Na ngoi so Jéhovah amû yanga na azo ti “si ndö ti sese na [ti] sara si sese ni aga na gbe ti ala”, lo ye ti fa so mbeni lâ, sese kue ayeke ga Paradis (Gen. 1:28). Azo so ayeke ngbâ ande na fini lakue lakue adoit ti sara ye alingbi na oko commandement so. Na tongo nda ni, sese ayeke duti ande Paradis ape, ndali ti so yaka ti Éden ayeke dä encore ape. Tâ gï na peko ti Harmaguédon, e yeke duti ande na akua mingi ti sara ti leke ambage ti sese so abuba si aga nzoni. So ayeke hunda ande gbâ ti kua.

Ye so adabe ti e na kua so azo ti Israël asara lani na peko ti so ala londo na Babylone ala kiri. Zo oko alango lani na kodro ti ala ape na yâ ti ngu 70. Me Ésaïe atene lani so, grâce na mungo maboko ti Jéhovah, ala yeke sara si kodro ni akiri aga pendere. Prophétie ni atene: “Lo yeke sara si benyama ti lo aga tongana yaka ti Éden, nga kpangbala ndo ti désert ayeke ga tongana jardin ti Jéhovah.” (És. 51:3). Jéhovah a-aidé lani azo ti Israël ti sara si kodro ti ala aga pendere ndo.  Legeoko nga, na mungo maboko ti Jéhovah, azo so sese ayeke ga ande ye ti ala ayeke sara si sese aga Paradis. Mo peut ti fa même laso so mo ye ti mû mbage dä.

Mbeni ye so mo peut ti sara ayeke ti sara kue ti tene ndo ti mo aduti propre. Mo peut ti sara ni atâa ndo ti avoizin ti mo ayeke propre ape. Mo peut nga ti aidé ti nettoyé Da ti Royaume nga na Da ti assemblée nga ti bâ lege ni si angbâ propre. Tongana dutingo ti mo amû lege na mo, mo peut ti sû demande ti duti volontaire so ayeke mû maboko na azo na peko ti mbeni ngangu kpale so asi na ndo so mo yeke dä. Ye so afa so mo yeke nduru ti mû maboko na aita tongana bezoin ayeke dä. Mo peut ti manda ambeni kode so mo peut ti sara na kua tongana Jéhovah amû lege na mo ti ngbâ na fini lakue lakue na ndö ti sese.

Hio na peko ti so Jésus azingo molenge-wali ti Jaïrus na kuâ, lo tene so a yeke nzoni a mû na lo ye ti tengo (Marc 5:42, 43). Peut-être a yeke lani ngangu ape ti bâ lege ti molenge so ayeke na ngu 12 so. Me gbu li na ndö ti gbâ ti akua so e bezoin ande ti sara na ngoi so Jésus ayeke sara ye alingbi na zendo ti lo, so lo tene: “[Azo] kue so ayeke na yâ ti adû ti kuâ ayeke mä ande go ti lo, na ala yeke sigi.” (Jean 5:28, 29). Atâa so Bible afa anzene nzene tënë mingi na ndö ni ape, e peut ti imaginé so azo so ayeke zingo ande na kuâ ayeke duti ande na bezoin ti kobe, ndo ti lango nga na bongo. Eskê mo peut ti fa même laso so mo ye ti duti nduru ti aidé? Bâ ambeni hunda so mo peut ti gbu li na ndö ni.

Tongana a tene tokua ti gango ti surveillant ti circonscription na yâ ti congrégation ti ala, eskê mo yeke hunda ti tisa lo ti ga ti te ye na ndo ti mo? Tongana a kiri na aita so ayeke sara gï kua ti ngoi kue na Béthel na territoire wala tongana kua ti mbeni surveillant ti circonscription ahunzi, eskê mo peut ti aidé ala ti wara mbeni ndo ti lango? Tongana a yeke sara mbeni kota bungbi ti lango ota wala mbeni kota bungbi so ayeke nde na ndo so mo yeke dä, eskê mo peut ti duti volontaire ti sara kua na place ni kozo wala na  peko ti kota bungbi ni wala mo peut ti duti dä ti yamba azo so ayeke ga?

Tongana ti so Kusala 24:15 afa, a yeke zingo ande azo milliard mingi na kuâ. Mingi ti ala awara lege ti hinga Jéhovah ape kozo na kuâ ti ala. Lege ayeke zi na ala ti hinga lo na peko ti so a zingo ala na kuâ. a Awakua be-ta-zo ti Nzapa ayeke fa ande ye na ala (És. 11:9). Charlotte, so afa lani tënë na Europe, Amérique du Sud nga na Afrika, ayeke ku kungo ti sara ni. Na ngia lo tene: “Mbi yeke ku kungo ti fa ye na azo so a yeke zingo ala na kuâ. Tongana mbi diko ye na ndö ti mbeni zo so ayeke na fini ândö, fani mingi mbi pensé, mbi tene: ‘Tongana fade zo so ahinga Jéhovah, fini ti lo ayeke duti tâ nde mingi.’ Mbi yeke ku kungo ti sara tënë ti Jéhovah na azo so a zingo ala na kuâ nga ti fa na ala tongana nyen la gigi ti ala ayeke duti nzoni mingi tongana ala sara na lo.”

Même awakua ti Jéhovah be-ta-zo so ayeke na fini kozo na Jésus ayeke duti ande na aye mingi ti manda. Imaginé tongana nyen la terê ti e ayeke nzere ande mingi, nga a yeke duti ande tongana mbeni pasa la e yeke na ni, ti fa na Daniel tongana nyen la aprophétie so lo sû so lo mä yâ ni ape aga tâ tënë (Dan. 12:8). Wala imaginé so mo yeke aidé ande Ruth na Naomi ti hinga so sewa ti ala ayeke mbeni kotara ti Messie. A yeke nzere ande na e mingi ti mû mbage na yâ ti kapa ti fango ye na yâ ti dunia kue, na akpale nga na aye so ayeke gboto lê ti zo na yâ ti sioni dunia so ayeke duti ande dä ape.

Tongana nyen la laso mo peut ti fa so mo ye ti duti nduru ti mû mbage na kapa so? Mbeni lege so mo peut ti sara ni ayeke ti sara kue ti ga mbeni nzoni wafango ye nga ti fa tënë lakue (Mat. 24:14). Même tongana laso mo peut ti fa tënë mingi ape ndali ti ngu ti mo wala ndali ti ambeni ye nde, mo peut ti fa so mo yeke ku kungo ti fa ye na azo so a yeke zingo ande ala na kuâ na lege so mo sara ye so mo peut ti sara ti fa tënë laso.

A yeke nzoni ti gbu li na ndö ti akota hunda so: Eskê biani mo yeke ku kungo ti tene sese aga ye ti mo? Eskê mo yeke ku kungo ti sara si sese aga Paradis, ti bâ lege ti azo so a yeke zingo ala na kuâ nga ti fa ye na ala? Mo peut ti fa so mo yeke nduru ti ngbâ na fini lakue lakue na ndö ti sese na lege so laso mo sara akua so ayeke tongana ati so mo yeke sara ande na ngoi so sese ayeke ga ti mo.