1. Aye wa la asara si e hinga biani so e yeke na “lâ ti nda ni”?

A DÜ mo na peko ti ngu 1914? Tongana a yeke tongaso, andâ mo passé gigi ti mo kue na “lâ ti nda ni” ti aye ti ngoi so (2 Tim. 3:1). E kue e mä tënë ti aye so Jésus atene ayeke si na ngoi ni so. Lo sara tënë ti abira, kota nzara, yengingo ti sese, asioni kobela so amû ndo, kpengo ndia pëpe so ayeke wu mingi nga na sarango aye ti ngangu na awakua ti Jéhovah (Mat. 24:3, 7-9, 12; Luc 21:10-12). E bâ nga so azo ayeke sara ye tongana ti so bazengele Paul atene lani. (Bâ encadré “ Sarango ye ti azo laso.”) E awakua ti Jéhovah e hinga biani so e yeke na “andangba lango ni”.​—Mi. 4:1.

2. Ahundango ndo wa la a lingbi e hinga akiri tënë ni?

² Ndali ti so ngu 1914 ahon aninga mingi awe, e doit ti duti nduru mingi na hunzingo ti “lâ ti nda ni”. So hunzingo ti aye ti ngoi so ayeke nduru mingi, a lingbi e hinga akiringo tënë na ambeni kota hundango ndo: Aye wa la ayeke si ande na hunzingo ti lango ti “lâ ti nda ni”? Nyen la Jéhovah aye ti tene e sara na ngoi so e yeke ku aye ni so?

3. Ti gue oko na prophétie so ayeke na 1 aThessalonicien 5:1-3, amara ayeke tö ande mbela wa?

³ Diko 1 aThessalonicien 5:1-3. Paul asara tënë ti “lâ ti Jéhovah”. Na yâ ti aversê so, “lâ ti Jéhovah” aye ti sara tënë ti ngoi so ato nda ni na bira so a yeke sara na “Babylone, Ngangu gbata,” so ayeke abungbi ti vorongo nzapa ti wataka kue, na ahunzi na bira ti Harmaguédon (Apoc. 16:14, 16; 17:5). Ngoi  kete kozo ti tene “lâ ti Jéhovah” so ato nda ni, amara ayeke tö ande mbela atene “siriri na nzoni duti ayeke dä!” (Ambeni Bible atene: ‘E yeke na siriri. Mbeni ye ti sarango e ayeke dä pëpe.’) Na ambeni ngoi akota zo ti dunia asara kua na mara ti atënë so ti sara tënë ti nzoni mango terê so ala yeke gi ti tene aduti na popo ti akodro. * Ye oko, tongo mbela ti “siriri na nzoni duti ayeke dä” so Bible asara tënë ni ayeke duti ti lo ande nde. Ngbanga ti nyen? Na ngoi so a yeke tö ande mbela ni, azo mingi ayeke pensé atene akota zo ti dunia awara lege ti ga na nzoni duti na yâ ti dunia awe. Me “mbeni kota ye ti vundu” ayeke komanse, na pekoni “futingo ayeke ga gï hio tongaso na ndö ti ala”.​—Mat. 24:21.

4. (a) Aye wa la a lingbi e ku ti hinga ni ande na ndö ti tongo mbela ti “siriri na nzoni duti ayeke dä”? (b) Nyen la e hinga na ndö ni awe?

⁴ E hinga ambeni ye na ndö ti tënë so atene “siriri na nzoni duti ayeke dä”. Ye oko, ambeni ye ayeke dä so e hinga ni ape. E hinga ape nyen la ayeke sara ande si a tö mbela ni so wala a yeke tö ande mbela ni tongana nyen. E hinga ape wala a yeke tö ande mbela ni gï fani oko wala a yeke sara ni na peko ti terê ti gboto lê ti azo kue. Atâa nyen la asi, e hinga ye so: A lingbi e handa terê ti e ape ti pensé so akota zo ti dunia so alingbi biani ti sara si siriri aduti na yâ ti dunia kue. Me tongo mbela so la Bible ahunda na e ti ku ti mä ni. Ni la ayeke fa so “lâ ti Jéhovah” ayeke nduru ti to nda ni.

5. Aye wa la 1 aThessalonicien 5:4-6 afa na e ti sara ti duti nduru ndali ti “lâ ti Jéhovah”?

⁵ Diko 1 aThessalonicien 5:4-6. Tënë ti Paul so afa ye so a lingbi e sara ti duti nduru ndali ti “lâ ti Jéhovah”. A lingbi “e lango pëpe tongana ti so atanga ni ayeke lango”. A lingbi “lê ti e angbâ na zingo ni” nga angbâ ti kpengba. Na tapande, a lingbi lê ti e angbâ ti kpengba si e ngbâ ti duti nde nga e yôro terê ti e pëpe na yâ ti aye ti poroso ti dunia so. Tongana e yôro terê ti e dä, e yeke ga “ti dunia so”. (Jean 15:19). E hinga so gï Royaume ti Nzapa la ayeke ga na siriri na yâ ti dunia kue.

6. Nyen la e ye ti mû maboko na azo ti sara? Ngbanga ti nyen?

⁶ Na ndö ti so e yeke lango pëpe, e ye nga ti mû maboko na azo ti hinga ye na ndö ti aye so Bible atene ayeke si na yâ ti dunia. Zia e girisa ape so tongana kota ye ti vundu ato nda ni awe, ngoi ayeke duti dä ape ti tene azo aga na mbage ti Jéhovah. Ndani la a lingbi e fa tënë hio. *

7. Nyen la Jéhovah aye ti tene e sara laso?

⁷ Na yâ ti kete ngoi so angbâ kozo ti tene “lâ ti Jéhovah” ato nda ni, lo ye ti tene e ngbâ  ti fa tënë mingi. A lingbi e sara kue ti duti “na ye mingi ti sara na yâ ti kusala ti Seigneur”. (1 aCor. 15:58). Jésus afa kozo awe kua so e yeke sara. Na ngoi so lo sara lani tënë ti akpengba ye kue so ayeke si na lâ ti nda ni, lo tene: “Nga, a lingbi a fa nzoni tënë na amara kue kozoni si.” (Marc 13:4, 8, 10; Mat. 24:14). Gbu gï li kete: Na ngoi kue so mo gue na fango tënë, mo yeke mû maboko ti tene prophétie ti Bible so aga tâ tënë.

8. Tongana nyen la kua ti fango tënë ti Royaume angbâ ti gue na li ni?

⁸ E lingbi ti tene nyen na ndö ti kua ti fango tënë ti Royaume so ague na li ni? Ngu na ngu, kua so angbâ ti gue na li ni. Na tapande, gbu li na ndö ti wungo ti awafango tënë ti Royaume so ague na li ni na yâ ti dunia na lâ ti nda ni so. Na ngu 1914, wungo ti awafango tënë ayeke lani 5 155 na yâ ti akodro 43. Laso, wungo ti awafango tënë ayeke kutu miombe na ndambo tongaso na yâ ti akodro 240. Atâa so kue, kua ti e ade ti hunzi ape. E doit ti ngbâ ti fa na azo so gï Royaume ti Nzapa la alingbi ti leke akpale kue ti azo.​—Ps. 145:11-13.

9. Ngbanga ti nyen la a lingbi e ngbâ ti fa tënë ti Royaume?

⁹ Kua ti e ti fango tënë ti Royaume ayeke hunzi ape juska Jéhovah atene ahunzi awe. A ngbâ na azo ngoi oke ti tene ala gi ti hinga Jéhovah Nzapa na Jésus Christ? (Jean 17:3). E hinga ape. E hinga so juska ti tene kota ye ti vundu ato nda ni, azo kue “so ayeke nduru ti yeda na tënë ni ti wara fini ti lakue lakue” alingbi ti yeda na nzoni tënë (Kus. 13:48). Tongana nyen la e lingbi ti mû maboko na ala kozo si ngoi ayeke dä ape ti tene ala sara ni?

10. Aye wa la Jéhovah amû na e ti tene e fa na azo tâ tënë?

¹⁰ Jéhovah ayeke mû na e aye kue so e bezoin ni ti fa na azo tâ tënë na lege ti bungbi ti lo. Na tapande, yenga oko oko a yeke fa ye na e na ngoi ti bungbi ti milieu ti yenga. Bungbi so amû maboko na e ti hinga ye so e yeke tene na kozo tingbingo terê ti e na azo nga na ngoi so e yeke sara avizite. A fa na e nga tongana nyen ti sara étude na azo. Bungbi ti Jéhovah amû nga na e agbakuru so e yeke fa na ye na azo. Agbakuru so amû maboko na e . . .

•   ti to nda ti lisoro na azo,

• ti zia nzara ti tënë so e yeke fa na yâ ti azo,

• ti mû maboko na azo ti manda ye mingi na ndö ti Bible,

• ti fa tâ tënë na azo na ngoi ti a-étude nga

• ti tisa azo so aye tënë ti Nzapa ti gue na ndö ti site ti e nga ti ga na Da ti Royaume.

Me gï ti duti na agbakuru so alingbi ape. A lingbi e sara kua na ni. * Na tapande, tongana na peko ti so mo sara pendere lisoro na mbeni zo so aye tënë ti Nzapa, mo mû na lo mbeni tract wala mbeni périodique, lo lingbi ti diko ni kozo na ngoi so mo kiri mo wara terê na lo. A yeke na e oko oko kue ti ngbâ ti fa tënë ti Royaume mingi nze oko oko.

11. A sigi na Mandango Bible na lege ti Internet ngbanga ti nyen?

¹¹ Ti hinga mbeni fason so Jéhovah ayeke mû maboko na azo ti manda tâ tënë, gbu li na ndö ti Mandango Bible na lege ti Internet, so ayeke na ndö ti jw.org^®. * A sigi na Mandango Bible na lege ti Internet so ngbanga ti nyen? Nze oko oko, azo saki mingi na yâ ti dunia ayeke gue na ndö ti Internet ti gi aye ti manda so ayeke na yâ ti Bible. Aye ti manda so ayeke na ndö ti site ti e alingbi ti mû maboko na azo ti komanse ti manda tâ tënë ti Bible. Ambeni zo so mo sara lisoro na ala alingbi ti sara mbeto ti yeda ti manda Bible. Tongana a yeke tongaso, fa na ala mbage so na ndö ti site ti e wala tokua lien ti aye ti manda ni na ala.

12. Nyen la mbeni zo alingbi ti manda na lege ti Mandango Bible na lege ti Internet?

¹² Mandango Bible na lege ti Internet asara tënë na ndö ti atënë so: “Bible nga na Wa ti Bible,” “Azo so Bible asara tënë ti ala mingi” na “Tënë ti beku so ayeke na yâ ti Bible.” Tongana zo amanda ye na ndö ti atënë so, lo yeke hinga:

• Lege so Bible alingbi ti mû maboko na mbeni zo

• Jéhovah, Jésus nga na a-ange

• Ndani so Nzapa acréé azo

• Ndani so pasi nga na aye ti sioni ayeke dä

Aye ti manda ni asara nga tënë na ndö ti lege so . . . 

• Jéhovah ayeke hunzi pasi na kuâ

• Jéhovah ayeke kiri na akuâ na fini nga

• Jéhovah ayeke zia Royaume ti lo na place ti asioni gouvernement ti azo

13. Eskê Mandango Bible na lege ti Internet amû place ti étude so e yeke sara na azo? Fa ngbanga ti nyen la mo tene tongaso.

¹³ Mandango Bible na lege ti Internet amû pëpe place ti étude so e yeke sara na azo. Jésus amû na e pasa ti sara si azo aga adisciple. E yeke na beku so azo so aye tënë ti Nzapa ayeke manda aye ti manda so, ala yeke ye aye so ala manda nga ala yeke wara nzara ti manda ye mingi. Tongana a yeke tongaso, peut-être ala yeke yeda ti manda Bible. Na hunzingo ti ye ti manda oko oko, a wa zo so adiko ni ti sû demande ti tene mbeni zo amanda Bible na lo. Lâ oko oko, na lege ti site ti e, bungbi ti Jéhovah ayeke wara mbeti so azo 230 tongaso na yâ ti dunia ayeke tokua ti hunda ti tene a manda Bible na ala. A yeke kota ye mingi ti tene mbeni Témoin amanda Bible na mbeni zo!

14. Ti gue oko na yanga so Jésus amû na Matthieu 28:19, 20, nyen la e yeke sara kue ti gi ti sara? Ngbanga ti nyen?

¹⁴ Diko Matthieu 28:19, 20. Na ngoi so e yeke manda Bible na azo, a lingbi e sara kue  ti gi ti ‘sara si azo aga adisciple nga ti fa na ala ti bata aye kue so Jésus amû yanga na ala ti sara.’ A lingbi e mû maboko na azo ti hinga so a yeke kota ye mingi ti tene ala mû mbage ti Jéhovah nga na Royaume ti lo. Ye so aye ti tene e gi ti wa azo ti sara ye alingbi na tâ tënë na lege so ala sara ye alingbi na aye so ala manda, ala mû fini ti ala na Jéhovah nga ala wara batême. Ala yeke sö kuâ na lâ ti Jéhovah gï tongana ala sara aye so.—1 Pi. 3:21.

15. Nyen la e yeke na ngoi ti sara ni ape? Ngbanga ti nyen?

¹⁵ Tongana ti so e tene fade, ngoi ti tene aye ti ngoi so ahunzi aga nduru mingi awe. Ndani la, e yeke na ngoi pëpe ti ngbâ ti manda Bible na azo so asara pëpe achangement na yâ ti fini ti ala ti fa so ala ye ti ga adisciple ti Christ (1 aCor. 9:26). A lingbi e sara kua ti e hio. Azo mingi ayeke dä so abezoin ti mä tënë ti Royaume kozo si ngoi ayeke dä ape ti tene ala mä ni.

16. Ti gue oko na Apocalypse 18:2, 4, 5, 8, nyen la a lingbi e kue e sara? (Bâ nga kete tënë na gbe ni.)

¹⁶ Diko Apocalypse 18:2, 4, 5, 8. Aversê so afa mbeni ye nde so Jéhovah aye ti tene awakua ti lo asara. Atâ Chrétien kue adoit ti fa polele so ala yôro terê ti ala pëpe na yâ ti aye ti Babylone, Ngangu gbata. Kozo ti tene mbeni zo amanda tâ tënë, peut-être lo yeke na yâ ti mbeni bungbi ti vorongo nzapa ti wataka. Peut-être lo yeke gue lani na abungbi ni nga lo yeke mû mbage na aye so andu ni. Wala peut-être lo yeke mû lani nginza na bungbi ni. Kozo ti tene a yeda na mbeni zo ti ga wafango tënë so ade ti wara batême ape, lo doit ti fâ yâ ti songo kue so atingbi lo na bungbi ti vorongo nzapa ti wataka. Lo doit ti tokua lettre na ngbene eglize ti lo wala na mbeni bungbi so ayeke mbage ti bungbi ti vorongo nzapa ti wataka ti fa so lo zi terê ti lo biani biani dä awe. *

17. Mara ti kua wa la a lingbi Chrétien asara ni ape? Ngbanga ti nyen?

¹⁷ Tâ Chrétien adoit ti sara kue ti tene mbeni ye atingbi pëpe kua ti lo na Babylone, Ngangu gbata (2 aCor. 6:14-17). Na tapande, lo doit ti duti mbeni zo ti kua ti mbeni eglize ape. Na ndö ni, mbeni Chrétien so ayeke sara kua na mbeni ndokua ayeke sara pëpe gbâ ti kua na ndo so a maï vorongo nzapa ti wataka dä. Nga, tongana lo yeke na ndokua ti lo wani, lo yeke gi pëpe ti sara mbeni kua wala ti yeda ti sara mbeni kua ndali ti mbeni bungbi ti Babylone, Ngangu gbata. Ngbanga ti nyen la e luti ngangu na ndö ti tënë so? Ngbanga ti so e ye pëpe ti mû mbage na yâ ti afango ye ti  wataka nga na asioni sarango ye ti abungbi ti vorongo nzapa ti wataka so Nzapa atene ayeke sioni.—És. 52:11. *

18. Tongana nyen la mbeni ita-koli angbâ na ndö ti amama-ndia ti Bible so andu kua ti nginza ti lo?

¹⁸ A ninga mingi awe, mbeni koli ahunda na mbeni ancien so ayeke na ndokua ti lo wani ti sara mbeni kete kua ti charpentier na mbeni eglize na yâ ti kete gbata ti ancien ni. Koli ni ahinga so ita-koli ni ayeke tene ka lakue so ni yeke sara kua na a-eglize ape. Me ti so ni so koli ni agi zo gbä ti sara kua ni. Atâa so kue, ita-koli ni angbâ na ndö ti amama-ndia ti Bible na lo ke ti sara kua ni. Na yenga so aga na pekoni, mbeti-sango ti ndo ni afa foto ti mbeni charpentier nde so ayeke zia croix na terê ti eglize ni. Tongana fade ita-koli ni ayeda ti sara kua ni, ka peut-être foto ti lo la a yeke zia na yâ ti mbeti-sango ni. Imaginé tongana nyen la iri ti lo ayeke buba na popo ti amba ti lo aChrétien. Imaginé nga ye so ayeke sara na ndö ti Jéhovah.

19-20. (a) Nyen la e manda juska ge? (b) Ambeni ye wa la a lingbi e hinga encore?

¹⁹ Bible atene so kota prophétie ti peko so aga nduru ti ga tâ tënë ayeke so akota zo ti dunia ayeke tö ande mbela so “siriri na nzoni duti ayeke dä”. Grâce na aye so Jéhovah afa na e, e hinga so amara ayeke ga ande pëpe na tâ siriri so aninga. Nyen la a lingbi e sara kozo si kota prophétie so aga tâ tënë nga kozo na futingo so ayeke ga gï hio tongaso na pekoni? Jéhovah aye ti tene e ngbâ ti fa tënë ti Royaume mingi nga e ngbâ ti gi ti sara si azo mingi aga adisciple. Na oko ngoi ni, a lingbi e ngbâ ayo na abungbi ti vorongo nzapa ti wataka kue. Ye so aye nga ti tene so a lingbi e zi terê ti e na yâ ti Babylone, Ngangu gbata nga e sara kua pëpe ndali ni.

²⁰ Ambeni ye nde ayeke nga dä so ayeke si ande na hunzingo ti “lâ ti nda ni”. Ambeni ye nde ayeke nga dä so Jéhovah aye ti tene e sara. Aye ni so ayeke aye wa? Tongana nyen la e lingbi ti leke terê ti e ndali ti aye kue so aga nduru ti si awe? E yeke bâ ni na yâ ti article ti peko.