NA YÂ ti angu so ahon ade ti ninga ape, Cesar na wali ti lo, Rocio aduti nzoni na Californie, kâ, Cesar asara kua na mbeni place so a yeke wara ambeni masini so tongana dê asara ayeke sara si yâ ti da ni achauffé, nga tongana ndo achauffé yâ ti da ni adë nga wali ti lo Rocio asara kua so amû ngoi ti lo mingi ape na yâ ti mbeni hôpital. Ala yeke na da ti ala wani na ala yeke na molenge ape. Ye oko, mbeni ye asi so asara si gigi ti ala achangé. Nyen la asi nyen?

Na nze ti octobre, ngu 2009, filiale ti Amerika atokua mbeni lettre na acongrégation kue ti kodoro ni. Na yâ ti lettre ni a hunda na aita so ayeke na kode so aye ti sara kua teti mbeni ngoi na Béthel ti mû maboko na kua ti konongo yâ ti ada ti filiale na Wallkill, na New York ti sû mbeni demande ti sara kua ni. Même aita so ngu ti ala ahon ngu ti lingo na Béthel kue alingbi ti sû demande ni. Cesar na Rocio atene: “Ndali ti so ngu ti e ague na li mingi, e hinga so alingbi ti duti oko pasa so e yeke na ni ti sara kua na Béthel la. E ye ti zia pasa so ahon ape.” Ala sû demande ti ala hio ala tokua ni.

Ahon ngu oko na peko ni, a iri Cesar na Rocio pëpe ti gue na Béthel. Atâa so kue, ala gi ti changé aye na yâ ti fini ti ala ti mû lege na ala ti si na ye so ala zia na gbele ala. Cesar atene: ‘E leke place ti ziango oto ti e aga mbeni chambre ti tene e lango dä tongaso si e lingbi ti zia da ti e na mbeni zo nde ti loué ni. Na pekoni, e zia kota da ti e ti étage so ayeke na chambre mbasambala so e ye ni mingi, so e leke ni asara gi ngu use so, e gue na yâ ti kete place so e leke ni so. So e sara achangement so kue asara si a yeke ngangu na e ape ti yeda ti gue na Béthel tongana a iri e ti gue.’ Nyen la asi na peko ni? Rocio atene: “Nze oko na peko ti so e gue na yâ ti kete da ti e ni, e wara lettre so a tene na e ti gue ti sara kua tongana volontaire teti mbeni ngoi na Wallkill. E bâ polele so, so e changé ye na yâ ti fini ti e, e mû lege na Jéhovah ti iri tënë nzoni na ndo ti e.”

Legeoko tongana Cesar na Rocio, aita saki mingi asara asacrifice ti mû lege na ala ti mû mbage na kua ti lekengo da so a ngbâ ti sara ni na New York.  Mingi ti ala amû maboko na kua ti konongo yâ ti ada na Wallkill, ambeni mingi awara ti ala pasa ti mû maboko na kua ti lekengo kota ndokua ti e na Warwick. * Gbâ ti akoli na awali ti ala azia apendere da ti ala, anzoni kua ti ala nga même anyama ti ala so ala ye ala mingi ti gue ti sara kua mingi na Jéhovah. Jéhovah airi tënë nzoni na ndo ti sacrifice so ala sara so? Biani, lo sara ni.

Na tapande, Way, so ayeke na Kansas na so ayeke leke awâ ti courant, nga na wali ti lo Debra, so ala use kue aga nduru ti wara ngu 60 awe, akä da ti ala nga na aye ti ala na ala gue na Wallkill ti sara kua tongana aBéthelite so alango na Béthel pëpe. * Atâa so ti sara tongaso ahunda ti tene ala changé aye na yâ ti fini ti ala, ala bâ so, so ala sara sacrifice aga na aye ti nzoni mingi. Debra atene na ndo ti kua ti lo na Béthel, lo tene: “Na ambeni ngoi mbi bâ tere ti mbi mo bâ mo tene mbi yeke na popo ti azo so ayeke leke da na yâ ti Paradis tongana ti so a fa foto ni na yâ ti ambeti ti e.”

Melvin na Sharon, so ayeke na Caroline du Sud, akä da ti ala nga na aye ti ala ti gue na Warwick ti mû maboko na kua ti lekengo fini ndokua ti e. Atâa so a yeke kete ye pëpe ti sara asacrifice so, ala bâ so a yeke kota pasa la ala yeke na ni ti mû mbage na kota kua so. Ala tene: “Mo yeke wara ngia mingi tongana mo hinga so mo sara mbeni ye so ayeke ga na ye ti nzoni na aita ti dunia kue.”

Kenneth, so ayeke ngbene zo ti lekengo da nga na wali ti lo Maureen, so ala use kue ayeke na ngu 55 tongaso, alondo na Californie ague ti sara kua ti lekengo fini ndokua ti e na Warwick. Ti mû lege na ala ti gue, ala mä tere na mbeni ita-wali na yâ ti congrégation ti bata da ti ala nga ala hunda na afami ti ala ti bâ lege ti babâ ti Kenneth so ngu ti lo ague na li ni mingi. Ala regretté asacrifice so ala sara ti gue ti sara kua na Béthel so? Ên-ën. Kenneth atene: “E wara aye ti nzoni mingi. E wara akpale pëpe? Akpale ayeke dä me e wara ngia mingi na yâ ti fini e, nga na bê ti e kue, e wa amba ti e ti sara mara ti kua so.”

Mingi ti aita so aduti nduru ti sara kua tongana avolontaire ahon ndo ti ambeni kpale lani. Na tapande, William na Sandra, so ala use kue ayeke na ngu 60 na ndo ni, aduti nzoni na Pennsylvanie. Ala yeke na mbeni ndokua ti ala so na yâ ni a yeke wara gbâ ti amasini so azo ti kua 17 ayeke sara kua na yâ ni. Ala yeke na yâ ti oko congrégation so ala yeke dä dépuis molenge, na mingi ti afami ti ala alango nduru na ndo so congrégation ni ayeke dä. Tongaso, na ngoi so ala wara lege ti gue ti sara kua tongana avolontaire na Wallkill, ala hinga so ala yeke zia azo nga na  aye ti ala so ala ye ni mingi. William atene: “Kite ayeke pëpe so, oko kota kpale so e wara ayeke so e zia nzoni ndo ti e.” Ye oko, na peko ti so ita-koli so na wali ti lo asambela mingi, ala mû desizion ti sara voyage ni. Ala regretté desizion so ala mû so pëpe. William atene: “Mbeni ye so e lingbi ti haka na ngia so e wara na mungo mbage na kua so nga na sarango kua legeoko na aita ti Béthel ayeke dä pëpe. Mbi na Sandra e yeke na ngia mingi ahon ti kozo.”

A hunda na Ricky, so ayeke wayinda so abâ ndo na ndo ti kua ti lekengo da na Hawaii, ti sara kua tongana mbeni Béthelite so alango na Béthel ape ti mû maboko na kua ti lekengo fini ndokua ti e na Warwick. Wali ti lo, Kendra, aye ti tene lo yeda. Ye oko, ala yeke na mbeni kota gingo bê: ala ye ti tene molenge ti ala ti koli, Jacob so ayeke na ngu 11 aduti nzoni. Ala hunda tere ti ala wala a yeke na lege ti ndara ti zia ndo ti ala ti gue na New York nga eskê molenge ti ala ni ayeke ye ande ndo ni kâ.

Ricky atene: “Mbeni ye so agbu bê ti e ayeke ti wara mbeni congrégation so na yâ ni a yeke wara amaseka so aye Jéhovah. E ye ti tene Jacob awara gbâ ti anzoni kamarade.” Ye so asi ayeke so, congrégation so ala gue dä amolenge ayeke na yâ ni mingi ape me aBéthelite ayeke dä gbani. Ricky atene: “Na peko ti kozo bungbi so e sara kâ, mbi hunda Jacob wala lo bâ fini congrégation ni tongana nyen, mbilimbili ndali ti so amaseka ti ngu ti lo ayeke dä ape so. Lo tene na mbi, lo tene: ‘Gi bê ti mo ape Papa. Mbi yeke sara ande kamarade na aBéthelite so ayeke amaseka.’”

A-Béthelite ni asara biani kamarade na Jacob. Ye ti peko ni ayeke so wa? Ricky atene: “Na mbeni bï, mbi hon na tere ti chambre ti molenge ti mbi na mbi bâ so wâ angbâ ti za na yâ ti chambre ni. Mbi bâ mbi tene mbi yeke wara lo na sarango jeu vidéo, andâ lo yeke diko Bible. Na ngoi so mbi hunda lo ye so lo yeke sara so, lo tene: ‘Mbi yeke kete Béthelite, mbi ye ti hunzi dikongo Bible na yâ ti ngu oko.’” Ricky na Kendra ayeke na ngia ndali ti so Ricky amû mbage na kua ti lekengo fini ndokua ti e na Warwick, nga ndali ti so voyage ti ala asara si molenge ti ala ague na li ni na lege ti yingo.—aProv. 22:6.

A si na mbeni ngoi ande, kua ti lekengo ada na Wallkill nga lekengo fini ndokua ti e na Warwick ayeke hunzi. Tongaso, aita so a iri ala ti ga ti mû maboko ahinga so kua ti ala na Béthel ayeke gi ti kete ngoi. Aita ni agi bê ti ala ahon ndo ni na ndo ti ndo so ala yeke gue dä wala ye so ala yeke sara ande? Oko pëpe. Mingi ti ala ayeke na oko bango ndo so ambeni ita-koli use so alondo na Floride na awali ti ala ayeke na ni. Ala kue ayeke na ngu 50 na ndo ni.  John, so ayeke wayinda so abâ ndo na ndo ti kua ti lekengo da, nga na wali ti lo Carmen, so ala sara kua tongana avolontaire na Warwick, atene: “E bâ tongana nyen la Jéhovah amû na e ambilimbili ye so e yeke na bezoin ni juska ge. E tene so Jéhovah alingbi ti ga na e ge ti tene lo dö gi e lo zia na peko ni ape.” (Ps. 119:116). Luis, so ayeke leke amasini so ayeke mingo awâ so agbi ye, nga na wali ti lo, Quenia, asara kua na Wallkill. Ala tene: “E bâ awe so Jéhovah asara nzoni bê na e na lege so lo mû na e aye so e yeke na bezoin ni na lege ti mitele. Atâa so e hinga pëpe tongana nyen, lawa, wala na ndo wa la lo yeke  bâ lege ti e, e yeke na confiance so lo yeke ngbâ ande ti bâ lege ti e.”—Ps. 34:11; 37:25.

Mingi ti aita so amû maboko na kua ti lekengo ada na New York so alingbi lani ti wara araison ti ke ti sara kua tongana avolontaire. Ye oko, ala tara Jéhovah gi tongana ti so lo tene na e kue ti sara, lo tene: “I tara Mbi . . . ti bâ tongana Mbi lungula fenêtre ti yayu na i pëpe, na Mbi sa na ndo i ye ti nzoni so ndo alingbi na ni pëpe.”—Mal. 3:10.

Mo kue mo ye ti tara Jéhovah na ti wara aye ti nzoni mingi na peko ni? Gbu li ti mo na ndo ti ye so mo lingbi ti sara ti mû mbage na pendere kua so ayeke ga, atâa ayeke na New York wala na mbeni ndo so a yeke leke ni ndali ti kua ti Jéhovah nga zia tënë ni na yâ ti sambela. Nga bâ tongana nyen Jéhovah ayeke iri tënë nzoni na ndo ti mo wani.—Marc 10:29, 30.

Dale, so ahinga ye na ndo ti lekengo ada nga na alege, na wali ti lo, Cathy, so ala londo na Alabama, agonda kua so mingi. Ala tene na ndo ti kua ti volontaire so ala sara na Wallkill, ala tene: “Tongana sân mbeto mo zia nzoni ndo ti mo, ti gue ti sara kua ti Jéhovah, mo yeke wara pasa ti bâ ngangu ti lo.” Nyen la a lingbi mo sara ti mû mbage na kua tongaso? Dale atene: “Changé aye, changé aye nga changé aye mingi. Mo yeke regretté ye oko pëpe.” Gary, alondo na Caroline du Nord, lo sara kua tongana wayinda so abâ lege ti lekengo ada asara ngu 30. Lo na wali ti lo, Maureen, atene mbeni ye ti nzoni so ala wara na Warwick ayeke “ti bungbi oko nga ti sara kua legeoko na gbâ ti aita so amû fini ti ala ti sara kua na Jéhovah na Béthel.” Gary atene: “Ti sara kua na Béthel, a lingbi mo duti na aye mingi na yâ ti fini ti mo ape, so ayeke nzoni lege so ahon tanga ni kue ti duti na fini na yâ ti sioni dunia so.” Jason, so asara kua na mbeni ndokua so abâ lege ti courant, na wali ti lo Jennifer, alondo na Illinois, ala tene so ti sara kua ti lekengo Béthel na Wallkill ayeke “mbeni mara ti ye so mo lingbi ti sara ande na yâ ti fini dunia.” Jennifer atene: “Bê ti mo ayeke nzere ti bâ so Jéhovah abâ na nene ni ye kue so mo sara nga lo yeke ngbâ ti bâ ni na nene ni. Jéhovah ayeke iri tënë nzoni mingi na ndo ti mo.”