1-2. (a) Nyen la Jésus asara na bi so na ndade ni a fâ lo? (b) Ahunda wa la e yeke bâ na yâ ti article so?

 NA JEUDI, lango 14 ti Nisan ngu 33 na lakui, Jésus na abazengele ti lo so ayeke be-ta-zo ate Kobe ti Seigneur. Lo hinga so na yâ ti kete ngoi Judas ayeke kä lo, awato ti lo ayeke sara pasi na lo nga ala yeke fâ lo. Ndani la na peko ti kobe ni, Jésus atene atënë mingi ti kpengba abazengele ti lo. Na ngoi so ala ye ti hon, Jésus atene mbeni kpengba sambela. E peut ti diko atënë ti sambela so na Jean chapitre 17.

² Nyen la atënë ti sambela ti Jésus so afa na e na ndö ti aye so lo gi bê ti lo na ndö ni na ngoi ni so? Tongana nyen la sambela so afa ye so ayeke kota mingi na lo na ngoi ti kua ti lo ti fango tënë na ndö ti sese? Zia e sara lisoro na ndö ti kiringo tënë na ahunda so.

“MBI SARA SI ALA HINGA IRI TI MO”

3. Jésus atene nyen na ndö ti iri ti Jéhovah? Lo ye ti tene nyen la? (Jean 17:​6, 26).

³ Na yâ ti sambela ti Jésus, lo tene: “Mbi sara si ala hinga iri ti mo.” Ti vrai ni, fani use lo tene so lo sara si adisciple ti lo ahinga iri ti Jéhovah. (Diko Jean 17:​6, 26.) Lo ye ti tene nyen la? Eskê lo fa lani na ala mbeni iri so ade ala hinga ni ape? Adisciple ti Jésus ayeke lani aJuif, tongaso ala hinga awe so iri ti Nzapa ayeke Jéhovah. Iri so asigi fani saki mingi na yâ ti Mbeti ti Nzapa so a sû ândö na Hébreu. Tongaso, Jésus ayeke sara lani pëpe tënë ti iri ti Nzapa, me lo yeke sara tënë ti mara ti Nzapa so Jéhovah ayeke ni. Lo aidé lani adisciple  ti lo ti hinga Jéhovah nzoni, na tapande, lo fa na ala ye so lo leke na bê ti lo ti sara ndali ti sese nga na azo, aye so lo sara awe, aye so lo yeke sara ande nga na asarango ye ti lo. Gï Jésus oko la ahinga Jéhovah nzoni mingi.

4-5. (a) Tongana nyen la e peut ti fa na lege ti mbeni tapande ye so aye ti tene ti hinga iri ti mbeni zo? (b) Nyen la a-aidé adisciple ti Jésus ti hinga ye nzoni mingi na ndö ti iri ti Jéhovah?

⁴ Na tapande, imaginé so mbeni ancien ti congrégation ti mo so iri ti lo David ayeke nga docteur. A sara angu mingi awe la mo hinga ita ni. Me mbeni lâ, mo yeke na ngangu kpale ti seni. Mo gue na hôpital so ita-koli ni ayeke sara kua dä na lo sö fini ti mo. Fadeso, mo ye ita ni même mingi ahon ti kozo, tongana mo mä iri ti lo, mo yeke pensé na ye so lo sara na mo. David angbâ ancien so mo hinga lo aninga awe, me lo yeke nga fadeso docteur so asö fini ti mo.

⁵ Legeoko nga, adisciple ti Jésus ahinga iri ti Jéhovah awe. Me iri so aga kota ye mingi na lê ti ala ndali ti so Jésus a-aidé ala ti hinga Jéhovah nzoni. E tene tongaso ngbanga ti nyen? Ndali ti so ye kue so Jésus atene nga lo sara, lo sara ni tongana Babâ ti lo. Tongaso, abazengele ti lo ‘ahinga’ Jéhovah nzoni na lege so ala mä afango ye ti lo nga ala bâ fason so lo sara na ye na azo.—Jean 14:9; 17:3.

“IRI TI MO WANI SO MO MÛ NA MBI”

6. Na lege wa la Jéhovah amû iri ti Lo na Jésus? (Jean 17:​11, 12).

⁶ Na yâ ti sambela ti Jésus, lo sambela ndali ti adisciple ti lo, lo tene: “Bâ ndo na ndö ti ala ndali ti iri ti mo wani so mo mû na mbi.” (Diko Jean 17:​11, 12.) Eskê a ye ti tene so a yeke iri fadeso Jésus Jéhovah? Ên-ën. Bâ so na yâ ti sambela ti Jésus, lo sara tënë ti iri ti Jéhovah lo tene “iri ti mo wani.” Tongaso, iri ti Jéhovah aga lani iri ti Jésus ape. Ka Jésus aye lani ti tene nyen na ngoi so lo tene Nzapa amû iri ti Lo na lo? Kozoni, Jéhovah la atokua Jésus ti sara tënë na iri ti lo. Lo ga lani na iri ti Babâ ti lo nga lo sara akpengba kua na iri ti lo (Jean 5:43; 10:25). Use ni, nda ti iri ti Jésus aye ti tene “Jéhovah ayeke salut.” Tongaso, iri ti Jéhovah ayeke na yâ ti nda ti iri ti Jésus.

7. Mû mbeni tapande ti fa tongana nyen la Jésus apeut ti sara tënë na iri ti Jéhovah.

⁷ Na tapande, mbeni lembe ayeke sara kua na iri ti mbeni gbia ti kodro, tongaso lo peut ti sara tënë na iri ti gbia ni. Tongaso, atënë so lembe ni ayeke tene ayeke na ngangu tongana ti gbia ni. Legeoko nga, Jésus ayeke sara lani kua na iri ti Jéhovah nga lo sara tënë na azo na iri ti Lo.—Mat. 21:9; Luc 13:35.

8. Tongana nyen la Jésus asara lani kua na iri ti Jéhovah kozo ti ga na sese? (Exode 23:​20, 21).

⁸ Bible airi Jésus “Tënë ni” ndali ti so Jéhovah asara kua na lo ti fa na a-ange nga na azo aye so lo ye ti tene ala hinga nga ala sara (Jean 1:​1-3). Peut-être Jésus la ayeke ange so Jéhovah atokua lani lo ti bâ lege ti azo ti Israël na ngoi so ala yeke na yâ ti benyama. Na ngoi so Jéhovah ayeke tene na azo ti Israël ti mä yanga ti ange so, lo tene: “Ndali ti so lo yeke sara kua na iri ti mbi.” a (Diko Exode 23:​20, 21.) Jéhovah atene tongaso ndali ti so Jésus asara tënë na iri ti lo nga lo yeke zo so afa so Jéhovah asara ye kue na lege ni nga Lo yeke nzoni-kue.

 “BABÂ, MÛ GLOIRE NA IRI TI MO”

9. Tongana nyen la Jésus afa so iri ti Jéhovah ayeke lani kota ye mingi na lê ti lo? Fa ndani so mo tene tongaso.

⁹ Tongana ti so e londo ti bâ, même kozo ti tene Jésus aga na sese, iri ti Jéhovah ayeke lani kota mingi na lê ti lo. Na ngoi so Jésus ayeke lani na sese, lo fa nga so iri ti Jéhovah ayeke kota mingi na lê ti lo na lege ti aye kue so lo sara. Nduru na hunzingo ti kua ti fango tënë ti Jésus na sese, lo tene na Jéhovah, lo tene: “Babâ, mû gloire na iri ti mo.” Na lê ni lê ni, Babâ ti lo angbâ na yayu akiri tënë na lo na kota go, atene: “Mbi mû gloire na ni awe na mbi yeke kiri ti mû gloire na ni.”—Jean 12:28.

10-11. (a) Jésus amû gloire na iri ti Jéhovah tongana nyen? (Bâ nga foto.) (b) Ngbanga ti nyen la a hunda ti tene a sara si iri ti Jéhovah aga nzoni-kue nga a zi zonga so a bi na ndö ni?

¹⁰ Jésus nga kue amû lani gloire na iri ti Babâ ti lo. Lo sara ni tongana nyen? Mbeni lege ni ayeke so lo fa na azo apendere sarango ye ti Babâ ti lo nga na aye so lo sara so apika bê mingi. Me lo sara nga mbeni ye nde. Jésus adoit lani ti fa so Jéhovah asara aye kue na lege ni nga iri ti lo ayeke nzoni-kue. b Jésus afa lani so a yeke kota ye ti sara tongaso na lege ti tapande ti sambela so lo fa na adisciple ti lo. Lo tene: “Babâ ti e so mo yeke na yayu, zia a sara si iri ti mo aga nzoni-kue.”—Mat. 6:9.

¹¹ Ngbanga ti nyen la a doit ti sara si iri ti Jéhovah aga nzoni-kue nga ti zi zonga so a bi na ndö ni? Ngbanga ti so na yaka ti Éden, Satan Zabolo atene amvene na iri ti Jéhovah Nzapa. Satan atene so Jéhovah ayeke zo ti mvene  nga lo gbanzi mbeni nzoni ye na Adam na Ève (Gen. 3:​1-5). Satan atene nga so fason so Jéhovah ayeke sara na aye ayeke na lege ni ape. Atënë ti mvene so apeut ti sara si azo apensé so Jéhovah ayeke sioni Nzapa. Na pekoni na ngoi ti Job, Satan atene so azo ayeke voro Jéhovah gï ndali ti aye so lo peut ti mû na ala. Zo ti mvene so atene nga so azo ayeke zia ti voro Jéhovah tongana ala wara akpale ndali ti so ala ye Lo vrai ape (Job 1:​9-11; 2:4). A bezoin lani ngoi ti hinga zo so ayeke zo ti mvene ni, Jéhovah wala Satan.

“MBI KÄ FINI TI MBI NA KU”

12. Nyen la Jésus ayeke lani nduru ti sara ndali ti so lo ye iri ti Jéhovah?

¹² So Jésus aye Jéhovah, lo ye lani ti sara kue ti tene iri ti lo aga nzoni-kue nga ti zi zonga so a bi na ndö ni. Jésus atene: “Mbi kä fini ti mbi na kuâ.” (Jean 10:​17, 18). Biani, lo yeke lani même nduru ti kui ndali ti iri ti Jéhovah. c Adam na Ève, so ayeke akozo zo so ayeke mbilimbili-kue, atourné lani peko na Jéhovah na ala mû mbage ti Satan. Nde na ala, Jésus ayeke lani nduru ti ga na sese nga ti fa so lo ye Jéhovah. Jésus asara ni na lege so lo mä yanga ti Jéhovah na yâ ti ye kue so lo sara nga lo tene (aHéb. 4:15; 5:​7-10). Lo ngbâ be-ta-zo na Jéhovah juska lo kui na ndö ti keke ti pasi (aHéb. 12:2). So lo sara tongaso, lo fa so lo ye Jéhovah nga na iri ti Lo.

13. Ngbanga ti nyen la Jésus ayeke zo so afa nzoni mingi so Satan ayeke zo ti mvene? (Bâ nga foto.)

¹³ Ye kue so Jésus asara afa lani so Satan ayeke zo ti mvene, me Jéhovah ape (Jean 8:44). Jésus ahinga Jéhovah nzoni ahon azo kue. Tongana mbeni tënë so Satan atene lani na ndö ti Jéhovah ayeke tâ tënë, Jésus ayeke hinga. Me Jésus aleke na bê ti lo ti gbu koko ti iri ti Jéhovah ti fa so lo hinga so atënë kue so Satan atene ayeke mvene. Même na ngoi so mo bâ mo tene Jéhovah adö lo azia, Jésus ayeke lani nduru ti kui ahon ti tourné peko na Babâ ti lo so aye lo.—Mat. 27:46. d

“MBI HUNZI KUSALA SO MO MÛ NA MBI TI SARA SO AWE”

14. So Jésus angbâ lani be-ta-zo, Jéhovah afuta lo tongana nyen?

¹⁴ Na yâ ti sambela so Jésus atene na bï so na ndade ni lo kui, lo tene: “Mbi hunzi kusala so mo mû na mbi ti sara so awe.” Lo yeke lani na confiance so Jéhovah ayeke futa lo ndali ti so lo ngbâ be-ta-zo (Jean 17:​4, 5). Na lo yeke lani na raison ti sara confiance na  Babâ ti lo. Jéhovah azia pëpe si lo ngbâ na yâ ti dû ti kuâ (Kus. 2:​23, 24). Lo zingo Jésus na kuâ na lo mû na lo mbeni ndo so ayeke kota mingi na yayu (aPhil. 2:​8, 9). A si na mbeni ngoi, Jésus akomanse ti komande tongana Gbia ti Royaume ti Nzapa. Nyen la Royaume ni ayeke sara? Jésus akiri tënë na ni na ngoi so lo fa na adisciple ti lo ti sambela, lo tene: “Zia Royaume ti mo aga. Zia a sara ye so bê ti mo [Jéhovah] aye, na yayu legeoko nga na ndö ti sese.”—Mat. 6:10.

15. Mbeni kua nde wa la Jésus ayeke sara ande?

¹⁵ Fafadeso, Jésus ayeke sara bira na awato ti Nzapa nga lo yeke futi asioni zo na ngoi ti Harmaguédon (Apoc. 16:​14, 16; 19:​11-16). Kete na pekoni, lo yeke bi Satan na yâ ti “kota dû so alï mingi,” so ayeke mbeni ndo so lo peut ti sara ye oko dä ape (Apoc. 20:​1-3). Na ngoi ti Komandema ti Jésus ti ngu saki oko, lo yeke sara si siriri amû ndo kue nga azo ayeke ga mbilimbili-kue. Lo yeke zingo ande akuâ. Lo yeke sara si sese kue aga mbeni paradis. Ye so Jéhovah aleke na bê ti lo ti sara ayeke ga ande tâ tënë.—Apoc. 21:​1-4.

16. Fini ayeke duti ande tongana nyen na peko ti Komandema ti Jésus ti ngu saki oko?

¹⁶ Fini ayeke duti ande tongana nyen na peko ti Komandema ti Jésus ti ngu saki oko? Siokpari ayeke duti dä ape. Zo abezoin encore ape ti hunda pardon ndali ti asiokpari ti lo na lege ti ye so a futa ti zi azo; e bezoin ande ape mbeni zo ti sara songo na popo ti e na Nzapa nga e bezoin ande aprêtre ape. Nga, “kuâ so ayeke ndangba wato ni” ayeke duti dä ape. Azo so akui ayeke kiri na fini. Azo kue so ayeke na ndö ti sese ayeke ga mbilimbili-kue.—1 aCor. 15:​25, 26.

17-18. (a) Nyen la ayeke si na peko ti Komandema ti ngu saki oko ti Christ? (b) Nyen la Jésus ayeke sara ande tongana komandema ti lo ahunzi? (1 aCorinthien 15:​24, 28). (Bâ nga foto.)

¹⁷ Mbeni ye nde wa la ayeke si na peko ti Komandema ti ngu saki oko ti Christ? Na ngoi  ni so, mbeni ye so ayeke nde mingi ayeke passé. Zo oko ayeke dë kite encore ape so Jéhovah ayeke nzoni-kue nga Nzapa so ayeke mbilimbili. Ngbanga ti nyen? Na yaka ti Éden, Satan atene lani so Jéhovah ayeke zo ti mvene nga ndoye la apusu lo ti komande azo ape. Ngbene ye na ngoi ni so ti ga na ni, azo so ane lo asara si iri ti lo aga nzoni-kue fani mingi. Tongaso, na hunzingo ti Komandema ti ngu saki oko ti Christ, a yeke zi zonga so a bi na ndö ti iri ti Jéhovah kue kue kue. Lo yeke fa ande so lo yeke Babâ ti e ti yayu so aye e mingi, zo oko ayeke dë kite na ni ape.

¹⁸ Azo kue ayeke hinga ande so atënë so Satan atene na ndö ti Jéhovah ayeke mvene. Nyen la Jésus ayeke sara ande tongana komandema ti lo ahunzi? Eskê lo yeke sara ande ye tongana Satan na lo yeke londo ti sara kpengba-li na Jéhovah? Ên-ën. (Diko 1 aCorinthien 15:​24, 28.) Jésus ayeke kiri ande na Royaume ni na Babâ ti lo. Lo yeke woko ande terê ti lo na gbe ti komandema ti Jéhovah. Nde na Satan, Jésus ayeke nduru ti dö aye kue ti zia ndali ti so lo ye Jéhovah.

19. Tongana nyen la iri ti Jéhovah ayeke kota ye mingi na lê ti Jésus?

¹⁹ Li ti e akpe ape so Jéhovah ayeke lani nduru ti mû iri ti lo na Jésus. Jésus asara lani kua na iri ti Babâ ti lo nzoni mingi. Tongaso, tongana nyen la iri ti Jéhovah ayeke kota ye mingi na lê ti Jésus? A yeke kota ye mingi na lê ti lo ahon tanga ti aye kue. Lo yeke lani nduru ti kui ndali ti iri so nga lo yeke duti ande nduru ti kiri na aye kue na Jéhovah na hunzingo ti Komandema ti lo ti ngu saki oko. E peut ti mû tapande ti Jésus tongana nyen? E yeke kiri tënë na hunda so na yâ ti article ti peko.