1, 2. Boohaarsha lainohunni mayi doorshi noonke?

 HANNI mitte coommitanno haqqichcho laalo itattora kaꞌe noottohu gede assite hedi. Ikkollana itattora laꞌꞌatto wote mitto widiido daꞌmuulchu qasinota afittoro ma assatto? Sasere assattora dandaatto: daꞌmuulchu qasinowano agurittokki hatte laalo gudisse itattora dandaatto; woyi hatte laalo gudisse hunattora dandaatto; woyi daꞌmuulchu qasinowa murte hoolte fayyo wido itattora dandaatto. Tenne sasente giddo ati hiittee doodhatto?

² Mito widoonni laꞌniro, boohaarshu yaano godoꞌlineemmo godoꞌle, nabbambeemmo borronna laꞌneemmori hatte laalo lawanno. Mite yannara boohaarattora hasiꞌratto wote, xaa yannara noo boohaarshi giddo rooru daꞌmuulchu qasino laalo gede amanynyootunni maaeelinoha ikkinota huwatatto. Hakkawote ma assatto? Mitu mannooti alame shiqishshanno boohaarshi dancha ikko busha, sammi yite adhitanno. Mitootu qolte gawajjannori iillannonsakki gede qorophphate yite horonta boohaara hooggara dandiitanno. Wolootu qolte gawajjanno boohaarsha lowo geeshsha qorophphite, saꞌe saꞌe wossanamino deerrinni dancha ikkino boohaarsha doodhitanno. Ati Maganu baxillinni fulittokki heeꞌra dandaatto gede kuri giddo hiikkonne doodha hasiissannohe?

3. Xa hiittee hajore ronseemmo?

 ³ Ninke giddo rooriidi anga sayikki doorsha doodhitanno. Saꞌne saꞌne boohaara dancha ikkitinota anfoommoha ikkirono, amanynyootunni xurinokki boohaarsha calla doodhineemmo. Konni daafira amanynyootunni xurinohunna xurinokkihu hiittoo boohaarshaatiro bande anfeemmo gara rosa hasiissannonke. Balanxe kayinni doodhineemmo boohaarshinna Yihowara shiqishiꞌneemmo magansiꞌra mayi xaado afidhinoro laꞌno.

4. Ninkeneeto Yihowara sayinse uyinoommore ikkanke, hiittoo boohaarsha doodhineemmo gede assitankera hasiisanno?

⁴ Shiimu diri albaanni, 1946⁠nni cuuaminohu mittu jawu rodii togo yiino: “Ayeewoteno cuuamate nigiggire shiqinshanniwa haꞌratenna ani cuuamammora kaoommohu gede hatte nigiggire seekke macciishshate murciꞌroommo.” Kuni rodii tenne assannohu mayiraatiro xawisanni togo yiino: “Aneneeto [Yihowara] sayise oommota duuchcha wote qaagaꞌya ammaname heeꞌrate lowo geeshsha kaaꞌlitinoe.” Atino konni rodii hedo ledo sumuu yaattoti dihuluullissannote. ‘Heeshshoꞌya woꞌmatenni soqqameemmohe’ yite Yihowara qaale eoottota duuchcha wote qaagakki kaajjite heeꞌratto gede assitannohe. (Mekibibi 5:4; Ibiraawuyaani 10:7) Isinni ateneeto sayisse aakkinni wossaꞌnootto wussaane seekkite hiincakki, Kiristaanu soqqanshora noohe lao calla ikkikkinni heeshshokki gara gudisse biddi assiꞌratto gede kaaꞌlitannohe; konni giddo mittu doodhatto boohaarshaati. Hawaariya Phaawuloosi yannasira noo Kiristaanira sokka borreessi wote tini yaatto gara ikkitinota xawisino. Togo yiino: “Ittinanni woyiteno ikkiro, woy[i] agginanni woyiteno ikkiro, woy[i]  ayee coye assitinanni woyiteno, duuchchankare Maganu ayirrinynyira asse.”—1 Qorontoosi 10:31.

5. Zelewaawuyaani 22:18-20 aana noo assaawe, Roomu Sokka 12:1 aana wole yaattonni qorophphe yinoonninketa huwanteemmo gede kaaꞌlitannonkehu hiittoonniiti?

⁵ Heeshshokki giddo assattori baalunku Yihowara shiqishiꞌratto magansiꞌra ledo xaado afiꞌrinoho. Phaawuloosi Roomu Kiristaanira borreessino sokkara tini yaatto halaale ikkitinota huwattanno gede kaajjishe coyiꞌrino. Togo yee amaalinonsa: “Mannimmaꞌne Magano hagiirsiissanno gede heeshshonnitanna qullaabbino kakkalo assitine [shiqishshinanni] gede Maganu shaqqillinni huucciꞌreemmoꞌne. Hattino Maganu qaali ledo xaaddanno [soqqanshoꞌneeti].” (Roomu Sokka 12:1) Mannimmate yinannihu surrekki, wodanakkinna wolqakkino mitteenniiti. Maganoho soqqamattohu kore baala horoonsidheeti. (Maarqoosi 12:30) Phaawuloosi woꞌma lubbonni soqqammannita togoo soqqansho kakkalote yiino. Phaawuloosi hatto yaasi wole yaattonni qorophphe yitanno sokka amaddino. Muse Higge garinni, xeꞌne afidhino kakkalo Maganu diadhanno. (Zelewaawuyaani 22:18-20) Hatteente gede, mittu Kiristaanchi Maganoho shiqishanno soqqansho mito ragaa xeꞌne noota ikkituro, Maganu diadhanno. Ikkina kuni hiitto ikke ikkanno?

6, 7. Mittu Kiristaanchi mannimma battaabbara dandiitannohu hiittoonniiti? Konni korkaatinni mayi iillasira dandaanno?

⁶ Phaawuloosi Roomu Kiristaana, “Mannimmaꞌne . . . cubboho shiqishshinoonte” yee kaajjishe amaalino. Qoleno Phaawuloosi, “Mannimmaꞌne looso [shiiyye]” yee kulinonsa. (Roomu Sokka 6:12-14; 8:13) Hakkuyira albaanni borreessino sokka aana ‘mannimmate loosi’ giddo gamu hiikkuriitiro kulino. Qullaawu Maxaafi cubbaataamu  mannire coyiꞌranni togo yaanno: “Afiinsa rumotenninna qaraarotenni woꞌminoho.” “Lekkansa manna shaate rakkinote.” “Magano horontanni diwaajjitanno.” a (Roomu Sokka 3:13-18) Mittu Kiristaanchi ‘mannimmasinni’ woyi bisisi kifilenni togoo cubbo loosiro mannimmasi batteessiꞌranno. Lawishshaho mittu Kiristaanchi afanni heeꞌrenni teeda baꞌino misilla woyi filme, woyi bararraaqissanno finqille lawinore shollado ikkino coye laꞌꞌannoha ikkiro, ‘[illesi] cubboho shiqishanni’ noo daafira, woꞌma mannimmasi batteessiꞌranni no. Konni Kiristaanchi magansiꞌra qullaawa ikkitinokki daafira Maganu diadhanno. (Marro 15:21; 1 Pheexiroosi 1:14-16; 2 Pheexiroosi 3:11) Kuni manchi gariweelo boohaarsha doodhasinni togo ikke kassaranno!

⁷ Konninni buuxa dandiineemmonte gede, mittu Kiristaanchi doodhanno boohaarshi lowo geeshsha daafasira dandaanno. Konni daafira Maganoho shiqishiꞌneemmo kakkalo roore woyyeessannoha ikkinnina xeꞌne noota assanno boohaarsha didoodhineemmo. Xa hanni garu boohaarshanna gara ikkinokkiha hiittoonni afa dandiineemmoro laꞌno.

8, 9. (a) Xaphphoomunni boohaarsha hiittee lame boosora beeha dandiinanni? (b) Woꞌmunni woꞌma xeertiꞌra hasiissannonkehu hiittoo boohaarshaati? Mayira?

⁸ Xaphphoomunni boohaarsha lamewa beeha dandiinanni. Umihu Kiristaanu woꞌmunni woꞌma xeertiꞌrannoho; wolu kayinni Kiristaanu bushaho yee giwara woyi danchaho yee adhara dandaannoho. Hanni balanxe Kiristaanu woꞌmunni woꞌma xeertiꞌrannohu hiittoo boohaarshaatiro laꞌno.

⁹ Fooliishsho mittete laꞌnummonte gede, mitu boohaarshi Qullaawu Maxaafi giddo hoolloonni coye reqecci asse leellishannoho. Lawishshaho, laꞌꞌate woyi macciishshate shagaggi assannoha woyi agaanintete coye, woyi teeda baꞌino misilla woyi giwisannohanna amanynyootunni maaeelinore leellishannore interneete lawinore, filme, televizhiinete pirogiraamenna muuziiqa heda dandaatto. Togoohu maaeelino boohaarshi Qullaawu Maxaafihu xintu seeri ledo sumuu yaannokki coye woyi Qullaawu Maxaafi higge gobbaanni ikkino coye dancha lawise shiqishanno daafira, addu Kiristaani togoo boohaarshiwiinni xooqa hasiissannonsa. (Soqqamaanote Looso 15:28, 29; 1 Qorontoosi 6:9, 10; Ajuuja 21:8) Togoohu gariweelu boohaarshiwiinni xeertiꞌratenni, ‘busha coye effidhe giwattohanna’ ayeewoteno ‘bushu coyiwiinni xooqattoha’ ikkoottota Yihowara leellisha dandaatto. Hatto assattoha ikkiro, “halaalaancho ammana” noohe yaate.—Roomu Sokka 12:9; Faarso 34:14; 1 Ximootewosi 1:5.

10. Boohaarsha lainohunni gawajjitanno hedo hiittenneeti? Mayira?

¹⁰ Mitu manni amanynyoote baino coye reqecci asse leellishannore laꞌꞌa ‘assitannori dino’ yee hedara dandaanno. Kuni manni, ‘Togoore filmete woyi televizhiinete aanalla laoommo ikkinnina hattoore ani diasseemmo’ yaara  dandaanno. Togo yee heda doggannotenna lowo geeshsha gawajjitannote. (Ermiyaasi 17:9) Yihowa effire giwannore laꞌꞌa hagiirsiissannonkeha ikkiro, addinta ‘busha coye gimbeemmoreeti’ yaa dandiineemmo? Amanynyoote bainore ganynyine laꞌneemmoha, macciishshineemmoha woyi nabbambeemmoha ikkiro, tiiꞌꞌinke jallaaganni haꞌranno. (Faarso 119:70; 1 Ximootewosi 4:1, 2) Togoore ronsummoro, assineemmo assootinna wolootu cubbo laꞌneemmo gari gariweelo ikkanno.

11. Boohaarsha lainohunni Galatiya 6:7 halaale ikkitinota mayinni buunxoonni?

¹¹ Kuni addinta ikkino coyeeti. Mitu Kiristaanooti boohaarate yite duuchchaagge laꞌinorinni kainohunni, foortino. Kuri Kiristaanooti “manchu wixiꞌrinoha hakkonne” qole mixxannota iillinonsa qarrinni buuxxino. (Galatiya 6:7) Ikkollana togoori iillannonketa balanxe hooꞌla dandiineemmo. Qorophphotenni surrekki giddo danchare wixiꞌrattoha ikkiro, heeshshokki giddo hagiirsiisannore mixxa dandaatto.— Qoola 77 noota “Hiittoo Boohaarsha Doodha Hasiissannoe?” yitanno saaxine lai.

12. Galatiya 6:5 boohaarshu ledo mayi xaado afidhino? Gillete wussaane wossaꞌnineemmo gede kaaꞌlannonkehu mayi biddishshi noonke?

¹² Xa hanni layinkiha boohaarshu dana laꞌno: Hakkuno Maganu Qaali xawise bushaho woyi danchaho yee kulinokkire amadino boohaarshaati. Togoo boohaarsha lainohunni, mittu mittunku Kiristaanchi dancha lawinosire gilletenni wossaꞌna hasiissannosi. (Galatiya 6:5) Ikkollana togoore wossaꞌnineemmo wote, harunsineemmo biddishshi dinonke yaa diꞌꞌikkino. Qullaawu Maxaafi Yihowa hedo huwanteemmo gede kaaꞌlannonkeha xintu seera  woyi xintu halaale amadino. Togooha xintu seera illachchinsheemmoha ikkiro, doodhineemmo boohaarshano ikko baalanka coye lainohunni “Mootichchu hedo maatiro” wodancha dandiineemmo.—Efesooni 5:17.

13. Yihowa giwanno boohaarshiwiinni xeertiꞌneemmo gede xixxiiwannonkeri maati?

¹³ Anfoommonte gede, baalunku Kiristaanira hedate woyi wodanchate dandoonsa qajeeltino deerri taalo diꞌꞌikkino. (Filiphphisiyusi 1:9) Hakkiinni saeno, mittu manchi baxannorinna wolu manchi baxannori babbaxxinoha ikkinota Kiristaanu huwatanno. Konni daafira, baalunku Kiristaani mittu gari wussaane wossaꞌnanno yine heda didandiinanni. Hakkoyeno ikkiro, Maganunnihu xintu seeri surrenkenna wodananke marraꞌꞌara faqqandummo kiiro, Yihowa giwanno boohaarshi baalunkunni xeertiꞌrate roore hasatto heedhannonke.—Faarso 119:11, 129; 1 Pheexiroosi 2:16.

14. (a) Boohaarsha doodhineemmo wote heda hasiissannonkehu wolu coyi maati? (b) Heeshshonke giddo ayyaanaamo coye balaxisiisa dandiineemmohu hiittoonniiti?

¹⁴ Boohaarsha doodhatto wote heda hasiissannoheri wolurino no: hattino yannakkiiti. Doodhatto boohaarshi danchaho yite adhatto coyi hiittoohoro kulanno; boohaartanni keeshshatto yanna kayinni heeshshokki giddo maa balaxisiisattoro kultanno. Kiristaanu ayyaanaamo coye balaxisiisannoti dihuluullissannote. (Maatewoosi 6:33) Ikkina heeshshokki giddo ayyaanaamo coye balaxisiisate maa assa dandaatto? Hawaariya Phaawuloosi togo yiino: “Hiitto ikkitine heedhinanniro buuxxine laꞌe. Egennaammu gede ikkinnina gowwuullu gede heedhinoonte. Tini wogga bushatena [afidhinanni] . . . yannanni dancha looso loosse.” (Efesooni 5:15, 16) Addaho, mageeshshi yanna boohaarattoro balaxxe wossaꞌnakki, roore ‘woyyanno  coyira’ yaano ayyaanaamittekki lossanno coyira baqete yanna heedhannohe gede kaaꞌlitannohe.—Filiphphisiyusi 1:10.

15. Boohaarsha doodhineemmo wote, hendoommohunni roore qorophpha hayyo ikkitinohu mayiraati?

¹⁵ Hakkiinni saeno boohaarsha doodhineemmo wote, qorophpha hasiissannonke yine hendoommohunni roore qorophpha hasiissannonke. Hatto yaa mayyaate? Aleenni  laꞌnummoha laalonnire kulanno lawishsha hanni qaagi. Hedittokki daꞌmuulchu qasino base mitteenni itattokki gede, daꞌmuulchu qasinowa calla ikkikkinni hatte base qooxo gudisse murte hoolattoti egennantinote. Hatteente gede, boohaarsha doodhineemmo wote ninke hendoommohunni roore qorophphanke hayyote. Busulu Kiristaanchi Qullaawu Maxaafihu xintu seeri ledo xaaddote sumuu yaannokki boohaarsha calla ikkikkinni, Yihowa ledo noosi fiixoomanna isi albaanni noosi uurrinsha daafannore shiimare nafa giddosiinni amadino boohaarshano xooqanno. (Lawishsha 4:25-27) Maganu Qaali giddo noo amaale seekke harunsa togoore afiꞌrino boohaarshiwiinni xeertiꞌneemmo gede kaaꞌlitannonke.

16. (a) Amanynyoote lainohunni Yihowara noosi gedee lao noonketa leellisha dandiineemmohu hiittoonniiti? (b) Qullaawu Maxaafiha xintu seera heeshshokki giddo ganynyite loosu aana hosiisattohu ma assittorooti?

¹⁶ Addu Kiristaani boohaarsha doodhanno wote, duuchchunku coyinni roorse Yihowa hedo balaxisiisanno. Qullaawu Maxaafi Yihowara mayi macciishshamannosiro, hattono seerisi hiittoohoro kulannonke. Lawishshaho, Nugusu Salamooni Yihowa giwannore batinynye coye borreessino; kuri giddo gamu “kaphphaancho arrawo, keeraancho mundee duntanno anguwa, busha mala qalanno wodanaatinna bunshete widira doddanno lekkuwaati.” (Lawishsha 6:16-19) Yihowa lao hiittootero afakki, ate lao hiittoota ikkitanno gede assitahera hasiisanno? Faarsaanchu, “Yihowa baxxinanniri bushare gibbe” yee kaajjishe amaalino. (Faarso 97:10) Doodhatto boohaarshi Yihowa giwannore addinta giwattota leellishannoha ikka hasiissannosi. (Galatiya 5:19-21) Hakkiinni saeno, ati hiittoo manchootiro leellishannohu mannu noowa assatto  coye ikkikkinni, callikki heedhe assattore ikkinota habbooti. (Faarso 11:4; 16:8) Konni daafira, amanynyoote lainohunni Yihowara noosi lao heeshshokki woꞌmatenni leellisha addinta hasiꞌrattoha ikkiro, ayeewoteno Qullaawu Maxaafihu xintu seeri ledo sumuu yaannore doodhatto. Qoleno hatto assa heeshshokki giddo ganynyite assattore ikkanno.—2 Qorontoosi 3:18.

17. Boohaarsha doodhankera albaanni ninkeneeto mayine xaꞌma hasiissannonke?

¹⁷ Boohaarsha doodhatto wote, Yihowa lao ledo sumuu yaannoha doodhatto gede wolere maa assa dandaatto? ‘Kuni boohaarshi anenna Maganu albaanni nooe uurrinsha seekkara woyi daafara dandaannohu hiittoonniiti?’ yitanno xaꞌmo heeshshi gotti assite hedi. Lawishshaho, mitte filme laꞌꞌattora albaanni, ‘Tenne filme giddo noori tiiaꞌya seekkara woyi xursiisara dandaannohu hiittoonniiti?’ yite ateneeto xaꞌmi. Tenne hajo lainohunni loosu aana hosiisa hasiissannonkehu xintu seeri hiikkonneetiro hanni laꞌno.

18, 19. (a) Filiphphisiyusi 4:8 aana noohu xintu seeri doodhinoommo boohaarshi dancha ikkinotanna teꞌee anfeemmo gede kaaꞌlannonkehu hiittoonniiti? (b) Dancha boohaarsha doodhatto gede kaaꞌlannohehu wolu xintu seeri hiikkonneeti? (Lekkaalliidi qaagiishsha lai.)

¹⁸ Horoomannohu xintu seeri giddo mittu Filiphphisiyusi  4:8 aana no; xiqise togo yitanno: “Roduuwaꞌya ballo! Halaale ikkino coye duuchcha, wodanaamimma noo coye duuchcha, keeraanchimma [“xalala,” NW] ikkino coye duuchcha, qullaawimma noo coye duuchcha, baxillu noo coye duuchcha, danchu duduwi noo coye duuchcha, danchummanna galata ikkirono, konne duuchchanka qaagge [“assaawa agurtinoonte,” NW].” Phaawuloosi coyiꞌranni noohu boohaarshunnire ikkikkinni, wodaninke hedoreeti; tini hedo qolte Magano hagiirsiisanno coyi aana illachchisha hasiissannosete. (Faarso 19:14) Ikkeennano Phaawuloosi coyiꞌrino qaali, boohaarsha lainohunni xintu seera ikke kaaꞌlara dandaanno. Hiitto?

¹⁹ Hanni ateneeto togo yite xaꞌmi: ‘Laeemmo filme, godoꞌleemmoti viidiyote godoꞌle, macciishsheemmo muuziiqi woyi wolu boohaareemmo coyi surreꞌya giddo “qullaawimma noo” coyi woꞌmanno gede assannoho?’ Lawishshaho, mitte filme laitto gedensaanni surrekki giddo qaꞌmidhe gattanno misile hiittoote? Hagiirsiissannota, xuru nookkitanna surrekki haaroonsitannota ikkituro, doodhootto boohaarshi danchaho yaate. Ikkollana laootto filme maaeela coye assaawatto gede assituhero, doodhootto boohaarshi digaraho, hakkiinni saeno gawajjannoho yaate. (Maatewoosi 12:33; Maarqoosi 7:20-23) Togo yineemmohu mayiraati? Korkaatuno amanynyoote baino coye assaawakki, giddiidi keerekki huntanno, Qullaawu Maxaafinni qajeelino tiiakki xursiissanno, hattono Maganu ledo noohe fiixooma huntara dandiitanno. (Efesooni 5:5; 1 Ximootewosi 1:5, 19) Togoo boohaarshi gawajjannohu ate umokki ikkino daafira, togoo boohaarshiwiinni xeetiꞌrate qodhite kai. b (Roomu Sokka 12:2) “Illeꞌya haafa  coye laꞌannota hoolie” yee Yihowa huucciꞌrino faarsaanchi gede ikki.—Faarso 119:37.

20, 21. Umi Qorontoosi 10:23, 24 dancha boohaarsha doodhate ledo xaaddannohu hiittoonniiti?

²⁰ Phaawuloosi gillete wussaane wossaꞌnineemmo wote assaawa hasiissannonkeha Qullaawu Maxaafiha qara xintu seera kulinonke. Isi togo yiino: ‘Duuchchankare fajjinoonnie, ikkollana duuchchunkuri . . . keereensannoho [“dhaawannoho,” NW] yaa diꞌꞌikkino. Mittu mittunku umisira ikkannoha calla ikkikkinni wolu mannira ikkannohano heda noosi.’ (1 Qorontoosi 10:23, 24) Kuni xintu seeri dancha boohaarsha doodhate ledo xaadannohu hiittoonniiti? Ateneeto togo yite xaꞌmi: ‘Doodheemmo boohaarshi woloota gawajjara dandaannohu hiittoonniiti?’

²¹ Ati ‘fajjinoonniho’ woyi danchaho yite hedattore laꞌꞌattora, nabbawattora woyi macciishshattora tiiꞌꞌikki faqqadahera dandaanno. Ikkeennano ati doodhootto boohaarshi millo miliqqo hoolanno tiiꞌꞌi noonsa roduuwa shagaggi assannonsata laittoha ikkiro, hattoo boohaarsha agurate wossaꞌnattora dandaatto. Mayira? Korkaatuno ammanate roduuwikki Maganoho ammanantinore ikka kabbaaddannonsa gede assite insa ‘aana sao loosa’ dihasiꞌratto; roduuwikki aana sao loosattoha ikkiro, Phaawuloosi yiinonte gede “K[i]ristoosi aana sao” loossanni nootto yaate. “Ayeeno soꞌrisiissinoonte [“gufichcho ikkitinoonte,” NW]” yitannota kaajjado amaale seekkite harunsi. (1 Qorontoosi 8:12; 10:32) Addu Kiristaani xaa yannara ‘fajjinoonniha’ ikkirono ‘dhaawannokki’ boohaarshiwiinni xooqatenni Phaawuloosi wodanchatenninna mannaho assaawatenni uyinota tenne amaale harunsanno.—Roomu Sokka 14:1; 15:1.

22. Gilletenni wossaꞌninanni coye lainohunni Kiristaanu wolu roduuwita baxxitino hedo ayirrisa hasiissannonsahu mayiraati?

 ²² Ikkollana wolu mannira xaqqamannore hedate yineemmo wote wolurino assaawa hasiissannonkeri no. Millo miliqqo hoolanno tiiꞌꞌi noosi Kiristaanchi boohaarsha lainohunni Kiristaanu songo giddo noori baalu isite gedee lao heedhansara agara dihasiissannosi. Baalunkura anete gedee lao heedhonsa yaannoha ikkiro, halaꞌlado makeenu doogora makeena kadannohu baalu ani hasiꞌreemmo rankenni kado yaanno shufeertichchi gede ikkanno yaate. Baalunku hatto ikkara hasiꞌra coye korkaatunni assaawa diꞌꞌikkitino. Millo miliqqo hoolanno tiiꞌꞌi noosi Kiristaanchi boohaarsha lainohunni wolootu roduuwi lao isitewiinni baxxituro, Kiristaanunnihu xintu seeri ledo sumuu yitannota ikkitu geeshsha roduuwisira noosi baxilli laonsa ayirrisanno gede assannosi. Hatto assannoha ikkiro, ‘shaqqillisi [“korkaataamimmasi,” NW] manna duuchchaho leeltanno’ gede assanno.—Filiphphisiyusi 4:5; Mekibibi 7:16.

23. Dancha boohaarsha doodha dandaattohu hiittoonniiti?

²³ Xaphphoomunni dancha boohaarsha doodha dandaattohu hiittoonniiti? Maganu Qaali giddo xawinse kulloonnire amanynyoote bainorenna maaeelino coye reqecci asse leellishanno boohaarsha effidhe giwi. Qullaawu Maxaafi giddo xawinse kulloonnikki boohaarsha lainohunni Qullaawu Maxaafiha xintu seera harunsi. Tiiakki gawajjanno boohaarshiwiinni xeertiꞌri; qoleno wole manna roorenkanni ammanate roduuwakki shagaggi assanno boohaarsha agurate maahoyye yii. Tenne assate wossaꞌnootto wussaane Maganoho ayirrinynye abbitannotanna ateno ikko maatekki isi baxillinni fultinikki heedhinanni gede assitannoꞌneta ikkito.