Atënë so azo ahunda

Tongana yâ ti mbeni wali abuba wala mbeni foroto akui kozo ti tene a dü lo, a lingbi ande ti zingo foroto ni?

Ti azo so ade ye tongaso asi na ala pëpe, a lingbi ti duti ngangu na ala ti hinga vundu ti bê ti ala so ye so asi na ala. Ambeni babâ na mama ayeke na vundu mingi ndali ni. Mbeni wali adü aforoto fani oku gi na kuâ ni. A si na mbeni ngoi, lo yeke na ngia ti dü amolenge-koli use so angbâ na fini na pekoni ala kono. Ye oko, juska na kuâ ti lo, lo ngbâ lani lakue ti dabe ti lo na aforoto oko oko kue so lo girisa ala. Lo yeke tara ti bâ konongo ti ala tongana ala ngbâ fade na fini. A-Chrétien so mara ti ye so asi na ala ayeke na mbeni nda ti tënë ti bâ so a yeke kiri ande na aforoto so na fini?

Senge kiringo tënë ni ayeke so e hinga pëpe. Bible asara tënë polele pëpe na ndo ti tënë ti zingongo aforoto so a dü ala na kuâ ni wala so ngo ti ala abuba. Ye oko, na yâ ti Mbeti ti Nzapa a yeke wara akpengba-ndia so andu tënë so na so alingbi ti sara si bê ti zo adë kamême.

Zia e bâ ahundango ndo use so andu tënë so. Kozo ni, na lê ti Jéhovah, fini ato nda ni lawa? na ngoi so wali amû ngo wala na ngoi so lo dü? Use ni, Jéhovah abâ molenge so ade ti dü lo pëpe tongana nyen? tongana mbeni zo wala mbeni senge bungbi ti acellule so ayeke na yâ ti mbeni wali? Akpengba-ndia ti Bible akiri tënë polele na ahundango tënë use so.

Ndia ti Moïse afa polele so fini ato nda ni na ngoi ti dungo molenge pëpe, me kozoni na ngoi ni so. Ndia ni afa ni tongana nyen? A fa so a lingbi ti fâ mbeni zo tongana lo fâ mbeni foroto so ade a dü lo pëpe. Bâ Ndia so si: “Fade mo mû fini teti fini.” * (Ex. 21:22, 23). Tongaso, mbeni foroto so angbâ na yâ ti mama ti lo ayeke zo so ayeke na fini. Ti hinga ni tongaso amû maboko na aChrétien kutu mingi ti ke ti tuku ngo, teti so ala bâ ni tongana mbeni kota siokpari so zo asara ti ke Nzapa.

Mbeni foroto so angbâ na yâ ti mama ti lo ayeke biani na fini, me Jéhovah abâ fini ti foroto so tongana nyen? Ndia so e bâ ni fade ahunda ti tene a fâ mbeni kota zo so asara si mbeni foroto so ade ti dü lo pëpe akui. Ni la, a yeke polele so fini ti mbeni foroto so ade ti dü lo pëpe ayeke kota ye mingi na lê ti Nzapa. Na ndo ni, gbâ ti aversê ti Mbeti ti Nzapa afa so Jéhovah abâ aforoto so ade ti dü ala pëpe tongana atâ zo. Na tapande, yingo ti Jéhovah apusu Gbia David ti tene: “Mo sara si tere ti mbi atingbi na yâ ti mama ti mbi. . . . Lê ti Mo abâ mbi tongana mbi de na yâ ngo senge. Lâ ni kue so Mo diko na mbi, Mo sara kue na mbeti ti Mo awe.”​—Ps.139:13-16; Job 31:14, 15.

Jéhovah abâ nga so aforoto so ade ti dü ala pëpe ayeke na asarango ye ti tere ti ala nga so ala lingbi ti sara akpengba ye na yâ ti gigi ti ala mbeni lâ. Na ngoi so Rebecca wali ti Isaac ayeke na ngo ti angbo, Jéhovah atene mbeni prophétie na ndo ti amolenge-koli use so ayeke tiri na yâ ti mama ti ala; ye so afa so lo bâ kozoni awe asarango ye ti ala so mbeni lâ ayeke ndu ande gbâ ti azo.​—Gen. 25:22, 23; aRom. 9:10-13.

Ye so Bible atene na ndo ti Jean-Baptiste andu nga bê ti e mingi. Évangile ni atene: “Tongana Élisabeth amä bara ti Marie, foroto so ayeke na yâ ti lo ahuru, na Élisabeth asi na yingo vulu.” (Luc 1:41). Na ngoi so Docteur Luc ayeke sara lani tënë ti ye so asi so, lo sara kua na mbeni tënë ti Grec so alingbi ti ndu mbeni molenge so ade na yâ ti mama ti lo wala so a dü lo awe. Lo sara kusala na oko tënë so ti sara tënë ti Jésus na ngoi so lo ngbâ bébé na lo yeke lango na yâ ti ndo ti tengo kobe ti anyama.​—Luc 2:12, 16; 18:15.

Na bango aye so kue so Bible afa na e, mbeni ye amû lege na e ti sara kota kangbi na popo ti mbeni bébé so ade na yâ ti mama ti lo na lo so ayeke na fini na ngoi so a dü lo? Na bango ni, mbeni ye ti sarango kota kangbi na popo ti ala  ayeke dä pëpe. Nga, ye so ague oko na aye so azo ti senda-ye ahinga ni laso. Na tapande, awagingo nda ti ye ahinga so mbeni bébé so ade na yâ ti mama ti lo alingbi ti hinga ye so azo ayeke sara nga ti sara mbeni ye ti fa so lo hinga ni. Ni la, a yeke ye ti dongo bê pëpe so mama ti ngo ayeke na kpengba songo na molenge so ayeke maï na yâ ti lo.

Awali alingbi ti mû ngo na oko lango na a lingbi ti si so ala dü na alango nde nde. Bâ tapande so: Mbeni mama ti ngo adü molenge ti lo kozo ti tene yâ ti lo akpengba, na molenge ni akui lango kete na pekoni so a dü lo. Ti mbeni mama ti ngo ni nde, yâ ti lo akpengba, me molenge ni akui ngoi kete kozo ti tene a dü lo. A yeke zingo ande molenge ti kozo mama ni gi ndali ti so lo dü molenge ni kozo ti tene yâ ti lo akpengba? Ka ti use mama ni, a yeke zingo ande molenge ti lo pëpe ndali ti so lo dü lo na kuâ ni?

Na nduru tënë, Bible afa polele so fini ti zo ato nda ni na ngoi so a mû ngo ti lo, nga so Jéhovah abâ foroto so ade ti dü lo pëpe tongana mbeni tâ zo na lo bâ lo na nene ni. Ti hinga atâ tënë so Bible afa ge asara si ambeni zo alingbi ti bâ so tenengo so a yeke zingo ande pëpe aforoto so akui kozo ti tene a dü ala ague nde na ye so Bible afa. Ti tâ tënë ni, ala lingbi ti pensé so tenengo so a yeke zingo ande pëpe aforoto so asara si zo ayeke na kite na ndo ti bango ndo ti e so aluti na ndo ti Bible na so apusu e ti ke ti tuku ngo, bango ndo so aluti mingi na ndo ti a-oko tâ tënë so e bâ na yâ ti article so.

Ândö, Tour ti Ba Ndo asigigi na ambeni kpengba hundango tënë so asara si azo abâ so a yeke zingo ande pëpe amolenge so akui kozo ti tene a dü ala. Na tapande, na yâ ti paradis, Nzapa ayeke zia ande na yâ ti mbeni wali para ti mbeni foroto so ade ti maï lani kue pëpe? Ye oko, Bebungbi akiri agi nda ti ye mingi na ndo ti tënë so, lo gbu li dä nga lo sambela ndali ni, na ye so apusu lo na nda ni ti tene so mara ti ahundango ndo so asara ye oko pëpe na ndo ti beku ti zingongo akuâ. Jésus atene: “Nzapa alingbi ti sara ye kue.” (Marc 10:27). Ye so asi ândö na Jésus afa so tënë so ayeke tâ tënë; a mû fini ti lo na yayu na a zia ni na yâ ti mbeni masia, mbeni ye so azo abâ so zo oko alingbi pëpe ti sara ni.

Tongaso, aye so kue aye ti tene so Bible afa so a yeke zingo ande amolenge so akui kozo ti tene a dü ala? Zia e kiri e tene so Bible akiri tënë polele pëpe na hundango ndo so; tongaso, mbeni ye amû lege na azo pëpe ti tene so fade a yeke zingo ande biani amolenge so. Tënë so alingbi ti sara si gbâ ti ahundango tënë nde nde abâ gigi. Ye oko, ti tâ tënë ni, a yeke nzoni mingi ti kpe ti fa abibe nde nde na ndo ti tënë so. Ye so e hinga ni ayeke so: Tënë ni ayeke na yâ ti maboko ti Jéhovah Nzapa, so asi singo na nzobe nga so ayeke sara nzoni bê (Ps. 86:15). Kite ayeke dä pëpe so lo leke na bê ti lo ti hunzi kui na lege so lo yeke zingo ande akuâ (Job 14:14, 15). Zia e hinga na bê ti e kue so lo yeke sara lakue ye so ayeke na lege ni. Lo yeke sara ande si bê ti e adë kue na peko ti aye ti vundu so e wara na yâ ti sioni dunia ti laso na ngoi so na ndoye, lo yeke mû ande yanga na Molenge ti lo ti “futi akusala ti Zabolo.”​—1 Jean 3:8.

[Akete tënë na gbe ni]

[Foto na lembeti 23]

Jéhovah ayeke sara ande si bê ti e adë kue na peko ti aye ti vundu kue so e wara laso