၁ ဘုရင်များ ၁၇:၁-၂၄
၁၇ ဂိလဒ်ပြည်မှာနေတဲ့+ တိရှဘိရွာသား ဧလိယက*+ “အစ္စရေးတို့ရဲ့ဘုရား၊ ကျွန်တော်ကိုးကွယ်တဲ့ အသက်ရှင်နေတဲ့ဘုရား ယေဟောဝါကို တိုင်တည်ပြီး ကျွန်တော်ပြောမယ်။ မိုးရွာစေ၊ နှင်းကျစေလို့ ကျွန်တော် မပြောမချင်း ဒီနှစ်တွေအတွင်းမှာ မိုးမရွာ၊ နှင်းမကျစေရဘူး”+ ဆိုပြီး အာဟပ်ကို ပြောတယ်။
၂ ယေဟောဝါက ဧလိယကို၊
၃ “ဒီကနေထွက်ပြီး အရှေ့အရပ်ကို သွားပါ။ ဂျော်ဒန်မြစ်အရှေ့ဘက် ခေရိတ်သဲချောင်းမှာ ပုန်းနေပါ။
၄ ချောင်းရေကို မင်းသောက်ရမယ်။ မင်းအတွက် စားစရာယူလာပေးဖို့ ကျီးနက်ကြီးတွေကို ငါမှာထားမယ်” ဆိုပြီး ပြောတယ်။+
၅ ဒါနဲ့ ဧလိယက ချက်ချင်း ထွက်သွားပြီး ယေဟောဝါ ပြောတဲ့အတိုင်း ဂျော်ဒန်မြစ်အရှေ့ဘက် ခေရိတ်သဲချောင်းမှာ သွားနေထိုင်တယ်။
၆ ကျီးနက်ကြီးတွေက မုန့်နဲ့အသားကို မနက်ပိုင်းမှာ တစ်ကြိမ်၊ ညနေပိုင်းမှာ တစ်ကြိမ် ယူလာပေးတယ်။ ချောင်းရေကို သောက်ရတယ်။+
၇ ဒါပေမဲ့ တိုင်းပြည်မှာ မိုးခေါင်တဲ့အတွက် မကြာခင်မှာပဲ ချောင်းရေ ခန်းခြောက်လာတယ်။+
၈ အဲဒီအခါ ယေဟောဝါက ဧလိယကို၊
၉ “ထပါ။ ဆိုင်ဒုန်ပြည်၊ ဇရတ္တမြို့ကို သွားပြီး အဲဒီမှာ နေထိုင်ပါ။ မင်းကို ကျွေးမွေးဖို့ အဲဒီက မုဆိုးမတစ်ယောက်ကို ငါမှာထားမယ်”+ ဆိုပြီး ပြောတယ်။
၁၀ သူလည်း ထပြီး ဇရတ္တမြို့ကို သွားတယ်။ မြို့တံခါးဝကို ရောက်တော့ မုဆိုးမတစ်ယောက် ထင်းကောက်နေတာကို တွေ့တယ်။ ဒါနဲ့ အဲဒီအမျိုးသမီးကို “ရေနည်းနည်းလောက် တိုက်ပါလား” လို့ပြောတယ်။+
၁၁ အမျိုးသမီး ရေသွားယူတဲ့အခါ ဧလိယက “မုန့်တစ်ချပ်လောက် ယူလာပေးပါလား” လို့ပြောပြန်တယ်။
၁၂ အမျိုးသမီးက “ရှင်ကိုးကွယ်တဲ့ အသက်ရှင်နေတဲ့ဘုရား ယေဟောဝါကို တိုင်တည်ပြီး ပြောပါရစေ။ ကျွန်မမှာ ဘာမုန့်မှ မရှိဘူး။ အိုးကြီးထဲမှာ ဂျုံမှုန့်လက်တစ်ဆုပ်စာ၊ အိုးသေးထဲမှာလည်း ဆီနည်းနည်းပဲ ကျန်တယ်။+ အိမ်ပြန်ပြီး ကျွန်မတို့သားအမိအတွက် မုန့်လုပ်ဖို့ အခု ထင်းစတွေ လိုက်ကောက်နေတာ။ ကျွန်မတို့ စားပြီးရင် သေဖို့ပဲရှိတော့တယ်” လို့ပြောတယ်။
၁၃ ဒါနဲ့ ဧလိယက “စိတ်မပူပါနဲ့။ အိမ်ပြန်ပြီး ပြောတဲ့အတိုင်း လုပ်ပါ။ ဒါပေမဲ့ ရှိတာလေးနဲ့ မုန့်တစ်လုံး အရင်လုပ်ပြီး ကျုပ်ဆီ ယူလာပေးပါ။ ပြီးမှ ခင်ဗျားတို့သားအမိအတွက် မုန့်လုပ်ပါ။
၁၄ အစ္စရေးတို့ရဲ့ဘုရား ယေဟောဝါက ‘မြေပေါ်မှာ ငါယေဟောဝါ မိုးရွာစေတဲ့နေ့ မရောက်မချင်း အိုးကြီးထဲမှာ ဂျုံမှုန့်ကုန်မှာ မဟုတ်ဘူး။ အိုးသေးထဲမှာ ဆီပြတ်မှာမဟုတ်ဘူး’ လို့မှာထားတယ်”+ ဆိုပြီး ပြောတယ်။
၁၅ အမျိုးသမီးလည်း သွားပြီး ဧလိယ ပြောတဲ့အတိုင်း လုပ်တယ်။ ဒါကြောင့် သူ့မိသားစုနဲ့ ဧလိယအတွက် ရက်ပေါင်းများစွာ စားစရာမပြတ်ဘူး။+
၁၆ ဧလိယကတစ်ဆင့် ယေဟောဝါ ပြောခဲ့တဲ့အတိုင်း အိုးကြီးထဲမှာ ဂျုံမှုန့်မကုန်ဘူး။ အိုးသေးထဲမှာလည်း ဆီမပြတ်ဘူး။
၁၇ နောက်ပိုင်းမှာ အိမ်ရှင်မရဲ့ သားလေးဟာ နေမကောင်းဖြစ်လာတယ်။ အဖျားကြီးလွန်းလို့ သေသွားရှာတယ်။+
၁၈ အဲဒီအခါ အမျိုးသမီးက “စစ်မှန်တဲ့ဘုရားသခင်ရဲ့လူ၊ ရှင် ဘာကြောင့် ဒီလိုလုပ်ရတာလဲ။ ကျွန်မရဲ့အပြစ်ကို ပြန်သတိရစေချင်လို့၊ ကျွန်မသားကိုသေစေချင်လို့ ရှင် ရောက်လာတာလား” ဆိုပြီး ပြောတယ်။+
၁၉ ဒါနဲ့ ဧလိယက “ခင်ဗျားရဲ့သားကို ပေးပါ” ဆိုပြီး အမျိုးသမီးရဲ့ ရင်ခွင်ထဲက ကလေးကို ယူလိုက်တယ်။ ပြီးတော့ သူနေတဲ့ အိမ်မိုးအထက်ခန်းကို ချီသွားပြီး သူ့အိပ်ရာပေါ်မှာ ချထားလိုက်တယ်။+
၂၀ အဲဒီနောက် “ယေဟောဝါဘုရား၊ ကျွန်တော်တည်းခိုနေတဲ့အိမ်က ဒီမုဆိုးမကိုပါ ဒုက္ခရောက်စေတော့မှာလား။ အခု သူ့သားလေး သေဆုံးသွားပါပြီ” ဆိုပြီး ယေဟောဝါကို ပြောတယ်။+
၂၁ ပြီးတော့ ကလေးအပေါ်မှာ သုံးကြိမ်တိတိ ကိုယ်ကိုကိုင်းပြီး “ယေဟောဝါဘုရား၊ ဒီကလေးကို အသက်ပြန်ရှင်စေပါ ” ဆိုပြီး ယေဟောဝါကို ဆုတောင်းတယ်။
၂၂ ဧလိယ တောင်းလျှောက်တာကို+ ယေဟောဝါ နားထောင်တဲ့အတွက် ကလေး အသက်ပြန်ရှင်လာတယ်။+
၂၃ ဧလိယက ကလေးကို အိမ်မိုးအထက်ခန်းကနေ အိမ်ထဲခေါ်လာတယ်။ ပြီးတော့ “ကြည့်ပါဦး၊ ခင်ဗျားသားလေး အသက်ရှင်လာပြီ” ဆိုပြီး သူ့အမေဆီ အပ်လိုက်တယ်။+
၂၄ အဲဒီအခါ အမျိုးသမီးက “ရှင်ဟာ တကယ်ပဲ ဘုရားသခင်ရဲ့လူဖြစ်မှန်း ကျွန်မ သိပါပြီ။+ ရှင်ပြောတဲ့ ယေဟောဝါဘုရားရဲ့ စကားဟာ အမှန်တရားပဲဆိုတာကိုလည်း သိပါပြီ” လို့ ဧလိယကို ပြောတယ်။
အောက်ခြေမှတ်ချက်များ
^ အဓိပ္ပာယ်၊ “ငါ့ဘုရားဟာ ယေဟောဝါ။”
