NGBENE ye giriri ti ga na ni asandaga ayeke kota mbage ti tâ vorongo. Azo ti Israël ayeke mû lani asandaga ti anyama, nga a hinga aChrétien depuis na “sandaga ti gonda” ti ala. Ye oko, ambeni sandaga nde ayeke dä so anzere na Nzapa (aHéb. 13:15, 16). Asandaga so ayeke ga na ngia nga na anzoni ye tongana ti so atapande so e yeke gue ti bâ ayeke fa.

Hannah, mbeni wakua ti Nzapa ti giriri so ayeke be-ta-zo, aye lani mingi ti wara mbeni molenge ti koli me lo lingbi ti dü amolenge ape. Na yâ ti sambela, lo mû zendo na Jéhovah lo tene, tongana ni dü mbeni molenge ti koli, ni ‘yeke mû lo na Jéhovah ti sara kua ti lo na yâ ti gigi ti lo kue.’ (1 Sam. 1:10, 11). A si na mbeni ngoi, Hannah amû ngo na lo dü molenge ti koli so iri ti lo ayeke Samuel. Na ngoi so Hannah azi Samuel na me, lo gue na lo na tabernacle, gï tongana ti so lo tene lani. Jéhovah airi tënë nzoni na ndö ti Hannah ndali ti bibe ti sacrifice so lo yeke na ni. Lo wara pasa ti dü encore amolenge oku, na Samuel aga mbeni prophète nga mbeni zo ti sungo Bible.​—1 Sam. 2:21.

Legeoko tongana ti Hannah na Samuel, aChrétien ayeke laso na pasa ti mû fini ti ala ti sara na Zo so acréé ala. Jésus atene nga so Jéhovah ayeke futa ande e nzoni ndali ti asacrifice kue so e sara ti voro na lo.​—Marc 10:28-30.

Na ngoi ti akozo Chrétien, a hinga lani Dorcas mbeni wali Chrétien tongana zo so ayeke “sara anzoni kusala mingi nga ayeke mû amatabisi mingi na azo ti mawa”. So ti tene asacrifice so lo sara ti mû maboko na azo. Me mawa ni ayeke so “lo tï kobela na lo kui”, ye so amû vundu mingi na congrégation. Na ngoi so adisciple amä so Pierre ayeke na yâ ti kodro ni, ala voro yanga na lo ti ga hio. Tara ti bâ nzerengo terê ti ala na ngoi so Pierre aga na lo zingo Dorcas na kuâ. So ayeke kozo ti tene mbeni bazengele azingo kuâ la (Kus. 9:36-41). Nzapa agirisa lani pëpe asacrifice so Dorcas asara (aHéb. 6:10). A sara tënë ti mungo ye ti lo so na yâ ti Bible tongana mbeni nzoni tapande ti tene e mû pekoni.

Bazengele Paul nga kue ayeke mbeni nzoni tapande mingi ti zo so amû ngoi ti lo mingi ndali ti azo nga lo yeke bibe mingi na ala. Paul asû mbeti na aita ti lo aChrétien ti Corinthe, lo tene: “Ti mbi, mbi yeke duti ande na ngia mingi ti mû aye ti mbi kue nga ti kä terê ti mbi kue ndali ti ala.” (2 aCor. 12:15). Paul ahinga na lege ti aye so asi na lo so ti mû terê ti mo ndali ti azo ayeke ga gï na mo ngia ape me nga Jéhovah ayeke iri tënë nzoni na ndö ti mo nga mo yeke nzere na lo, ye so ayeke kota mingi.​—Kus. 20:24, 35.

A yeke polele so tongana e mû ngoi ti e nga na ngangu ti e ti sara si aye ti Royaume ague na li ni nga ti mû maboko na aita ti e, a yeke nzere na Jéhovah mingi. Me eskê ambeni lege nde ayeke dä so e lingbi ti mû maboko na kua ti fango tënë ti Royaume? En, a yeke dä. Na ndö ti ngoi ti e nga na ngangu ti e so e yeke mû, e lingbi ti mû a-offrande na bê ti e wani ti mû gonda na Nzapa. A yeke sara kua na ni ndali ti kua ti fango tënë na yâ ti dunia kue, a ndu mungo maboko na amissionnaire nga na azo so ayeke sara gï kua ti ngoi kue. Nga a yeke na lege ti a-offrande so e mû na bê ti wani la a yeke sû ambeti ti e na a yeke kiri peko ni na ayanga ti kodro nga a yeke sara na avidéo. A yeke nga na lege ni la a yeke mû maboko na azo so awara kpale na peko ti mbeni kota pupu wala mbeni ngu so asuku amû ndo. A yeke sara nga kua na ni ti leke na afini Da ti Royaume. E yeke na kite oko ape so “a yeke iri tufa na ndö ti zo so amû ye mingi na azo”. Nga, tongana e mû aye ti e ti ngangu ngere na Jéhovah, e yeke mû gonda na lo.​—aProv. 3:9; 22:9.