2013 ජූලි මාසේ බ්‍රසීලයේ සාඕ ෆේලික්ස් ඩූ ක්ෂින්ගු නගරයේ ජීවත් වෙන යෙහෝවා දෙවිගේ සාක්ෂිකරුවන් 28දෙනෙක් කයාපූ සහ යූරූනා කියන රතු ඉන්දියානුවන් ඉන්න ප්‍රදේශයට ගියා. ඔවුන් එහේ ගියේ ක්ෂින්ගු ගඟේ අඩි 50ක් දිග බෝට්ටුවකයි. ඇමසන් ගඟට එකතු වෙන ක්ෂින්ගු ගඟ කිලෝමීටර් 2,092ක් දිගයි.

ඒ කණ්ඩායම එහේ ගියේ ගඟ අවට ගම්මානවල ජීවත් වෙන මිනිස්සුන්ට දේවරාජ්‍යය ගැන ශුභාරංචිය දේශනා කරන්නයි. මේ ගමනේ තුන්වෙනි දවසේ සාක්ෂිකරුවන් කොක්‍රයිමොරො කියන ගම්මානයට ආවා. එහේ අය හරිම සතුටින් සාක්ෂිකරුවන්ව පිළිගත්තා. එහේ හිටපු කාන්තාවක් මොනවදෝ අතින් සංඥා කළා. ඔවුන් එක්ක ගිය ඒ ප්‍රදේශයේ කෙනෙක් ඒ මොකද්ද කියලා පැහැදිලි කළා. ඔහු කිව්වේ මෙහෙමයි. “එයා කියනවා ‘අපි ඔයාලව සාදරෙන් පිළිගන්නවා. අපි කැමතියි ඔයාලා ගැන දැනගන්න’ කියලා.”

සාක්ෂිකරුවන් ඔවුන්ට හම්බ වුණ හැමෝටම දේශනා කළා. සමහර අයට පෘතුගීසි භාෂාවෙනුත් තවත් සමහර අයට අතින් සංඥා කරමිනුත් ඔවුන් කතා කළා. ඒ අයත් එක්ක කතා කරන්න සාක්ෂිකරුවන්ගේ පොත් පත්වල තිබුණු ලස්සන පින්තූර ගොඩක් උදව් වුණා. ඒගොල්ලෝ හරිම උනන්දුවෙන් සාක්ෂිකරුවන්ගේ පොත් පත් ලබාගත්තා. විශේෂයෙන්ම ‘දෙවිට සවන් දෙන්න’ කියන සඟරාව ලබාගන්න ගොඩක් අය කැමති වුණා.

ජේසන් කියන්නේ සාඕ ෆේලික්ස් ඩූ ක්ෂින්ගු නගරයේ සේවය කරන විශේෂ පුරෝගාමියෙක්. එයා ඒ ගමේ කෙනෙක්ට ‘මගේ බයිබල් කතන්දර පොත’ කියන ප්‍රකාශනය දුන්නාම ලැබුණු ප්‍රතිචාරය ගැන විස්තර කළේ මෙහෙමයි. “එයා පොත දිහා බලලා ඒක අත් දෙකෙන්ම හයියෙන් අල්ලගත්තා. ටික වෙලාවකටත් ඒක බිම තියන්න එයා කැමති වුණේ නෑ.”

සාක්ෂිකරුවන් ඒ ගම්වල අයට පොත් පත් 500ක් විතර දුන්නා. කවටීරී ගමේ හිටපු අය පාරාදීසය ගැන බයිබලේ තිබුණු දේවල් දැනගත්තාම ඔවුන් ගොඩක් සතුටු වුණා. එහේ හිටපු කයාපූ කියන ගෝත්‍රයට අයිති ටොන්ජයික්වා මෙහෙම කිව්වා. “පාරාදීසේ මිනිස්සු අපි වගේ නිදහසේ සතුටින් ජීවත් වෙයි නේද?”

සාක්ෂිකරුවන්ගේ මේ ගමන ගැන සාඕ ෆේලික්ස් ඩූ ක්ෂින්ගු නගරයේ ගොඩක් අය දැනං හිටියා. ඒ නිසා ඒ අය සාක්ෂිකාරියක් වෙන සීමෝනීට කියලා තිබුණා ඒ ගම්වල අය සාක්ෂිකරුවන්ව ගම ඇතුළටවත් ගනීද දන්නේ නෑ කියලා. ඒ වුණාට ඇත්තටම වුණ දේ ගැන සීමෝනී කිව්වේ මෙහෙමයි. “එහේ අය අපිව ආදරෙන් පිළිගත්තා. ඒ නිසා හම්බ වුණ හැමෝටම අපි දේශනා කළා.”