KATHERINE akono na Amerika nga na ngoi so lo yeke lani na ngu 16 lo wara batême lo ga Témoin ti Jéhovah. Lo fa tënë mingi me mingi ti azo ti ndo so lo fa tënë dä ayeda pëpe na tënë ti Royaume so lo fa. Lo tene: “Mbi diko ambaï so asara tënë ti azo so asambela Nzapa ti tokua na ala mbeni zo ti mû maboko na ala ti hinga lo. Mbi ye lani mingi ti wara mara ti azo tongaso, me mbi wara ape.”

Katherine afa tënë teti angu mingi na ndo ni so. Na pekoni lo pensé ti gue na mbeni ndo so azo mingi alingbi ti yeda na tënë ti Royaume. Me, lo gi bê ti lo wala lo yeke gbu lê ni. Lo voyagé lo oko gi fani oko na lo sara gi yenga use. A yeke lani kozo ti tene lo zia sewa ti lo lo hon la, me lango oko oko nzara ti kodoro ti lo ahon ndo ti lo. Me lo ye mingi ti wara ngia so azo ayeke wara na pekoni so ala mû maboko na azo ti hinga Jéhovah na lo soro ti gue. Na pekoni so lo gbu li ti lo na ndo ti ando nde nde so lo lingbi ti gue dä, lo sara lettre na filiale ti Guam na lo wara asango so lo yeke na bezoin ni. Na juillet, ngu 2007, na ngoi so Katherine ayeke na ngu 26 lo gue na Saipan, mbeni zoa so ayeke na Kota ngu-ingo ti Pacifique, so ayo akilomètre 10000 na kodoro ti lo. Nyen la lo wara kâ?

Kete na pekoni so Katherine asi na fini congrégation so lo gue dä, lo wara Doris, mbeni wali so ayeke na ngu 45 tongaso, so ayeda ti manda Bible. Na pekoni so ala manda chapitre oko ti si na ota ti buku Bible afa, Katherine agi bê ti lo. Lo tene: “Doris amanda ye nzoni mingi na mbi ye ti kanga lege na lo ape ti gue na li ni. Lâ oko mbi sara étude na mbeni zo ape, ni la mbi pensé so mbeni ita-wali so ahinga ti fa ye nzoni mingi si alingbi ti sara étude na Doris, peut-être mbeni ita-wali ti ngu ti lo.” Katherine asambela Jéhovah ti mû maboko na lo ti wara mbeni nzoni ita-wali ti sara étude ti Doris. Lo leke na bê ti lo ti tene na Doris so lo yeke ga na lo mbeni ita-wali ti sara étude na lo.

Katherine atene: “Kozoni si mbi sara tënë ni na Doris, lo tene na mbi so lo ye ti tene mbeni tënë na mbi. Tongana mbi mä lo awe, mbi fa na lo ye so Jéhovah asara ti mû maboko na mbi ti hon ndo ti mara ti ye so asi na lo so. Lo kiri singila na mbi.” Na pekoni, Doris atene na Katherine, lo tene: “Jéhovah asara kua na mo ti mû maboko na mbi. Na kozo lango so mo ga na da ti mbi, mbi ngbâ ti diko lani Bible teti angbonga mingi. Mbi yeke toto, mbi yeke hunda lani Nzapa ti tokua na mbi mbeni zo ti mû maboko na mbi ti mä yâ ti Bible. Na pekoni mo pika yanga-da ti mbi. Jéhovah akiri lani tënë na sambela ti mbi.” Katherine atoto na ngoi so Doris ayeke sara tënë ni na lo.  Lo tene: “Atënë ti Doris so ayeke lani kiringo tënë na sambela ti mbi. Jéhovah afa na mbi so mbi lingbi lani ti ngbâ ti sara étude ni.”

Doris awara batême na ngu 2010 nga fadeso lo yeke sara étude na gbâ ti azo. Katherine atene: “A nzere na mbi mingi ndali ti so depuis la mbi ye mingi ti mû maboko na mbeni zo ti ga Témoin ti Jéhovah so. Fadeso, Katherine ayeke pionnier spécial na Kosrae mbeni zoa ti Pacifique.

Aita ahon ngbangbo oko (so ngu ti ala ayeke na popo ti ngu 19 ti si na ngu 79) so alondo na kodoro wande afa tënë na ando so bezoin ti awafango tënë ayeke dä mingi na Micronésie. Erica ague na Guam na ngu 2006 na ngoi so lo yeke na ngu 19. Tënë so lo tene afa tënë ti bê ti aita so, lo tene: “A nzere mingi ti sara kua ti pionnier na yâ ti mbeni territoire so azo aye mingi ti mä tâ tënë dä. Mbi kiri singila mingi na Jéhovah so amû maboko na mbi ti sara kua ti pionnier na ndo so bezoin ti awafango tënë ayeke dä mingi. So ayeke tâ nzoni ye so zo alingbi ti sara na yâ ti gigi ti lo la!” Fadeso, Erica ayeke na ngia ti sara kua ti pionnier spécial na Ebeye na yâ ti azoa ti Marshall. Me zo ayeke wara nga akpale tongana lo fa tënë na kodoro wande. Zia e bâ ambeni kpale ni ota so aita so ague na Micronésie awara nga e bâ tongana nyen la ala hon ndo ni.

Fason so azo ni ayeke vivre na ni. Na pekoni so Simon, so ayeke na ngu 22, asi na zoa ti Palau na ngu 2007, hio lo bâ so nginza so lo wara ayeke kete mingi na ti so lo wara na kodoro ti lo na Angleterre. Lo tene: “A lingbi mbi manda ti vo pëpe aye kue so mbi ye. Fadeso, mbi yeke soro kobe so mbi ye ti vo ni nzoni, nga mbi yeke haka ngere ti aye so mbi ye ti vo na ando nde nde ti bâ ti so wa ngere ni ayeke ngangu ape. Tongana mbeni ye ti mbi abuba, mbi yeke gi ti vo apièce so a sara kua na ni kozo awe na mbi gi mbeni zo ti tene lo leke ni na mbi.” So lo yeke lani na aye mingi ape amû maboko na lo tongana nyen? Simon atene: “A mû maboko na mbi ti hinga ye so ayeke biani kota ye na yâ ti gigi ti zo nga tongana nyen la mbi lingbi ti vivre na kete ye so mbi yeke na ni. Mbi bâ so Jéhovah amû maboko na mbi na yâ ti angoi mingi. Na yâ ti ngu mbasambala so mbi fa tënë ge, mbi yeke wara lakue ye ti te nga na mbeni ndo ti lango.” Biani, Jéhovah ayeke mû maboko na azo so ayeke gi ti duti na aye mingi ape ndali ti so ala ye ti gi Royaume kozoni.—Mat. 6:32, 33.

Nzara ti kodoro. Erica atene: “Mbi ye afami ti mbi ngangu, nga mbi gi bê ti mbi lani mbi tene nzara ti kodoro ti mbi ayeke buba ande yâ ti fango tënë ti mbi.” Nyen la lo sara ti leke tere ti lo? Lo tene: “Kozoni si mbi gue, mbi diko a-article ti Tour ti Ba Ndo so afa tongana nyen zo alingbi ti hon ndo ti nzara ti kodoro ti lo tongana lo yeke na kodoro wande. Ye so amû maboko na mbi biani ti leke tere ti mbi ti hon ndo ti kpale ni. Na yâ ti mbeni article ni, mbeni mama adë bê ti molenge ti lo ti wali so Jéhovah ayeke bâ lege ti lo. Lo tene: ‘Jéhovah alingbi ti bâ lege ti mo nzoni mingi ahon mbi.’ Tënë ti dengo bê so amû biani ngangu na mbi.” Hannah na koli ti lo, Patrick, afa tënë na Majuro na yâ ti azoa ti Marshall. Ye so  amû maboko na Hannah ti hon ndo ti nzara ti kodoro ti lo ayeke so lo zia li ti lo gi na ndo ti aita ti congrégation so ala yeke dä. Lo tene: “Mbi kiri singila lakue na Jéhovah ndali ti sewa ti aita ti e so ayeke na yâ ti dunia kue ndali ti so ala nga kue ayeke afami ti mbi. Tongana fade ala mû maboko na mbi ape, ka mbi lingbi lâ oko pëpe ti fa tënë na ndo so bezoin ti awafango tënë ayeke dä mingi.”

Sarango kamarade. Simon atene: “Tongana mo si na mbeni fini kodoro, mo yeke bâ so aye kue ayeke nde. Na tapande, mbi ye ti tene atënë ti ngia na azo me ala yeke mä yâ ti atënë ti ngia ti mbi ni nzoni ape.” Erica atene: “Na tongo nda ni, mbi bâ so mbi yeke gi mbi oko, me ye so amû maboko na mbi ti pensé na ndo ti ye so apusu mbi ti ga ge. Mbi ga ge ti gi ye ndali ti nzoni ti mbi wani ape, me ti sara kua ti Jéhovah mingi.” Lo tene nga lo tene: “A si na mbeni ngoi, mbi wara anzoni kamarade so mbi ye ala mingi.” Simon asara ngangu ti manda yanga ti Palauan na amû maboko na lo ti “maï tâ ndoye so ayeke na bê ti lo” na aita ti congrégation so lo yeke dä (2 aCor. 6:13). Ngangu so lo sara ti manda yanga ti Palauan asara si aita aye lo mingi. Tongana aita so aga fini fini nga na aita ti ndo so aita ni ague dä asara kua maboko na maboko, ye ti nzoni so ala kue ayeke wara ayeke so ala yeke ga anzoni kamarade na yâ ti congrégation. Ambeni ye ti nzoni wa aita so amû tere ti ala wani ti fa tënë na ando so bezoin ti awafango tënë ayeke dä mingi awara?

Bazengele Paul atene: “Zo so alu ye mingi mingi, fade lo ko ni mingi mingi nga.” (2 aCor. 9:6). Wango so ayeke na yâ ti tënë so abâ biani azo so ayeke fa tënë mingi. Aye ti nzoni wa la ala “ko ni mingi mingi” na Micronésie?

Na Micronésie, a yeke ngangu ape ti komanse a-étude nga ti bâ tongana nyen azo so asara étude nga asara ye alingbi na tâ tënë so ayeke na yâ ti Bible ayeke gue na li ni na lege ti yingo. Patrick na Hannah afa nga tënë na Angaur, mbeni kete zoa so azo ti kodoro ni ayeke 320. Na pekoni so ala fa tënë kâ teti nze use, ala wara mbeni wali so abata amolenge ti lo gi lo oko. Hio wali ni ayeda ti manda Bible, lo yeda na tâ tënë nga lo sara akota changement na yâ ti gigi ti lo. Hannah atene: “Na peko ti a-étude oko oko kue so e sara na wali ni, tongana e zia lo e mû avélo ti e ti kiri, e yeke bâ lê ti mba na e tene: ‘Merci Jéhovah!’” Hannah atene nga lo tene: “Mbi hinga so nyen na nyen Jéhovah ayeke gboto wali so na mbage ti lo. Me e wara lege ti wara wali so ayeke tongana ngasangbaga so ti hinga Jéhovah, ndali ti so e gue na ndo so bezoin ti awafango tënë ayeke dä mingi. So ayeke mbeni ye ti nzoni so ahon atanga ni kue so e wara na yâ ti gigi ti e la! Tongana ti so Erica atene, “mo yeke wara ngia mingi tongana mo mû maboko na mbeni zo ti hinga Jéhovah.”

Na yâ ti akodoro mingi, bezoin ti awafango tënë ayeke mingi. Mo lingbi ti fa tënë na ando so bezoin ti awafango tënë ayeke dä mingi? Sambela Jéhovah ti sara si mo duti na nzara ti fa tënë mingi. Sara tënë ni na a-ancien ti congrégation, na surveillant ti circonscription wala na aita so asara kua awe na mbeni ndo so bezoin ti awafango tënë ayeke dä mingi. Na ngoi so mo komanse ti leke tere ti mo, sara lettre na filiale so abâ lege ti territoire so mo ye ti gue ti fa tënë dä nga hunda ndo ti wara asango mingi na ndo ni. * Peut-être mo nga kue mo lingbi ti ga na popo ti aita saki na saki (so na popo ni mo yeke wara amaseka, ambakoro, akumbamba wala azo so asara mariage awe) so amû tere ti ala wani ti sara ye nga so awara ngia ti ‘ko ye mingi mingi’.