Bâ ye so Bible afa

A yeke batize ka aChrétien ngbanga ti nyen?

Article so ayeke sigigi na ahundango tënë so mo lingbi ti hunda tere ti mo na ni nga a yeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni.

1. Nda ti batême ti aChrétien ayeke nyen?

Batême amû lege na zo ti duti na nzoni songo na Nzapa. Tongaso, a yeke nzoni a batize mbeni Chrétien, pëpe na ngoi so lo ngbâ bébé, me na ngoi so lo kono awe na lo wani lo lingbi ti manda ye na ndo ti Nzapa na ti ga mbeni disciple ti Jésus (Kusala 8:12; 1 Pierre 3:21). E yeke ga disciple ti Jésus tongana e manda aye so lo hunda na e ti sara na e sara aye ni so.​—Diko Matthieu 28:19, 20.

Na tango ti abazengele ti Jésus, azo mingi aku ngbii pëpe si ala manda ye na ndo ti Nzapa nga na ndo ti Jésus. Na tapande, na ngoi so mbeni koli amä so kuâ ti Jésus azi lege ti wara salut, gi na lê ni lê ni lo ga disciple ti Jésus. Laso, azo mingi so na bê ti ala kue aye ti hinga tâ tënë ayeda ti ga adisciple ti Jésus.​—Diko Kusala 8:26-31, 35-38.

2. A batize lani Jésus ngbanga ti nyen?

Jésus ayeke lani na ngu 30 tongaso la si Jean Wabatizengo zo ayôro lo kue kue kue na yâ ti Ngu ti Jourdain. Batême ti Jésus afa lani so lo yeda ti sara ye so Nzapa aleke ndali ti lo (aHébreu 10:7). Kua ni so andu nga mungo fini ti lo na sandaga teti siokpari ti azo ti dunia kue. Lani so lo de na yayu, Jésus aye lani babâ ti lo, Jéhovah, nga lo mä yanga ti lo. Même na ngoi so lo ga na sese, lo ngbâ ti sara tongaso.​—Diko Marc 1:9-11; Jean 8:29; 17:5.

  3. Ngbanga ti nyen a lingbi a batize mbeni Chrétien?

Ti e, e yeke nde na Jésus, a dü e na siokpari na tere ti e. Me, sandaga ti Jésus amû lege na e ti duti na nzoni songo na Nzapa (aRomain 5:10, 12; 12:1, 2). Lege azi nga na e ti ga ti sewa ti lo (2 aCorinthien 6:18). E yeke sara tongana nyen ti wara pasa ni so? E yeke tene mbeni sambela na Jéhovah gi e oko, ti fa na lo so e ye ti mû tanga ti fini ti e kue ti sara gi na lo. Na pekoni, e yeke wara batême ti fa na lê ti azo kue so e mû tere ti e na Nzapa awe.​—Diko Matthieu 16:24; 1 Pierre 4:2.

4. Mo lingbi ti sara nyen ti wara batême?

A-Témoin ti Jéhovah ayeke manda Bible na zo kue so aye ti duti na nzoni songo na Nzapa. Ti manda Bible na ti gue na abungbi ayeke sara si mo kiri mo ye Nzapa mingi na ayeke sara nga si mabe ti mo akpengba. A yeke sara nga si anzoni ye la ayeke duti na yâ ti li ti mo so ayeke pusu mo ti duti na anzoni sarango ye. Ndoye, mabe nga na ambeni mara ti aye tongaso so anzere na Nzapa ayeke mû maboko na mo ti sara na lo lakue lakue a lingbi na yanga so mo mû na lo.​—Diko Jean 17:3; aHébreu 10:24, 25.

Ti hinga tënë mingi na ndo ni, bâ chapitre 18 ti buku so, so aTémoin ti Jéhovah asigigi na ni.