අපගේ අපක්ෂපාතී යෙහෝවා දෙවිව අනුකරණය කරන්න

“දෙවි සියල්ලන්ටම එක හා සමානව සලකන්නේය.”—රෝම 2:11, NW.

1, 2. (අ) සමස්තයක් වශයෙන් කානාන් ජාතිකයන් සම්බන්ධයෙන් යෙහෝවාගේ අරමුණ කුමක් වීද? (ආ) යෙහෝවා කළේ කුමක්ද? මින් පැනනඟින්නේ කවර ප්‍රශ්නද?

පොදු යුගයට පෙර 1473දී මෝවබ් මිටියාවතේ කඳවුරු බැඳගෙන සිටි ඊශ්‍රායෙල් ජාතිය මෝසෙස්ට සවන් දුන්නේ ඉතා උනන්දුවෙනි. යොර්දාන් ගඟින් එගොඩව ඔවුන් ඉදිරියෙහි අභියෝගයක් තිබිණ. පොරොන්දු දේශයේ විසූ බලවත් කානාන් ජාතීන් සතක් ඊශ්‍රායෙල් ජාතිය මාර්ගයෙන් පරාජය කිරීමට වූ යෙහෝවාගේ අරමුණ මෝසෙස් ඔවුන්ට ප්‍රකාශ කළේය. ‘ඔබේ දෙවි වූ යෙහෝවා ඔවුන් ඔබ අතට පාවා දෙන්ටත් ඔබ ඔවුන්ට පහර දෙන්ටත් යෙදෙනවා ඇත.’ මෝසෙස්ගේ මෙම වදන්වලින් ඔවුන් කොතරම් අස්වැසිල්ලක් ලබන්නට ඇද්ද! මෙම ජාතීන් සමඟ කිසිදු ගිවිසුමක් නොකිරීමට ඊශ්‍රායෙලිතයන් බැඳී සිටි අතර, ඔවුන්ට කිසිදු අනුකම්පාවක් දැක්වීම සඳහා පදනමක්ද නොතිබිණ.—ද්විතීය කථාව 1:1; 7:1, 2.

² කෙසේවෙතත්, යෙහෝවා ඊශ්‍රායෙලිතයන් පහර දුන් මුල්ම නුවරේ විසූ එක පවුලක් ගැලෙව්වේය. තවද තවත් නුවරවල් සතරක විසූ ජනතාවටද දෙවිගේ ආරක්ෂාව ලැබිණ. මෙවැනි දෙයක් සිදු වූයේ මන්ද? මෙම කානාන් ජාතිකයන්ගේ දිවි ගැලවීම හා බැඳි සුවිශේෂ සිදුවීම් සලකා බලද්දී, අපට යෙහෝවා ගැන උගත හැක්කේ කුමක්ද? තවද අපට ඔහුව අනුකරණය කළ හැක්කේ කෙසේද?

යෙහෝවා ලද කීර්තියට ජනයාගේ ප්‍රතිචාරය

3, 4. ඊශ්‍රායෙලිතයන් ලැබූ ජයග්‍රහණ පිළිබඳ පුවත් කානාන්හි පුද්ගලයන්ට බලපෑවේ කෙසේද?

³ පොරොන්දු දේශයට ඇතුල්වීමට පෙරාතුව ඊශ්‍රායෙල් ජාතිය වසර 40ක් පුරා පාළුකරයෙහි විසුවෝය. ඒ මුළු කාලය පුරාම යෙහෝවා තම ජනයාව ආරක්ෂා කළේ ඔවුන් වෙනුවෙන් සටන් කරමිනි. පොරොන්දු දේශයේ දකුණට වෙන්න පිහිටි අරද්හි කානානීය රජු හා ගැටීමට ඊශ්‍රායෙලයට සිදු විය. යෙහෝවාගේ උපකාරය ඇතුව ඊශ්‍රායෙලිතයෝ ඔහුවත් ඔහුගේ සෙනඟවත් හොර්මාහිදී පරාජය කළෝය. (ගණන් කථාව 21:1-3) ඉන් අනතුරුව, ඊශ්‍රායෙලිතයෝ ඒදොම්හි දේශ සීමා දිගේ ගොස්, මළ මුහුදේ ඊසාන දෙසට වෙන්න උතුරුකරයට ගමන් කළෝය. කලින් මෝවබ් ජාතිකයන් වාසය කළාවූ මෙම ප්‍රදේශයේ දැන් සිටින්නේ අමෝරිවරුන්ය. අමෝරි රජ වන සීහොන්, ඊශ්‍රායෙල් ජනයාට තම ප්‍රදේශය මැදින් යෑමට අවසර දුන්නේ නැත. ප්‍රතිඵලයක් ලෙස අර්ණොන් මිටියාවතට උතුරින් පිහිටි යහශ්හි ඔවුන් යුද්ධ කළ අතර, එහිදී සීහොන් මැරුම් කෑවේය. (ගණන් කථාව 21:23, 24; ද්විතීය කථාව 2:30-33) ඊට තවත් උතුරට වෙන්න, බාෂාන්හි අමෝරිවරුන්ව පාලනය කළේ ඕග්ය. ඕග් යෝධයෙකු වුවද, යෙහෝවා ඉදිරියෙහි ඔහු අසරණ වූයේය. ඔහුව එද්රෙයිහිදී ඝාතනය කරන ලදි. (ගණන් කථාව 21:33-35; ද්විතීය කථාව 3:1-3, 11) මෙම ජයග්‍රහණ පිළිබඳ පුවත් මෙන්ම ඊජිප්තුවෙන් ඊශ්‍රායෙල් ජාතිය නික්ම ගිය ආකාරය ගැනද ප්‍රචලිත වූ ආරංචි කානාන්හි ජීවත් වූ ඇතැම් පුද්ගලයන් කෙරෙහි ඇති කළේ ප්‍රබල බලපෑමකි. *

⁴ යොර්දාන් ගඟින් එගොඩ වී කානාන් දේශයට මුලින්ම අවතීර්ණ වූ විට, ඔවුන් කඳවුරු බැඳගත්තේ ගිල්ගාල්හිදීය. (යෝෂුවා 4:9-19) ඊට නුදුරින් පිහිටා තිබුණේ පවුරුවලින් වට වී තිබුණු යෙරිකෝ නුවරයි. යෙහෝවා කළ ක්‍රියා ගැන තමාට ආරංචි වූ දේවල් හේතුවෙන් කානානීය රාහාබ් ඇදහිල්ලෙන් ක්‍රියා කිරීමට පෙලඹුණාය. ප්‍රතිඵලයක් ලෙස යෙහෝවා යෙරිකෝව විනාශ කළ විට, ඔහු ඇයවද ඇගේ පවුලේ සාමාජිකයන්වද ආරක්ෂා කළේය.—යෝෂුවා 2:1-13; 6:17, 18; යාකොබ් 2:25.

5. ගිබියොන්වරුන් ඥානවන්තව ක්‍රියා කිරීමට පෙලඹුණේ කුමක් නිසාද?

⁵ ඊශ්‍රායෙල් ජනයා ඊළඟට කළේ ගඟ අසබඩ පිහිටි තැනිතලාවේ සිට මධ්‍යම කඳුකරයට යෑමයි. යෙහෝවාගේ මඟ පෙන්වීම් අනුගමනය කරමින් යෝෂුවා හායි නගරය අල්ලාගැනීම පිණිස රැක සිට පහර දීමේ යුද්ධෝපාය ක්‍රියාත්මක කළේය. (යෝෂුවා 8වන පරිච්ඡේදය) හායි නුවරට අත් වූ අන්ත පරාජයට ප්‍රතිචාරය දැක්වීමක් ලෙස කානාන්හි රජවරුන් කිහිපදෙනෙක්ම යුද්ධ කිරීම සඳහා එක්ව සැරසුණෝය. (යෝෂුවා 9:1, 2) එනමුත් ළඟපාතක පිහිටි හිවීය නුවර වූ ගිබියොන්හි වැසියන් ප්‍රතිචාරය කළේ ඊට වෙනස්වය. යෝෂුවා 9:4හි [NW] පවසන පරිද්දෙන් “ඔවුහු ස්වකැමැත්තෙන්ම  ඥානවන්තව ක්‍රියා කළෝය.” යෙහෝවා තම සෙනඟ ඊජිප්තුවෙන් නික්ම ගිය විට ඔවුන්ව ගැලවූ ආකාරයද සීහොන් සහ ඕග් පරාජය කළ ආකාරයද රාහාබ්ට මෙන් ඔවුන්ටද සැල වී තිබිණ. (යෝෂුවා 9:6-10) ඊශ්‍රායෙලයට එරෙහිව සිටීම නිෂ්ඵල දෙයක් බව ගිබියොන්වරුන්ට වැටහිණ. එබැවින්, ඔවුහු ගිබියොන් වෙනුවෙන්ද, කෙපීරා, බෙයේරොත් සහ කිර්යත්-යෙයාරීම් යන ළඟපාත නුවරවල් තුන වෙනුවෙන්ද දුර රටක සිට පැමිණ ඇති බවක් පෙන්නුම් කරන වෙස්ගත් දූත පිරිසක් ගිල්ගාල්හි සිටි යෝෂුවා ළඟට යැවූහ. මෙම උපාය සාර්ථක විය. යෝෂුවා ඔවුන් සමඟ ගිවිසුමක් ඇති කළ අතර, එය ඔවුන්ගේ දිවි ගැලවීමට හේතු විය. දින තුනකට පසුව තමන්ව රවටා ඇති බව යෝෂුවා සහ ඊශ්‍රායෙලිතයන්ට දැනගන්නට ලැබිණ. කෙසේවෙතත්, එම ගිවිසුම යෙහෝවාගේ නාමයෙන් ස්ථිර කර තිබුණු නිසා, ඔවුහු ඊට ඇලී සිටියෝය. (යෝෂුවා 9:16-19) යෙහෝවා ඊට තම අනුමැතිය දුන්නාද?

6. යෝෂුවා ගිබියොන්වරුන් සමඟ ඇති කළ ගිවිසුමට යෙහෝවා ප්‍රතිචාරය දැක්වූයේ කෙසේද?

⁶ ඊශ්‍රායෙලිතයන් වෙනුවෙන්, මණ්ඩපයේ පිහිටි ‘යෙහෝවාගේ පූජාසනයටත්’ දර කපන්නන්ද දිය අදින්නන්ද වීමට ගිබියොන්වරුන්ට ඉඩ දෙන ලදි. (යෝෂුවා 9:21-27) එපමණක්ද නොව, අමෝරි රජවරුන් පස්දෙනෙකු ගිබියොන්වරුන්ට එරෙහිව නැඟී සිටි විට, යෙහෝවා ආශ්චර්යවත් ආකාරයකින් මැදිහත් වූයේය. යෝෂුවාගේ භට පිරිස අතින් මැරුම් කෑ සතුරන් ගණනට වඩා හිම ගල් වර්ෂාවෙන් වැඩි පිරිසක් මැරුම් කෑවෝය. තවද සම්පූර්ණ ජයක් අත් කරගැනීම සඳහා සූර්යයා සහ චන්ද්‍රයාව එක තැන නතර කරවන ලෙස යෝෂුවා කළ ඉල්ලීමට පවා යෙහෝවා සවන් දුන්නේය. ඒ පිළිබඳව යෝෂුවාගේ සටහන වූයේ මෙයයි. “යෙහෝවා මනුෂ්‍යයෙකුගේ හඬ ඇසූ එබඳු දවසක් ඊට ප්‍රථමවත් පසුවවත් නොවීය. මක්නිසාද යෙහෝවා ඊශ්‍රායෙල් උදෙසා සටන් කළේය.”—යෝෂුවා 10:1-14.

7. ඇතැම් කානානිවරුන් සම්බන්ධයෙන් අදාළ වූයේ පේතෘස් පිළිගත් කවර සත්‍යතාවද?

⁷ කානානීය රාහාබ්, ඇගේ පවුල මෙන්ම ගිබියොන්වරු යෙහෝවාට භය වී ඊට එකඟව ක්‍රියා කළෝය. ඔවුන්ට සිදු වූ දෙයින් පැහැදිලිව නිරූපණය කරන්නේ ක්‍රිස්තියානි ප්‍රේරිත පේතෘස් පසු කාලයකදී පැවසූ දෙය සත්‍යයක් බවය. “දෙවි සියල්ලන්ටම එක හා සමානව සලකන බව මට ස්ථිරවම වැටහේ. මන්ද සියලු ජාතීන් අතරේ ඔහු කෙරෙහි භය ඇතිව ධර්මිෂ්ඨකම් කරන තැනැත්තාව ඔහු පිළිගන්නේය.”—ක්‍රියා 10:34, 35, NW.

ආබ්‍රහම් සහ ඊශ්‍රායෙල් ජනයා සමඟ කටයුතු කරද්දී

8, 9. ආබ්‍රහම් සහ ඊශ්‍රායෙල් ජාතිය සමඟ කටයුතු කළ ආකාරයෙන් යෙහෝවා සියල්ලන්ටම එක හා සමානව සලකන බව පැහැදිලි වන්නේ කෙසේද?

⁸ දෙවි ආබ්‍රහම් සහ ඔහුගේ පැවතෙන්නන් සමඟ කටයුතු කරද්දී විදහාපෙන්වූ මහත් කරුණාවට ශ්‍රාවක යාකොබ් අවධානය යොමු කළේය. ආබ්‍රහම් “යෙහෝවාගේ මිත්‍රයා” බවට පත් වූයේ ඔහුගේ පරම්පරාව නිසා නොව ඔහුගේ ඇදහිල්ල හේතුවෙනි. (යාකොබ් 2:23, NW) යෙහෝවා කෙරෙහි ආබ්‍රහම්ට තිබුණු ඇදහිල්ලේ සහ ප්‍රේමයේ ප්‍රතිඵලයක් ලෙස ඔහුගේ පැවතෙන්නන්ට ආශීර්වාද අත් විය. (2 ලේකම් 20:7) යෙහෝවා ආබ්‍රහම්ට පොරොන්දු වූයේ මෙලෙසය. “මම ඒකාන්තයෙන්ම ඔබට ආශීර්වාද කරන්නෙමි. අහසේ තාරකා මෙන්ද මුහුදු වෙරළෙහි වැලි මෙන්ද ඔබේ වංශය බොහෝසෙයින් වැඩි කරන්නෙමි.” එනමුත් ඊළඟ පදයෙහි දුන් පොරොන්දුව සැලකිල්ලට ගන්න. “ඔබේ වංශය කරණකොටගෙන පොළොවේ සියලු ජාතීහු ආශීර්වාද ලබන්නෝය [තමුන්ටම ආශීර්වාද සලසාගන්නෝය, NW].”—උත්පත්ති 22:17, 18; රෝම 4:1-8.

⁹ ඉතින් යෙහෝවා එක් පිරිසකට කොහෙත්ම අනිසි අනුග්‍රහයක් දැක්වූයේ නැත. ඒ වෙනුවට ඊශ්‍රායෙල් ජනයා සමඟ කටයුතු කළ ආකාරයෙන් ඔහු නිරූපණය කළේ තමාට කීකරු වන අය වෙනුවෙන් තමාට කුමක් කළ හැකිද යන්නයි. යෙහෝවා තම විශ්වාසවන්ත සේවකයන්ට පක්ෂපාත ප්‍රේමය දක්වන්නේ කෙසේද යන්න පිළිබඳව මෙලෙස කටයුතු කළ ආකාරය නිදසුනක් වේ. ඊශ්‍රායෙල් යෙහෝවාගේ “අසහාය වස්තුව” වුවද, දෙවිගේ කාරුණාව ලැබීමේ ප්‍රස්තාව වෙනත් ජාතීන්ට අහිමි වූ බව ඉන් අදහස් කරන්නේ නැත. (නික්මයාම 19:5; ද්විතීය කථාව 7:6-8) යෙහෝවා ඊශ්‍රායෙලය ඊජිප්තුවේ වහල්භාවයෙන් මුදා “පොළොවේ සියලු වංශවලින් ඔබ  පමණක් ඇඳිනගත්තෙමි” යයි ප්‍රකාශ කළ බව ඇත්තය. එනමුත් යෙහෝවා අනාගතවක්තෘ ආමොස් සහ වෙනත් අය මාර්ගයෙන් ‘සියලු ජාතීන්ට’ අයත් ජනයාහට මවිතකර අපේක්ෂාවක් පොරොන්දු විය.—ආමොස් 3:2; 9:11, 12; යෙසායා 2:2-4.

යේසුස්—සියල්ලන්ටම එක හා සමානව සැලකූ ගුරුවරයා

10. සියල්ලන්ට එක හා සමානව සැලකීමේදී යේසුස් තම පියාණන්ව අනුකරණය කළේ කෙසේද?

¹⁰ තම පියාණන්ගේ නියම ස්වරූපය වන යේසුස්, සිය භූමික දේවසේවාව ඉටු කළ කාලයේදී යෙහෝවා කළ ලෙසම ඔහු සියල්ලන්ටම එක හා සමානව සැලකුවේය. (හෙබ්‍රෙව් 1:3) ඒ කාලයේදී ඔහුගේ අවධානය ප්‍රධාන ලෙස යොමු වී තිබුණේ “ඊශ්‍රායෙල් වංශයේ නැති වුණු බැටළුවන්” වෙතටය. එහෙත්, ළිඳක් අසලදී සමාරියේ ස්ත්‍රියකට සාක්ෂි දැරීමෙන් ඔහු වැළකී සිටියේ නැත. (මතෙව් 15:24, NW; යොහන් 4:7-30) එමෙන්ම, පෙනෙන විදිහට යුදෙව්වෙකු නොවූ හමුදා නිලධාරියෙකුගේ ඉල්ලීම පරිදි ඔහු ආශ්චර්යයක්ද සිදු කළේය. (ලූක් 7:1-10) ඔහු මෙවැනි ක්‍රියා කළේ දෙවිගේ ජනයා සඳහා තම ප්‍රේමය නිරූපණය කිරීමට කළ ක්‍රියාවලට අමතරවය. යේසුස්ගේ ගෝලයෝ ලෝවටා දේශනා කළෝය. ක්‍රමානුකූලව පැහැදිලි වූ දෙයක් වූයේ, යෙහෝවාගේ ආශීර්වාද ලැබීම රඳා පැවතියේ යමෙකුගේ ජාතිය මත නොව නමුත් ආකල්පය මත බවය. සත්‍යයට පිපාසයක් දැක්වූ යටහත් පහත්, අවංක සිත් ඇති අය රාජ්‍යයේ ශුභාරංචියට ප්‍රතිචාරය දැක්වූහ. ඊට වෙනස්ව, උඩඟු හා අහංකාර අය යේසුස්ව හා ඔහුගේ පණිවිඩය ප්‍රතික්ෂේප කළෝය. යේසුස් වරක් කීවේ මෙලෙසය. “ස්වර්ගයටත් පොළොවටත් ස්වාමීන් වන පියාණෙනි, ඔබ මේ දේවල් ප්‍රඥාවන්තයන්ගෙන් සහ බුද්ධිමතුන්ගෙන් සඟවා, බිලිඳුන්ට හෙළි කර තිබෙන බැවින් මම ඔබට ප්‍රසිද්ධියේ ප්‍රශංසා කරමි. එසේය පියාණෙනි, මන්දයත් මෙලෙස කිරීම ඔබ අනුමත කළ මාර්ගය වේ.” (ලූක් 10:21, NW) ප්‍රේමය සහ ඇදහිල්ල යන පදනම මත අන් අය සමඟ කටයුතු කරන විට, සියල්ලන්ටම එක හා සමානව අප සලකන්නේ එය යෙහෝවා අනුමත කරන මාර්ගය බව අවබෝධය කරගනිමිනි.

11. මුල් ක්‍රිස්තියානි සභාවෙහි සියල්ලන්ටම එක හා සමානව සලකනු ලැබූ බව පැහැදිලිව පෙන්වූයේ කෙසේද?

¹¹ මුල් ක්‍රිස්තියානි සභාවේ, යුදෙව්වන් සහ යුදෙව් නොවන්නන් අතර උස් පහත් භේදයක් තිබුණේ නැත. පාවුල් එය පැහැදිලි කළේ මෙලෙසය. “යහපත කරන සියල්ලන්ටම, එනම් පළමුකොට යුදෙව්වාටද එලෙසම ග්‍රීකයාටද තේජසත් ගෞරවයත් සමාදානයත් ලැබෙන්නේය. මන්ද, දෙවි සියල්ලන්ටම එක හා සමානව සලකන්නේය.” * (රෝම 2:10, 11, NW) ඔවුන් යෙහෝවාගේ මහත් කරුණාවෙන් ප්‍රයෝජන ලබනවාද නැද්ද යන්න රඳා පැවතුණේ ඔවුන්ගේ ජාතිය, පරම්පරාව මත නොව, නමුත් යෙහෝවා මගින් සහ ඔහුගේ පුත්‍ර යේසුස්ගේ මිදීමේ පූජාව මගින් විවෘත වන අපේක්ෂාවන් ගැන ඉගෙනගනිද්දී ඔවුන් ඊට දක්වන ප්‍රතිචාරය මතයි. (යොහන් 3:16, 36) පාවුල් මෙලෙස ලීවේය. “යුදෙව්වෙකු ලෙස හඳුන්වන්නේ මතුපිටින් යුදෙව්වෙකුව සිටින්නෙකු නොවේ. තවද, චර්මච්ඡේදනය ලෙස හඳුන්වන්නේ මතුපිටින් වූ, එනම් මාංසයේ චර්මච්ඡේදනය නොවේ. නමුත් යුදෙව්වෙකු ලෙස හඳුන්වන්නේ ඇතුළතින් යුදෙව්වෙකුව සිටින තැනැත්තාවය. ඔහුගේ චර්මච්ඡේදනය, ආත්මය මාර්ගයෙන් වූ සිතෙහි චර්මච්ඡේදනයක් මිස ලිඛිත නීති මාලාවක් මාර්ගයෙන් සිදු වූවක් නොවේය.” ඊළඟට “යුදෙව්” යන වචනයෙහි අර්ථයට යොමු දක්වමින් (“යුදෙව්” යන්නෙන් අදහස් වන්නේ “යුදයෙන්” යන්නයි. එහි තේරුම ප්‍රශංසා හෝ වර්ණනා කිරීමයි.) පාවුල් මෙසේද පැවසීය. “ඒ තැනැත්තාට ප්‍රශංසාව පැමිණෙන්නේ මිනිසුන්ගෙන් නොව දෙවිගෙන්ය.” (රෝම 2:28, 29, NW) යෙහෝවා සියල්ලන්ටම ප්‍රසංසා කරන්නේ එක හා සමානව සලකමිනි. අපත් එසේම කරනවාද?

12. එළිදරව් 7:9හි ඉදිරිපත් කරන්නේ කවර අපේක්ෂාවද? කාටද?

¹² පසු කාලයකදී, ප්‍රේරිත යොහන් දර්ශනයක් මාර්ගයෙන් දුටුවේ විශ්වාසවන්ත ආලේප ලත් ක්‍රිස්තියානීන්ව “ඊශ්‍රායෙල් පුත්‍රයන්ගේ සෑම ගෝත්‍රයකින්ම මුද්‍රා කරනු ලැබූ” 1,44,000දෙනෙකුගෙන් යුත් ආත්මික ජාතියක් ලෙස දක්වා ඇති ආකාරයයි. ඉන් අනතුරුව යොහන් “මහත් සමූහයක්” දුටුවේය. ‘සියලු ජාතීන්ගෙන්ද ගෝත්‍රවලින්ද ජනයාගෙන්ද භාෂාවලින්ද වූ ඔවුහු, සුදු පැහැති සළු පැළඳ සිංහාසනය ඉදිරියෙහිත් බැටළු පැටවා ඉදිරියෙහිත් සිටගෙන සිටියෝය. ඔවුන් අත තාල පත්‍ර තිබිණ.’ (එළිදරව් 7:4, 9, NW) මෙසේ, නවීන දින ක්‍රිස්තියානි සභාවට ඇතුල් වන්නට නොහැකි වන පරිදි කිසිදු ජාතියක් හෝ භාෂාවක් පිට තහංචි පනවා නැත. ඕනෑම පසුබිමකින් පැමිණෙන පුද්ගලයන්ට මතු පැමිණෙන “මහත් පීඩාවෙන්” බේරී ‘ජීවන වතුරෙන් යුත් උල්පත්වලින්’ බීමට ප්‍රස්තාව ඇත.—එළිදරව් 7:14-17.

යහපත් ප්‍රතිඵල

13-15. (අ) ජාතික සහ සංස්කෘතික වෙනස්කම් අභිභවා යෑමට අපට හැක්කේ කෙසේද? (ආ) සුහදතාව පෙන්නුම් කිරීමෙන් නෙළාගත හැකි ප්‍රයෝජන උලුප්පා දක්වන උදාහරණ සඳහන් කරන්න.

¹³ යහපත් පියෙකු තම දරුවන් හඳුනන්නාක් මෙන් යෙහෝවා අපව හොඳින් හඳුනයි. ඒ හා සමානව, අපද අන් අයගේ සංස්කෘතිය සහ පසුබිම කෙරෙහි උනන්දුවක් දක්වද්දී, ඔවුන්ව තේරුම්ගැනීමට හැකි වන අතර, තිබෙන වෙනස්කම් ද නොපෙනී යයි. වාර්ගික භේද අතුරුදහන් වී, ශක්තිමත් ලෙස ප්‍රේමයෙන් සහ මිතු දමින් බැඳී සිටින්නට මං උදා  වේ. එක්සත්කමද වැඩි වර්ධනය වේ. (1 කොරින්ති 9:19-23) මෙය මනාව පැහැදිලි වන්නේ විදේශ පැවරුම්වල සේවය කරන මිෂනාරිවරුන් ක්‍රියා කර ඇති ආකාරයෙන්ය. මිෂනාරිවරුන්ට විගස පෙනී යන දෙයක් නම්, එම රටවල වෙසෙන අය කෙරෙහි පෞද්ගලික උනන්දුවක් දැක්වීමේ ප්‍රතිඵලයක් ලෙස සභාවල අය සමඟ තමන් සමීප මිතු දමින් බැඳෙන බවයි.—ෆිලිප්පි 2:4.

¹⁴ සියල්ලන්ටම එක හා සමානව සැලකීමෙන් ලැබෙන යහපත් ප්‍රතිඵල බොහෝ රටවල ඉතා පැහැදිලිව දැකගත හැකිය. ඉතියෝපියාවේ පදිංචිව සිටි අක්ලීලූ බ්‍රිතාන්‍යයේ අගනුවර වූ ලන්ඩනයේ පදිංචියට ගිය විට ඔහුට මහත් තනිකමක් දැනිණ. එම රටේ වැසියන් වෙනත් රටවල අයට සාමාන්‍යයෙන් කිසිදු සුහදබවක් නොදක්වන බව අක්ලීලූට පෙනී ගියේය. එමනිසා ඔහුට දැනුණු තනිකම තවත් උග්‍ර විය. ඇත්තෙන්ම මෙය නූතන යුරෝපයේ විශාල නගර බොහොමයක දක්නට ලැබෙන දෙයකි. කෙසේවෙතත්, යෙහෝවාගේ සාක්ෂිකරුවන්ගේ රාජ්‍ය ශාලාවක ක්‍රිස්තියානි රැස්වීමකට ගිය විට ඔහුගේ අද්දැකීම කොතරම් වෙනස් වීද! එහි සිටි අය ඔහුව සාදරයෙන් පිළිගත් අතර, වැඩි වේලාවක් යන්නට මත්තෙන් ඔහුට සැහැල්ලුවක් දැනිණ. මැවුම්කරු ගැන තම අවබෝධය වැඩි කරගනිමින්, ඔහු කෙරෙහි ගැඹුරු කෘතඥතාවක් ඇති කරගනිමින් ඔහු ශීඝ්‍ර ප්‍රගතියක් ලැබීය. එම දිස්ත්‍රික්කයේ සිටි වෙනත් අයට රාජ්‍යයේ ශුභාරංචිය බෙදාහැරීමෙහි සහභාගි වීමට ප්‍රස්තා සෙවීමට ඔහු පමා වූයේ නැත. දවසක්, අක්ලීලූ සමඟ සේවයෙහි සහභාගි වූ අනික් තැනැත්තා ඔහුගේ වර්තමාන ඉලක්ක ගැන ඔහුගෙන් විමසූ විට, ඔහු විගස කීවේ ඔහුගේ භාෂාව වන අම්හාරික් භාෂාව කතා කරන සභාවක කවදා හෝ සාමාජිකයෙකු වන්නට තමා ආශාවෙන් සිටින බවය. එම ප්‍රදේශයේ පිහිටි ඉංග්‍රීසි කතා කරන සභාවේ වැඩිමහල්ලන් ඒ ගැන දැනගත් විට, අක්ලීලූගේ මව් බසින් ප්‍රසිද්ධ බයිබල් කතාවක් දීමට ඔවුන් විධිවිධාන යෙදුවේ ඉමහත් සතුටිනි. මෙම කතාවට පැමිණීම සඳහා කළ ආරාධනයට ප්‍රතිචාරය දක්වමින් විදේශිකයන් හා ස්වදේශිකයන් රැසක් බ්‍රිතාන්‍යයේ මුල් වතාවට අම්හාරික් බසින් පවත්වන ප්‍රසිද්ධ රැස්වීමට සහයෝගය දැක්වීමක් ලෙස එකට රැස් වූහ. වර්තමානයේ එම ප්‍රදේශයෙහි ඉතා දියුණු සභාවක ඉතියෝපියානුවෝ සහ වෙනත් අය එක්සත්ව සිටිති. එහි සිටින බොහෝදෙනෙකුට පෙනී ගොස් ඇත්තේ යෙහෝවා වෙනුවෙන් ස්ථාවරයක් ගෙන, එම ස්ථාවරය ක්‍රිස්තියානි බව්තීස්මයෙන් සංකේතවත් කිරීම සඳහා ඔවුන්ට කිසිදු බාධාවක් නැති බවය.—ක්‍රියා 8:26-36.

¹⁵ එක් එක් පුද්ගලයාගේ පෞද්ගලික ගතිලක්ෂණ සහ පසුබිම් වෙනස්ය. මේවා යමෙකු උසස් හෝ පහත් බව නියම කිරීමට මිනුම් දඬු නොවේ. ඒවා නිකම්ම වෙනස්කම් පමණි. මෝල්ටා දිවයිනේ යෙහෝවාට කැප වූ නවකයන්ගේ බව්තීස්මය නරඹමින් සිටි ස්වදේශීය සාක්ෂිකරුවන් තම සතුට පළ කළේ මහත් උද්‍යෝගයකිනි. බ්‍රිතාන්‍යයේ සිට පැමිණි සහෝදරයන් එම අවස්ථාවේදී සිය හැඟීම් පළ කළේ සතුටු කඳුළු සැලීමෙනි. මොන තරම් කදිම සංයෝගයක්ද! මෝල්ටා සහ බ්‍රිතාන්‍ය ජාතිකයන් දෙපාර්ශ්වයම තම හැඟීම් පළ කළේ එකිනෙකට වෙනස්වය. එනමුත් යෙහෝවා කෙරෙහි ඔවුන්ට තිබූ දැඩි ප්‍රේමය මගින් ඔවුන් අතර තිබූ ක්‍රිස්තියානි සහෝදරත්වයේ බැම්ම තව තවත් ශක්තිමත් විණ.—ගීතාවලිය 133:1; කොලොස්සි 3:14.

අගතිය පරාජය කිරීම

16-18. ක්‍රිස්තියානි සභාව අගතිය පරාජය කළ බව නිරූපණය කරන අද්දැකීමක් සඳහන් කරන්න.

¹⁶ යෙහෝවා සහ අපගේ ක්‍රිස්තියානි සහෝදරයන් කෙරෙහි අපගේ ප්‍රේමය තව තවත් ගැඹුරු වෙත්ම, අප අන් අය දෙස බලන ආකාරය සම්බන්ධයෙන් යෙහෝවාව වඩාත් කිට්ටුවෙන් අනුකරණය කළ හැකිය. ඇතැම් ජාතීන්, වර්ග හෝ සංස්කෘතීන්වල අය කෙරෙහි අපට වරක් යම්හෙයකින් දැනුණු අගති පරාජය කළ හැකිය. නිදසුනකට, දෙවන ලෝක යුද්ධයේදී බ්‍රිතාන්‍ය හමුදාවේ සේවය කළ ඇල්බට්ගේ අද්දැකීම  සලකා බලන්න. වර්ෂ 1942දී සිංගප්පූරුව ජපන් හමුදාව අතට පත් වූ විට ඔහුව අල්ලාගන්නා ලදි. ඔහුව වසර තුනකට පමණ “මාරයාගේ රේල් පාර” තැනීමට යොදවන ලදි. මෙම රේල් පාර පිහිටා තිබුණේ ක්වායි ගඟ උඩින් යන පාලම ලෙස පසු කාලයකදී ප්‍රසිද්ධ වූ ස්ථානය අසලය. යුද්ධය අවසානයේදී ඔහුට නිදහස ලැබෙද්දී ඔහුගේ සිරුරේ බර කිලෝග්‍රෑම් 32ක් විය. ඔහුගේ හක්ක සහ නාසය කැඩී තිබිණ. එමෙන්ම ඔහු අතීසාරයෙන්, වටපණු රෝගයෙන් සහ මැලේරියාවෙන්ද පෙළුණේය. ඔහු සමඟ සිරගත වී සිටි තවත් දහස්දෙනෙකුට ඊටත් වඩා දරුණු ඉරණමකට මුහුණ දීමට සිදු විය. ඔවුන්ගෙන් බොහෝදෙනෙක් ජීවිතක්ෂයට පත් වූහ. ඇල්බට් සියැසින් දුටු සහ අද්දුටු කෲරකම් හේතුවෙන් 1945දී ඔහු සිය මව් රටට පැමිණියේ ජීවිතය තික්ත වූ මනුෂ්‍යයෙකු ලෙසය. දෙවියන් හෝ ආගම ගැන ඔහුට කිසිදු උනන්දුවක් නොතිබිණ.

¹⁷ ඇල්බට්ගේ බිරිඳ අයිරීන් යෙහෝවාගේ සාක්ෂිකාරියක් බවට පත් වූවාය. එමනිසා ඇයව සතුටු කරන්නට ඔහු යෙහෝවාගේ සාක්ෂිකරුවන්ගේ ප්‍රාදේශීය සභාවේ රැස්වීම් කිහිපයකට ගියේය. පූර්ණ-කාලීන සේවයෙහි නියුතුව සිටි තරුණ ක්‍රිස්තියානි සහෝදරයෙකු වූ පෝල්, ඇල්බට්ව හමුවීමට පැමිණියේ ඔහු සමඟ බයිබලය පාඩම් කිරීමටය. යෙහෝවා පුද්ගලයන්ව සලකන්නේ ඔවුන්ගේ හදවතේ තත්වයට අනුව බව වටහාගන්නට ඇල්බට්ට එතරම් කලක් ගත වූයේ නැත. ඔහු සිය ජීවිතය යෙහෝවාට කැප කොට බව්තීස්ම වූයේය.

¹⁸ ඉන්පසුව, පෝල් පදිංචිය සඳහා ලන්ඩනයට ගිය අතර, ජපන් බස ඉගෙනගෙන, ජපන් භාෂාව කතා කරන සභාවක් සමඟ ඇසුරු කළේය. ලන්ඩනයට පැමිණි ජපන් සාක්ෂිකරුවන්ට තමා සමඟ තමා කලින් සිටි සභාව බැලීමට යෑමට ඔහු යෝජනා කළ විට, ඔවුන්ගේ සංස්කෘතියට අයත් අය ගැන ඇල්බට්ට තිබු ප්‍රබල අගතිය එම සහෝදරයන්ට මතක් විය. බ්‍රිතාන්‍යයට යළිත් පැමිණි දා සිට ඇල්බට් උත්සාහ කළේ ජපානයේ අය කෙසේ හෝ හමුවීම මඟහරවාගැනීමටයි. එමනිසා, මතු වූ මෙම තත්වයට ඇල්බට් කෙසේ මුහුණ දෙයිද යන්න ගැන සහෝදරයන්ට සැකයක් ඇති විය. ඇත්තටම ඒ ගැන බියවීමට අවශ්‍යතාවක් තිබුණේ නැත. ඇල්බට් එම අමුත්තන්ව නොමද සහෝදර ස්නේහයකින් යුතුව ඉතා සාදරයෙන් පිළිගත්තේය.—1 පේතෘස් 3:8, 9.

“සිත් විශාල කරගන්න”

19. අප තුළ අනිසි අනුග්‍රහයක් දැක්වීමේ නැඹුරුවාවක් අල්පමාත්‍රයකින්වත් ඇත්නම්, අපට උපකාරවත් විය හැක්කේ ප්‍රේරිත පාවුල්ගේ කවර උපදෙසද?

¹⁹ ප්‍රඥාවන්ත සලමොන් රජ ලීවේ “කිසිවෙකුට අනිසි අනුග්‍රහයක් දැක්වීම හොඳ නැත” යනුවෙනි. (හිතෝපදේශ 28:21, NW) අප හොඳින් දන්නා හඳුනන අය කෙරෙහි ලෙන්ගතු වීම පහසුය. කෙසේවෙතත්, ඇතැම් අවස්ථාවලදී අප එතරම් හොඳින් දන්නා හඳුනන්නේ නැති අය කෙරෙහි වැඩි උනන්දුවක් දැක්වීමට අප තුළ නැඹුරුවාවක් ඇති වන්නේ  නැත. එලෙස වෙනස් විදිහට සැලකීම යෙහෝවාගේ සේවකයෙකුට සුදුසු නොවේ. “සිත් විශාල කරගන්න” කියමින් පාවුල් දුන් පැහැදිලි උපදෙස අප සියලුදෙනාම නිසැකවම අනුගමනය කළ යුතුය. එබැවින්, විවිධ පසුබිම්වලින් පැමිණ ඇති සෙසු ක්‍රිස්තියානීන් කෙරෙහි ප්‍රේමය දැක්වීමෙන් අපි සිතින් විශාල වෙමු.—2 කොරින්ති 6:13, NW.

20. සියල්ලන්ටම එක හා සමානව සලකන අපගේ දෙවි යෙහෝවාව අප අනුකරණය කළ යුත්තේ ජීවිතයේ කවර පැතිවලදීද?

²⁰ ස්වර්ගික කැඳවීම ලැබීමේ වරප්‍රසාදය අපට තිබුණත්, පොළොව මත සදාකල් ජීවත් වීමේ අපේක්ෂාව අප සතු වුවත්, එක එඬේරෙකු යටතේ සිටින එක රැළක් ලෙස එක්සත්කම භුක්ති විඳීමට සියල්ලන්ටම එක හා සමානව සැලකීම මහෝපකාරී වේ. (එෆීස 4:4, 5, 16) සියල්ලන්ටම එක හා සමානව සලකන අපගේ දෙවි යෙහෝවාව අනුකරණය කිරීමට අප දරන වෑයම අපගේ ක්‍රිස්තියානි දේවසේවයේදී, අපගේ පවුල් තුළ, සභාවන් තුළ, ඇත්තෙන්ම ජීවිතයේ සියලුම පැති තුළ අපට උපකාරවත් විය හැක. ඒ කෙසේද? මෙම විෂය ඊළඟ ලිපියෙහි සාකච්ඡා කෙරේ.

[පාදසටහන්වල]

ඔබ පිළිතුරු දෙන්නේ කෙසේද?

• සියල්ලන්ටම එක හා සමානව සැලකීමේ ගුණාංගය යෙහෝවා රාහාබ් සහ ගිබියොන්වරුන් සම්බන්ධයෙන් නිරූපණය කළේ කෙසේද?

• යේසුස් උගන්වද්දී සියල්ලන්ටම එක හා සමානව සලකන බව නිරූපණය කළේ කෙසේද?

• සංස්කෘතික හෝ ජාතික වශයෙන් පවතින අගතිය පරාජය කිරීමට අපට කුමක් උපකාරවත් විය හැකිද?

[පාඩම් ලිපියේ ප්‍රශ්න]

[13වන පිටුවේ පින්තූරය]

ඊශ්‍රායෙල් ජනයා කානාන් දේශය යටත් කරගැනීම අරඹයි

[15වන පිටුවේ පින්තූරය]

සමාරියේ ස්ත්‍රියකට සාක්ෂි දැරීමෙන් යේසුස් වැළකී සිටියේ නැත

[16වන පිටුවේ පින්තූරය]

බ්‍රිතාන්‍යයේ අම්හාරික් බසින් පවත්වන ප්‍රසිද්ධ රැස්වීමක්

[16වන පිටුවේ පින්තූරය]

යෙහෝවා කෙරෙහි ඇල්බට්ට තිබූ ප්‍රේමය අගතිය පරාජය කිරීමට ඔහුට උපකාරවත් විය