සින්ටි සහ රෝමා ගෝත්‍රිකයන් දසදහස් ගණනක් ජර්මනියේ ජීවත් වෙනවා. * මෑතකදී යෙහෝවා දෙවිගේ සාක්ෂිකරුවන් බයිබලය මත පදනම් පත්‍රිකා, පොත් පත් සහ වීඩියෝ ඔවුන්ගේම මව් භාෂාව වන රෝමනි භාෂාවෙන් ඉදිරිපත් කළා. *

2016 වසරේ සැප්තැම්බර් සහ ඔක්තෝබර් මාසවලදී සාක්ෂිකරුවන් විශේෂ වැඩසටහනක් සැලසුම් කළා. ජර්මනියේ බර්ලින්, බ්‍රේමර්හාවන්, ෆ්‍රෙයිබර්ග්, හැම්බර්ග් සහ හයිඩල්බර්ග් කියන නගරවල ජීවත් වන සින්ටි සහ රෝමා ගෝත්‍රිකයන්ට රෝමනි භාෂාවෙන් තියෙන බයිබල් ප්‍රකාශන ලබා දෙන්න එයාලා සැලසුම් කළා. ඒ වගේම නමස්කාර මධ්‍යස්ථානවල රෝමනි භාෂාවෙන් විශේෂ රැස්වීම් තියන්නත් එයාලා සැලසුම් කළා.

සාක්ෂිකරුවන්ගේ ඒ විශේෂ වැඩසටහන ගැන සින්ටි සහ රෝමා ගෝත්‍රිකයන් හුඟදෙනෙක් පුදුමයටත් සතුටටත් පත් වුණා. “එයාලව හම්බ වෙන්න අපි විශේෂ වෑයමක් දරපු නිසා එයාලා ගොඩක් සතුටු වුණා” කියලා ඒ වැඩසටහනට සහභාගි වුණ ඔන්ඩ්‍රේ සහ එස්තර් යුවළ පැවසුවා. බයිබලයේ තියෙන පණිවිඩය තමන්ගේම භාෂාවෙන් අහන්නයි කියවන්නයි ලැබුණාම ඒක ගොඩක් අයගේ හිතට වැදුණා. ‘බයිබලයේ තියෙන තොරතුරු සොයා බලන්න ඕන ඇයි?’ කියන වීඩියෝ එක රෝමනි භාෂාවෙන් බලපු තරුණියකට ඒක අදහගන්න බැරි වුණා. “මේක මගේ භාෂාව” කියලා එයා කීප සැරයක්ම පුදුමයෙන් කිව්වා.

හැම්බර්ග්වල මේ විශේෂ වැඩසටහනට සහභාගි වුණ මතියස් මෙහෙම කියනවා. “මාත් මගේ බිරිඳත් හිටපු කණ්ඩායමේ සාක්ෂිකරුවන් අටදෙනෙක් හිටියා. අපි ගිය ප්‍රදේශයේ සින්ටි සහ රෝමා ගෝත්‍රිකයන් 400ක් විතර ජීවත් වෙනවා. අපිට හම්බ වෙච්ච හැම කෙනෙක්ම අපේ ප්‍රකාශන ගන්න කැමති වුණා.” හැම්බර්ග්වල සේවය කරපු එක සහෝදරියක් මෙහෙම කිව්වා. “තමන්ගේම භාෂාවෙන් පොත් පත් තියෙනවා දැක්කාම සමහර අය ඇඬුවා.” ඒ විතරක් නෙමෙයි සමහරු ඒ වෙලේම ඒ ප්‍රකාශන ශබ්ද නඟලා කියවන්න පටන්ගත්තා. තවත් අය එයාලගේ යාළුවන්ටත් දෙන්න ප්‍රකාශන ඉල්ලගත්තා.

රෝමනි භාෂාවෙන් තියෙන අපේ විශේෂ රැස්වීම්වලට ආරාධනා කළාම ගොඩක් අය ඒ ආරාධනාව පිළිගත්තා. හැම්බර්ග්වල 94දෙනෙක් රැස්වීමට ආවා. එයාලගෙන් හුඟදෙනෙක් කලින් කවදාවත් අපේ රැස්වීම්වලට සහභාගි වෙලා තිබුණේ නැහැ. හයිඩල්බර්ග් කිට්ටුව තියෙන රෙයිලින්ගන්වල පවත්වපු රැස්වීමට 123දෙනෙක් ආවා. රැස්වීමෙන් පස්සේ රෝමනි භාෂාව කතා කරන පස්දෙනෙක් බයිබලය පාඩම් කරන්න කැමති වුණා.

ඒ විශේෂ වැඩසටහන නිසා පත්‍රිකා සහ සඟරා 3,000ක් විතර බෙදාහරින්න සාක්ෂිකරුවන්ට පුළුවන් වුණා. සින්ටි සහ රෝමා ගෝත්‍රිකයන් 360කට වඩා වැඩිදෙනෙක් එක්ක බයිබලේ තියෙන තොරතුරු සාකච්ඡා කරන්න අවස්ථාව ලැබුණා. 19දෙනෙක් බයිබලය පාඩම් කරන්නත් පටන්ගත්තා. “දෙවි අපිටත් අවස්ථාවක් දුන්නා ඔහුට ළං වෙන්න. ඒක කොච්චර දෙයක්ද” කියලා එයාලගෙන් හුඟදෙනෙක් කිව්වා.