1-3. (a) Achangement wa la alingbi ti duti ngangu na e ti sara ni na peko ti batême ti e? (b) Tongana a yeke ngangu mingi na e ti gue na li ni tongana ti so e ye, atënë wa la e lingbi ti hunda tere ti e na ni? (Bâ afoto so ayeke na tongo nda ti article ni.)

NA PEKO ti so Kévin ^[1] amanda tâ tënë, lo ye si mbeni ye abuba yâ ti songo ti lo na Jéhovah ape. Me angu mingi kozo, lo yeke sara angia ti nginza, lo yeke nyon manga, lo yeke nyon sämba ahon ndo ni nga na adrogue. Ti tene Kévin anzere na lê ti Nzapa, a yeke nzoni lo zia lege ti asioni ye so kue. A yeke ye so lo sara ni ngbanga ti so lo zia bê ti lo kue na Jéhovah nga na ngangu so Tënë ti Nzapa ayeke na ni ti changé aye na yâ ti fini ti zo.—aHéb. 4:12.

² Na peko ti so Kévin awara batême, eskê lo zia lege ti sarango achangement na yâ ti gigi ti lo? Ên-ën. A lingbi lo ngbâ ti sara effort lakue ti gi ti duti na anzoni sarango ye ti aChrétien (aÉph. 4:31, 32). Na tapande, lo bâ so a yeke lani ngangu na lo ti hon ndo ti ngonzo so ayeke gbu lo hio hio. Lo tene: “Ti zia lege ti sarango  ngonzo ayeke lani ngangu na mbi mingi ahon ti zia lege ti asioni ye so mbi yeke sara kozo.” Kévin asara achangement so ndali ti so lo voro yanga na Jéhovah na yâ ti sambela nga lo manda Bible mingi.

³ Tongana ti Kévin, e nga kue e sara akota changement na yâ ti gigi ti e kozo ti wara batême tongaso si fini ti e ague oko na aye so Bible ahunda. Na peko ti batême ti e, e bâ so a yeke kota ye ti ngbâ ti sara ambeni kete changement tongaso si e sara ye gi tongana Nzapa nga na Jésus (aÉph. 5:1, 2; 1 Pi. 2:21). Na tapande, peut-être e bâ so e yeke dema tere mingi, e yeke sara mbeto ti zo, e yeke na bibe ti dikongo akete kete tënë wala e yeke na ambeni wokongo nde. Ti hon ndo ti aye tongaso ayeke ngangu na e mingi? Tongana a yeke tongaso, mo lingbi ti hunda tere ti mo: ‘Tongana mbi sara akota changement kozo awe, ngbanga ti nyen a yeke ngangu na mbi ti ngbâ ti sara akete changement? Nyen la mbi lingbi ti sara ti tene mbi sara ye so Bible afa tongaso si mbi ngbâ ti changé aye na yâ ti gigi ti mbi?’

4. Ngbanga ti nyen e lingbi pëpe ti zia ngia na bê ti Jéhovah na yâ ti aye kue?

⁴ E so e hinga Jéhovah nga e ye lo mingi, e ye na bê ti e kue ti zia ngia na bê ti lo. Me atâa e ye lo tongana nyen, siokpari so ayeke na tere ti e asara si e yeke zia ngia na bê ti lo lakue ape. Pensé ti e ague oko na ti bazengele Paul so atene: “Nzara ti sara ye so mbi ye ayeke na yâ ti mbi, me ngangu ti sara ye so ayeke nzoni ayeke dä pëpe.”—aRom. 7:18; Jacq. 3:2.

5. Achangement wa la e sara lani kozo si e wara batême? Me ambeni wokongo wa la e lingbi ti ngbâ lakue ti gi ti hon ndo ni?

⁵ E dö asioni sarango ye so alingbi ti kanga lege na e lani ti ga aChrétien kue e zia (1 aCor. 6:9, 10). Me siokpari angbâ lakue na tere ti e (aCol. 3:9, 10). Ndani la, e yeke ngbâ ti sara afaute même tongana e wara batême a sara angu mingi awe. Ngoi na ngoi e lingbi ti wara asioni bibe, nzara ti sara asioni ye nga alingbi ti duti ngangu na e ti hon ndo ti mbeni wokongo ti e. E lingbi ti ngbâ ti tiri na ambeni wokongo ti e teti angu mingi.

6, 7. (a) Nyen la amû lege na e ti sara kamarade na Jéhovah atâa so e yeke na siokpari na tere ti e? (b) Ngbanga ti nyen a lingbi e zia pëpe ti sambela Jéhovah ti pardonné e?

⁶ Siokpari so ayeke na tere ti e alingbi ti kanga lege na e ape ti sara kamarade na Jéhovah wala ti ngbâ ti voro lo. Gbu li ti mo kete: Na ngoi so Jéhovah airi e ti sara kamarade na lo, lo hinga so e yeke sara ande afaute na ambeni ngoi (Jean 6:44). So Nzapa ahinga asarango ye nga na aye so ayeke na yâ ti bê ti e, lo hinga biani awokongo wa la alingbi ti gue na e ti sara afaute. Lo hinga lani nga so e lingbi ti sara siokpari na ambeni ngoi. Me, ye so akanga lege na Jéhovah ape ti zia si e duti akamarade ti lo.

⁷ Na ndoye, Jéhovah amû na e mbeni pendere matabisi so ayeke sandaga so lo mû ti zi e na lege ti Molenge ti lo so lo ye mingi (Jean 3:16). Na lege ti kota ngere so, tongana e sara mbeni faute si na pekoni e changé bê ti e, e hunda pardon na Jéhovah, e lingbi ti duti na confiance so e yeke ngbâ ti duti na nzoni songo na lo (aRom. 7:24, 25; 1 Jean 2:1, 2). A lingbi e zia pëpe ti sambela Jéhovah ti pardonné e, ndali ti so e tene e yeke na siokpari na tere ti e. Tongana e hunda pardon ape, a yeke tongana ti so maboko ti e ayeke saleté me e ke ti sukula ni. Kozoni kue, Jésus akui ndali ti azo so asara siokpari si achangé bê ti ala. Grâce na ngere so lo futa ti zi na e la e lingbi ti sara kamarade na Jéhovah atâa so e yeke mbilimbili kue ape.—Diko 1 Timothée 1:15.

8. Ngbanga ti nyen a lingbi e kanga lê na ndo ti awokongo ti e ape?

 ⁸ Biani, e ye gi ti kanga lê na ndo ti awokongo ti e ape. Jéhovah afa na e mara ti azo wa la lo ye ti tene ala duti akamarade ti lo (Ps. 15:1-5). Ndani la, tongana e ye ti ga nduru na Jéhovah, a lingbi e gi ti sara ye tongana lo nga na molenge ti lo. A lingbi e gi nga ti hon ndo ti asioni nzara ti bê ti e wala même ti zia lege ni biani. Atâa e wara batême fafadeso wala e ninga na yâ ti tâ tënë awe, a lingbi e ngbâ lakue ti changé asarango ye ti e ti tene aga nzoni.—2 aCor. 13:11.

9. Tongana nyen la e hinga so e lingbi ti ngbâ ti yü fini zo lakue?

⁹ Bazengele Paul atene na aChrétien: “A tene a yeke nzoni ala zi ngbene zo so alingbi na ngbene lege ti sarango ye ti tere ti ala na so ayeke buba gi bubango alingbi na anzara ti bê ti lo so ayeke handa zo; me a yeke nzoni lakue a ngbâ ti sara si ala kiri gi fini ni na yâ ti ngangu so ayeke fa lege na bibe ti ala, na a yeke nzoni ala ngbâ lakue ti yü fini zo so a sara lo alingbi na ye so bê ti Nzapa aye na so ague oko na tâ lege ti mbilimbili nga na tâ lege ti dutingo be-ta-zo.” (aÉph. 4:22-24). So aye ti tene a yeke nzoni e ngbâ lakue ti sara ngangu ti changé nga ti “yü fini zo”. Tongaso atâa e sara na Jéhovah asara ngu oke, e lingbi ti ngbâ lakue ti manda ye na ndo ti asarango ye ti Jéhovah. Bible alingbi ti mû maboko na e ti ngbâ ti changé asarango ye ti e si aga tongana ti Nzapa.

10. Nyen la a lingbi e sara ti tene Bible angbâ lakue ti changé aye na yâ ti gigi ti e? Atënë wa la e lingbi ti hunda tere ti e na ni?

¹⁰ Tongana e ye ti tene Bible angbâ ti changé aye na yâ ti gigi ti e, a hunda na e ti ngbâ ti sara ngangu. Me ngbanga ti nyen la a yeke nzoni e sara ngangu lakue? Tongana Jéhovah ayeke iri tënë nzoni na ndo ti a-effort ti e, e lingbi ti gue na li ni hio hio na lege ti yingo ape? Jéhovah alingbi fade ti sara si a duti ngangu na e mingi ape ti hon ndo ti asioni bibe ti e tongaso si e duti na anzoni sarango ye, ngbanga ti nyen lo sara ni ape?

11-13. Ngbanga ti nyen Jéhovah aye ti tene e sara ngangu ti hon ndo ti awokongo ti e?

¹¹ Tongana e bâ aye so ayeke na lê ti nduzu, e bâ so Jéhovah ayeke na kota ngangu. Na tapande, na yâ ti seconde oko oko, lâ ayeke tokua angangu lumière na ndowa gbâ ni gbâ ni. Atâa so sese ayeke wara gi kete mbage ti lumière na ti ndowa so, a lingbi awe ti mû lege na aye so ayeke na ndo ni ti ngbâ na fini (Ps. 74:16; És. 40:26). A nzere na Jéhovah ti mû na awakua ti lo ngangu so alingbi na ala tongana ala bezoin ni (És. 40:29). Biani, Nzapa alingbi même ti mû na e ngangu ti hon ndo ti awokongo ti e kue nga ti zia lege ti asioni bibe sân ti tene e sara ngangu. Me ngbanga ti nyen lo sara tongaso ape?

¹² Jéhovah amû na e liberté so ayeke mbeni pendere matabisi. Tongana e soro ti sara ye so bê ti Jéhovah aye, e yeke fa so e ye lo mingi nga e ye ti zia ngia na bê ti lo. E yeke fa nga so e mû mbage ti droit ti lo ti komande dunia. Satan atene so Jéhovah ayeke na droit ti komande ape. Me tongana e mä yanga ti Jéhovah, e yeke fa so e ye ti tene lo duti Gbia ti e. E yeke na kite oko ape so Babâ ti e ti ndoye abâ na nene ni angangu so e yeke sara ti mä yanga ti lo (Job 2:3-5; aProv. 27:11). Tongana e sara ngangu ti hon ndo ti awokongo ti e atâa so a yeke kete ye ape, a fa so e yeke be-ta-zo na Jéhovah nga e fa so e ye ti tene lo duti Gbia ti e.

¹³ Tongaso, Jéhovah atene na e ti sara “ngangu kue” ti duti na anzoni sarango ye. (Diko 2 Pierre 1:5-7; aCol. 3:12.) Lo ye ti tene e sara ngangu ti hon ndo ti asioni  pensé nga na atënë ti bê ti e (aRom. 8:5; 12:9). Tongana e sara ngangu ti sara ni, a yeke nzere na e mingi ti bâ so Bible amû maboko na e ti ngbâ ti changé aye na yâ ti gigi ti e.

14, 15. Nyen la e lingbi ti sara ti gi ti duti na anzoni sarango ye so anzere na Jéhovah? (Bâ encadré “ Bible nga na sambela achangé aye na yâ ti gigi ti ala.”)

¹⁴ Nyen la e lingbi ti sara ti gi ti duti na anzoni sarango ye so anzere na Jéhovah? A lingbi e sara aye mingi ahon ti ngbâ gi na ndo ti aye so a lingbi e changé ni. A lingbi e ngbâ ti sara ngangu nga e mû peko ti afango ye ti Nzapa, ndali ti so aRomain 12:2 atene: “Ala zia ti sara ye akpa ti aye ti ngoi so, me ala changé na sarango si bibe ti ala akiri fini ni, si ala wani alingbi ti hinga ye so bê ti Nzapa aye, so ayeke nzoni, so anzere nga so alingbi kue.” Tongaso, ti hinga ye so Jéhovah aye, a lingbi e zia bê ti e kue na ndo ti aye so lo sara ti mû maboko na e. A lingbi e diko Bible lâ na lâ, e gbu li na ndo ni nga e sambela Jéhovah ti mû na e yingo vulu (Luc 11:13; aGal. 5:22, 23). Tongana e sara aye so, Jéhovah ayeke mû maboko na e ti hinga aye so anzere na lo, nga e yeke manda ti duti na mara ti pensé ti lo. Na nda ni, apensé ti e, atënë ti e nga aye so e yeke sara ayeke nzere na Jéhovah mingi nga e yeke hinga tongana nyen ti hon ndo ti awokongo ti e. Me atâa so kue, e yeke ngbâ lakue ti tiri na ni.—aProv. 4:23.

¹⁵ Na ndo ti so e yeke diko Bible lâ na lâ, a yeke nzoni e manda ni na lege ti ambeti ti e tongana Tour ti Ba Ndo wala Réveillez-vous ! Na yâ ti apériodique so, a yeke wara gbâ ti a-article so afa tongana nyen la e lingbi ti duti na asarango ye ti Jéhovah nga ti hon ndo ti awokongo ti e. E lingbi ti wara na yâ ni ambeni article wala aversê so alingbi mbilimbili ti mû maboko na e. E lingbi ti bata ni na ti kiri ti diko ni ngoi na ngoi.

16. Ngbanga ti nyen a lingbi bê ti e anze ape tongana e lingbi ti sara achangement hio hio ape?

¹⁶ Tongana mo bâ so mo yeke gue na li ni na lege ti yingo hio hio ape, a yeke nzoni mo hinga so a yeke mbeni ye so ahunda ngoi. Ti gi ti duti na lengo ti yingo ayeke mbeni ye so e yeke ngbâ lakue ti sara ni. A lingbi e kanga bê e ku na ngoi so Bible angbâ ti changé aye na yâ ti gigi ti e. Na tongo nda ni, peut-être e yeke forcé tere ti e ti sara ye so Bible ahunda na e. Me tongana ngoi ayeke hon, na ngoi so e yeke gi yeke yeke ti pensé nga ti sara ye tongana ti Jéhovah, kite ayeke dä ape so a yeke duti ngangu na e mingi ape ti duti na anzoni bibe nga na anzoni sarango ye.—Ps. 37:31; aProv. 23:12; aGal. 5:16, 17.

17. Tongana e yeke be-ta-zo na Jéhovah, pendere gigi wa la e yeke wara ande?

¹⁷ Yeke yeke, awakua be-ta-zo ti Jéhovah ayeke ga ande nzoni-kue na ala yeke wara pasa ti sara na lo lakue lakue. Ande na ngoi ni so, a yeke hunda effort encore ape ti sara anzoni ye, me ala yeke duti lakue na ngia mingi ti sara ni. Ti laso, e wara lege ti voro Nzapa ti e ti ndoye grâce na ngere so Christ afuta ti zi na e. Tongana e ngbâ ti sara kue ti woko tere ti e na gbe ti ngangu so Bible ayeke na ni ti changé aye na yâ ti gigi ti zo, e yeke ngbâ ti voro Nzapa atâa so e yeke na siokpari na tere ti e.

18, 19. Tongana nyen la e hinga biani so Bible ayeke na ngangu ti ngbâ ti changé aye na yâ ti gigi ti e?

¹⁸ Kévin so e sara tënë ti lo fade so asara kue ti hon ndo ti ngonzo ti lo. Lo gbu li na ndo ti afango ye ti Bible, lo sara ye alingbi na ni nga lo yeda na mungo maboko nga na awango ti amba ti lo Chrétien. A sara ambeni ngu na pekoni, Kévin asara kota changement. Na nda ni, lo ga wakua ti mungo maboko nga lo ga ancien asara ngu 20 fadeso awe. Atâa so kue, lo bâ so lo yeke na bezoin ti ngbâ ti hon ndo ti awokongo ti lo.

¹⁹ Tapande ti Kévin afa so Bible alingbi ti mû maboko na awakua ti Nzapa ti ngbâ ti changé aye na yâ ti gigi ti ala. Ni la, a yeke nzoni e zia si Bible angbâ lakue ti changé asarango ye ti e nga asara si e ga akota kamarade ti Jéhovah (Ps. 25:14). Tongana e bâ so Jéhovah ayeke iri tufa na ndo ti angangu so e sara, e yeke bâ polele so Bible alingbi ti ngbâ ti changé aye na yâ ti gigi ti e.—Ps. 34:9.