Janet atene: “Kete na peko ti so babâ ti mbi akui, koli ti mbi atene na mbi so ni ngbâ ti gue na peko ti mbeni wali. Kete na pekoni, sân ti tene na e, lo ro abongo ti lo kue, lo hon, lo zia mbi na amolenge use.” Janet awara mbeni kua, me nginza ti kua ni akono ti bâ na lege ti sewa ni ape. Na ndo ti kpale ti nginza ni, lo wara nga ambeni kpale nde. Lo tene: “Gingo bê ndali ti akota kua so lo zia na mbi, mbi oko, awoko mbi kue. A sara mbi nzoni ape so mbi lingbi pëpe ti bâ lege ti amolenge ti mbi nzoni, tongana tanga ti ababâ na amama. Na même fadeso, mbi yeke na gingo bê na ndo ti fason so azo ayeke bâ na mbi na amolenge ti mbi. Wala ala yeke pensé atene mbi la mbi sara si mariage ti e ayeke na yâ ti kpale so?”

Sambela la amû maboko na Janet ti hon ndo ti gingo bê ti lo nga ti lë kpengba songo na Nzapa. Lo tene: “A yeke ka ngangu mingi na mbi na bï, teti so ndo adë kpô, na mbi yeke pensé ahon ndo ni. Sambela nga na dikongo Bible la ayeke mû maboko na mbi ti lango. Versê so mbi ye ni mingi ayeke aPhilippien 4:6, 7, so a tene: ‘Ala gi bê ti ala na ndo ti mbeni ye pëpe, me na yâ ti aye kue, na lege ti sambela, na lege ti vorongo tere na Nzapa nga na sambela ti kiringo singila, ala hunda na Nzapa aye so agbu bê ti ala, na fade siriri ti Nzapa so ahon ndo ti bibe kue ayeke bata bê ti ala nga na lege ti hingango ndo ti ala.’ Mbi sambela ka na bï mingi, na mbi bâ biani so siriri ti Nzapa amû ngangu na mbi.”

Atënë ti dengo bê so Jésus atene na ndo ti sambela andu nga mara ti agingo bê kue. Lo tene: “Nzapa, Babâ ti ala, ahinga aye so ala yeke na bezoin ni kozoni si ala hunda ni na lo.” (Matthieu 6:8). Me, a lingbi e hunda ni na lo. Sambela ayeke kozo ye so a lingbi e sara ti “ga nduru na Nzapa,” na tongana e sara tongaso, ‘fade lo yeke ga nduru na e.’—Jacques 4:8.

Biani, tongana e fa agingo bê ti e na yâ ti sambela, e yeke duti nzoni na pekoni, me a ngbâ gi ge pëpe. Jéhovah, so ayeke “mä sambela”, ayeke sara ye ndali ti azo kue so agi lo na mabe (Psaume 65:3). Ndani la si Jésus  afa na adisciple ti lo ti tene “ala sambela lakue na ala zia lege ni pëpe”. (Luc 18:1). A lingbi e ngbâ lakue ti hunda Nzapa ti fa lege na e nga ti mû maboko na e, nga zia e hinga so lo yeke futa mabe ti e. A lingbi e pensé lâ oko ape so Nzapa aye ti aidé e ape wala lo peut ti aidé e ape. Tongana e “ngbâ ti sambela lakue”, a fa so e yeke na tâ mabe na lo.—1 aThessalonicien 5:17.

Ti duti na mabe aye ti tene nyen? A ye ti tene “ti hinga” Nzapa, so ti tene ti hinga so lo yeke dä (Jean 17:3). E yeke hinga Nzapa na lege ti mandango Bible, so atënë ti bê ti lo ayeke na yâ ni. E yeke hinga so lo yeke bâ e oko oko kue nga so lo ye ti mû maboko na e. Me, tâ mabe aye gi ti tene ti hinga Nzapa awe ape. A ye nga ti tene ti lë mbeni kpengba songo ti kamarade na lo. Legeoko tongana ti sarango kamarade na mba ti e zo, e yeke lë kpengba songo ni gi gbagburu tongaso ape. Mabe ti e “ayeke kono” tongana e yeke manda ye mingi na ndo ti Nzapa, e “yeke sara lakue aye so anzere na bê ti lo” nga tongana e yeke bâ so lo yeke mû maboko na e (2 aCorinthien 10:15; Jean 8:29). A yeke mara ti mabe ni so la amû maboko na Janet ti hon ndo ti agingo bê ti lo.

Janet atene: “Vrai ye so akpengba mabe ti mbi ayeke maboko ti Jéhovah so mbi bâ na yâ ti aye ni oko oko kue. Fani mingi, e tingbi na ambeni kpale, so na bango ni, a yeke ngangu ti hon ndo ni. Me so mbi yeke sambela mingi, lakue Jéhovah ayeke sara si e sigigi na yâ ti kpale ni na mbeni lege so, tongana a ngbâ fade gi mbi, e lingbi ti sigigi dä ape. Na ngoi so mbi kiri singila na lo, mbi yeke dabe ti mbi na gbâ ti anzoni ye so lo sara ndali ti mbi. Lakue, lo mû maboko na mbilimbili ngoi ni, mingi ni tâ na ngoi so e yeke na bezoin ni. Lo mû nga na mbi atâ kamarade ti koli na ti wali, so ala yeke atâ Chrétien. Ala yeke lakue na tere ti mbi, nga ala yeke anzoni tapande ndali ti amolenge ti mbi.” *

“Mbi hinga ngbanga ti nyen la Jéhovah atene na Malachie 2:16, lo tene: “Mbi ke ziango wali”, wala divorce. Ti mo so mo la mo sara faute ni ape so, a yeke tâ kota ye ti kamene. Koli ti mbi ahon a ninga awe, me na ambeni ngoi, mbi bâ tere ti mbi so mbeni ye amanke mbi nga so mbi yeke ye oko ape. Mbi yeke gi ka ti mû maboko na ambeni zo; sarango tongaso ayeke mû nga maboko na mbi lakue.” So Janet asara ye alingbi na wango ti Bible so ahunda na zo ti kpe ti duti gi lo oko, a sara si lo gi bê ti lo mingi encore ape. *—aProverbe 18:1.

Janet atene: “So mbi ga ti hinga so ‘Nzapa ayeke Babâ ti amolenge so babâ ti ala ayeke pëpe, na Juge ti awomua’, a mû ngangu na mbi mingi. Lo yeke dö e lâ oko ti zia ape, tongana ti so koli ti mbi asara so.” (Psaume 68:6). Janet ahinga so Nzapa alingbi ti tara lo na “aye ti sioni” ape. Me, Nzapa ayeke mû ndara “na azo kue” nga lo yeke mû na e “ngangu so ahon ti so zo ayeke na ni” si e hon ndo ti agingo bê ti e.—Jacques 1:5, 13; 2 aCorinthien 4:7.

Me ka tongana gingo bê ti e ni ayeke ndali ti so fini ti e ayeke na yâ ti kpale, e yeke sara tongana nyen?