1, 2. Roore yanna xaꞌmo xaꞌma mayi horo afidhino?

 QAAQQUULLU xaꞌmo xaꞌmanno gara wodanchite egennootto? Batinynyu qaaqquulli afoo dadhanni heeꞌrenni xaꞌmo xaꞌma hanafanno. Afate lowo geeshsha quqquxamanno daafira albakki laꞌꞌanni togo yee xaꞌmannohe: Gordu qasiꞌrinohu hiikkooti? Beeddahe soodiro hiikka higganno? Cea buuwa dandiitinohu hiitto ikkiteeti? Togoo xaꞌmora dawaro qolate dandiitto geeshsha woꞌnaalattora dandaatto; ikkeennano mito mito wote hatto assa kabbaaddahera dandiitanno. Woyyitanno yite mitte dawaro qolittoro nafa, qaaqquullu Mayira? yite wole xaꞌmo xaꞌmitahera dandiitanno.

² Xaꞌmo xaꞌmitannori qaaqquulle calla diꞌꞌikkitino. Lophphinummo gedensaannino xaꞌmo xaꞌma diagurreemmo. Xaꞌmo xaꞌmineemmohu haꞌneemmo raga afate, fafa hasiissannonkeha gawajjanno coye bade afate, woyi afate noonke halcho fulateeti. Ikkollana batinynyu manni lowo geeshsha hasiissanno xaꞌmo xaꞌma agurinoha lawanno; xaꞌmiro nafa dawaro afiꞌrate diwoꞌnaalanno.

3. Batinynyu manni lowo geeshsha hasiissanno xaꞌmora dawaro afiꞌrate sharro assa agurinohu mayiraati?

 ³ Hanni konni maxaafira iimiidi qoolira noo xaꞌmo, bitimaho xaꞌminoonnita addi addi xaꞌmo woyi  tenne fooliishshora woroonni noo xaꞌmo assaawi. Xaꞌmattora dandaattote lowo geeshsha hasiissanno xaꞌmo giddo gama kuriiti. Ikkollana batinynyu manni togoo xaꞌmora dawaro afiꞌrate sharro assa agurino. Mayira? Qullaawu Maxaafi togoo xaꞌmora dawaro qolanno? Mitu mannira Qullaawu Maxaafi tenne xaꞌmora qolanno dawaro huwatate qarrissannoha lawannonsa. Wolootu kayinni xaꞌmo xaꞌma saalsiissannonke yite waajjitanno. Gamu kayinni togoo xaꞌmo ammaꞌnote murrootiranna rosiisaanora agura woyyitanno yitanno. Kuni coyi atera ma lawannohe?

4, 5. Heeshshonke giddo lowo geeshsha hasiissanno xaꞌmo giddo mite mite hiitteeti? Dawaro afiꞌrate sharro assa hasiissannonkehuna mayiraati?

⁴ Heeshshokki giddo lowo geeshsha hasiissanno xaꞌmora dawaro afiꞌrate hasiꞌrittokki digatootto. Mito mito wote, ‘Isi heeshshote alaami maati? Heeshshote yaa xaatella? Maganu isi hiittooho?’ yite xaꞌmittokki digatootto. Togoo xaꞌmo xaꞌma garaho; qolteno hasiissannote. Konni daafira ikkado dawaro afiꞌratto geeshsha sharro assa agurtooti. Bayiru rosiisaanchi Yesuusi Kiristoosi togo yiino: ‘Huuccidhe, uyinanniꞌnena; hasidhe, afidhinannina; ciratte, waalcho fannanniꞌnena.’—Maatewoosi 7:7.

⁵ Hasiissanno xaꞌmora dawaro ‘hasiꞌra’ agurattokkiha ikkiro, hatto assakki gedensaanni kiissahera dandiitanno. (Lawishsha 2:1-5) Mannu baxire yiiherono, tenne xaꞌmora dawaro no; qoleno tenne dawaro Qullaawu Maxaafi giddonni afiꞌra dandaatto. Dawarono huwatate qarrissannota diꞌꞌikkitino. Isinni hexxonna hagiirre afiꞌratto gede assitannohe. Xa nafa hagiirraame heeshsho heeꞌratto gede kaaꞌlitannohe. Hanni batinynye manna gurcheessitannota mitte xaꞌmo laꞌno.

6. Batinynyu manni, mannu oosora iillanno qarri Maganoho mittore dilawannosi yee hedannohu mayiraati?

⁶ Batinynyu manni tenne xaꞌmora dawaro ee yitannote yee hedanno. Konnira korkaata shiqishanni, ‘Maganu mannaho  assaawannoha ikkoommero alamenke xa noowiinni lowo geeshsha diwoyyaabbanno?’ yaanno. Qooxeessinkera noo alame laꞌnummoro, olu, gibbonna shetto woꞌmitinote. Qoleno mitti mittinke xiwammeemmo, qarrammeemmo hattono banxeemmo manna shiiꞌneemmo. Konni daafira batinynyu manni, ‘Maganu ninkera assaawannoha ikkoommero kuni duuchchu qarri iillannonketa dihoolanno?’ yaanno.

7. (a) Ammaꞌnote rosiisaano batinynyu manni Maganu kaajjadoho yee hedanno gede assitinohu hiittoonniiti? (b) Iillannonke fatana lainohunni Qullaawu Maxaafi mayyaanno?

⁷ Ikkollana konninni roore bushino coyi no; hakkuno ammaꞌnote marootinna sawaakooti, mannu Maganu kaajjadoho yee hedanno gede assansaati. Konne assitannohu hiittoonniiti? Mitte dano iillitanno wote, kuni Maganu abbinoreeti yitanno. Kuri rosiisaano wole yaattonni, iillitanno bunshe baalate xaꞌmamannohu Maganoho yaansaati. Maganu addinta hatto assannoni? Qullaawu Maxaafi tennera mayyaanno? Yaaqoobi 1:13 togo yite qoltanno: ‘Ayino fattanamanno woyite, “Maganu fattaninoe” yoonke. Korkaatuno, Maganu bushu coyinni difattanamanno; isi horontanni ayeeno difattananno.’ Konni daafira, alamenkera noo bunshe abbinohu horonta Magano diꞌꞌikkino. (Iyyoobi 34:10-12) Maganu bunshe heedhanno gede faqqadinoti dikaandannite. Ikkollana mittu coyi ikkanno gede faqqadatenna hakkonne coye assate mereero lowo badooshshi no.

8, 9. (a) Bunshe heedhara faqqadatenna bunshe abbate mereero noo badooshshe lawishshunni kuli. (b) Maganu mannu ooso bunshete doogo hadhara agurinohura iso bushiisha gara ikkitinokkihu mayiraati?

⁸ Lawishshu gede, mine baxxinokkihu qeedhichchu beetti noosiha mitto hayyichchanna baxillaancho mancho hedi. Kuni beetti finqile mininni fuleemmo yiiro, annu dihoolannosi. Kuni beetti bunshete doogo harunsino daafira qarru iillannosi. Ikkina konni beettira iillino qarra abbinohu annahoyyani? Deeꞌni. (Luqaasi 15:11-13) Hattonni mannu ooso bunshete doogo haꞌra doodhituta Maganu dihoolinonsa. Ikkollana doodhitino doogo haꞌransanni iillinonsa qarra abbinohu iso diꞌꞌikkino. Konni daafira mannu oosora iillanno qarrira Magano bushiisha digaraho.

 ⁹ Maganu mannu ooso bunshete doogo hadhara faqqadinohu ikkadu korkaati noosihuraati. Egennaamonna wolqaataamo Kalaqaanchonke ikkino daafira qarru heeꞌrara faqqadino korkaata ninkera kulate giddeessannosiri dino. Ikkollana baxannonke daafira qarru heeꞌrara faqqadino korkaata kulinonke. Tenne hajo lainohunni 11⁠^ki fooliishshora halaꞌladunni ronseemmo. Ikkollana iillannonke qarrira xaꞌmamannohu Magano ikkinokkita huluullantooti. Isinni qarrunni fulleemmo hexxo uyinonkehu isooti!—Isayyaasi 33:2.

10. Maganu bunshe abbitino gawajjo baala dhaawanno yine addaxxineemmohu mayiraati?

¹⁰ Hakkiinni saeno, Maganu qullaawaho. (Isayyaasi 6:3) Hatto yaa, isi xalalahonna xuru noosikkiho yaate. Isira hili bunshe nafa dinosi. Konni daafira, woꞌmunni woꞌma addaxxinammosira dandiineemmo. Mannu ooso kayinni soorrantara dandiitanno daafira, insa woꞌmunni woꞌma addaxxinammora didandiineemmo. Silxaane noosihu mittu ammanamino manchi nafa, bushu manni abbanno gawajjo dhaawa didandaanno. Maganoho kayinni hoogamannosiri dino. Isira, bunshe mannu oosora abbitino gawajjo baala dhaawate wolqa noosi; dhaawannono. Maganu tenne assanno yannara, bunshe hegerera baꞌanno!—Faarso 37:9-11.

11. (a) Alamete aana noo miicora Maganoho mayi macciishshamannosi? (b) Atera iillanno qarrira Maganoho mayi macciishshamannosi?

¹¹ Hakka geeshsha kayinni, alamete aana noo miicorano ikko atera iillitanno gawajjora Maganoho mayi macciishshamannosi? Umihunni, Qullaawu Maxaafi Maganu ‘taashsho baxannota’ rosiisanno. (Faarso 37:28) Konni daafira gara ikkino coyenna gariweelo coye lainohunni Maganoho lowo geeshsha macciishshamannosi. Isi baalanta miico giwanno. Biꞌre yannara bunshe alame woꞌmiteenna Maganoho ‘godowisi xissiisiꞌrinota’ Qullaawu Maxaafi coyiꞌranno. (Kalaqo 6:5, 6) Xaano ikkiro Maganu disoorramino. (Milkiyaasi 3:6) Alamete aana noo mitiimma laꞌꞌa iso xaano dihagiirsiissannosi. Qoleno isi mannu  qarramanna laꞌꞌa dibaxanno. Qullaawu Maxaafi, ‘Isi kiꞌnera assaawanno’ yaanno.—1 Pheexiroosi 5:7.

12, 13. (a) Baxillenna wole dancha akata afiꞌnoommohu hiikkiiniiti? Baxillu alamete aana noo qarrira mayi macciishshamannonke gede assanno? (b) Maganu alamete aana noo qarra hoolannota huluullammeemmokkihu mayiraati?

¹² Maganu mannu qarramanna laꞌꞌa baxannokkita huluullammeemmokkihu mayiraati? Konnira taje ikkannoha wole coye laꞌno. Qullaawu Maxaafi mannu Maganu daninni kalaqaminota rosiisanno. (Kalaqo 1:26) Konni daafira ninkera danchu akati heeꞌrankera dandiinohu, Maganoho danchu akati noosi daafiraati. Lawishshaho, danchu manni qarramanna laittoro mararsannohe? Togoori ate mararsannoheha ikkiro, Magano hakkiinni roore mararsannosita huluullantooti.

¹³ Mannu oosora noohu danchu coyi giddo mittu baxilleho. Ninkera noonke baxilli Maganu akata leellishanno. Qullaawu Maxaafi, ‘Maganu baxilleho’ yaanno. (1 Yohaannisi 4:8) Ninkera baxillu noonkehu Maganu baxillaancho ikkino daafiraati. Mannaho noohe baxilli alamete aana noo qarranna miico hoolatto gede kakkayisannohe? Wolqa heedhoommehero, hoolatto? Addaho hoolatto! Maganuno qarranna miico baalanta hoolannota huluullantooti. Konni maxaafira bitimaho qummi assinoonni hexxo baalanti haaqete halcho woyi beebbate hexxo diꞌꞌikkitino. Maganu eino qaali mitte huluullo nookkiha woꞌmanno! Ikkollana tenne baalanta hexxo addaxxate, tenne hexxo uyino Maganire roorsite afa hasiissannohe.

14. Maganu suꞌmi ayeeti? Iso suꞌmisinni woshsha hasiissannonkehu mayiraati?

¹⁴ Mittu manchi ledo egennama hasiꞌrittoro ma assatto? Suꞌmakki kulattositi egennantinote. Maganoho suꞌmu noosi? Duuchcha ammaꞌno suꞌmisi “Maganoho” woyi “Mootichchaho” yitanno; ikkollana kuri gillete suꞌmuwa diꞌꞌikkitino. “Nugusa” woyi “pirezidaantichcha” yaanno suꞌmi maaragete suꞌma ikkinonte gede, kurino maaragete suꞌmuwaati. Qullaawu Maxaafi Maganoho batinynyu maaragete suꞌmi noosita kulanno. Hakkuri giddo gamu “Magano” nna “Mootichcha” yinannireeti. Ikkollana Qullaawu Maxaafi Maganoho gillete suꞌmi  noositano kulanno. Suꞌmisi Yihowaati. Faarso 83:18 togo yitanno: “Suꞌmakki Yihowa yinannihu ati callu uulla woꞌmate Ayirradoho.” Qullaawu Maxaafikki giddo kuni suꞌmi nookkiha ikkiro, hooginohu mayiraatiro konni maxaafira qoola 195-197 noo Guwuursha laꞌꞌa dandaatto. Umo borreessinoonnitera Qullaawu Maxaafi tirora kayinni Maganu suꞌmi kumunni kiirranni basera no. Konni daafira Yihowa suꞌmasi afatto gedenna suꞌmisinni woshshattosi gede hasiꞌranno. Isi isonooto atera egensiisate Qullaawa Maxaafa horonsiꞌranno yaa dandiinanni.

15. Yihowa yinanni suꞌmi maa leellishanno?

¹⁵ Maganu isiniitira fushshiꞌrino suꞌmi lowo tiro afiꞌrinoho. Yihowa yinanni suꞌmi, Maganu eino qaale woꞌmanka wonshannotanna hedinore baala assannota leellishanno. a Maganu suꞌmi baxxinoho. Kuni suꞌmi Maganoho calla gabbaꞌꞌannoho. Yihowa  duuchcha doogonni baxxino Maganooti. Baxxinoha ikkinohu hiittoonniiti?

16, 17. (a) “Duuchchanka Dandaannohu” (b) “Hegerete Nugusa” (c) “Kalaqaanchu” yaannohu maaragete suꞌmi Yihoware maa rosiisannonke?

¹⁶ Faarso 83:18 aana, “Ati callu Ayirradoho” yaannoha nabbamboommo. Qoleno, ‘Duuchchanka Dandaanno’ yinoonnihu Yihowa callaati. Ajuu[j]a 15:3 togo yitanno: ‘Duuchchanka Dandaatto Magano Yihowa, loosikki bayirahonna maalaꞌlinanniho. Hegerete Nugusa, doogokki keeraanchotenna halaaleho.’ “Duuchchanka Dandaannohu” yaannohu maaragete suꞌmi, Yihowara gawalo nookki wolqa noosita leellishanno. Isi wolqa taalle nookkite; bayirate yaate. “Hegerete Nugusa” yaannohu maaragete suꞌmi, Yihowa baxxinoha ikkinoti wole doogo noota kulanno. Yihowa calla ayeewoteno heeꞌrannoho. Faarso 90:2, “Hegeretenni hegerete geeshsha ati Maganoho” yitanno. Yihowa togoo Magano ikkasi, iso lowo geeshsha ayirrinseemmo gedenna waajjineemmo gede diassitannonke?

¹⁷ Yihowa baxxinoha ikkinoti wole doogo, isi calla Kalaqaancho ikkasiiti. Ajuu[j]a 4:11 togo yitanno: ‘Yihowa Maganonke ballo duuchchanka kalaqoottona, kalaqamarano fajjoottohu ateetina ayirrinynyu, guweenynyunna wolqa atera ikkitohe.’ Illete leeltannokkiri iima noori ayyaanu kalaqo hashsha gordo woꞌmite leeltanno beeddahe, haqqete laalonna wuqiyanoosete hattono laggate giddo noo qulxuꞌme baala kalaqantinohu Yihowa kalaqinonsa daafiraati!

18. Mitu manni Maganunniwa shiqa didandiinanni yee hedannohu mayiraati? Qullaawu Maxaafi kayinni mayyee rosiisanno?

¹⁸ Mitu manni Yihowa ayirrinseemmo gedenna waajjineemmo gede assannonke akatire nabbawanno wote lowo geeshsha waajjanno. Kuni manni Maganu lowo geeshsha bayira ikkino daafira isiwa shiqa didandiinanni; woyi isi ninke garire asse dilaꞌꞌanno yee waajjanno. Ikkina hatto yee heda garaho? Qullaawu Maxaafi kayinni konninni baxxinore rosiisanno. Yihoware coyiꞌranni, ‘Ikkollana isi mitti mittinkewiinni dixeertiꞌrinoho’ yaanno. (Soqqamaanote Looso 17:27) Isinni Qullaawu  Maxaafi, ‘Maganunniwa shiqqe; isino kiꞌnewa shiqannona’ yee amaalannonke.—Yaaqoobi 4:8.

19. (a) Maganunniwa shiqate umo maa assa hasiissannonke? Hatto assankenni maa afiꞌneemmo? (b) Maganu amalla giddo ate roore baxissannoheri hiikkuriiti?

¹⁹ Maganunniwa shiqa dandaattohu hiittoonniiti? Umo, xa assitanni noottore yaano Maganunnire rosakki agurtooti. Yesuusi togo yiino: ‘Hegere heeshsho, ati callu halaalaancho Magano ikkoottoha atenna soottoha Yesuusi Kiristoosi afate.’ (Yohaannisi 17:3) Addaho Qullaawu Maxaafi, Yihowarenna Yesuusire afa “hegere heeshsho” uyitannota rosiisanno! Albaanni ronsummonte gede, ‘Maganu baxilleho.’ (1 Yohaannisi 4:16) Yihowara danchanna baxissanno amalla woleno noosi. Lawishshaho Qullaawu Maxaafi Yihowa “mararannoha, shaqqado, rahe hanqannokkiha hattono baxillisinna ammanamasi batidhino Magano” ikkinota coyiꞌranno. (Wolaphpho 34:6) Isi “danchahonna soꞌro gatona yaate qixxaawino” Maganooti. (Faarso 86:5) Maganu cincaho. (2 Pheexiroosi 3:9) Qoleno ammanaminoho. (1 Qorontoosi 1:9) Qullaawa Maxaafa nabbabbanni haꞌritto kiiro, Yihowa kurinna wole baxisanno akatasi hiittoonni leellishinoro buuxatto.

20-22. (a) Magano laꞌꞌa hooganke isiwa shinqeemmota hooltannonkeni? Xawisi. (b) Mitu atera assaawanno manni ma assatto gede xixxiiwahera dandaanno? Ati kayinni ma assa hasiissannohe?

²⁰ Maganu illete leellannokkiha ayyaana ikkino daafira iso laꞌꞌa dandaattokkiti addaho. (Yohaannisi 1:18; 4:24; 1 Ximootewosi 1:17) Ikkollana Qullaawa Maxaafa horonsidhe isire rosattoha ikkiro, isi mittu illete laootto manchi gede ikke xawe leellannohe. Faarsaanchu yiinonte gede, “Yihowa xumme laꞌꞌa” dandaatto. (Faarso 27:4; Roomu Sokka 1:20) Yihoware roore rossanni haꞌritto kiiro, isino atera roore xawe leellanni haꞌrannohe; qoleno iso baxatto gede assannohehu lowo korkaati heeꞌrannohe hattono isiwa higge shiqoottohu gede ikke macciishshamannohe.

²¹ Hakkiinnino Qullaawu Maxaafi, Yihowa Anninke gede assine laꞌneemmo gede rosiisannonkehu mayiraatiro sunu sununni affanni haꞌratto. (Maatewoosi 6:9) Yihowa heeshsho uyinonkeha calla ikkikkinni mittu shaqqadu anni oososira halchannonte  gede dancha heeshsho heeꞌneemmo gede hasiꞌranno. (Faarso 36:9) Qoleno Qullaawu Maxaafi mannu Yihowa jaala ikka dandaannota rosiisanno. (Yaaqoobi 2:23) Hatto yaa mayyaatero hanni hedi. Kalqete alame Kalaqaanchira jaala ikka dandaatto yaate!

²² Qullaawa Maxaafa xiinxallitanni haꞌritto kiiro, mitu atera assaawanno manni xiinxallokki aguratto gede xixxiiwahera dandaanno. Kuni manni ammaꞌnokki agurte wolete higatto yee yaadara dandaanno. Ikkeennano, baxxino jaalooma kalaqiꞌrattota yaano Maganu ledo jaaloomattota hoolahera ayeerano anga uyitooti.

23, 24. (a) Rossanni nootto roso lainohunni xaꞌmo xaꞌma agura hasiissannohekkihu mayiraati? (b) Aantanno fooliishshora maa ronseemmo?

²³ Umi qara einohekki coyi heeꞌrara dandaanno. Wole manna kaaꞌlo xaꞌmira umo heeshshi assa hasidhanno; ikkeennano waajjite xaꞌma agurtooti. Yesuusi qaaqquullu gede umo heeshshi assa dancha ikkitinota coyiꞌrino. (Maatewoosi 18:2-4) Anfoommonte gede, qaaqquullu duuchcha xaꞌmo xaꞌmitanno. Maganu xaꞌmokkira dawaro afiꞌrattora hasiꞌranno. Maganunnire rosate quqquxamino manna Qullaawu Maxaafi giddo galantoonninsa. Hakko manni rosiinsoonninsa rosi halaalehoronna teꞌee buuxate Qullaawa Borronni taashshanni xiinxallino.—Soqqamaanote Looso 17:11.

²⁴ Yihoware rosate duuchchunkunni woyyitino doogo Qullaawa Maxaafa seekke xiinxallate. Qullaawu Maxaafi wole maxaaffa baalantenni baxxinoho. Baxxinoha ikkinohu mayinniiti? Aantanno fooliishsho tenne hajore xawissanno.