1. Ti duti biani na ngia, nyen la e doit ti sara? Ngbanga ti nyen? (Ésaïe 48:​17, 18).

 BABÂ ti e ti yayu aye e mingi nga lo ye ti tene gigi anzere na e laso nga kekereke (Zo-ti. 3:​12, 13). Lo créé e na ambeni kode so apika bê mingi, me lo mû na e pëpe ngangu ti komande e wani wala ti fa ye so ayeke na lege ni nga ye so ayeke na lege ni ape (Zo-ti. 8:9; Jér. 10:23). Lo hinga so ti tene e duti biani na ngia, e doit ti voro lo nga ti mä yanga ti lo.—Diko Ésaïe 48:​17, 18.

2. Satan aye ti tene e pensé nyen? Nyen la Jéhovah asara ndali ni?

² Satan aye ti tene e pensé so e peut ti duti na ngia sân Jéhovah nga azo apeut ti komande ala wani nzoni (Gen. 3:​4, 5). Ti fa so Satan ayeke zo ti mvene, Jéhovah azia azo akomande ala wani teti mbeni ngoi. E bezoin ape ti gue ayo si e bâ asioni ye ti peko ti komandema ti azo. Me Bible asara nga tënë ti gbâ ti akoli na awali so ayeke lani na ngia ndali ti so ala voro Jéhovah. Jésus ayeke lani na ngia mingi ahon ala kue. Zia e bâ kozoni araison so ndali ni lo soro ti voro Jéhovah. Na pekoni, e yeke bâ ndani so Babâ ti e ti yayu alingbi ti tene e voro lo. Na nda ni, e yeke bâ ambeni raison so ndali ni e soro ti voro Jéhovah.

 NDANI SO JÉSUS ASORO TI VORO JÉHOVAH

3. Nyen la Satan aye lani ti mû na Jésus? Nyen la Jésus asoro ti sara?

³ Na ngoi so Jésus ayeke lani na sese, lo doit ti soro zo so lo yeke voro lo. Kete na peko ti batême ti Jésus, Satan atene ni yeke mû na lo aroyaume kue ti sese tongana lo voro ni gï fani oko. Jésus atene na lo: “Hon kâ, Satan! Mbeti ti Nzapa atene: ‘A yeke gï Jéhovah Nzapa ti mo si mo doit ti voro lo, nga gï lo oko si mo doit ti sara na lo kusala so ayeke nzoni-kue.’” (Mat. 4:​8-10). Ngbanga ti nyen la Jésus asoro lani ti sara tongaso? Zia e bâ ambeni raison ni.

4-5. Ambeni raison wa la ndali ni Jésus asoro ti voro Jéhovah?

⁴ Kota raison so apusu Jésus ti voro Jéhovah ayeke ndali ti so lo ye Babâ ti lo mingi (Jean 14:31). Na ndö ni, Jésus avoro Jéhovah ndali ti so a yeke na lege ni ti sara tongaso (Jean 8:​28, 29; Apoc. 4:11). Lo hinga so Jéhovah la amû na e fini, e peut ti sara confiance na lo nga lo mû na e gbâ ti anzoni ye (Ps. 33:4; 36:9; Jacq. 1:17). Jéhovah atene lakue tâ tënë na Jésus nga lo mû na lo ye kue so lo yeke na ni (Jean 1:14). Me ti Satan, lo la lo ga na kuâ. Lo yeke zo ti mvene so kota bê la ayeke pusu lo ti sara ye nga lo yeke gi gï nzoni ti lo (Jean 8:44). Jésus ahinga lani Jéhovah na Satan nzoni. Lo ye lâ oko ape ti sara ye tongana Satan nga ti sara kpengba-li na Jéhovah.—aPhil. 2:​5-8.

⁵ Mbeni raison so ndali ni Jésus asoro ti voro Jéhovah ayeke so lo yeke ku lani kungo gbâ ti anzoni ye so ayeke ga na pekoni (aHéb. 12:2). Lo hinga lani so tongana lo ngbâ be-ta-zo, lo yeke sara si iri ti Babâ ti lo aga nzoni-kue nga lo yeke zi apasi kue so Zabolo aga na ni.

NDANI SO JÉHOVAH ALINGBI TI TENE E VORO LO

6-7. Ngbanga ti nyen la azo mingi ayeke voro Jéhovah laso ape? Ngbanga ti nyen la lo lingbi ti tene e voro lo?

⁶ Laso, azo mingi avoro Jéhovah ape ndali ti so ala hinga apendere sarango ye ti lo ape nga ala hinga ape aye kue so lo sara ndali ti ala. Azo ti Athènes so Paul afa lani tënë na ala ayeke nga tongaso.—Kus. 17:​19, 20, 30, 34.

⁷ Paul afa na azo ti Athènes so tâ Nzapa la ‘amû na azo kue fini, pupu so ala yeke wu nga na aye kue.’ Lo kiri lo tene: “Ndali ti lo la e yeke na fini, e yeke tambela na e yeke dä.” Lo yeke Nzapa so acréé aye, so “na lege ti zo oko, lo sara mara oko oko kue ti azo”, tongaso lo yeke na droit ti tene e voro lo.—Kus. 17:​25, 26, 28.

8. Nyen la Jéhovah ayeke sara lâ oko ape? Tongana nyen la lo fa so lo ye e mingi?

⁸ So Jéhovah la acréé aye kue nga lo yeke Gbia ti dunia kue, lo peut ti forcé azo ti voro lo. Ye oko, Jéhovah ayeke sara ni lâ oko ape. Me lo fa na e aye so afa polele so lo yeke dä nga lo ye e oko oko kue mingi. Lo ye ti tene gbâ ti azo aga akamarade ti lo teti lakue lakue (1 Tim. 2:​3, 4). Ndani la Jéhovah afa ye na e ti fa na azo anzoni ye so lo yeke sara ande ndali ti ala nga tongana nyen la lo yeke sara ni (Mat. 10:​11-13; 28:​19, 20). Lo mû na e congrégation so e peut ti voro lo na yâ ni nga na a-ancien so aye e mingi ti mû maboko na e.—Kus. 20:28.

9. Na alege wa la Jéhovah afa ndoye ti lo na azo kue?

⁹ Jéhovah afa ndoye ti lo na lege so lo mû gbâ ti anzoni ye na azo so aye ape ti mä na bê na lo. Gbu li na ndö ti ye so: Ngbene ye giriri, azo milliard mingi asoro ti vivre alingbi na ye so ala bâ ayeke na lege ni nga ayeke  na lege ni ape. Atâa so kue, na nzoni bê, Jéhovah amû na ala ye so ala bezoin ni ti ngbâ na fini nga ti tene gigi anzere na ala (Mat. 5:​44, 45; Kus. 14:​16, 17). Lo mû na ala ngangu ti soro akamarade so aye ala, ti duti na sewa nga ti wara anzoni ye ti peko ti ngangu kua ti ala (Ps. 127:3; Zo-ti. 2:24). Aye so afa polele so Babâ ti e ti yayu aye azo kue (Ex. 34:6). Zia e kiri e dabe ti e na ambeni raison so ndali ni e soro ti voro Jéhovah nga e bâ tongana nyen la lo yeke sara tufa na ndö ti azo so ayeke voro lo.

NDANI SO E SORO TI VORO JÉHOVAH

10. (a) Kota raison so ndali ni e yeke voro Jéhovah ayeke so wa? (Matthieu 22:37). (b) Pardon ti Jéhovah a-aidé mo tongana nyen? (Psaume 103:​13, 14).

¹⁰ Tongana Jésus, kota raison so ndali ni e yeke voro Jéhovah ayeke so e ye lo mingi. (Diko Matthieu 22:37.) Tongana e manda ye na ndö ti apendere sarango ye ti Jéhovah, e yeke ga nduru na lo. Na tapande, lo yeke nduru ti pardonné e. Na ngoi so azo ti Israël ake yanga ti lo, lo voro yanga na ala, lo tene: “A yeke nzoni ala zia lege ti aye ti sioni so ala yeke sara so.” (Jér. 18:11). Jéhovah adabe ti lo so e yeke mbilimbili-kue ape. (Diko Psaume 103:​13, 14.) Tongana mo gbu li na ndö ti pardon ti Jéhovah nga na ambeni pendere sarango ye ti lo ayeke pusu mo ti voro lo teti lakue lakue.

11. Ambeni raison nde wa la ndali ni e soro ti voro Babâ ti e ti yayu?

¹¹ Bê ti e apusu nga e ti voro Jéhovah ndali ti so a yeke na lege ni ti sara ni (Mat. 4:10). Me e hinga nga so tongana e ngbâ be-ta-zo na Jéhovah, gbâ ti anzoni ye ayeke ga na pekoni. Tongana e sara na Jéhovah be-ta-zo ayeke sara si iri ti lo aga nzoni-kue, a yeke fa so Zabolo ayeke zo ti mvene nga a yeke zia ngia na bê ti Babâ ti e. Tongana e soro ti voro Jéhovah laso, e yeke nga na beku ti ngbâ ti voro lo teti lakue lakue.—Jean 17:3.

12-13. Nyen la e manda na lege ti ye so asi na Jane na Pam?

¹² Même tongana e de kete mingi, e peut ti manda ti ye Jéhovah mingi, na e yeke ye lo encore mingi tongana e kono. Bâ tapande ti Jane na Pam so ayeke aita. a Jane ayeke lani na ngu 11, Pam ayeke na ngu 10 na ngoi so ala komanse ti manda Bible. Atâa so babâ na mama ti ala aye ti ala ti manda Bible ape, ala yeda ti tene aTémoin amanda Bible na Jane na Pam tongana ala ngbâ ti gue na eglize legeoko na sewa. Jane atene: “Ye so aTémoin afa na mbi na yâ ti Bible a-aidé mbi ti dö sese na amba ti mbi so apusu mbi ti nyon drogue nga ti sara lango-sioni.”

¹³ Angu kete na pekoni, ala use kue aga awafango tënë. Na pekoni, ala komanse kua ti pionnier nga ala yeke bâ lege ti babâ na mama ti ala so aga mbakoro awe. Jane afa tënë ti bê ti lo na ndö ti aye kue so Jéhovah asara ndali ti ala, lo tene: “Mbi hinga so Jéhovah ayeke bâ lege ti akamarade ti lo lakue nga tongana ti so 2 Timothée 2:19 atene, ‘Jéhovah ahinga ala so ayeke ti lo.’” Kite ayeke dä ape so Jéhovah ayeke bâ lege ti azo so asoro ti ye lo nga ti voro lo.

14. Tongana nyen la atënë ti yanga ti e nga na aye so e sara apeut ti zi zonga so a bi na ndö ti iri ti Jéhovah? (Bâ nga afoto.)

¹⁴ E ye ti aidé ti zi zonga kue so a bi na ndö ti iri ti Jéhovah. Na tapande, gbu li na ndö ti mbeni kota kamarade ti mo so ayeke sara ye na nzoni bê, so ayeke mû ye mingi na  azo nga so ayeke nduru ti pardonné azo. Mbeni lâ, mo mä mbeni zo atene lo yeke sioni mingi nga lo sara ye na lege ni ape. Nyen la mo yeke sara? Mo yeke gbu koko ti lo. Legeoko nga, tongana Satan na azo so ayeke na gbe ti komandema ti lo agi ti buba iri ti Jéhovah, e yeke tene na azo tâ tënë na ndö ti Jéhovah nga e yeke gbu koko ti Lo ngangu (Ps. 34:1; És. 43:10). E yeke fa so e ye ti sara na Jéhovah na âme ti e kue na lege ti atënë ti yanga ti e nga na aye so e sara.

15. Ambeni nzoni ye wa la bazengele Paul awara na peko ti so lo sara akota changement na yâ ti gigi ti lo?(aPhilippien 3:7, 8)

¹⁵ E yeke nduru ti sara achangement na yâ ti gigi ti e ti zia ngia na bê ti Jéhovah wala ti sara na lo mingi. Na tapande, bazengele Paul ayeke lani na kota ndo na yâ ti bungbi ti vorongo Nzapa ti aJuif, me lo dö ni lo zia ti ga disciple ti Christ nga ti voro Jéhovah (aGal. 1:14). A sara si lo sara gbâ ti apendere ye na yâ ti kua ti Jéhovah na lo yeke komande ande legeoko na Christ na yayu. Lo regretté lâ oko ape desizion so lo mû ti voro Jéhovah, na lo yeke regretté nga ande ape.—Diko aPhilippien 3:​7, 8.

16. Nyen la e manda na lege ti tapande ti Julia? (Bâ nga afoto.)

¹⁶ Tongana e sara si kua ti Jéhovah aga ye so ayeke kota mingi na lê ti e, lo yeke sara tufa na ndö ti e laso nga na yâ ti angoi so ayeke ga. Bâ tapande ti ita-wali Julia. Na ngoi so Julia ade maseka, lo yeke he lani bia na yâ ti eglize ti lo. Lo he lani bia pendere mingi tongaso a komanse ti fa ye na lo ti tene lo ga zo ti hengo bia. Hio Julia aga zo so iri ti lo awu mingi nga lo sara si iri ti place ti hengo bia ti lo awu mingi. Na ngoi so lo  komanse ti gue na mbeni kota ekole ti musique, mbeni mba ti lo ti ekole ni akomanse ti fa na lo tënë ti Nzapa, lo fa na lo so Nzapa ayeke na iri, iri ti lo ayeke Jéhovah. A ninga ape, Julia akomanse ti manda Bible fani use yenga oko oko. Na nda ni, lo mû desizion ti mû ngoi ti lo na ngangu ti lo ti voro Jéhovah ahon ti ga zo ti hengo bia. A yeke lani kete ye ape ti mû desizion so. Lo tene: “Gbâ ti azo atene na mbi so a yeke ye ti buba so mbi zia ti he bia ti gue ti voro Jéhovah. Me mbi ye lani ti mû fini ti mbi ti sara na Jéhovah mingi.” Laso lo pensé nyen na ndö ti desizion so, so lo mû ahon ngu 30 awe so? Lo tene: “Mbi yeke na siriri ti bê nga mbi yeke na confiance so Jéhovah ayeke mû na mbi aye kue so mbi sara nzara ni na yâ ti angoi so ayeke ga.”—Ps. 145:16.

NGBÂ TI VORO JÉHOVAH

17. So e yeke vivre na ngoi so Nzapa aga nduru awe ti futi aye ti ngoi so apusu azo so asoro ti voro Nzapa nga na azo so ade ti sara ni ape ti sara nyen?

¹⁷ E yeke vivre na mbeni ngoi so Nzapa aga tâ nduru mingi ti futi aye ti ngoi so. Bazengele Paul atene: “Ndali ti so ‘na yâ ti kete ngoi, lo so angbâ ti ga so lo yeke si ande na retard ape.’” (aHéb. 10:37). Ye so aye ti tene nyen? A ye ti tene so ngoi angbâ mingi ape na azo so ade ti voro Jéhovah ape ti soro ti voro lo (1 aCor. 7:29). Tongana e soro ti voro Nzapa awe, e hinga so e doit ti  gbu ngangu na yâ ti akpale, me a yeke gï teti “kete ngoi”.

18. Nyen la Jésus na Jéhovah aye ti tene e sara?

¹⁸ Jésus awa lani azo ti ga adisciple ti lo na ti ngbâ ti mû peko ti lo (Mat. 16:24). Tongaso, tongana e yeke sara na Jéhovah asara ngu mingi awe, zia e leke na bê ti e ti ngbâ ti voro lo. E doit ti sara ngangu ti ngbâ ti sara ye alingbi na desizion so e mû ti voro lo. A peut ti duti kete ye ape, me so e yeke voro Jéhovah e peut ti duti na ngia nga e wara gbâ ti atufa même laso.—Ps. 35:27.

19. Nyen la e manda na lege ti tapande ti Gene?

¹⁹ Ambeni zo abâ so ti voro Jéhovah, zo adoit ti sara gbâ ti asacrifice. Tongana mo yeke maseka, eskê mo pensé so tongana mo voro Jéhovah mo yeke perdre mbeni ye? Mbeni ita-koli so ayeke maseka so iri ti lo Gene atene: “Mbi bâ lani so, so mbi yeke Témoin ti Jéhovah akanga lege na mbi ti sara ambeni ye so mbi ye. Na bango ni gbâ ti amolenge so mbi na ala e kono lani ayeke sara aye so anzere na ala, na tapande ala yeke gue na amatanga, ala yeke na acopine wala ala yeke sara asioni ngia ti vidéo, me ti mbi ngoi ti mbi ayeke gï ti gue na abungbi nga na fango tënë.” So lo pensé tongaso apusu lo ti sara nyen? Lo tene: “Mbi komanse ti sara asioni ye na hondengo ni na mbi wara ngia dä kete. Me mbi yeke lani na tâ ngia ape. Mbi komanse ti pensé na atâ tënë ti Bible so mbi sara sanka ni na mbi mû desizion ti voro Jéhovah na bê ti mbi kue. Ngbene ye na ngoi ni so ti ga na ni, na bango ni Jéhovah akiri tënë na asambela ti mbi oko oko kue.”

20. Nyen la a yeke nzoni e leke na bê ti e ti ngbâ ti sara?

²⁰ Mbeni zo ti sungo psaume ahe bia na Jéhovah, atene: “Ngia ayeke na zo so mo soro lo nga mo sara si lo ga lo duti na lê ti alacour ti mo.” (Ps. 65:4). Zia e leke na bê ti e ti ngbâ ti voro Jéhovah. Legeoko tongana Josué, e yeke tene: “Me ti mbi nga na azo ti da ti mbi, e yeke voro ti e gï Jéhovah.”—Jos. 24:15.