NA AMBENI ngoi, azo so asû Bible ayeke kiri na ndö ti amême tënë. Zia e bâ aye ota so peut-être asara si ala sara tongaso:

Ngoi so a sû na ni. Ândö na Israël, mingi ti azo ayeke na acopie ti Ndia ape. Mingi ni ala yeke mä Ndia ni na ngoi so a diko ni na ngoi so mara ni abungbi ndo oko na tabernacle (Deut. 31:​10-12). Peut-être aye ayeke lani dä so ayeke gboto lê ti ala na ngoi so ala yeke mä Ndia ni nga gbâ ti ala aluti teti angbonga mingi (Néh. 8:​2, 3, 7). Na angoi tongaso, ti kiri na ndö ti akota tënë ni ayeke sara lani si a yeke ngangu ape na azo ni ti dabe ti ala na ni nga ti sara ye alingbi na ni. So a kiri na ndö ti ambeni tënë a-aidé lani ala ti dabe ti ala na anzene nzene tënë ti andia so Nzapa amû na ala.—Lév. 18:​4-22; Deut. 5:1.

Kode so a sû na ni. A sû ambeni mbage ti Bible tongana abia, na tapande, mbeti ti Psaume, Bia ti Salomon nga na Toto ti Jérémie. Na ambeni ngoi, a kiri na ndö ti ambeni tënë ti yâ ti abia ni. Ye so asara si a gboto lê na ndö ti mama-tene ti bia ni na a-aidé azo so ayeke mä ni ti bata atënë ni. Na tapande, bâ atënë so ayeke na Psaume 115:​9-11: “Azo ti Israël, ala zia bê ti ala na ndö ti Jéhovah: lo la lo mû maboko na ala nga lo yeke vala ti ala. Ahale ti Aaron, ala zia bê ti ala na ndö ti Jéhovah: lo la lo mû maboko na ala nga lo yeke vala ti ala. Azo so akpe mbeto ti Jéhovah, ala zia bê ti ala na ndö ti Jéhovah: lo la lo mû maboko na ala nga lo yeke vala ti ala.” Kiringo na ndö ti atënë so a-aidé azo ti hengo bia ni ti bata apendere tënë so na li ti ala.

Ti luti na ndö ti akota tënë. Na ambeni ngoi, azo so asû Bible akiri na ndö ti akota tënë. Na tapande, na ngoi so Jéhovah ahunda na azo ti Israël ti te mênë ape, lo sara si Moïse akiri na ndö ti raison ni fani mingi. Nzapa aye lani ti tene ala hinga nzoni so fini ti ye kue so ayeke na nyama ti terê ayeke na yâ ti mênë, tongaso mênë ayeke fini (Lév. 17:​11, 14). Ambeni ngoi na pekoni, na ngoi so abazengele nga na a-ancien na Jérusalem asû mbeti na aChrétien na ndö ti ye so ala doit ti kpe ni si ala zia ngia na bê ti Nzapa, ala kiri ala tene so aChrétien adoit ti gbanzi terê ti ala na mênë.—Kus. 15:​20, 29.

Atâa so Bible akiri na ndö ti ambeni tënë, a ye ti tene ape so Jéhovah aye ti tene kiringo na ndö ti atënë ti Bible aga mbeni ye so e yeke sara lakue. Na tapande, Jésus atene: “Tongana mo yeke sambela, mo kiri gï na ndö ti tënë oko fani mingi pëpe.” (Mat. 6:7). Na pekoni, lo fa aye so e peut ti sambela ndali ni (Mat. 6:​9-13). Atâa so e yeke kpe ti kiri gï na ndö ti mbeni oko tënë fani mingi na yâ ti asambela ti e, e peut ti sambela ndali ti mbeni ye fani mingi.—Mat. 7:​7-11.

A yeke ndali ti anzoni raison la Bible akiri na ndö ti ambeni tënë. A yeke mbeni oko ti gbâ ti akode so Kota Maître ti e ayeke fa ye na e ndali ti nzoni ti e.—És. 48:​17, 18.