1-2. (a) Nyen la e doit ti sara ti ga kota kamarade ti mbeni zo? (b) Nyen la e yeke bâ na yâ ti article so?

 ESKÊ mo yeke na mbeni kota kamarade? Mo na lo aga akamarade tongana nyen? Peut-être mo mû ngoi ti duti na terê ti lo, mo gi ti hinga akpale so lo wara, aye so lo ye nga na aye so lo ke. Mo bâ so lo yeke na apendere sarango ye so mo ye ti mû tapande ni. Na mo ye kamarade ti mo ni.

² Ti ga kota kamarade ti mbeni zo ahunda ngoi nga na effort. Ti ga kamarade ti Jéhovah ayeke nga tongaso. Article so ayeke fa aye ti sara ti ga nduru mingi na Jéhovah nga na anzoni ye ti peko ni. Kozo ni, zia e bâ ndani so a yeke nzoni ti ga nduru na Jéhovah, Kamarade so ayeke nzoni mingi ahon atanga ni kue.

3. Ngbanga ti nyen la a yeke kota ye ti gbu li na ndö ti anzoni ye so e yeke wara tongana e ga nduru na Jéhovah?

³ Kite ayeke dä ape so mo yeda so gango nduru na Jéhovah ayeke nzoni. Me ti gbu li ti hinga tongana nyen la ayeke tâ nzoni mingi apeut ti pusu e ti ga nduru mingi na lo (Ps. 63:​6-8). Na tapande, e hinga so ti te nzoni kobe, ti sara sport, ti lango nzoni nga ti nyon ngu mingi ayeke sara nzoni na e. Me gbâ ti azo ayeke pensé mingi na aye so ape nga ala bâ lege ti seni ti ala nzoni ape. Ye oko, tongana e pensé mingi  na anzoni ye ti peko ti aye so ayeke sara si e duti na nzoni seni, e yeke ngbâ ti sara aye ni so. Legeoko nga, e hinga so a yeke nzoni ti ga kamarade ti Jéhovah, me tongana e gbu li na ndö ti anzoni ye ti peko ni apeut ti pusu e ti ngbâ ti ga nduru mingi na lo.—Ps. 119:​27-30.

4. Zo so asû Psaume 73:28 atene nyen?

⁴ Diko Psaume 73:28. Zo ti sungo Psaume 73 ayeke mbeni Lévite so a zia lo ti pika mozoko na temple ti Jéhovah. Peut-être lo voro Jéhovah be-ta-zo asara ngu mingi awe. Me lo hinga lani so a yeke kota ye ti tene lo dabe ti lo so “ti ga nduru na Nzapa” ayeke sara nzoni na lo nga na azo. Ngbanga ti nyen la a yeke nzoni ti hinga Jéhovah nzoni nga ti kpengba songo ti e na lo?

“TI GA NDURU NA NZAPA” AYEKE GA NA ZO NGIA

5. (a) Ngbanga ti nyen la ti ga nduru mingi na Jéhovah ayeke ga na e ngia? (b) Tongana nyen la ndara so Jéhovah amû na mo a-aidé mo nga abata mo? (aProverbe 2:​6-16).

⁵ Tongana e ga nduru mingi na Jéhovah, e yeke duti na ngia mingi (Ps. 65:4). Araison mingi asara si tënë so ayeke tâ tënë. Na tapande, tongana e diko tënë so lo tene na yâ ti Bible na e sara ye alingbi na ni, e yeke ga zo ti ndara. Tongana e ga zo ti ndara ayeke bata e si ambeni ye asara sioni na e ape nga e sara akota faute ape. (Diko aProverbe 2:​6-16.) Ndani la Bible atene: “Ngia ayeke na zo so awara ndara, nga na zo so awara kode ti bâ yâ ti aye nzoni.”—aProv. 3:13.

6. Ngbanga ti nyen la zo ti sungo psaume ni aperdre ngia ti lo?

⁶ Tâ tënë, vundu apeut ti sara même akamarade ti Jéhovah na ambeni ngoi. Zo ti sungo Psaume 73 ayeke na ngia encore ape na ngoi so lo komanse ti pensé na aye so lo bâ so ayeke na lege ni ape. Bê ti lo akomanse lani ti son nga lo komanse ti sara bê ti ye ndali ti so na lo, asioni zo so apensé na Nzapa ape wala amä yanga ti lo ape ayeke vivre nzoni. Lo pensé lani so azo so ayeke sara aye ti ngangu na azo nga so ayeke azo ti baba apeut ti wara ye kue so ala ye, ala yeke na nzoni seni nga ala yeke bâ pasi ape (Ps. 73:​3-7, 12). Li ti lo aga lani tâ kirikiri asara si na mbeni ngoi lo hunda terê ti lo wala a yeke nzoni so lo sara effort ti voro Jéhovah. Vundu asara lo lani mingi na lo tene: “Ti tâ tënë ni, mbi ngbâ ti sara si bê ti mbi avuru gï senge senge, nga a yeke gï senge senge la mbi sukula tïtî mbi ti fa so tënë ayeke na li ti mbi pëpe.”—Ps. 73:13.

7. Tongana vundu asara e teti mbeni ngoi, nyen la e peut ti sara? (Bâ nga foto.)

⁷ Zo ti sungo psaume ni azia pëpe si vundu awoko lo kue. Lo sara mbeni ye. Lo “gue na pendere ndo ti Nzapa so ayeke nzoni-kue”, kâ Jéhovah aleke bango ndo ti lo (Ps. 73:​17-19). Tongana vundu asara e, Jéhovah so ayeke kota Kamarade ti e ahinga ni. Tongana e sambela lo ti fa lege na e nga e yeda na mungo maboko so lo mû na e na lege ti Bible nga na congrégation, e yeke wara ngangu ti hon ndö ti vundu ti e. Tongana akpale ahon ndö ti e si e hinga ye ti sara ape, Jéhovah ayeke aidé e ti duti kpô.—Ps. 94:19. a

“TI GA NDURU NA NZAPA” ASARA SI E VIVRE NZONI LASO NGA AMÛ NA E BEKU

8. Na ambeni lege nde wa so ayeke kota mingi ti ga nduru na Nzapa asara nzoni na e?

⁸ Ti ga nduru na Nzapa asara nzoni na e na alege use so ayeke kota mingi. Kozo ni, tongana  e ga akota kamarade ti Nzapa e peut ti vivre nzoni. Use ni, a mû na e kpengba beku ndali ti kekereke (Jér. 29:11). Zia e gi ti hinga nzoni anzoni ye so.

9. Tongana nyen la ti ga nduru na Nzapa apeut ti sara si e yeke na ngia mingi?

⁹ Tongana Jéhovah ayeke kota kamarade ti e, e peut ti vivre nzoni. Laso, gbâ ti azo atene so Nzapa ayeke dä ape. Tongaso, ala hinga ape ndani so azo ayeke na ndö ti sese nga ala mä na bê so mbeni lâ azo ayeke duti dä encore ape. Me so e manda Bible, e hinga so Nzapa ayeke dä. E hinga so lo yeke Nzapa so “ayeke zo so ayeke futa azo so ayeke gi lo ngangu.” (aHéb. 11:6). Même laso, e yeke na ngia ndali ti so e yeke sara ye so a leke e ndali ni so ayeke ti voro Jéhovah, Babâ ti e ti yayu.—Deut. 10:​12, 13.

10. Nyen la Jéhovah amû zendo ti sara na azo so asara confiance na lo? (Psaume 37:29).

¹⁰ Ti azo mingi, beku ti ala angbâ gï na aye so: guengo na kua, bango lege ti sewa nga na batango nginza ndali ti kekereke. Ala hinga ape aye so Nzapa amû zendo ti sara ande. Me e hinga ti e so Jéhovah ayeke bâ lege ti awakua ti lo (Ps. 25:​3-5; 1 Tim. 6:17). E yeke na confiance na Nzapa so e ga nduru na lo nga e yeke na confiance so lo yeke sara ande aye so lo mû zendo ni na e. E yeke na beku ti voro ande lo teti lakue lakue na yâ ti Paradis.—Diko Psaume 37:29.

11. So e ga nduru na Nzapa asara e tongana nyen? A sara lo tongana nyen?

¹¹ Ti ga nduru na Nzapa asara e nzoni na ambeni lege nde mingi. Na tapande, Jéhovah atene lo yeke pardonné asiokpari ti e tongana e changé bê ti e (És. 1:18). Tongaso, e bezoin ape ti ngbâ ti gi bê ti e ndali ti asiokpari so e sara ândö (Ps. 32:​1-5). Tongana e ga nduru na Jéhovah, e yeke zia ngia na bê ti lo (aProv. 23:15). Tâ tënë, gbâ ti ambeni nzoni ye nde ayeke dä so e wara ndali ti so e yeke akamarade ti Jéhovah. Tongana nyen la e peut ti ngbâ ti ga nduru na Nzapa?

AYE TI SARA TI NGBÂ TI “GA NDURU NA NZAPA”

12. Nyen la mo sara ti ga nduru mingi na Nzapa?

¹² Tongana mo yeke mbeni Chrétien so awara batême awe, mo sara awe gbâ ti aye ti ga nduru na Jéhovah. Mo manda gbâ ti atâ tënë na ndö ti Jéhovah Nzapa nga na Christ Jésus, mo zia lege ti asiokpari so mo yeke sara ândö, mo yeke na kpengba mabe na Nzapa nga mo sara ye kue so mo peut ti sara ti mä yanga ti lo. Me ti ga nduru mingi na Nzapa e doit ti ngbâ ti sara aye ni so.—aCol. 2:6.

13. Aye ota wa la apeut ti aidé e ti ngbâ ti ga nduru mingi na Jéhovah?

¹³ Nyen la ayeke aidé e ti ngbâ ti ga nduru mingi na Jéhovah? (1) E doit ti ngbâ ti diko Bible nga ti manda ni. Na ngoi so e yeke diko Bible, a yeke nzoni e ngbâ gï na ndö ti mandango ye na ndö ti Nzapa ape. Me a yeke nzoni e gi ti comprendre ye so Nzapa aye ndali ti e nga e zia si amama-ndia ti lo so ayeke na yâ ti Bible afa lege na e (aÉph. 5:​15-17). (2) E doit ti gi ti kpengba mabe ti e na lege so e gbu li na ndö ti gbâ ti aye so afa so lo ye e. (3) E doit ti ngbâ ti ke aye so ason bê ti Jéhovah nga e sara songo pëpe na azo so ayeke sara asioni ye.—Ps. 1:1; 101:3.

14. Ti gue oko na 1 aCorinthien 10:​31, ambeni ye wa la e peut ti sara lango oko oko ti zia ngia na bê ti Jéhovah? (Bâ nga afoto.)

¹⁴ Diko 1 aCorinthien 10:31. A yeke kota ye ti tene e ngbâ ti sara aye so azia ngia na bê ti Jéhovah. A ngbâ gï pëpe na aye so e yeke sara na fango tënë nga na ngoi ti abungbi. A yeke nzoni aye so e yeke sara lâ na lâ  azia ngia na bê ti Jéhovah. Na tapande, tongana e sara ye na lege ni na yâ ti aye kue nga e mû ye na azo ayeke nzere na Jéhovah (2 aCor. 8:21; 9:7). Lo ye nga ti tene e bâ fini na nene ni mingi. Tongaso, e yeke te ye nga e yeke nyon ye ahon ndö ni ape nga e yeke sara ambeni ye so ayeke aidé e ti duti na nzoni seni. Tongana Jéhovah abâ so e gi ti zia ngia na bê ti lo na yâ ti aye kue so e sara, lo yeke ye e même mingi.—Luc 16:10.

15. Jéhovah aye ti tene e sara ye na azo tongana nyen?

¹⁵ Jéhovah ayeke sara ye na nzoni bê na azo ti mbilimbili nga na azo so ayeke mbilimbili ape (Mat. 5:45). Lo ye ti tene e sara nga tongaso na azo. Na tapande, e doit ‘ti sara sioni tënë ti mbeni zo pëpe, ti duti pëpe azo so aye papa, ti fa so e yeke sara ye biani na ngangu pëpe na azo kue.’ (Tite 3:2). Tongaso, même azo so amä na bê na Jéhovah ape e yeke pensé ape so e yeke nzoni ahon ala (2 Tim. 2:23-25). E yeke ga nduru mingi na Jéhovah tongana lakue e sara ye na nzoni bê na azo kue nga e ne ala.

E PEUT TI GA “NDURU NA NZAPA” MÊME NA NGOI SO E SARA AFAUTE

16. Zo ti sungo Psaume 73 akomanse ti pensé nyen na peko ti so lo sara na Jéhovah teti ambeni ngoi?

¹⁶ Me ka tongana asi na mbeni ngoi mo komanse ti bâ so mo lingbi ape ti tene Jéhovah aye mo? Tongana ti so e bâ fade, mara ti ye tongaso asi lani na zo ti sungo Psaume 73. Lo dema lo tene: “A ngbâ kete gere ti mbi amû mbeni lege nde, a ngbâ kete gere ti mbi aglissé.” (Ps. 73:2). Lo wani lo tene so ‘bê ti lo ason’, lo “gbu li lani nzoni pëpe” nga lo yeke lani “tongana nyama so ahinga ndo pëpe” na devant ti Jéhovah (Ps. 73:​21, 22). Me eskê lo tene lani so ndali ti afaute ti lo Jéhovah aye lo encore ape nga lo yeke pardonné lo ape?

17. (a) Atâa so zo ti sungo psaume so adécouragé lani ngangu, nyen la lo sara? (b) Nyen la e peut ti manda na lege ti tapande ti lo? (Bâ nga afoto.)

 ¹⁷ Tongana zo ti sungo psaume so apensé lani so Jéhovah adö lo azia awe, lo pensé tongaso gï teti kete ngoi. Même na ngoi so lo découragé ngangu, lo bâ so lo doit ti ga nduru mingi na Jéhovah. Lo tene: “Me ti fadeso, mbi yeke lakue na terê ti mo; mo gbu maboko ti mbi ti koli. Mo mû wango na mbi ti fa lege na mbi; na pekoni, mo yeke gue na mbi ti wara gloire.” (Ps. 73:​23, 24). E nga kue e doit ti hunda na Jéhovah ti kpengba e na ngoi so e bâ so mabe ti e awoko wala na ngoi so afaute ti e asara si e découragé (Ps. 73:26; 94:18). Même tongana e sara akota faute, e peut ti kiri na Jéhovah na e hinga biani so lo yeke “nduru ti pardonné” e (Ps. 86:5). Na ngoi so e découragé ngangu, a yeke kota ye mingi ti ga nduru mingi na Nzapa.—Ps. 103:​13, 14.

GANGO “NDURU NA NZAPA” TETI LAKUE LAKUE

18. Ngbanga ti nyen la e peut ti ngbâ ti ga nduru na Jéhovah teti lakue lakue?

¹⁸ E peut ti ngbâ ti ga nduru na Jéhovah teti lakue lakue. E yeke zia ande lâ oko ape ti manda ye na ndö ti lo. Bible atene so ‘zo alingbi ti hinga kue pëpe’ alege ti Jéhovah, ndara ti lo nga na hingango ye ti lo (aRom. 11:33).

19. Mbeti ti Psaume afa na e nyen na ndö ti kekereke?

¹⁹ Psaume 79:13 atene: “E azo ti mo so e yeke nga ataba ti mo so mo yeke bâ lege ti ala, e yeke mû singila na mo lakue lakue; nga e yeke sepela mo na yâ ti angoi nde nde so ayeke ga.” Tongana mo ngbâ ti ga nduru mingi na Nzapa, mo nga kue mo peut ti duti sûr so lo yeke sara tufa na ndö ti mo teti lakue lakue nga mo peut ti tene na bê ti mo kue, mo tene: “Nzapa ayeke kota tênë so asara si bê ti mbi awara ngangu nga lo yeke part ti mbi lakue lakue.”—Ps. 73:26.