යොෂුවා 6:10-15, 20 කියන විදිහට ඊශ්‍රායෙල්වරු දවසට එක වතාව ගානේ දවස් හයක් යෙරිකෝව වටේට ගියා. ඒත් හත්වෙනි දවසේ ඔවුන් යෙරිකෝව වටේ හත් වතාවක් ගියාට පස්සේ දෙවි නගරයේ දැවැන්ත පවුර කඩා වැටෙන්න සැලැස්සුවා. ඒ නිසා නගරය ඇතුළට ගිහින් ඒක යටත් කරගන්න ඊශ්‍රායෙල්වරුන්ට පුළුවන් වුණා. යෙරිකෝව යටත් කරගන්න කලින් ඊශ්‍රායෙල්වරු කාලයක් තිස්සේ ඒක වටලලා හිටියේ නැහැ කියලා බයිබලේ කියන දේ පුරාවිද්‍යාත්මක සාක්ෂිවලට එකඟද?

හමුදාවක් නගරයක් යටත් කරගන්න කලින් ඒ නගරේ වටේට කඳවුරු බැඳගෙන ඒක වටලන එක අතීතයේදී සාමාන්‍ය දෙයක්. කාලයක් තිස්සේ නගරයක් වටලලා හිටියා වුණත් ඒක යටත් කරගත්ත ගමන් ඒකේ තියෙන වස්තුව, ආහාර ඇතුළු හැම දේම ඔවුන් කොල්ල කෑවා. හැබැයි යෙරිකෝවේ නටබුන් අතරින් ආහාර විශාල ප්‍රමාණයක් පුරාවිද්‍යාඥයන්ට හම්බ වුණා. ඒ ගැන සඟරාවක කියන්නේ මෙහෙමයි. “යෙරිකෝවේ නටබුන් අතරින් මැටි භාජන ඇරුණාම වැඩියෙන්ම හම්බ වුණේ ධාන්‍ය. පලස්තීන පුරාවිද්‍යා වාර්තාවලට අනුව ඒක දුර්ලභ දෙයක්. කැණීම්වලදී ධාන්‍ය භාජනයක් දෙකක් හම්බ වෙන්න පුළුවන් වුණත් ධාන්‍ය විශාල ප්‍රමාණයක් හම්බ වුණ එක විශේෂයි.”—Biblical Archaeology Review.

බයිබල් වාර්තාවලට අනුව යෙරිකෝවේ ධාන්‍ය කොල්ල කන්නේ නැතුව ඉන්න ඊශ්‍රායෙල්වරුන්ට හොඳ හේතුවක් තිබුණා. නගරයේ කිසිම දේකට අතවත් තියන්න එපා කියලා යෙහෝවා දෙවි ඔවුන්ට අණ කළා. (යොෂු. 6:17, 18) ඊශ්‍රායෙල්වරු යෙරිකෝව යටත් කරගත්තේ අස්වැන්න නෙළන කාලය ඉවර වෙනවත් එක්කම නිසා ධාන්‍ය විශාල ප්‍රමාණයක් නගරේ තිබුණා. (යොෂු. 3:15-17; 5:10) යෙරිකෝවේ කැණීම්වලදී ධාන්‍ය විශාල ප්‍රමාණයක් හම්බ වුණ එකෙන් පැහැදිලි වෙන්නේ බයිබලේ කියන විදිහටම ඊශ්‍රායෙල්වරු කාලයක් තිස්සේ යෙරිකෝව වටලලා හිටියේ නැහැ කියන එකයි.