NA NGOI so Jésus Christ ayeke peut-être lani nduru na Gadara, na mbage ti mbongo-to ti Kota ngu-ingo ti Galilée, lo tene na mbeni koli so aye ti ga disciple ti lo, lo tene: “Kiri na afami ti mo, na mo fa na ala peko ti ye so kue Jéhovah asara ndali ti mo nga tongana nyen lo sara nzoni bê na mo.” Tënë so Jésus atene na koli so afa biani so Jésus ahinga ye so ayeke na bê ti zo: nzara so zo ayeke na ni ti fa na afami ti lo tënë ti mbeni ye so agbu bê ti lo wala mbeni ye so ayeke kota mingi na lê ti lo.—Marc 5:19.

Laso nga e yeke bâ mara ti bibe so, me na yâ ti ambeni kodoro bibe ni so ayeke mingi ahon ti ambeni. Mingi ni tongana mbeni zo aga wakua ti tâ Nzapa, Jéhovah, lo yeke na nzara ti fa ye so lo mä na bê na ni fini fini so na afami ti lo. Me lo lingbi ti sara ni tongana nyen? Lo lingbi ti ndu bê ti afami ti lo so ayeke voro mbeni nzapa nde wala so amä na bê ape tongana nyen? Bible amû nzoni wango ti sarango ni.

Na ngoi ti akozo Chrétien, André ayeke lani na popo ti akozo zo so ahinga so Jésus ayeke Messie. Na pekoni lo sara tënë ni hio na zo wa? “Kozoni, André ague awara ita ti lo Simon, na lo tene na lo: ‘E wara Messie ni awe!’ (Nda ti iri Messie aye ti tene ‘Christ’).” Lo gue na Pierre na Jésus, na Pierre awara pasa ti ga mbeni disciple ti Jésus.—Jean 1:35-42.

Ngu omene na pekoni, na ngoi so Pierre ayeke na Joppé, a hunda na lo ti gue na mbage ti banga na Césarée na da ti Corneille, mbeni turugu ti kota kamba. Na ngoi so Pierre asi kâ azo wa la abungbi na yâ ti da ni? “Na ngoi ni, Corneille ayeke ku [Pierre na aita so avoyagé] lo iri afami ti lo nga na akota  kamarade ti lo.” Corneille asara si afami ti lo awara pasa ti mä tënë so Pierre atene na ala na ti mû nzoni desizion.—Kus. 10:22-33.

Nyen la e lingbi ti manda na ndo ti lege so André na Corneille asara ye lani na mbage ti afami ti ala?

André na Corneille azia pëpe si mbeni pasa so ala wara ahon senge. André lo wani lo fa Pierre na Jésus, na Corneille aleke ti tene afami ti lo amä tënë so Pierre aye ti tene na ala lani. Me André wala Corneille aforcé lani pëpe afami ti ala nga ala handa ala handango pëpe ti tene ala ga adisciple ti Christ. Mo manda nyen na lege ti ye so? A yeke nzoni e nga e mû tapande so. E lingbi ti fa tënë na afami ti e na e gi lege ti sara si ala mä atâ tënë ti Bible nga ti tene ala ga nduru na aita. Me e yeke bâ desizion ti ala na nene ni nga e yeke gi ti sara ngangu na ndo ti ala ape. Ti bâ tongana nyen la e lingbi ti mû maboko na afami ti e, zia e bâ tapande ti Jürgen na wali ti lo Petra so ayeke na Allemagne.

Petra amanda lani Bible na aTémoin ti Jéhovah nga na pekoni lo wara batême. Koli ti lo, Jürgen, ayeke lani mbeni turugu ti kota kamba. Jürgen ayeda lani pëpe na desizion so wali ti lo amû. Me tongana ngoi ayeke hon lo ga ti bâ so aTémoin ti Jéhovah ayeke fa tâ tënë so alondo na yâ ti Bible. Lo kue lo mû tere ti lo na Jéhovah na fadeso lo yeke mbeni ancien na yâ ti congrégation so lo yeke dä. Awango wa la lo mû na ndo ti ye so e lingbi ti sara ti ndu bê ti afami ti e so ayeke aTémoin ti Jéhovah ape?

Jürgen atene: “A yeke nzoni e gi pëpe ti forcé afami ti e nga ti sara gi gbâ ti tënë na ala na ndo ti aye ti yingo. Ti sara tongaso ayeke zi nzara ti tâ tënë zingo na bê ti ala. Me a yeke duti nzoni ti sara ni na kode nga yeke yeke. A yeke nga nzoni ti tene e sara si afami ti e ahinga tere na aita so ngu ti ala na ala ayeke oko nga so abezoin ti ala na ala ayeke oko. Sarango tongaso alingbi ti sara si ala yeda na tâ tënë.”

Bazengele Pierre na afami ti Corneille ayeda lani hio na fango ye ti Bible. Ambeni zo na ngoi ti akozo Chrétien so amä tâ tënë amû lani desizion hio ape.

Afami ti Jésus mingi amä na bê na lo na ngoi so lo yeke fa lani tënë. Na tapande, bazengele Jacques na bazengele Jean ayeke afami ti Jésus, mama ti ala Salomé ayeke ita ti mama ti Jésus. Salomé ayeke peut-être lani na popo ti “ambeni wali mingi. Awali so ayeke mû aye ti ala ti mû maboko na Jésus na adisciple ti lo nga.”—Luc 8:1-3

Me ti ambeni fami ti Jésus ala mä na bê lani hio ape. Na mbeni ngoi na peko ti batême ti lo, gbâ ti azo abungbi na yâ ti mbeni da ti mä lo. “Me na ngoi so afami ti lo amä tënë ni, ala gue ti gbu lo, ngbanga ti so ala yeke tene ti ala: ‘Ye asara li ti lo awe.’” Ambeni ngoi na pekoni, tongana aita ti Jésus so mama ti lo na ala ayeke oko asara tënë na ndo ti voyage so lo leke ti sara, lo zi yanga dä na lê ni lê ni ape. Ngbanga ti nyen? Ngbanga ti so “aita ti lo amä na bê na lo pëpe.”—Marc 3:21; Jean 7:5.

E manda nyen na ndo ti lege so Jésus asara ye na afami ti lo? Lo sara lani ngonzo ape tongana ambeni fami ti lo atene so ye asara li ti lo. Même na pekoni so a fâ lo na lo zingo na kuâ, Jésus akiri awa afami ti lo na lege so lo fa tere ti lo na ita ti lo Jacques so mama ti lo na lo ayeke oko. Ye so Jésus asara so amû lege na Jacques nga na tanga ti aita ti Jésus so mama ti lo na ala ayeke oko ti hinga biani so lo yeke Messie. Kite ayeke pëpe so ala yeke na popo  ti abazengele nga na azo so awara yingo vulu na yâ ti da so ayeke na nduzu na Jérusalem. Na mbeni ngoi, Jacques na Jude, ambeni ita ti lo, awara anzoni pasa.—Kus. 1:12-14; 2:1-4; 1 aCor. 15:7.

Legeoko na ngoi ti akozo Chrétien, laso ambeni fami ti e ayeke na bezoin ti tene a zia na ala ngoi mingi si ala mû lege ti fini. Zia e bâ tapande ti Roswitha so asara kua ngangu na yâ ti bungbi ti vorongo nzapa ti Catholique ti azo ti Rome na ngoi so koli ti lo awara batême na aga Témoin ti Jéhovah na ngu 1978. Teti so aye so Roswitha amä na bê na ni agbu bê ti lo mingi, lo kanga lege lani na koli ti lo. Me na peko ti angu mingi, lo kanga lege na koli ni tongana ti kozo ape na lo ga ti bâ so aTémoin ti Jéhovah ayeke fa tâ tënë. Lo wara batême na ngu 2003. Nyen la asara si lo changé so? A hon ti tene koli ti Roswitha asara ngonzo na ngoi so lani Roswitha ayeke kanga lege na lo, koli ni azia ngoi na lo ti changé bango ndo ti lo. Wango wa Roswitha amû? Lo tene: “Aye ti nzoni mingi alingbi ti ga tongana zo akanga bê lakue ti ku.”

Monika awara batême lani na ngu 1974 na amolenge ti lo ti koli use aga aTémoin ti Jéhovah ngu bale-oko na pekoni. Atâa so koli ti lo, Hans, akanga lege lâ oko pëpe na ala, lo wara lani batême gi na ngu 2006. Na peko ti ye so asi na sewa so, wango wa la azo ti sewa ni amû? “Ngbâ be-ta-zo na Jéhovah, na luti nganganga na ndo ti ye so mo mä na bê na ni.” A yeke lani kota ye ti tene Monika na amolenge ti lo ti koli use so afa na Hans lakue so ala ngbâ ti ye lo. Na ala ngbâ ti duti lani na beku so mbeni lâ lo lingbi ti yeda na ye so ala mä na bê na ni.

Jésus atene so tâ tënë ayeke tongana ngu so amû na zo fini ti lakue lakue (Jean 4:13, 14). E ye si afami ti e anyon dede ngu ti tâ tënë so saleté ayeke dä ape ti tene bê ti ala adë. Kite ayeke pëpe so, e ye pëpe ti tene ala zia lege ti nyongo ngu so ndali ti so e mû ngu ni na ala gbani gbani na e forcé ala ti nyon ni hio hio. A yeke lege so e yeke fa na tënë ti mabe ti e na ala la ayeke sara si ala yeda ti nyon ngu so wala ala ke ni. Bible atene so “zo ti mbilimbili agi bê ti lo si lo kiri tënë, me yanga ti zo ti sioni asa sio tënë” na nga “bê ti zo ti ndara afa ye na yanga ti lo, na a sara si yanga ti lo amanda ye.” E lingbi ti sara ye alingbi na wango so tongana nyen?—aProv. 15:28; 16:23.

Mbeni wali aye peut-être ti sara tënë ti mabe ti lo na koli ti lo. Tongana lo ‘gi bê ti lo si lo kiri tënë,’ lo yeke gbu li ti lo nzoni kozo si lo sara tënë, na lo yeke sara tënë gi hio hio ape. Lo yeke fa ape so lo la lo yeke na raison wala lo la lo yeke kota. Anzoni tënë so lo gbu li ti lo kozo si lo tene, a yeke dë bê na a yeke ga na siriri. Ti tene lo sara tënë nga lo sara ye na lege ti ndara, a yeke nzoni lo gbu li ti lo na ndo ti ahundango ndo so: Na ngoi wa la koli ti lo ayeke kpô na a yeke ngangu ape ti ga nduru na lo? Aye wa koli ni aye ka ti sara lisoro na ndo ni mingi wala ti diko ye na ndo ni mingi? Lo ye aye na ndo ti senda-ye, na ndo ti poroso, wala na ndo ti ngia ti awanguru mingi? Lo yeke sara tongana nyen ti sara si koli ti lo asara nzara ti Bible nga na oko ngoi ni ti bâ na nene ni bango ndo ti koli ni nga na atënë ti bê ti lo?

A yeke gi pëpe na fango na afami ti e so ayeke aTémoin ti Jéhovah ape atënë ti mabe ti e yeke yeke la e lingbi ti ndu bê ti ala. Atënë so e fa na ala ayeke ndu bê ti ala tongana e duti na nzoni sarango ye.

Jürgen so e sara tënë ti lo fade atene: “E ngbâ lakue ti sara ye alingbi na afango ye ti Bible na yâ ti fini ti e lâ oko oko. So ayeke mbeni nzoni lege so ayeke sara si mbeni fami ti e abâ anzoni sarango ye ti e même tongana lo zi yanga na ndo ni ape.” Hans so wali ti lo awara batême asara nduru na ngu 30 na pekoni si lo ga ti wara batême atene: “A yeke nzoni ti tene e aChrétien e duti na nzoni sarango ye tongaso si afami ti e abâ aye ti nzoni so tâ tënë aga na ni na yâ ti fini ti e.” A yeke nzoni afami ti e abâ so aye so e mä na bê na ni la asara si e yeke nde na tanga ti azo me pëpe sioni sarango ye la asara si e yeke nde.

Bazengele Pierre amû nzoni wango na awali so akoli ti ala ayeke aTémoin ape, lo tene: “Ala woko tere na gbe ti akoli ti ala, si tongana ambeni koli ni ayeke dä so ayeda na tënë ti Nzapa pëpe, a lingbi ti ga na ala ti mä na bê, na lege ti tënë pëpe, me na lege ti sarango ye ti tere ti awali ti ala, ngbanga ti so akoli ni abâ na lê ti ala sarango ye ti ala so sioni oko ayeke dä pëpe nga na nengo so ala ne na ala mingi. Nga, zia pendere ti ala aduti gi pendere ti  gigi pëpe, so ti tene sarango li ti ala na kode ahon ndo ni, yungo aye ti pendere nde nde ti lor wala yungo abongo ti ndo ni, me zia pendere ti ala aduti ti zo ti yâ ni na yungo bongo so alingbi ti buba pëpe so ayeke bibe ti dutingo na siriri nga ti sarango ye na ngangu pëpe so ayeke ye ti kota ngere na lê ti Nzapa.”—1 Pi. 3:1-4.

Pierre atene so sarango ye ti mbeni wali alingbi ti sara si koli ti lo ayeda na tâ tënë. Ngbene ye na ngoi so Christa, mbeni ita-wali, awara batême na ngu 1972, lo sara ye alingbi na tënë ti Pierre so ti gi ti tene koli ti lo ayeda na tâ tënë. Atâa so na mbeni ngoi, aTémoin asara étude na koli ti lo, ade tâ tënë agbu bê ti lo lani pëpe. Ngoi na ngoi lo yeke gue lani na bungbi nga lo na aita ayeke na nzoni songo. Aita aforcé nga lo pëpe ti yeda na tâ tënë. Christa asara tongana nyen ti ndu bê ti koli ti lo?

“Mbi leke na bê ti mbi ti ngbâ gi na ndo ti lege so Jéhovah aye ti tene mbi gue dä. Na oko ngoi ni, mbi gi ti sara si koli ti mbi ayeda na tâ tënë na lege ti nzoni sarango ye ti mbi me na lege ti tënë pëpe. Tongana mbeni ye so lo hunda na mbi ti sara ague nde na afango ye ti Bible ape, mbi yeke sara kue ti sara ye so bê ti lo aye. Nga, mbi yeke bâ na nene ni droit so lo yeke na ni ti soro ye so bê ti lo aye na mbi zia tënë ni na maboko ti Jéhovah.”

Ye so asi na Christa afa so a yeke kota ye ti luti nganganga pëpe na ndo ti aye. Lo ngbâ ti bata anzoni sarango ye ti lo na lege ti yingo. Lo yeke gue lakue na bungbi nga na fango tënë. Me lo sara ye na lege ti ndara. Lo hinga so a yeke na lege ni ti tene lo ye koli ti lo, lo mû ngoi ndali ti lo nga lo bâ lege ti lo. A yeke nzoni e so mbeni fami ti e ayeke Témoin ape e luti nganganga pëpe na ndo ti aye nga e sara ye na lege ti ndara. Bible atene: “Ngoi ayeke teti ye kue.” Ye so andu nga ngoi so e yeke mû teti afami ti e, mbilimbili koli wala wali ti e, so ayeke Témoin ape. Ti mû ngoi ti duti ndo oko asara si azo asara lisoro. Aye so asi afa so nzoni lisoro asara si ala sara mbanda pëpe, ala bâ pëpe so ala yeke gi ala oko, wala a ke ala.—Zo-ti. 3:1.

Holger so afami ti lo awara batême a sara ngu 20 na pekoni awe si babâ ti lo aga ti wara batême atene: “A yeke kota ye ti tene e ndoye fami ti e so ayeke Chrétien ape nga e sambela ndali ti lo.” Christa atene nga so ni ‘yeke ngbâ lakue ti duti na beku so koli ti ni ayeke mû ande desizion ti sara na Jéhovah nga ti yeda na tâ tënë.’ A lingbi sarango ye ti e na mbage ti afami ti e so ayeke aTémoin ape aduti lakue na lege ni nga e duti na beku.

Ye so e zia na gbele ti e ayeke ti bata nzoni songo na popo ti e na afami ti e ti mû lege na ala ti hinga tâ tënë nga ti ndu bê ti ala na atënë ti Bible. Nga, na yâ ti aye kue a lingbi e sara ye na “ngangu pëpe nga na nengo zo mingi.”—1 Pi. 3:15.