Bitima
“Ammanatenninna cincatenni Maganu uyino hexxo ragiꞌranno manni faale [hadhe].”—IBIRAAWOOTA 6:12, NW.
1, 2. Mittu woradu aliidi laꞌꞌaanchi Qullaawu Maxaafi giddo kulloonniha ammanamino manna ma garinni laꞌꞌanno? Insa dancha jaalla ikkitankera dandiitanno yineemmohu mayiraati?
MITTE rodoo, mittu jawu woradu aliidi laꞌꞌaanchi lallawo shiqishanna macciishshituhu gedensaanni togo yitino: “Qullaawu Maxaafi giddo kulloonni mannire coyiꞌranno woyite, lowo diro egennino jaallasi gede asse coyiꞌranno.” Hatto yaase garankolla; mayira yiniro, kuni rodii Maganu Qaale lowo diro xiinxallanninna rosiisanni keeshshino daafira, Qullaawu Maxaafi giddo kulloonniri ammanantino labballinna meenti isira lowo diro ledo heeꞌrino jaallasi gedeeti.
2 Qullaawu Maxaafi giddo kulloonnihu batinyu manni dancha jaalla ikkannonkeha dilawannohe? Ati konne manna seekkite egennootto? Togoo manni ledo lawishshaho Nohi, Abirahaami, Ruuti, Eeliyaasinna Asteeri ledo roore egennamate insa ledo hasaabbanni hosoottoro hiitto hagiidhattoro hanni hedi. Kuri Maganu soqqamaasine amaaltannohe amaalenna jawaachishshannohe gari mageeshshi geeshsha kaaꞌlannohero heda dandaatto!—Lawishsha 13:20 nabbawi.
3. (a) Qullaawu Maxaafi giddo kulloonnihu ammanamino manni xagge rosanke kaaꞌlitannonkehu hiittoonniiti? (b) Aanchine hiikkuri xaꞌmuwa laꞌneemmo?
3 “Maganu . . . keeraano reyotenni kayisanno” woyite, insa ledo xaande jaalooꞌmineemmo faro afiꞌneemmo. (Soq. 24:15) Ikkollana, xa nafa Qullaawu Maxaafi giddo kulloonni labballinna meentire rosanke lowore kaaꞌlitannonke. Hiittoonni? Soqqamaasinchu Phaawuloosi tennera assa hasiissannonkere kulanni togo yiino: “Ammanatenninna cincatenni Maganu uyino hexxo ragiꞌranno manni faale [hadhe].” (Ibi. 6:12, NW) Ammanaminohu Maganu manni xagge xiinxallinammora albaanni, hanni Phaawuloosi coyiꞌrinori ledo xaadooshshe afidhinota mite xaꞌmuwa laꞌno: Ammana maati? Ammana hasiissannonkehu mayiraati? Hundi waro heeꞌrinohu ammanamino manni faale haꞌra dandiineemmohu hiittoonniiti?
Ammana Maati? Hasiissannonkehu Mayiraati?
4. Batinyu mannira ammanate yaa maa labbannonsa? Insa sodhino yineemmohu mayiraati?
4 Ammana, konni maxaafira xaggensa xiinxallineemmo manni lowo geeshsha naadannoho kaajja akataati. Yannankera batinyu manni addu ammana maatiro diafino; insara ammanate yaa taje nookkiha mulla haafa yine ammana labbannonsa. Hatto yee hedansa kayi soꞌrote. Addu ammana mitto coye taje nookkiha haafa yine ammana diꞌꞌikkitino; qoleno mulla iibbabbine ammanano diꞌꞌikkitino. Taje nookkiha haafa yine ammana gawajjitanno. Mulla iibbabbine ammanano geeddannota diꞌꞌikkitino; isinni Maganu noota ammana calla nafa diguddanno; mayira yiniro, “hattenne durriisuno ammananno; waajjeno huxiꞌranno.”—Yai. 2:19.
5, 6. (a) Ammana laꞌꞌa dandiineemmokkiha hiikkonne lame coye amaddino? (b) Ammananke mageeshshi geeshsha kaajjado ikka hasiissannose? Lawishshunni kuli.
5 Addu ammana hakkii saꞌinote. Hanni Qullaawu Maxaafi ammanate yaa mayyaate yaannoro wodanchi. (Ibiraawoota 11:1 nabbawi.) Phaawuloosi, ammana laꞌꞌa dandiineemmokkiha lame coye amaddinota coyiꞌrino. Mittu, ‘illete leellannokkiho’ xa noo coyeeti. Ayyaanu alamera noore lawishshaho, Magano Yihowa, Beettosi woy xa gordoho gashshite noota Maganu Mangiste maalu illenkenni laꞌꞌa didandiineemmo. Layinkihu, xaara woꞌminokkiho “hexxotenni agadhinoonni” coyeeti. Maganu Mangiste muli yannara abbitannota haaro alame xa laꞌꞌa didandiineemmo. Hatto yaa kayinni, xa nooha illete leellannokki coyenna hexxotenni agadhine heeꞌnoommo coye ammananke taje dinoote yaate?
6 Deeꞌni, hatto yaa diꞌꞌikkitino! Phaawuloosi addu ammana kaajjado safo afidhinota xawisino. Isi ammanate yaa “hawaqiꞌrate” yee borreessino qaale, “jajju meessiha ikkinota leellishannoha tajete woraqata” yineno tira dandiinanni. Hanni mittu manchi mine aahera kaino yine hendo. Isi minunniha tajete woraqata atera aanni, “Hiiꞌꞌi minekki” yaahera dandaanno. Hatto yaasi hige hakkuyi woraqati aana galatto yaasi diꞌꞌikkitino; kayi higge affinohu hakku tajete woraqati minu xaate ateha ikkinota buuxisannoha ikkino daafira, woraqatu umisi mineho yaa dandiinanni. Hatteente gede, ammananke kaajjadonna ammansiissanno taje noota ikkitino daafira, addu ammana heedhunkero ammannoommo coye laꞌnoommohu gede assine kiirreemmo.
7. Addu ammana maati?
7 Hakko daafira, addu ammana kaajjado taje afiꞌne hawaqiꞌratenna Magano Yihowa seekkine anfe horo huluullama hoogate. Ammana Yihowa baxillaanchu Anninke gede assine laꞌneemmo gedenna uyino hexxo baalanti woꞌmase gattannokkita addaxxineemmo gede assitannonke. Kayi addu ammana hakkiino saꞌanno. Heeshshote kalaqami gede, ammana baꞌannokki gede towaaxxa hasiissannonke. Ammananke loosunni leellisha hasiissannonke; hakkuyi kaꞌa reyitanno.—Yai. 2:26.
8. Ammana lowo geeshsha hasiissannota ikkitinohu mayiraati?
8 Ammana togo hasiissannota ikkitinohu mayiraati? Phaawuloosi ammana lowo geeshsha hasiissannohu mayiraatiro xawisino. (Ibiraawoota 11:6 nabbawi.) Ammana hooggunkero, Yihowawa shiqano iso hagiirsiisano didandiineemmo. Ninke mannu ooso kalaqammoommohu iimi Anninkewa Yihowawa shinqeemmo gedeetinna isi ayirranno gede assinammoraati; kuni ikkannohu kayinni ammana heedhunkero callaati.
9. Yihowa ammana lowo geeshsha hasiissannonketa afinota leellishinohu hiittoonniiti?
9 Yihowa ammana mageeshshi geeshsha hasiissannonkero afino; hakko daafira, ammana lossiꞌneemmonna leellinsheemmo gara rosate kaaꞌlannonke lawishsha uyinonke. Isi Kiristaanu songo giddo albisa ikkite soqqantannore ammanantino labballo oye maassiꞌrinonke. Qaalisi, “Ammaꞌnatenni insa labbe” yaanno. (Ibi. 13:7) Yihowa wolereno qixxeessinonke. Phaawuloosi ‘batiꞌru gomichi gede ikkitino naqaashshe’ daafira, yaano ammanatenni kaajja lawishsha ikkannohu hundi waro heeꞌrino labballinna meentire borreessino. (Ibi. 12:1) Phaawuloosi Ibiraawoota fooliishsho 11 aana, ammanamino manna baalanka kulino yaa diꞌꞌikkino. Qullaawu Maxaafi giddo, tenne ammana nookki yannara dancha lawishsha ikkannonkehu batinyu manniti addu xagge no; kuri labballinna meenti dirinsanna heeshshonsa gari babbaxxinoha ikkirono ammanatenni heedhinoreeti.
Ammanatenni Wolootu Faale Haꞌra Dandiineemmohu Hiittoonniiti?
10. Hojju xiinxallo, Qullaawu Maxaafi giddo kulloonnihu ammanamino labballinna meenti faale haꞌneemmo gede kaaꞌlitannonkehu hiittoonniiti?
10 Mitto mancho seekkite egenna hoogittoro, faalesi haꞌra didandaatto. Konne maxaafa nabbawatto woyite, kore ammanamino labballonna meento seekkite egennatto gede kaaꞌlate yine lowore xiinxalline qixxeessinoonnita huwatatto. Atino mayira hakko garinni ledde dixiinxallatto? Hojju xiinxallokki yannara, xiinxallote kaaꞌlanno uduunne horoonsidhe Qullaawa Maxaafa unte xiinxalli. Xiinxallattore hiincatto woyite, Qullaawu Maxaafi xaggera kulloonni bayichonna ikkito hedate woꞌnaali. Hedokkinni hakko noottohu gede ikkite qooxeessaho noore laꞌꞌate, huuro macciishshatenna foole suꞌniissate woꞌnaali. Roorenkanni, xaggete giddo kulloonni mannira mayi macciishshaminonsaro huwatate woꞌnaali. Insa ikkitino gara huwatate woꞌnaalattoha ikkiro, albinni roore egennattonsa; qoleno insa lowo diro egennootto jaalla gede ikkitannohe.
11, 12. (a) Abiraaminna Saarayi jaallakki gede assite laꞌꞌattora dandaattohu hiittoonniiti? (b) Haanna, Eeliyaasi woy Saamueeli xagge kaaꞌlitahera dandiitannohu hiittoonniiti?
11 Konne ammanamino labballonna meento seekkite egennittoro, faalensa haꞌra hasiꞌrakki digattanno. Coyi gedera, hanni mitte soqqanshote qoosso uyinahera kaꞌnoonni yine hendo. Yihowa dirijjite soqqansho halashshiꞌratto gede koyissinohe. Miteekkine sabbakkannori roore hasiissannowa hadhe soqqamatto gede, woy alba sabbakke egennoottokki garinni woy atera injaannohekki garinni sabbakatto gede koyinsoonniheha ikkara dandaanno. Tenne hajo daafira huuccatto assidhe heeshshi gotti assite hedatto woyite, Abiraami xagge hiinca kaaꞌlitahe ikka? Abiraaminna Saarayi Uuri katami qawaaxxo agurte fultino daafira, Yihowa lowo geeshsha maassiꞌrinonsa. Atino insa faale haꞌrattoha ikkiro, insa albinni roore egennoottoti leeltannohe.
12 Woy mittu ammaꞌnatto manchi ate woffi assannore coyiꞌrino woy assino daafira, lowo geeshsha koffi yite, ‘Xaate songote gambooshshino gatoe’ yite noottohalla ikki? Haanna xagge hiincattohanna ise Finaana qussituserono Yihowara ammanante soqqantino gara hedattoha ikkiro, ise lawishshi gara ikkinore assatto gede kaaꞌlannohe; qoleno Haanna albinni roore jaalakki gede assite laꞌꞌattora dandaatto. Hakkiinni saeno, hexxo mudhite ditidhoommoho yite hedattoha ikkiro, Eeliyaasi qarramino garanna Yihowa sheshifachishinosi gara xiinxallakki Eeliyaasi albinni roore jaalikki gede assite laꞌꞌatto gede kaaꞌlitahera dandiitanno. Rosu mine maaeela coye assitanno gede darawonsa xixxiibbannonsa wedellootino, Saamueeli xaadooshshu dunkaanira Eeli ooso bunshe huntusikkinni ammaname heeꞌrino gara xiinxallansa Saamueeli jaalinsa gede assite laꞌanno gede kaaꞌlitansara dandiitanno.
13. Ammanatenni Qullaawu Maxaafi giddo kulloonni manni faale haꞌrakki gari ammana noohekkita leellishshannoni? Xawisi.
13 Ammanatenni Qullaawu Maxaafi giddo kulloonni manni faale haꞌrakki gari ammana noohekkita leellishshannoni? Deeꞌni, dileellishshanno! Yihowa Qaali, ammanamino manni faale haꞌneemmo gede jawaachishannonketa qaagi. (1 Qor. 4:16; 11:1; 2 Tes. 3:7, 9) Hakkiinni saeno, konni maxaafira xaggensa xiinxallineemmohu mitu manni, insara albaanni heeꞌrino manni faale haꞌrinoho. Lawishshaho, konni maxaafira Fooliishsho 17 laꞌneemmonte gede, Maariyaami coyidhinohu mitu qaali alba Haanna coyidhinoho; hakko daafira, ise Haanna lawishsha harunsitino yaate. Hatto yaa Maariyaami ammana garita diꞌꞌikkitino yaate? Hatto yaa diꞌꞌikkitino! Haanna lawishshi, Maariyaami ammanase kaajjishidhanno gedenna Maganu Yihowa albaanni dancha suꞌma afidhanno gede kaaꞌlinose.
14, 15. Konni maxaafira nooti mite mite coyibba hiikkuriiti? Konne maxaafa danchu garinni horoonsiꞌra dandiineemmohu hiittoonniiti?
14 Konne maxaafa qixxeessinoonnihu, ammanakki kaajjishiꞌratto gede kaaꞌlateeti. Maxaafu giddo nooti mite hedo, Agarooshshu Shaera fulinohu “Ammanatenni Insa Faale Hadhe” yaanno birxichinni haaꞌnoonnite. Hasaawate injaanno gedenna rosu heeshshonkera kaaꞌlannonke gara huwanteemmo gede kaaꞌlate xaꞌmuwa qixxeessinoonni. Rosu xawe leellanno gede kaaꞌlitannota batinye laꞌꞌate baxissanno misilla seekkinoonni; alba nooterano geeshshanna biinfille lendoonni. Konni maxaafi giddo wole kaaꞌlitanno coyibba lawishshaho diru aante leellishshanno mashalaqqenna kaartuwa qixxeessinoonni. Ammanatenni Insa Faale Hadhe yaannoha konne maxaafa qixxeessinoonnihu hojju xiinxallora, maatete magansiꞌra yannaranna songote xiinxallinammora hendeeti. Maate konni maxaafira noo xagge huuronsa naggi assite nabbawansa umise lowore kaaꞌlitansara dandiitanno.
15 Kuni maxaafi, hundi waro heedhinori ammanantinori Yihowa soqqamaasine faale haꞌratto gede kaaꞌlannohe yine hexxineemmo. Qoleno, ammanakki lophitanni hadhanno gedenna albinni roore iimi Annikkiwa Yihowawa shiqatto gede kaaꞌlahera halchineemmo!
