අපිට වගේ ශරීරයක් දෙවියන්ට නැති නිසා ඔහුව අපිට පේන්නේ නැහැ. මේ විශ්වය ඇතුළු සෑම දෙයක්ම නිර්මාණය කළේ දෙවි පියාණන්. ඔහුට ආරම්භයක්වත් අවසානයක්වත් නැහැ. (ගීතාවලිය 90:2) දෙවියන් කැමති අපි ඔහුගේ මඟ පෙන්වීම් හොයලා ඔහු ගැන සත්‍යය දැනගන්නවාටයි.—ක්‍රියා 17:24-27 කියවන්න.

අපිට දෙවියන්ගේ නම දැනගන්න පුළුවන්. ඔහු නිර්මාණය කරලා තියෙන දේවලින් ඔහුගේ ගුණාංග ගැන යම් අවබෝධයක් ලබාගන්නත් පුළුවන්. (රෝම 1:20) ඒත් ඔහුව හොඳින් දැන හඳුන ගන්න නම් බයිබලය කියවලා තේරුම්ගන්න ඕනේ. ඔහුගේ පෞද්ගලිකත්වය ගැන දැනගන්න පුළුවන් වෙන්නේ එතකොටයි.—ගීතාවලිය 103:7-10 කියවන්න.

යෙහෝවා දෙවියන් අසාධාරණකම් හෙළාදකිනවා. ඔහු අපිව නිර්මාණය කරලා තියෙන්නේ ඔහුගේ ගුණාංග ඇතුවයි. (ද්විතීය කතාව 25:16) අසාධාරණයට අපි අකමැති ඒ නිසයි. දෙවියන් අපිව නිර්මාණය කරලා තියෙන්නේ යන්ත්‍ර වගේ නෙමෙයි, හිතලා බලලා තීරණ ගන්න පුළුවන් විදිහටයි. ඒත් හුඟක් අය ඒ හැකියාව වැරදි විදිහට පාවිච්චි කරලා අසාධාරණකම් කරද්දී “දෙවිගේ සිතට මහත් වේදනාවක්” දැනෙනවා.—උත්පත්ති 6:5, 6; ද්විතීය කතාව 32:4, 5 කියවන්න.

යුක්තියට ප්‍රිය කරන දෙවියන් හැමදාම අසාධාරණකම් පවතින්න ඉඩ තියන්නේ නැහැ. (ගීතාවලිය 37:28, 29) ළඟදීම අසාධාරණකම් නැති කරනවා කියලා ඔහු පොරොන්දු වෙනවා.—2 පේතෘස් 3:7-9, 13 කියවන්න.