Kiringo tënë ni ayeke changé bango ndo so e yeke na ni na ndö ti gigi.

So Nzapa aleke apendere ye na yâ ti dunia, ka ngbanga ti nyen la lo ye si e bâ gï pasi na yâ ti gigi ti e?

Azo so ahinga Nzapa ape abâ pasi tongana mbeni ye so afa so Nzapa apensé na e ape wala même so lo yeke dä ape. Ala pensé so pasi so e yeke bâ afa so (1) Nzapa ayeke na ngangu ti kanga lege na ni ape, (2) Lo ye ti kanga lege na ni ape wala (3) Lo yeke dä ape.

Eskê gï araison so afa ni ge so la asara si e yeke bâ pasi?

Nzapa acréé e ti tene e bâ pasi ape.

Lo ye si e duti na ngia.

“Tongana azo aduti na ngia nga ala sara ye ti nzoni na yâ ti gigi ti ala, mbeni ye ti nzoni ti hon ni ayeke dä pëpe; nga a yeke nzoni ti tene zo oko oko ate ye, anyon ye nga lo bâ nzoni na peko ti ngangu kua kue so lo sara. So ayeke matabisi so Nzapa amû na zo la.”​—ZO-TI-FA-TENE 3:12, 13.

Nzapa amû lani na azo ye kue so ala bezoin ni si ala vivre sân ti bâ pasi.

Lo leke lani ape ti tene ala wala amolenge ti ala abâ pasi.

“[Nzapa a]tene na ala: ‘Ala dü, ala ga gbani, ala si ndö ti sese na ala sara si sese ni aga na gbe ti ala.’”​—GENÈSE 1:28.

Kozo koli na kozo wali amû lani desizion ti ke yanga ti Nzapa.

Ye so ala sara so aga na pasi mingi na ndö ti ala, nga na amolenge ti ala kue.

“Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.”​—AROMAIN 5:12. *

Nzapa acréé e azo ti tene e wani la e fa lege na terê ti e ape.

A créé e pëpe ti komande terê ti e, legeoko tongana ti so a créé e pëpe ti vivre na gbe ti ngu.

“Zo so ayeke tambela, a yeke même na lo wani ti fa lege na gere ti lo pëpe.”​—JÉRÉMIE 10:23.

Nzapa aye ti tene e bâ pasi ape.

Lo ye ti tene tongana lege ayeke dä e sara kue ti kpe akpale.

“Tongana fade mo dengi mê na acommandement ti mbi, ka siriri ti mo ayeke ga tongana kota ngu.”​—ÉSAÏE 48:18.