-
Yesuusi tini masaalo woꞌmitanno gede assinohu hiittoonniiti?
-
Xaa yannara mannu konne dancha duduwo macciishsha hasiissannonsaha lawannohe?
5. Yesuusi heeshshote kaaꞌlanno roso rosiisino
Yesuusi Maganu Mangisteha dancha duduwo duduwa calla ikkikkinni, heeshshote kaaꞌlanno rosono rosiisino. Hanni isi ilaalu aana heeꞌre rosiisino rosi giddo mito laꞌno. Maatewoosi 6:14, 34 nna 7:12 nabbabbe; hakkiinni aante noo xaꞌmuwa hasaabbe:
-
Yesuusi tenne qummeeshshuwa aana hiittee kaaꞌlitanno amaale amaalino?
-
Tini amaale xaa yannarano kaaꞌlitannonkeha lawannohe?
6. Yesuusi maalale loosino
Yesuusi, Yihowa wolqa oyeennasi batinye maalale loosino. Mitto lawishsha laꞌꞌate, Maarqoosi 5:25-34 nabbabbe; woy VIIDIYO laꞌe. Hakkiinni aante noo xaꞌmo hasaabbe.
-
Viidiyote giddo laꞌnummo mancho mayite ammantino?
-
Tenne maalale giddo dhagge ikkinoheri maati?
Yohaannisi 5:36 nabbabbe; hakkiinni aante noo xaꞌmo hasaabbe:
-
Yesuusi loosino maalale isi daafira maa ‘farcidhanno’ woy leellishshanno?
Ati tenne afootto?
Yesuusi heeꞌrino heeshsho daafira roore anga borreessinoonnihu Wongeellaho yinannihu Qullaawu Maxaafihu shoolu maxaafi giddooti; insano Maatewoosi, Maarqoosi, Luqaasinna Yohaannisi Wongeellaati. Mittu mittunku Wongeellu borreessaanchi Yesuusi daafira mito baxxino coye borreessino. Shoolenka Wongeella nabbambeemmo woyite, Yesuusi heeshsho daafira lowore ronseemmo.
-
MAATEWOOSI
Wongeella balaxe borreessinohu isooti. Maatewoosi Wongeelli, Yesuusi rosiisinoha batinye roso, roorenkanni Maganu Mangiste daafira rosiisinore kulanno.
-
MAARQOOSI
Wongeelluwate giddo haranchu isi borreessino Wongeellaati. Kuni Wongeelli addi addita dhagge ikkitanno ikkito kulanno.
-
LUQAASI
roorenkanni huuccattote daafiranna Yesuusi meentoho shaqqille leellishino gara borreessino.
-
YOHAANNISI
Isi Yesuusi muli jaallasinna wolu manni ledo hasaawino hasaawi daafira lowore borreessino; tini Yesuusi ayimma daafira lowore anfeemmo gede kaaꞌlitannonke.
MITU MANNI TOGO YAANNO: “Yesuusi dayinohu ninke daafira reyaraati.”
-
Yesuusi ninke daafira reyara calla dayinoha lawannohe?
XAPHISHSHA
Yesuusi Maganu Mangistere duduwino, batinye maalale loosino, hattono Yihowara woꞌmanka woyite hajajamino
Kageeshsha Rosoottore
-
Yesuusi uullate aana noo yannara loosinohu qaru loosi maati?
-
Yesuusi loosino maalale maa leellishshanno?
-
Yesuusi heeshshote kaaꞌlannoha hiikkoye roso rosiisino?
EGENNO LEXXI
Yesuusi roore anga mayi daafira rosiisino?
“Maganu Mangistera Yesuusi Togo Diinaggaawinohu Mayiraati?” (Agarooshshu Shae, Birra 1, 2014)
Yesuusi loosino maalale addinta ikkinoreeti yineemmohu mayiraatiro rosi.
“Yesuusi Loosino Maalalenni Maa Ronseemmo?” (Agarooshshu Shae, Maaja 15, 2004)
Mittu manchi Yesuusi manna baxannoha ikkinota roseenna heeshshosi soorrante woyyaabbinohu hiittoonniitiro nabbawi.
“Alba Umiꞌya Daafira Calla Hedeemmoho” (Agarooshshu Shaera fulino birxicho)
Yesuusi soqqanshosi yannara assinoha qara qara coye aantensa garinni nabbawi.
a Roso 31-33 Maganu Mangistere lende ronseemmo.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
