AYEE gaazeexano nabbawittoro, televizhiine laittoro, woyi raadoone macciishshittoro, jaddo, olunna shibbire gobba baala woˈmitinota huwatatto! Hanni atera gilletenni iillanni noohe qarrano hedi. Miteekkite xiwante shette noottoha, woyi baxatto manna shiidhe xissiisidhanni noottoha ikkara dandaanno. Atino danchu manchi Iyyoobi yiinte gede, ‘Buuto qarramoommo’ yaattora dandaatto.—Iyyoobi 10:15.

Hanni ateneeto togo yite xaˈmi:

• Maganu anerano ikko wolu mannira hedino hedo tenneeti?

• Iillannoe qarra dandee heeˈrate kaaˈlo afiˈreemmohu hiikkiinniiti?

• Uullate aana keeru heeˈranno yanna daggaikka?

Qullaawu Maxaafi alee noo xaˈmora hagiirsiissanno dawaro qolanno.

‘Hindiiddo duuchcha illensa aaninni feyanno; reyo, woyi dadillu, woyi wiˈla, woyi xibbu konni kaˈa diheeˈranno.’—Ajuu[j]a 21:4

“Naafichchu bullichchi gede kubbanno.”—Isayyaasi 35:6

“Ballichchu ille faˈnantanno.”—Isayyaasi 35:5

 “Waammate giddo noori . . . [fultanno].”—Yohaannisi 5:28, 29

“Hakko heeˈrannohu, ‘Xiwamoommo’ diyaanno.”—Isayyaasi 33:24

“Uullate aana gidu woˈmanno.”—Faarso 72:16

Sai qoolira kulloonni hexxo muddante haaqete halchooti yite adha gibbooti. Maganu tenne hexxo wonshate qaale eino; qoleno Qullaawu Maxaafi, isi tenne assannohu hiittoonniitiro kulanno.

Ikkeennano Qullaawu Maxaafi hakkiinni saˈino horo afiˈrino. Xaa yannara nafa hagiirsiissannotanna geˈino heeshsho heeˈra dandaatto gara kulannohe. Hanni ate gilletenni mitiinsannoherenna qarrisannohere hedi. Mitiinsannohehu miinju qarra, maatete qarra, fayyimmate qarra woyi baxatto manna shiira ikkara dandaanno. Qullaawu Maxaafi xaa yannara noo qarra dandiite heeˈratto gede kaaˈlannohe; qoleno woroonni noote gedee xaˈmora dawaro oye sheshifachchishannohe:

• Qarrunna mitiimma iillitannonkehu mayiraati?

• Heeshshonke giddo iillitannonke mitiimma dandee heeˈrate mayi kaaˈlannonke?

• Maatete heeshshonke hagiirru woˈminota assiˈra dandiineemmohu hiittoonniiti?

• Reyineemmo wote hiikkineemmo?

• Reyinohu banxeemmo manni ledo galagalle xaandammokka?

• Maganu konni kaˈa asseemmo yee qaale einore wonshanno yine ammanneemmo gede assannonkeri mayi no?

 Xa konne maxaafa nabbawakki, Qullaawu Maxaafi rosiisannore afa hasiˈrattota leellishshanno. Kuni maxaafi tennera lowo geeshsha kaaˈlannohe. Konni maxaafiti baalanti gufo qoolaho hundaanni uminsa xaˈmo afidhino. Miliyoonetenni kiirranni manni Qullaawa Maxaafa Yihowa Farciˈraasine ledo xaˈmotenninna dawarotenni xiinxallansanni hagiidhino. Atino hatto assite hagiidhatto yine ammanneemmo. Qullaawu Maxaafi addinta mayyee rosiisannoro xiinxallatto wote Maganu atooti ledokki ikko!