Qullaawu Maxaafi giddo, “alamete gumulora” ‘daga dagate aana ola kayisannotanna’ kalaqamu dano ikkitannota balanxe masaalloonni. (Maatewoosi 24:3, 7) Saihu soqqanshote diro yaano 2023, tini masaalo woꞌmitanna laꞌnoommo. a Ikkollana, mite 100 ikkitanno gobbuwara olunna kalaqamu dano batidhinoha ikkirono, Yihowa Farciꞌraasine Yihowa baxille leellishshino. Hiittoonni?

 Saihu 2023 soqqanshote diro, roduuwinkera 200 saꞌanno dano (kalaqamunnitino ikko mannu abbannoti) iillitinonsa. Yihowa Farciꞌraasine danotenni gawajjantinore kaaꞌlate, xaphoomunni tonne miliyoone doolaare b saꞌꞌanno woxe alamete doyicho loosira fushshinoonni woxi aaninni horoonsidhino. Kuni, roduuwu qooxeessinsara dano gawajjitino roduuwa kaaꞌlate uminsanni fushshitino woxeno agurranna fulino woxeeti. Hanni fushshitinanni woxe horoonsiꞌne dano iillitinonsa roduuwa kaaꞌlinoommo gara leellishannoha lame lawishsha laꞌno.

 Nayijeeriyaho mitu qooxeessira duucha woyite lolahu qarrisanno. Ikkollana, Birra 2022 dayino lolahi hatte gobbara tonnu diri giddo horo ikke diegenninoho. Kuni lolahi 676,000 hekitaare ikkitannota loosiꞌnanni baatto hunino; qoleno lame miliyoone saꞌꞌanno manni qaensanni daramino. Nayijeeriyunniti sinu biironke, dano gawajjitinore kaaꞌlatenna ayyaanaamittensa jawaachishate bayichonko Irdaatu Komite xintitino.

•   7,505 halashshaano qaensanni darantino

•   860 mini gawajjamino woy horo diigamino

•   90 Gambooshshu Addaraashenna mitte Jajjabbu Gambooshshi Addaraashe lolahu eꞌꞌe woꞌmino

 Dano gawajjitinore kaaꞌlate, 250,000 doolaare ale ikkanno woxe fushshine, aane noore shiqinshoonni:

•   Sagale lawishshaho ruuze, baaqeelanna paasta

•   Mini uduunne lawishshaho dadonna agobere

•   Lolahu diigino woy hunino minna gatamarroonni woy wirro minnoonni

 Roduuwinke dirijjitete woxe garunni horoonsiꞌnanni gede assitinohu hiittoonniiti? Tenne assinoonniti mitte doogo, mitto mittonka mine gatamarriro woyyannoronna teꞌee seekke buuxate. Mitto mine haaro ikkine mina hasiissinoha ikkiro, qooxeessaho rosamino garinni minnoonni.

 Dano gawajjiteenna kaaꞌlinoonni roduuwinke lowo geeshsha hagiidhitino. Mitte rodoo togo yitino: “Lolahu heeshshonke umo lekkicho soorrino; mayira yiniro, gatinke gudisame baino, qoleno miniweelo mullawa gantoommo. Roduuwinke hakko barranni dagge kaaꞌlitunketanna fooliishshiꞌneemmo bayicho uyitunketa kayinni wodanaaꞌminoommo. Sinu biiro sokkinonke sagale iillituta isinni roore wodanaaꞌminoommo. Yohaannisi 13:34, 35 woꞌmitanna illenkenni laꞌnummota, yineemmonti baꞌinonke. . . . Addu baxilli addinta no. Roduuwinke kaaꞌlo hasiisse noonke saatera dagge kaaꞌlitinonke daafira, aninna maateꞌya godowinta, lowo geya galaxxineemmonsa.”

 Qarqaru mannino kaaꞌlote loosonke wodanchino. Bayelsa Qoqqowira, Sabagiriya heeꞌrannohu mittu olluu murrichi togo yiino: “Alamete aana batinye dirijjittanna beetekiristaanna no; kayi togoore assitinori Yihowa Farciꞌraasine callaati. . . . Alamete aana noote kaajja dirijjitta giddo mitte [kiꞌne] dirijjiteeti.”

 Ammajje 2023, Chiili gobbara 400 ale ikkitanno giira kaꞌe lowore huntino. Xaphoomunni 430,000 hekitaare saꞌanno gobba giirantino; kuri giddo mite Chiili gobbara lowore kaaꞌlanno miinji noo baattooti. Mite 8,000 meddi yaanno manni qaensanni fule daramino. Sinu biiro dano kalaqantuhunni shiima yanna gedensaanni, roduuwanke kaaꞌlate qixxaawo assitino.

•   222 halashshaano qaensanni fulte darantino

•   20 mini giirame baino

 Dano gawajjitinore kaaꞌlate, 200,000 doolaare saꞌꞌanno woxe fushshine, konni woroonni noore shiqinshoonni:

•   Sagalenna waa

•   Nadaaje, mine feyatenna hayishshate hasiisanno uduunnenna xagga

•   Gawajjantino minna gatamara

 Mitte maate mininsanna loosinsano gatikkinni noonsari baalu giirame bainota affu woyite lowo geeshsha massino. Konni garinni tini maate loosiweelo gattino. Boodu barri geya, tini maate alba mininsa noo bayicho xa buluulu callu gatinota laꞌanno woyite lowo geeshsha xissiisidhino. Mine haaro ikkine minnanni heeꞌnoonninsata laꞌuti kayinni sheshifattino. Kaaꞌlitansara martino roduuwi lowo baxille leellishshinonsa daafira, isi cincitino. Tini maate insara assinoonniri lowo geya dhagge ikkinonsa daafira, insa uminsa wolootu mine mina kaaꞌlitino.

 Kaaꞌlote loosinke lowo roduuwinkera dhagge ikkinonsa. Mittu rodii togo yiino: “Yihowa qixxeessinonketi Irdaatu Komite qixxaawo lowo geeshsha dhagge ikkitannote. Kuri roduuwi, dano iillituhunni layinki soodonni dagge hasiisannore shiqishshanni no. Irdaatu komite wole gobbara roduuwanke kaaꞌlitino gara nabbawa jawaachishshanno. Ninke umonke kaaꞌlitanna laꞌneemmo woyite kayinni coyi baxxanno. Dirijjitenke roore naandeemmo; qoleno, roduuwu Yihowa faale hadhanno gari, maalaamittetenna ayyaanaamittete hasiisannonkere afiꞌneemmo gede assate sharrantanno gari, hattono baxille leellishshannonke gari roore dhagge ikkannonke. Yihowa baxille illenkenni laꞌnoommo.”

 Tenne alame goofimarchi roore gamba yii kiiro, dano roore lexxitannota anfoommo. (Luqaasi 21:10, 11) Ikkirono, Kiristaanu songo widoonni, shaqqadu Mootenke Kiristoosi Yesuusi “alamete gumulo geeshsha barru baala” ninke ledo nootano anfoommo. (Maatewoosi 28:20) Alamete doyicho loosira donate.jw.org widoonninna wole doogganni fushshatto woxi, hattono wolqakkinna yannakki uyite kaaꞌlakki Maganu Gashshootiranna shaqqadu Mootenkera halamattota leellishshanno. Woꞌmanka woyite shaqqillunni aatto daafira galanteemmohe.