Boha songo gawajjantannokki gede agartanno; hattono cubbo loose maaro einokkihura seejjo ikkitanno. (1Qo 5:6, 11) Yihowa konni garinni seejjanno seejjo ayirrisankenna halamanke, baxillu noonketa leellishshanno. Boha cubbo loosinohano ikko muli fiixasi hattono yoote komite xissiissannoti egennantinote. Hatto ikkina tenne qixxaawo ayirrisa baxille leellisha ikkitinohu hiittoonniiti?

Tenne qixxaawo ayirrisanke, baalunkunni roore, Yihowa suꞌmanna isi qullaambete daafira fushshino biddishsha banxeemmota leellishshanno. (1Ph 1:14-16) Qoleno, bohaminohano banxeemmota leellishshanno. Shota ikkitinokki seejjo xissiissannoha ikkirono, gedensaanni ‘keeraanchimmate guma laaltara’ dandiitanno. (Ib 12:5, 6, 11) Bohamino woy isonooto songotewiinni badino manchiwa aanneemmoha ikkiro, Yihowa hakkonne mancho seejjannota hoollanni heeꞌnoommo. Yihowa mannasi ‘halaalunni [woy bikkunni] seejjannota’ qaagge. (Er 30:11) Bohamino manchi barrunni mitto barra shooshaqu Anninkewa Yihowawa higanno yine hexxineemmo. Hakka geeshsha kayinni, Yihowa seejjo ayirrinseemmota leellishanna isi ledo noonke jaalooma kaajjishiꞌra diagurreemmo.—Is 1:16-18; 55:7.

MITTU WODANINNI AMMANANTINOONNIRE IKKE YITANNO VIIDIYO LAꞌINIHU GEDENSAANNI, AANTE NOO XAꞌMUWARA DAWARO QOLATE WOꞌNAALLE:

• Kiristaana ikkino anninna ama beettinsa Yihowa mininni fulanno woyite xissiisiꞌrannohu hiittoonniiti?

• Songo ammanantinore maatete miilla kaaꞌla dandiitannohu hiittoonniiti?

• Maatetenni roore Yihowara ammanama hasiissannota kultannoti Qullaawu Maxaafi xagge hiitteeti?

• Maatenkenni roore Yihowara ammanama dandiineemmohu hiittoonniiti?