බයිබලය ලියූ මුල් භාෂාවල ෂෙයෝලය යන හෙබ්‍රෙව් වචනය හා හේදීසය යන ග්‍රීක වචනය වාර 70කට වඩා සඳහන් කර තිබෙනවා. බයිබලයේ එම වචන දෙක භාවිත කර තිබෙන්නේ මරණය ගැන සඳහන් කරන යම් අවස්ථාවලයි. බයිබල් පරිවර්තන කිහිපයකම එම වචන පරිවර්තනය කිරීමට “පාතාලය,” හා “පාතාල ලෝකය” යන වචන යොදාගෙන තිබෙනවා. නමුත් ෂෙයෝලය හා හේදීසය යන වචනවලින් ඇත්තටම අදහස් කරන්නේ කුමක්ද කියා අපි සලකා බලමු.

දේශනාකාරයා 9:10හි සඳහන් වන්නේ මෙසේයි. “ඔබට කළ හැකි සෑම දෙයක්ම ඔබේ මුළු උත්සාහයෙන්ම කරන්න. මන්ද ඔබ යන මිනී වළේදී [හෙබ්‍රෙව් බසින් ෂෙයෝලය] කිසි වැඩක් කරන්නවත් කිසි දෙයක් ගැන කල්පනා කරන්නවත් ඔබට නොහැක. එහි දැනුමද ප්‍රඥාවද නැත.” එම පදයට අනුව ෂෙයෝලය නමැති වචනයෙන් මිය ගිය කෙනෙකුව භූමදාන කරන ස්ථානය අදහස් කරනවාද? නැහැ. මන්ද ඒ සඳහා බයිබලයේ වෙනත් වචන භාවිත කර තිබෙනවා. (උත්පත්ති 23:7-9; මතෙව් 28:1) පොදු සුසාන භූමියක් ගැන හෝ සමූහ මිනී වළක් ගැන සඳහන් කරන විටත් ෂෙයෝලය යන හෙබ්‍රෙව් වචනය බයිබලයේ භාවිත කර නැහැ.—උත්පත්ති 49:30, 31.

එසේනම් බයිබලයේ ෂෙයෝලය හා හේදීසය නමැති වචන භාවිත කර තිබෙන්නේ කුමක් විස්තර කිරීමටද? ඉහත සලකා බැලූ කරුණුවලින් පැහැදිලි වන්නේ එය නිශ්චිත ස්ථානයක් නොවන බවයි. එම වචනවලට සංකේතාත්මක අර්ථයක් තිබෙනවා. නිදසුනකට යෙසායා 5:14හි පවසන දෙය සලකා බලන්න. “මිනී වළද [ෂෙයෝලය] එහි කට අප්‍රමාණ ලෙස ඇරගෙන ඔවුන්ව ගිලගන්න මහත් ආශාවෙන් බලාගෙන සිටියි.” ඉන් පැහැදිලි වන්නේ ෂෙයෝලය කට ඇර, මිය ගිය අය ගණන් කළ නොහැකි තරම් සංඛ්‍යාවක් ගිලගෙන තිබුණත් එහි ආශාව සන්සිඳී නැති බවයි. (හිතෝපදේශ 30:15, 16) සීමිත සංඛ්‍යාවක් පමණක් භූමදාන කළ හැකි සුසාන භූමියක් මෙන් නොව, ‘මිනී වළ සෑහීමට පත් වන්නේ නැහැ.’ (හිතෝපදේශ 27:20) ඒ අනුව ෂෙයෝලය හෝ හේදීසය යන වචන භාවිත කරන්නේ යම් ස්ථානයක් විස්තර කිරීමට නොව මිනිසුන් මිය යන විට ඔවුන් මරණය නමැති නින්දෙහි සැතපී සිටින බව පෙන්වීමටයි.

ෂෙයෝලය හා හේදීසය යන වචන තවත් හොඳින් තේරුම්ගැනීමට නැවත නැඟිටීම ගැන බයිබලයෙහි සඳහන් කරුණු සලකා බැලීමත් ප්‍රයෝජනවත් වෙනවා. බයිබලයේ මෙම වචන මිය ගිය කෙනෙකු සම්බන්ධයෙන් භාවිත කරන විට ඉන් අදහස් කරන්නේ එම පුද්ගලයා නැවත  නැඟිටීමක් ලබන තුරු සැතපී සිටින බවයි. a (යෝබ් 14:13; ක්‍රියා 2:31; එළිදරව් 20:13) යෙහෝවා දෙවිට සේවය කර මිය ගිය අය ගැන පමණක් නොව දෙවිට සේවය නොකර මිය ගිය අය ගැන සඳහන් කරන විටද බයිබලයේ එම වචන දෙක භාවිත කර තිබෙනවා. (උත්පත්ති 37:35; ගීතාවලිය 55:15) “ධර්මිෂ්ඨ අය වගේම අධර්මිෂ්ඨ අයත් නැවත නැඟිටින බව” බයිබලයෙහි සඳහන් වන්නේ ඒ නිසයි.—ක්‍රියා 24:15.