ROSO 35
Gara Ikkinore Doodhate Kaaꞌlannonkeri Maati?
Ninke baalunku mitte doodha hasiissannonke woyiti no. Doodhineemmo coyi kaaꞌlankera woy gawajjankera, hattono Yihowa ledo noonke jaalooma seekkara woy hunara dandaanno. Lawishshaho, mama heeꞌneemmoro, heeshshote hasiisannonkere ma garinni afiꞌneemmoro woy adhammeemmoronna teꞌee doodha hasiissannonkeha ikkara dandaanno. Gara ikkinore doodhinummoro, hagiirru noo heeshsho heeꞌneemmo; hattono Yihowa hagiirsiinseemmo.
1. Qullaawa Maxaafa horoonsidhe gara ikkinore doodha dandaattohu hiittoonniiti?
Mitto coye doodhattora albaanni, kaaꞌlannohe gede Yihowa huucciꞌri; qoleno isi hattee hajo daafira ma garinni hedannoro huwatate Qullaawu Maxaafi yaannore xiinxalli. (Lawishsha 2:3-6 nabbawi.) Yihowa mite hajo daafira uyino hajajo goꞌlitinota diꞌꞌikkitino. Hatto ikkiro, wole baalanka rooranno doorshi hattee hajajo ayirrisate.
Kayinni konne assi konne assitooti yitannoti Qullaawu Maxaafi hajajo nookkiha ikkirona? Hattoo woyiteno Yihowa ‘haꞌratto doogo kulannohe.’ (Isayaasi 48:17) Hiittoonni? Maa assittoro woyyannoro afatto gede kaaꞌlannohehu xintu seeri heeꞌrara dandaanno. Qullaawu Maxaafihu xintu seeri Maganu hedo huwatate kaaꞌlannonkeho xinta ikkino halaaleeti. Duucha woyite Qullaawu Maxaafi giddo nooti mitte xagge, Maganu mitte hajo daafira ma garinni hedannoro afate kaaꞌlitannonke. Yihowa hedanno gara wodanchinummoro, iso hagiirsiisannore doodha dandiineemmo.
2. Mitto coye doodhattora albaanni maa heda hasiissannohe?
Qullaawu Maxaafi, “Egennaamu . . . layiꞌranni qaafanno” yaanno. (Lawishsha 14:15) Hatto yaa, mitto coye doodhinammora albaanni, maa assa dandiineemmoro woy noonke doorsha wodanaaꞌmine heda hasiissannonke yaate. Mitto mittonka doorsha hedatto woyite, ateneeto togo yite xaꞌmi: ‘Tenne hajo ledo xaadooshshe afiꞌrinohu Qullaawu Maxaafihu xintu seeri hiikkoyeti? Assa hasiissannoeri maati? Doodheemmori wole manna kaaꞌlara woy gawajjara dandaannohu hiittoonniiti? Roorenkanni, doodheemmo coyi Yihowa hagiirsiisanno?’—Marro 32:29.
Kuni danchaho kuni bushaho yaate qoosso noosihu Yihowaati. Hajajosinna xintu seerasi seekkine anfummoronna seerisi garinni heeꞌrate murciꞌneemmoha ikkiro, tiianke qajeelsiꞌnanni heeꞌnoommo. Tiiu danchanna busha bade afate kaaꞌlitannonkete giddonke noo dandooti. (Roomu Sokka 2:14, 15) Tiiꞌꞌinke qajeelsiꞌnummoro gara ikkinore doodhate kaaꞌlannonke.
LEDDE XIINXALLI
Qullaawu Maxaafihu xintu seerinna tiiꞌꞌinke gara ikkinore doodhate kaaꞌlannonke gara ledde rosi.
3. Qullaawu Maxaafi massagannohe gede assiꞌri
Mitto coye doodhineemmo woyite Qullaawu Maxaafihu xintu seeri kaaꞌlannonkehu hiittoonniiti? VIIDIYO laꞌe; hakkiinni aante noo xaꞌmuwa hasaabbe.
-
Yihowa uyinonketi muxxe elto maati?
-
Yihowa doodhate dandoo uyinonkehu mayiraati?
-
Isi doodhate dandoonke danchu garinni horoonsiꞌneemmo gede kaaꞌlannonkere maa uyinonke?
Qullaawu Maxaafihu xintu seeri giddo mitto laꞌꞌate, Efesooni Sokka 5:15, 16 nabbabbe. Hakkiinni, konni woroonni noore assate yannanke danchu garinni horoonsiꞌra dandiineemmo gara hasaabbe:
-
ganyine Qullaawa Maxaafa nabbawate
-
dancha minaanna, dancha minaama, dancha anna woy dancha ama, woy dancha oosicho ikkate
-
songote gambooshshe haꞌrate
4. Gara ikkinore doodhate tiiakki qajeelsiꞌri
Xabbe leeltannoti Qullaawu Maxaafi hajajo nooha ikkiro, gara ikkinore doodha qarrisa hooggankera dandiitanno. Kayinni hattoo hajajo nookkiha ikkirona? VIIDIYO laꞌe; hakkiinni aante noo xaꞌmo hasaabbe.
-
Viidiyote giddo, rodoonke tiiase qajeelsiꞌratenna Yihowa hagiirsiisannore doodhate maa maa assitino?
Ninke doodha hasiissannonke coye wolu manni doorankera xaꞌma hasiissannonkekkihu mayiraati? Ibiraawoota 5:14 nabbabbe; hakkiinni aante noo xaꞌmuwa hasaabbe:
-
Wolu manni maa assa hasiissannonkero kulankera xaꞌma shota ikkiturono, ninke uminke maa bande afa hasiissannonke?
-
Tiiakki qajeelsiꞌratenna gara ikkinore doodhate kaaꞌlannohehu hiikku uduunni no?
Doogo leellishanno kaarti gede, tiiꞌꞌinke heeshshonke giddo massagannonke
5. Wolu manni tiia ayirrisi
Mannu addi addire doodhanno. Wolu manni tiia ayirrinseemmota leellisha dandiineemmohu hiittoonniiti? Hanni lame ikkito laꞌno:
Ikkito 1: Addi addire buudhite seesa baxxannoti mitte rodoo wole songo higgino; hattee songora noohu batinyu meya roduuwi kayinni togoore dibaxanno.
Roomu Sokka 15:1 nna 1 Qorontoosi 10:23, 24 nabbabbe; hakkiinni aante noo xaꞌmuwa hasaabbe:
-
Tini qummeeshshuwa kultanno garinni, tini rodoo maa doodhitara dandiitanno? Ate tiiꞌꞌi assattora fajjannohere tiiꞌꞌisi fajjannosikki manchi ledo heeꞌrittoro, maa assatto?
Ikkito 2: Mittu rodii Qullaawu Maxaafi ago quwa saꞌnikki aga hoolannokkita afinoha ikkirono, isi kayinni aga hoogate murciꞌrino. Kuni rodii sagalete koyinsoonnisiwa roduuwu ago agganna lai.
Rosiisaancho 7:16 nna Roomu Sokka 14:1, 10 nabbabbe; hakkiinni tenne xaꞌmuwa hasaabbe:
-
Kuri qummeeshshuwa kultanno garinni, hakku rodii maa doodhara dandaanno? Ate tiiꞌꞌi assattora fajjannohekkire wolu manchi assanna laittoro, maa assatto?
Gara ikkinore doodhate kaaꞌlannoheri maati?
1. Maa assittoro woyyannoro afatto gede kaaꞌlahera Yihowa huucciꞌri.—Yaiqoobi 1:5.
2. Kaaꞌlahera dandaannoha xintu seera afiꞌrate, Qullaawa Maxaafanna Qullaawu Maxaafi aana xintantino borro xiinxalli. Gikki yiinoha woy woꞌnaalshu noonsa Kiristaanano amaaꞌla dandaatto.
3. Doodhatto coyi atehanna wolu manni tiia kaaꞌlara woy gawajjara dandaanno gara balaxxe hedi.
MITU MANNI TOGO YAANNO: “Baxummore assate qoosso nooe. Ani asseemmorira wole manna mayi eessanno?”
-
Mitto coye doodhineemmo woyite, Maganohono wolu mannirano mayi macciishshamannonsaro heda hasiissannonkehu mayiraati?
XAPHISHSHA
Yihowara mayi macciishshamannosironna assineemmori wole manna kaaꞌlara woy gawajjara dandaannohu hiittoonniitiro hedanke, gara ikkinore doodhate kaaꞌlitannonke.
Kageeshsha Rosoottore
-
Yihowa hagiirsiisannore doodha dandaattohu hiittoonniiti?
-
Tiiakki qajeelsiꞌra dandaattohu hiittoonniiti?
-
Wolu manni tiia ayirrisattota leellisha dandaattohu hiittoonniiti?
EGENNO LEXXI
Maganu ledo noohe jaalooma roore kaajjishannore doodha dandaattohu hiittoonniiti?
“Maganu Ayirranno Gede Assannore Doodhe” (Agarooshshu Shae, Dotteessa 15, 2011)
Yihowa amaalannonkehu hiittoonniitiro ledde rosi.
Mittu beetti danchare doodhanno gede kaaꞌlinosiri maatiro rosi.
Yihowa konne asse konne assitinoonte yee bade kulinokki coyi tuncu yaannohe woyite iso hagiirsiisannore doodha dandaatto gara ledde rosi.
“Woꞌmunku Coyira Hajajo Uyinahera Agadhatto?” (Agarooshshu Shae, Sadaasa 1, 2003)
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
