“AKOBE ti fango ni ayeke mingi, me azo ti kua ni ayeke mingi pëpe. Tongaso, ala voro yanga na Wa ti kua ni ti tokua azo ti kua ti fâ akobe ti yaka ti lo.” (Luc 10:2). Atënë ti Jésus so lo tene asara angu 2 000 tongaso awe afa nzoni mingi ye so ayeke passé na Myanmar laso. Ngbanga ti nyen? Na Myanmar, gï awafango tënë 4 200 tongaso la ayeke fa nzoni tënë ti Royaume na popo ti azo kutu 55.

Ye oko, Jéhovah, “Wa ti kua ni”, andu bê ti aita ngbangbo mingi ti akodro nde nde, ala ga na kodro so na sud-est ti Asie ti mû maboko na kua ti fango kobe ti yaka na lege ti yingo. Nyen la asara si ala zia kodro ti ala? Nyen la amû maboko na ala ti sara ni? Aye ti nzoni wa la ala wara? Zia e bâ ni.

A sara ambeni ngu awe, kobela ti makako abi Kazuhiro, so ayeke mbeni pionnier na Japon. Na ngoi so kobela ni abi lo, lo hinga ndo ape nga a gue na lo na hôpital. Docteur atene na lo ti kpe na oto ape ngu use. Li ti Kazuhiro akpe. Lo hunda terê ti lo: ‘Tongana nyen la mbi lingbi ti ngbâ ti sara kua ti mbi ti pionnier so mbi ye ni mingi?’ Lo sambela Jéhovah ngangu, lo toto na lo ti zi lege na lo ti ngbâ ti sara kua ti pionnier.

Kazuhiro atene: “Nze oko na pekoni, kamarade ti mbi so ayeke sara kua ti fango tënë na Myanmar amä tënë ti kpale ti mbi ni. Lo iri mbi na téléphone, lo tene na mbi, lo tene: ‘Na Myanmar mingi ti azo ayeke mû gï bus. Tongana mo ga ge, mo peut ti ngbâ ti sara kua ti mo ti fango tënë, mo bezoin oto ape.’ Mbi hunda docteur ti mbi ti bâ wala eskê mbi peut ti gue na Myanmar atâa so kobela ti makako abi mbi. Li ti mbi akpe, so docteur ti mbi atene: ‘Mbeni docteur so ayeke bâ tënë ti kobela ti makako ayeke londo na Myanmar ti ga na Japon fafadeso ti sara vizite. Mbi yeke fa mo na lo. Tongana kobela ni akiri abi mo, lo lingbi ti bâ lege ti mo.’ Mbi bâ tënë so docteur so atene na mbi so tongana kiringo tënë so alondo na Jéhovah.”

Hio, Kazuhiro atokua e-mail na filiale ti Myanmar, na yâ ni lo fa so lo na wali ti lo aye ti sara kua ti fango tënë na Myanmar tongana apionnier. Gï lango oku na pekoni, filiale ni akiri tënë, atene: “Ala ga, e bezoin gbâ ti apionnier!” Kazuhiro na wali ti lo, Mari, akä a-oto ti ala, ala wara visa ti ala na ala vo abillet ti avion. Laso, ala yeke sara kua na ngia na mbeni groupe ti awabuburu na Mandalay. Kazuhiro atene: “Na lege ti ye so asi so, e bâ so mabe so e yeke na ni na zendo so ayeke na Psaume 37:5 akiri akpengba: ‘Zia si Jéhovah afa lege na mo; zia bê ti mo na ndö ti lo, na lo yeke sara ye ndali ti mo.’”

Na ngu 2014, aTémoin ti Jéhovah ti Myanmar awara pasa ti tene a sara kota bungbi so ayeke nde kâ. Gbâ ti aita so alondo na kodro wande aga ndali ni. Mbeni oko ti ala, Monique, mbeni ita-wali so ayeke na ngu 34 so alondo na États-Unis, atene: “Na peko ti so mbi londo na kota bungbi ni mbi kiri, mbi sambela Jéhovah na ndö ti mbeni ye nde so a lingbi mbi sara na yâ ti fini ti mbi. Mbi sara nga lisoro na babâ na mama ti mbi na ndö ti aye so mbi zia na gbele mbi ti sara na lege ti yingo. E kue e bâ so a lingbi mbi kiri na Myanmar, me a mû ngoi nga na peko ti gbâ ti asambela mbi sara ye so mbi mû desizion ti sara.” Monique afa ndani so amû ngoi nga lo sambela mingi.

“Jésus awa adisciple ti lo ti ‘diko ngere kozoni.’ Tongaso, mbi hunda terê ti mbi: ‘Eskê mbi yeke na nginza ti sara voyage so? Mbi lingbi ande ti bâ lege ti mbi na kodro ni kâ sân ti mû ngoi mingi ti sara kua ti nginza?’” Lo tene: “Hio mbi bâ so mbi yeke na nginza mingi ape ti gue na mbeni kodro nde so ayo mingi.” Tongaso, tongana nyen la lo wara lege lani ti gue?—Luc 14:28.

Monique atene: “Mbeni lâ, kota zo ti place ti kua ti mbi so ayeke wali ahunda ti bâ mbi. Mbeto asara mbi, mbi pensé mbi tene lo ye ti zi mbi na kua. Me a yeke tongaso ape, lo ye ti mû merci na mbi ndali ti nzoni kua ti mbi. Na pekoni lo tene na mbi so lo leke ti tene a mû na mbi mbeni nginza nde na nginza ti kua ti mbi, nginza ni alingbi tâ gï na nginza so mbi yeke na bezoin ni ti futa na abon so ayeke na li ti mbi.”

Ngbene ye na décembre ngu 2014 ti ga na ni, Monique ayeke sara kua ti fango tënë na Myanmar. Lo bâ kua ti lo ti fango tënë na ndo so bezoin ti awafango tënë ayeke dä mingi so tongana nyen? Lo tene: “A nzere na mbi mingi so mbi yeke ge, mbi yeke manda Bible na azo ota. Mbeni oko ayeke na ngu 67. Lo yeke bara mbi lakue na ngia nga lo yeke gbu mbi na kate ti lo. Na ngoi so lo manda lani so iri ti Nzapa ayeke Jéhovah, a ndu bê ti lo mingi asara si ngu ti lê ti lo aga. Lo tene: ‘A yeke kozo ti tene mbi mä so iri ti Nzapa ayeke Jéhovah la. Ngu ti mbi ahon ti mo mingi, me mo fa na mbi mbeni kpengba ye so a lingbi mbi hinga ni.’ Mbi kue ngu ti lê ti mbi aga. Amara ti aye tongaso ayeke aye so asara si sarango kua na ndo so bezoin ti awafango tënë ayeke dä mingi asara si gigi ti zo anzere na lo mingi.” Ade ti ninga ape, Monique awara pasa ti gue na Ekole ti awafango nzoni tënë ti Royaume.

Mbeni ye so apusu azo ti gue na Myanmar ayeke mbaï ti Myanmar so ayeke na yâ ti Annuaire des Témoins de Jéhovah 2013. Li, mbeni ita-wali, so ngu ti lo ahon ngu 30, ayeke lani na Sud-est ti Asie. Lo yeke sara lani kua, me mbaï so ayeke na yâ ti Annuaire ni apusu lo ti gbu li ti lo na ndö ti sarango kua ti fango tënë na Myanmar. Lo tene: “Na ngu 2014 na ngoi so mbi gue na mbeni kota bungbi so ayeke nde na Yangon, mbi wara mbeni couple so ayeke sara kua na ndo so bezoin ti awafango tënë ayeke dä mingi na yâ ti territoire ti yanga ti Chinois na Myanmar. Ndali ti so mbi yeke tene Chinois, mbi mû desizion ti gue na Myanmar ti mû maboko na groupe ti yanga ti Chinois kâ. Mbi na Monique e mä terê ti sara kua legeoko na e gue na Mandalay. Jéhovah asara si e wara kua ti fango mbeti so amû ngoi ti e kue ape na yâ ti mbeni même ekole, na e wara mbeni da nduru na ni. Atâa so ndowa ayeke mingi nga ambeni kpale ayeke dä, kua ti fango tënë ge anzere na mbi mingi. Azo ti Myanmar ayeke na aye mingi ape, me ala yeke ne zo nga ala yeke nduru ti mû ngoi ti mä nzoni tënë. A nzere mingi ti bâ tongana nyen la Jéhovah ayeke sara si kua ti fango tënë ague na li ni na loro. Mbi hinga na bê ti mbi kue so a yeke Jéhovah la aye ti tene mbi ga ge na Mandalay.”

Ambeni zo so ague na ndo so bezoin ti awafango tënë ayeke dä mingi abâ ngangu so sambela ayeke na ni. Bâ tapande ti Jumpei so ayeke na ngu 37 nga na wali ti lo, Nao, so ayeke na ngu 35. Ala yeke sara kua ti fango tënë na mbeni congrégation ti yanga ti awabuburu na Japon. Ngbanga ti nyen la ala gue na Myanmar?  Jumpei atene: “Mbi na wali ti mbi e zia na gbele e lakue ti sara kua ti fango tënë na mbeni ndo so a bezoin awafango tënë dä mingi na kodro-wande. Mbeni ita-koli ti congrégation ti e ti awabuburu na Japon ague lani na Myanmar. Atâa so e yeke gï na mbeni kete nginza so e bata, na mai ngu 2010 e nga kue e gue. Aita ti Myanmar ayamba e na ngia.” Lo bâ sarango kua na territoire ti awabuburu na Myanmar tongana nyen? Lo tene: “Azo aye ti mä tënë mingi. Tongana e fa avidéo ti awabuburu, li ti awabuburu so e fa tënë na ala da na da akpe. A nzere na e mingi so e mû desizion ti ga ge ti sara na Jéhovah!”

Tongana nyen la Jumpei na Nao ahon ndö ti kpale ti nginza so ala yeke na ni? Jumpei atene: “Na peko ti so e sara ngu ota, pata so e bata aga nduru ti hunzi na nginza so angbâ alingbi ti tene e payé na da na ngu ti peko ape. Mbi na wali ti mbi e sambela mingi na bê ti e kue. E wara mbeni lettre ti filiale so ahunda na e ti sara kua ti pionnier spécial temporaire. A yeke mbeni ye so e ku terê ti e na ni ape. E zia bê ti e na Jéhovah, na e bâ so lo zia e ape. Lo yeke bâ ka lege ti e na yâ ti aye kue.” Ade ti ninga ape, Jumpei na Nao ague na Ekole ti awafango nzoni tënë ti Royaume.

Nyen la apusu Simone, mbeni ita-koli so ayeke na ngu 43, so ayeke zo ti Italie, na wali ti lo, Anna, mbeni ita-wali so ayeke na ngu 37, so ayeke zo ti Nouvelle-Zélande, ti gue na Myanmar? Anna akiri tënë atene: “A yeke mbaï so asara tënë ti Myanmar so ayeke na yâ ti Annuaire 2013.” Simone atene: “A yeke mbeni kota pasa mingi ti duti na Myanmar. Gigi ayeke ngangu ge oko ape, na mbi lingbi ti mû ngoi mingi ti sara kua ti Jéhovah. A nzere mingi ti bâ so Jéhovah ayeke bâ lege ti e na ngoi so e yeke sara kua na ndo so a bezoin awafango tënë dä mingi.” (Ps. 121:5). Anna atene: “Mbi yeke na ngia so ade mbi wara mara ni lâ oko ape. E yeke na aye mingi ape. Mbi na koli ti mbi e yeke duti mingi na terê ti mba, na a sara si e yeke nduru mingi na mba ahon ti kozo. E wara nga afini kamarade so e ye ala mingi. Azo ake aTémoin ape nga fason so azo aye ti mä tënë ahon gbungo li ti zo.” Na alege wa?

Anna atene: “Mbeni lâ, mbi fa tënë na mbeni zo so ayeke manda mbeti na dasendagi na gara na mbi leke ti wara lo encore. Na ngoi so mbi kiri ti bâ lo, lo ga na mbeni kamarade ti lo. Na ngoi ti peko, lo ga na ambeni. Na mbeni lango ni encore na pekoni, lo ga na ambeni na ndö ni. Fadeso, mbi yeke manda Bible na ambeni oku.” Simone atene: “Azo ti territoire ni ayeke sara ye na nzoni bê nga ala ye ti hinga aye. Ala mingi aye ti mä tënë. E yeke na ngoi ti mû maboko na ala kue ape.”

Me ka ti sarango ambeni ye so amû maboko na zo ti mû desizion ti gue na Myanmar ayeke tongana nyen? Mizuho, so alondo na Japon, atene: “Mbi na koli ti mbi Sachio e ye lani ti gue ti sara kua ti fango tënë na mbeni kodro so bezoin ti awafango tënë ayeke dä mingi, me na kodro wa? Na peko ti so e diko mbaï ti Myanmar na yâ ti Annuaire 2013, aye so a fa na yâ ti mbaï ni andu bê ti e mingi na e komanse ti gbu li ti e wala lege ayeke dä ti tene e gue e sara kua ti fango tënë kâ.” Sachio atene: “E mû desizion ti gue yenga oko ti bâ ndo na Yangon, so  ayeke kota gbata ti Myanmar. Nduru voyage so e sara ti hinga ye na ndö ti kodro ni asara si e hinga na bê ti e kue so a lingbi e ga ge.”

Rodney, na wali ti lo Jane, so ngu ti ala ahon ngu 50 nga na molenge ti ala ti koli Jordan na ti wali Danica, so ala kue ayeke azo ti Australie, ayeke sara kua ti fango tënë na ndo so bezoin ti awafango tënë ayeke dä na Myanmar ngbene ye na ngu 2010. Rodney atene: “So azo ti Myanmar aye mingi ti manda ye na ndö ti Nzapa, a ndu bê ti e mingi. Mbi yeke wa ambeni sewa ti tene ala gi ti sara kua ti fango tënë na mara ti ndo tongana Myanmar so.” Ngbanga ti nyen? “A nzere na e mingi ti bâ tongana nyen la guengo na Myanmar asara si e ga nduru mingi na Jéhovah. Amaseka mingi ayeke mû ngoi ti ala mingi na téléphone ti ala, oto ti ala, na akua ti ala nga na ambeni ye tongaso. Amolenge ti e amû ngoi ti ala mingi ti manda afini tënë ti sara kua na ni na fango tënë. Ala manda tongana nyen ti sara lisoro na azo so ahinga Bible nzoni ape nga tongana nyen ti kiri tënë na ngoi ti abungbi ti congrégation ti ndo ni, na ala bi terê ti ala mingi na yâ ti ambeni kua ti yingo so amû ngia na zo.”

Oliver, mbeni ita-koli so ayeke na ngu 37, so ayeke zo ti États-Unis, afa ngbanga ti nyen la lo yeke wa ka aita ti sara mara ti kua so, lo tene: “Ti sara kua na mbeni ndo so mbi habitué na ni ape aga na mbi aye ti nzoni mingi. Ti gue na mbeni ndo nde amû maboko na mbi ti zia bê ti mbi mingi na Jéhovah na yâ ti aye kue so asi na mbi. Ti sara kua legeoko na azo so mbi hinga ala kozo ape me so aye so e mä na bê na ni ayeke oko amû maboko na mbi biani ti bâ so na yâ ti dunia so ye oko ayeke dä ape so ayeke kota so a lingbi ti haka ni na Royaume ti Nzapa.” Laso, Oliver na wali ti lo, Anna, angbâ ti yapu ti sara kua na yâ ti territoire ti yanga ti Chinois.

Trazel, mbeni ita-wali so ayeke na ngu 52 so ayeke zo ti Australie, ayeke sara kua ti fango tënë na Myanmar ngbene ye na ngu 2004. Lo tene: “Mbi yeke wa azo so dutingo ti ala amû lege na ala ti sara kua ti fango tënë na ndo so bezoin ti awafango tënë ayeke dä mingi. Mbi bâ so tongana mo ye ti sara kua ni, Jéhovah ayeke iri tënë nzoni na ndö ti a-effort ti mo. Mbi pensé lâ oko ape so mbi yeke duti tongaso. Mbi wara aye ti nzoni mingi nga gigi ti mbi anzere na mbi mingi ahon ti so mbi pensé fade na ni.”

Zia si atënë ti aita so afa tënë na ndo so bezoin ti awafango tënë ayeke dä mingi, so ala tene na bê ti ala kue, apusu mo ti gbu li ti bâ tongana nyen la mo lingbi ti mû maboko na azo so aye tënë ti Nzapa so ayeke na yâ ti aterritoire so ade ti fa tënë dä ape. Biani aita so ague na ndo so bezoin ti awafango tënë ayeke dä ayeke iri ndo atene: “Pardon, ala ga na Myanmar ala mû maboko na e.”