Komandema ti Satan ayeke tï biani
Komandema ti Satan ayeke tï biani
“Me fade a yeke nzoni na awasiokpari pëpe.”—ZO-TI. 8:13.
1. Ngbanga ti nyen fango ngbanga so ayeke ga na ndo ti azo ti sioni ayeke nzoni tënë ti dengo bê?
NYEN na nyen, a yeke gue na azo ti sioni, wala awasiokpari na gbele ngbanga. A lingbi ala kiri tënë teti ye so ala sara (aProv. 5:22; Zo-ti. 8:12, 13). So ayeke nzoni tënë ti dengo bê, mbilimbili teti azo so aye mbilimbili na so abâ pasi teti so a sara ye na lege ni pëpe na mbage ti ala na ala wu pono na tïtî azo ti sioni. Na popo ti azo ti sioni so a yeke gue na ala na ngbanga, a yeke wara babâ ti sioni, Satan Zabolo.—Jean 8:44.
2. Ngbanga ti nyen a hunda ngoi ti leke tënë so alondo na Éden?
2 Lani na yaka ti Éden, Satan abâ tere ti lo kota mingi na lo pusu azo ti ke komandema ti Jéhovah. Ye ti pekoni ayeke so, kozo babâ na mama ti e abungbi na Satan ti dë kite na komandema ti Jéhovah so ayeke mbilimbili na ala ga awasiokpari na lê ti lo (aRom. 5:12-14). Biani, Jéhovah ahinga ye so ayeke si ande na ala teti lege ti kpengba-li so ala mû. Me, a lingbi ye ti pekoni so zo alingbi ti kanga lege na ni pëpe asigigi polele teti a-ange na azo kue. Tongaso, a hunda ngoi ti leke tënë ni na ti fa na gigi si azo kue ahinga biani so awakengo yanga so asara sioni.
3. Dutingo ti e ayeke tongana nyen na gbele angorogbia ti azo?
3 Teti so azo ake ti tene Jéhovah abâ ndo na ndo ti ala, a lingbi ala zia na sese angorogbia nde nde ti bê ti ala. Na sungo mbeti na amba ti lo awamabe so ayeke na kodoro ti Rome, bazengele Paul atene mara ti angorogbia so ayeke “akota zo ti komande.” Na ngoi ti Paul, akota zo ti komande so ayeke kozoni kue ngorogbia ti Néron, togbia ti Rome, so alë gbia na ngu 54 ti si na ngu 68. Paul atene so akota zo ti komande so “Nzapa azia si ala duti na ando nde nde so alingbi na ala.” (Diko aRomain 13:1, 2.) Paul aye ti fa so komandema ti zo ahon ti Nzapa? A yeke tongaso pëpe. Nde na so, lo ye ti tene so na ngoi so Jéhovah azia lege na komandema ti azo ti duti dä, a lingbi aChrétien akpe “ye so Nzapa si azia na sese”, na ti yeda na dutingo ti ala tongana agbia.
Mbeni lege so ague na azo na kpale
4. Fa tongana nyen komandema ti zo ayeke tï tingo.
4 Kite ayeke pëpe so komandema ti azo so Satan ayeke na li ni ayeke gue ti tï tingo. Ngbanga ti nyen? Kozoni kue, ngbanga ti so komandema ni aluti na ndo ti ndara ti Nzapa pëpe. Gi Jéhovah oko si ayeke na ndara so alingbi kue. Tongaso, gi lo oko la alingbi ti fa na e tongana nyen ti komande nzoni (Jér. 8:9; aRom. 16:27). Nde na azo so lakue ayeke manda ye na lege ti akpale na afaute, Jéhovah ahinga lakue nzoni lege ti sarango ye. Ngorogbia kue so amû peko ti fango lege ti lo pëpe alingbi ti tambela nzoni pëpe. Tongana e zia na ndo ni sioni bibe so ayeke na peko ti komandema ti Satan, komandema ti Satan so lo yeke komande na lege ti azo atï ti lo na ngu awe ngbene ye na tongo nda ni.
5, 6. Nyen la ague na Satan ti sara kpengba-li na Jéhovah?
5 Mingi ni, zo so li ti lo ayeke dä ayeke sara mbeto ti mû lege so lo hinga lo tene lo yeke wara sioni na pekoni. Tongana lo ke si lo gue gi guengo na lege ni so, fade lê ti lo wani ayeke fa na lo. Mbaï afa so fani mingi a yeke ye senge ti sara kpengba-li na Wasarango ye so ngangu ti lo ahon ye kue. (Diko aProverbe 21:30.) Ye oko, nzara ti gango kota na fandara so avuko lê ti Satan asara si lo turnê peko ti lo na Jéhovah. Tongaso, Zabolo asoro na bê ti lo mveni lege so alingbi gi ti hunzi na kota kpale.
6 Sarango ye ti fandara so Satan asara asigigi polele na yâ ti sarango ye ti mbeni gbia ti Babylone so asara tënë na baba; Bible afa peko ti atënë ti lo ni tongaso: “Fade mbi ma na yayu; fade mbi yä trône ti mbi na nduzu ahon atongoro ti Nzapa; fade mbi duti na hoto ti bungbi, na nda ti mbage ti nord; fade mbi ma na nduzu ahon mbinda; fade mbi sara si mbi mveni mbi ga tongana Lo Ti Nduzu Ahon Kue.” (És. 14:13-15). Ye ti buba so gbia so aye ti sara alï ngu, na ahale ti agbia ti Babylone atï ti kamene. Legeoko nga, na yâ ti kete ngoi, Satan na dunia ti lo ayeke tï biani biani.
Ndani so Jéhovah azia lege na azo ti duti yamba na komandema ti lo
7, 8. Ambeni ye ti nzoni so aga na peko ti so Jéhovah azia lege na sioni ti duti teti kete ngoi ayeke so wa?
7 Ambeni zo alingbi ti hunda tere ti ala atene ngbanga ti nyen Jéhovah akanga lege pëpe na azo ti mû peko ti Satan na ti zia na sese mbeni komandema so lo hinga lo tene ayeke gue ti tï. So lo yeke Nzapa ti Ngangu Ahon Kue, kite ayeke pëpe so lo lingbi fade ti sara ni (Ex. 6:3). Ye oko, lo sara ni pëpe. Ndara so lo yeke na ni afa so na kengo ti yôro tere ti lo na yâ ti kpengbango-li ti azo teti kete ngoi, a yeke kiri ti ga nzoni na pekoni. Na nda ni, fade Jéhovah afa so lo yeke gbia ti mbilimbili na ti ndoye, na azo so ayeke be-ta-zo na lo ayeke wara ye ti nzoni na lege ti desizion ti Nzapa so.
8 Ye ti vundu alingbi fade ti si pëpe na sewa ti azo tongana fade azo ake handa ti Satan na ala zia ti gi lege ti duti yamba na komandema ti Nzapa. Me, desizion ti Jéhovah ti zia lege na azo ti komande tere ti ala wani teti mbeni ngoi aga na aye ti nzoni. A pusu azo so bê ti ala ayeke mbilimbili ti duti na ndara ti mä Nzapa na ti zia bê kue na lo. Na yâ ti angu so kue, azo atara mara ti angorogbia nde nde, me mbeni oko ti nzoni na popo ni ayeke pëpe. Ye so alingbi ti kpengba azo so avoro Nzapa ti hinga biani so lege so Jéhovah ayeke komande na ni ayeke nzoni mingi. Tâ tënë, so Jéhovah azia lege na sioni komandema ti Satan aga na akpale mingi na azo nga na abe-ta-zo so ayeke voro lo. Me, so a zia lege teti kete ngoi na sioni ti duti dä aga nga na aye ti nzoni teti azo so avoro Nzapa na lege ni.
Kengo yanga asara si Jéhovah awara gonda
9, 10. Fa tongana nyen komandema ti Satan aga na gonda na ndo ti Jéhovah.
9 So Jéhovah azia lege na azo ti duti na gbe ti Satan na ti komande tere ti ala wani akiri na nengo ti komandema ti Jéhovah na peko oko pëpe. Nde na so, mbaï afa so tënë ti Jérémie, so alondo na Nzapa ayeke tâ tënë, so lo tene zo ayeke na ngangu ti komande tere ti lo wani pëpe. (Diko Jérémie 10:23.) Na ndo ni, kengo yanga ti Satan amû lege na Jéhovah ti fa na gigi anzoni sarango ye ti lo na mbeni lege so ayeke kota mingi. Tongana nyen?
10 Teti so e lingbi ti bâ akpale ti peko ti komandema ti Satan, asarango ye ti Jéhovah so ayeke nzoni kue asigigi polele na lê ti azo ahon ti so alingbi fade ti duti. Tongaso, lo ga kota na lê ti ala so andoye lo. Biani, ahon ti mû gonda na Satan, komandema ti lo amû gi gonda na Nzapa. A fa na gigi na mbeni lege so ayeke kota mingi tongana nyen Jéhovah aleke tënë so andu dengo kite na ndo ti droit ti lo ti komande. Ti fa tâ tënë so, zia e sara tënë kete na ndo ti ambeni sarango ye ti Jéhovah na ti bâ tongana nyen sioni komandema ti Satan apusu Jéhovah ti fa na gigi asarango ye so na ambeni lege nde.
11. Jéhovah afa na gigi ndoye ti lo tongana nyen?
11 Ndoye. Mbeti ti Nzapa atene na e so “Nzapa ayeke ndoye.” (1 Jean 4:8). Lekengo zo ayeke kozoni kue mbeni fä ti ndoye ti Nzapa. Na ndo ni, so a leke e na mbeni lege so adö bê na ayeke pendere mingi afa na gigi ndoye ti Jéhovah. Nga, na ndoye, Jéhovah amû na azo pendere ndo ti duti so lo zia ye kue na yâ ni ti mû lege na ala ti duti na ngia (Gen. 1:29-31; 2:8, 9; Ps. 139:14-16). Me gi na peko ti so sioni alï na yâ ti sewa ti azo, Jéhovah afa ndoye ti lo na mbeni lege nde. Tongana nyen? Bazengele Jean asû na mbeti tënë ti Jésus so atene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” (Jean 3:16). So Nzapa atokua oko Molenge ti lo na sese ti mû fini ti lo tongana ngere so a futa ti zi awasiokpari afa kota ndoye ti lo na mbage ti azo kue pëpe? (Jean 15:13). Kota ndoye so Nzapa afa ayeke nga mbeni tapande teti azo, na mungo na ala lege ti sara legeoko tongana lo na yâ ti fini ti ala ti lâ oko oko na mbage ti amba ti ala, tongana ti so Jésus asara ândö.—Jean 17:25, 26.
12. Na lege wa Jéhovah afa ngangu ti lo?
12 Ngangu. Gi “Nzapa, [Lo] ti ngangu ahon kue,” si ayeke na ngangu ti créé fini (Apoc. 11:17; Ps. 36:10). Na lâ ti dungo zo, zo ato nda ni mo bâ mo tene mbeni cahier so ade ti sara mbeti dä pëpe. Na lâ ti kuâ ti lo, lê ti cahier so asi na adesizion so lo mû, akusala so lo sara nga na aye nde nde so asi na lo so asara si lo yeke nde. Asango so kue Jéhovah ayeke bata ni. Tongana ngoi ni alingbi, Jéhovah alingbi ti kiri na zo ni na fini, a lingbi na sarango ye ti lo (Jean 5:28, 29). Tongaso, atâa so ayeke ye so lani Jéhovah aye teti azo pëpe, kuâ amû lege na Jéhovah ti fa so lo yeke na ngangu ti kiri na fini zo so akui. Biani, Jéhovah ayeke “Nzapa, [Lo] ti ngangu ahon kue”.
13. Tongana nyen sandaga ti Jésus afa na gigi so mbilimbili ti Jéhovah ayeke nzoni-kue?
13 Mbilimbili. Jéhovah atene mvene pëpe; lo lingbi nga ti sara ye ti kirikiri pëpe (Deut. 32:4; Tite 1:2). Lo gbu lakue akpengba-ndia ti lo ngangu na ndo ti tâ tënë na mbilimbili, même tongana sarango ni akpa mbeni ye so aga na lo ye ti nzoni pëpe (aRom. 8:32). A mû vundu na Jéhovah mingi ti bâ Molenge ti lo so lo ndoye lo mingi akui na ndo ti keke ti pasi mo bâ mo tene Jésus ayeke mbeni sioni zo so azonga Nzapa! Atâa so kue, ndoye so Jéhovah ayeke na ni na mbage ti awasiokpari apusu lo ti zia si ye ti vundu so asi ti tene lo wani lo bata kpengba-ndia ti lo na ndo ti mbilimbili. (Diko aRomain 5:18-21.) Ye ti kirikiri so asi singo na ndo ti dunia amû lege na Jéhovah ti fa so gi lo oko lo yeke mbilimbili ahon azo kue.
14, 15. Na ambeni lege wa Jéhovah afa kota ndara ti lo nga na kangango bê ti lo?
14 Ndara. Kete na peko ti so Adam na Éve asara siokpari, Jéhovah afa lege so lo yeke zi aye ti sioni so aga na peko ti kpengba-li ti ala (Gen. 3:15). Ye so lo sara hio so, nga na fango yeke na yeke anzene nzene tënë na ndo ti ye so lo leke ti sara teti awakua ti lo, asara si ndara ti Jéhovah asigigi polele (aRom. 11:33). Ye oko ti kanga lege na ngangu ti Nzapa ti leke atënë so nzoni ayeke pëpe. Na yâ ti mbeni dunia so asi singo na lango-sioni, bira, sarango ye ti buba, kengo yanga, sarango nzoni bê pëpe, sarango kangbi na popo ti azo, na handango lê ti azo, lege azi na Jéhovah ti fa na acréature ti lo kue tâ ndara ti lo. Disciple Jacques atene: “Ndara so alondo na nduzu ayeke nzoni-kue; nga a yeke sara ye na siriri, a yeke sara ye na lege ni, a yeke nduru ti mä tënë, a hinga ti sara nzoni bê mingi na zo nga a si singo na anzoni lengo, a yeke sara kangbi na popo ti azo pëpe, a yeke handa lê ti zo pëpe.”—Jacq. 3:17.
15 Kangango bê ti ku. Tongana a hunda lani pëpe ti tene Jéhovah asara ye na mbage ti awasiokpari, ka a lingbi ti duti ngangu ti bâ polele kangango bê so lo fa ni. So Jéhovah ayeke nduru ti kanga bê teti angu saki mingi afa so nzoni sarango ye ti lo so ayeke kota mingi na ayeke nzoni-kue, ndali ni a lingbi e kiri singila na lo mingi. Bazengele Pierre ayeke na raison ti tene so a lingbi e “bâ kangango bê ti Seigneur ti e tongana salut”.—2 Pi. 3:9, 15.
16. Ngbanga ti nyen so Jéhovah ayeke nduru ti pardone asara si e duti na kota ngia?
16 Dutingo nduru ti pardone. E kue e yeke awasiokpari, na fani mingi e kue e yeke pika gere ti e (Jacq. 3:2; 1 Jean 1:8, 9). A lingbi e kiri singila teti so Jéhovah ayeke nduru ti pardone asioni ti e, ti “pardone [ni] kue.” (És. 55:7). E bâ nga ye so: teti so a dü e na yâ ti siokpari, dutingo ti e amû lege na e ti hinga kota ngia so e yeke na ni tongana e bâ so Jéhovah apardone afaute ti e (Ps. 51:7, 11, 19). Tongana e oko oko e bâ pendere sarango ye ti Jéhovah so, a yeke kpengba ndoye ti e na mbage ti lo na a yeke mû na e ngangu ti mû tapande ti lo na yâ ti sarango ye ti e na mbage ti amba ti e.—Diko aColossien 3:13.
Ndani so dunia so ayeke na kobela
17, 18. Aye wa afa na e so komandema ti Satan atï?
17 Aye kue so ayeke na yâ ti dunia ti Satan (so aga na lege ti komandema ti lo) atï fani mingi awe ngbene ye giriri juska laso. Na ngu 1991, mbeni mbeti-sango (The European) atene: “Dunia so ayeke na kobela? En, me a londo na Nzapa pëpe: kobela ti dunia so alondo na azo ti yâ ni.” Tënë so ayeke tâ tënë biani! Ndali ti so Satan ahanda akozo babâ na mama ti e, ala soro komandema ti zo ahon ti soro komandema ti Jéhovah. Na sarango tongaso, ala zia na sese mbeni komandema so atï ti lo na ngu awe. Pasi na vundu so azo ayeke na yâ ni na ndo ti sese kue afa so mbeni sioni kobela agbu komandema ti azo awe.
18 Komandema ti Satan amaï bibe ti kion. Me, kion alingbi lâ oko pëpe ti hon ndoye na ngangu, teti so ndoye ayeke na gunda ti lege so Jéhovah ayeke komande na ni. Komandema ti Satan awara pëpe lege ti sara si aye aduti na place ni ndali ti azo kue, a mû na ala tâ ngia wala nzoni duti pëpe. Me Jéhovah afa na gigi droit ti lo ti komande! Ambeni ye ayeke dä laso, so amû lege na e ti bâ ni? En, a yeke tënë so e yeke bâ na article ti peko.
E manda nyen na ndo ti komandema tongana e diko . . .
[Ahundango tënë ti manda na ye]
[Foto na lembeti 25]
Komandema ti Satan aga lâ oko na ye ti nzoni na azo pëpe
[Foto na lembeti 25]
U.S. Army photo
[Foto na lembeti 25]
WHO photo by P. Almasy
[Foto na lembeti 26]
Jéhovah ayeke na ngangu ti kiri na fini zo so akui
[Foto na lembeti 27]
A bâ ndoye na mbilimbili ti Jéhovah na yâ ti sandaga ti Molenge ti lo