TONGANA ZO AYEKE NA MBENI KOBELA SO A PEUT TI SAVA NI APE WALA MBENI MBAGE TI TERÊ TI LO ABUBA YE NI SO APEUT TI CHANGÉ AYE NA YÂ TI FINI TI LO. Ulf ayeke mbeni koli so kozo lo yeke na nzoni seni, me na peko ti so lo paralysé, lo tene: “Vundu ahon lani ndö ti mbi mingi. Mbi yeke na ngangu nga na courage encore ape . . . Mbi bâ terê ti mbi, mbi yeke ye oko ape.”

Aye so asi na Ulf afa na e so, e ye wala e ye ape e yeke tï kobela. Me, e peut ti sara ambeni ye so apeut ti sara si e tï kobela mingi ape. Me ka tongana a si so e komanse ti wara kpale ti seni? Eskê a ye ti fa so e peut ti duti na ngia encore ape? Ên-ën, na e yeke bâ ande ndani. Kozoni kue, zia e bâ ambeni wango so apeut ti mû lege na e ti duti na nzoni seni.

ZIA SI ‘SARANGO YE TI TERÊ TI MO AYEKE LAKUE NZONI.’ (1 Timothée 3:2, 11). Mingi ni, tongana zo ate ye mingi wala lo nyon sämba mingi lo yeke wara kpale ti seni me nga ayeke hunzi nginza ti lo! Bible atene: “Ga pëpe oko ti azo so ayeke nyon vin ahon ndö ni, na azo so ayeke te nyama ahon ndö ni, ndali ti so ngbâa ti sämba na zo ti tengo ye ahon ndö ni ayeke tï na yâ ti yere.”—aProverbe 23:20, 21.

KPE AYE SO AYEKE BUBA TERÊ TI ZO. Bible atene: “Zia e sukula terê ti e wani ti zi aye kue so asara si terê na bibe aga sioni.” (2 aCorinthien 7:1). Azo ayeke buba terê ti ala tongana ala nyon manga, mbangi wala ala nyon sämba ahon ndö ni. Mbeni ndokua na États-Unis so ayeke bâ tënë na ndö ti akobela atene so manga “ayeke sara si zo awara ambeni kobela nga ayeke buba mingi ti aye ti terê ti zo.”

BÂ TERÊ TI MO NGA NA FINI TI MO TONGANA PENDERE CADEAU. Bible atene: “Ndali ti [Nzapa] la e yeke na fini, e yeke tambela na e yeke dä.” (Kusala 17:28). Ti bâ fini na nene ni ayeke sara si e yeke mû arisque kirikiri ape, atâa e yeke na place ti kua, e yeke kpe na oto wala e yeke sara ambeni ye nde. A yeke nzoni ti kpe aye so aga na zo nzerengo terê gï teti kete ngoi me so na pekoni aga na zo kpale ti seni na yâ ti gigi ti lo kue.

KPE ASIONI PENSÉ. Apensé ti e apeut ti sara ye mingi na ndö ti seni ti e. Ni la, sara kue ti kpe ti pensé mingi, ti sara ngonzo ahon ndö ni, ti sara bê ti ye nga na ambeni ye ni  nde. Psaume 37:8 atene: “Zia lege ti ngonzo nga zia si ngonzo ahon ndö ti mo pëpe.” Mbeni versê ni nde atene: “Ala gi bê ti ala lâ oko pëpe ngbanga ti kekereke, ndali ti so kekereke ayeke ande na agingo bê ti lo wani.”—Matthieu 6:34.

GI TI PENSÉ GÏ NA ANZONI YE. A-Proverbe 14:30 atene: “Bê so ayeke kpô asara si terê ti zo awara fini.” Mbeni versê ni nde atene: “Bê so ayeke na ngia ayeke nzoni yorö.” (aProverbe 17:22). Awandara ayeda na tënë so. Mbeni docteur na Écosse atene: “Tongana mo yeke na ngia laso, na yâ ti angoi so ayeke ga ande mo yeke wara kpale ti seni mingi ape tongana a haka mo na azo so ayeke na ngia laso ape.”

SARA KUE TI GBU NGANGU. Tongana ti so asi na Ulf, na ambeni ngoi, ye so mo peut ti sara ayeke gï ti gbu ngangu na yâ ti kpale ni awe. Mo peut ti bâ aye so mo lingbi ti sara ti gbu ngangu na yâ ni. Ti ambeni, kpale ni apeut ti sara si ala découragé mingi, na kpale ni apeut ti kiri aga kota. A-Proverbe 24:10 atene: “Tongana bê ti mo anze kue na ngoi ti ngangu kpale, ngangu ti mo ayeke kiri gï kete.”

Ti ambeni zo ni nde, peut-être na tongo nda ni ala découragé, me na pekoni ala kiri awara ngangu. Ala manda ti vivre na kpale ti ala ni nga ti gbu ngangu na yâ ni. A yeke ye so Ulf asara la. Lo tene so na peko ti so lo sambela mingi nga lo gbu li na ndö ti atënë ti Bible, lo “komanse ti gi ti bâ aye so lo peut ti sara ahon ti bâ gï aye so lo peut ti sara ape.” Lo manda nga ti bâ mawa ti azo nga ti sara nzoni bê na ala, na ye so apusu lo ti fa atënë ti Bible so adë bê na amba ti lo.

Mbeni zo ni so abâ pasi mingi ayeke Steve. Na ngu 15, lo londo na li ti keke lo tï, na lo paralysé a londo na go ti lo juska na gere ti lo. Na ngoi so lo yeke na ngu 18, lo kiri lo komanse ti sara kua na maboko ti lo. Na pekoni lo gue na université, na kâ lo tï na yâ ti nyongo mbangi, sämba nga na lango-sioni. Lo yeke lani zo so ayeke na beku ape juska na ngoi so lo komanse ti manda Bible, na ye so asara si pensé ti lo na ndö ti gigi achangé nga lo changé asioni sarango ye ti lo. Lo tene: “Teti angu mingi mbi bâ so mbeni ye amanke mbi, me fadeso mbi pensé tongaso ape. Mbi yeke na siriri, ngia nga mbi yeke zia bê ti mbi gï na ndö ti aye so mbi yeke na ni.”

Ye so asi na Steve nga na Ulf adabe ti e na Psaume 19:7, 8 so atene: “Ndia ti Jéhovah ayeke mbilimbili-kue, a sara si zo akiri awara ngangu. . . . Yanga so Jéhovah amû na ndö ti aye nde nde ayeke mbilimbili, na a zia ngia na bê ti zo; commandement ti Jéhovah, sioni ye ayeke dä pëpe, na a sara si lê ti zo azi.”