MABE ayeke na ngangu mingi. Na tapande, atâa so Satan aye ti buba songo ti e na Jéhovah, mabe amû lege na e “ti mingo wâ ti akokora kue ti Zo ti sioni.” (aÉph. 6:16). Tongana e yeke na mabe, e lingbi ti hon ndö ti akpale so ayeke tongana ahoto. Jésus atene na adisciple ti lo, atene: “Tongana ala yeke na mabe so akono tongana lê ti keke ti moutarde, ka ala yeke tene na hoto so: ‘Londo ge, mo gue mo duti kâ,’ na lo yeke londo ti gue.” (Mat. 17:20). Ndali ti so e hinga so mabe alingbi ti sara si songo ti e na Jéhovah akpengba mingi, a lingbi e gbu li na ndö ti ahundango ndo so: Mabe ayeke nyen? Ti bâ tâ tënë na nene ni ayeke sara nyen na ndö ti mabe ti e? Tongana nyen la e lingbi ti kpengba mabe ti e? A lingbi e mä na bê na zo wa?—aRom. 4:3.

Mabe andu aye mingi ahon gï ti mä na bê so aye so Bible atene ayeke tâ tënë, ndali ti so “asioni yingo nga kue amä na bê [so Nzapa ayeke dä], na ala yeke dö na mbeto.” (Jacq. 2:19). Tongaso, mabe ayeke nyen?

Bible afa so mabe ayeke na ambage use. Kozoni, “mabe ayeke hingango biani so aye so mo yeke ku ni kungo ayeke si biani.” (aHéb. 11:1a). Tongana mo yeke na mabe, mo yeke na kite oko ape so aye kue so Jéhovah atene ayeke tâ tënë na ayeke si biani. Na tapande, Jéhovah atene lani na azo ti Israël, atene: “Tongana ala lingbi ti fâ yâ ti mbele ti mbi ti tene kota lâ aduti dä pëpe nga bï aduti dä pëpe, si mbi lingbi ande ti fâ yâ ti mbele so mbi te lani na wakua ti mbi David.” (Jér. 33:20, 21). Eskê a si lâ oko awe so mo sara mbeto so, mbeni lâ, lâ ayeke sigi ape nga ayeke linda ape, a sara si kota lâ nga na bï aduti dä encore ape? Tongana mo yeke na kite ape na ndö ti andia so ayeke fa lege na aye so ayeke tambela na yâ ti dunia so asara si sese angbâ ti tourné na angoro na terê ti lâ, eskê mo doit ti dë kite so Nzapa so alu andia so alingbi pëpe ti sara ye alingbi na azendo so lo mû? Ên-ën!—És. 55:10, 11; Mat. 5:18.

Use ni, mabe ayeke “fango polele na gigi ye so afa atene aye so mo bâ ni pëpe ayeke dä biani.” (aHéb. 11:1b). Na lege wa? Imaginé so mbeni molenge ahunda mo, atene: ‘Mo hinga tongana nyen so pupu ayeke dä?’ Atâa so mo bâ pupu lâ oko na lê ti mo ape, âmanke mo yeke mû maboko na molenge ni ti gbu li na ndö ti aye so afa atene pupu ayeke dä, na tapande, pupu so e yeke wu nga na aye so afa so pupu ayeke ya. Tongana molenge ni ayeda so aye so ayeke dä biani, lo yeke comprendre so zo alingbi ti mä na bê na mbeni ye so lo bâ ni ape. Legeoko nga, akpengba ye ayeke dä so asara si zo ayeke na mabe.—aRom. 1:20.

Ndali ti so mabe aluti na ndö ti aye so afa polele so mbeni ye ayeke dä biani, ti tene mbeni zo aduti na mabe a lingbi kozoni lo wara “tâ hingango ye na ndö ti tâ tënë.” (1 Tim. 2:4). Me gï hingango ye alingbi ape. Bazengele Paul atene: “A yeke na bê si zo ayeke mä na bê.” (aRom. 10:10). Zo adoit ti mä na bê na tâ tënë nga ti bâ ni na nene ni. Tongana lo sara tongaso ayeke pusu lo ti mä na bê, so ti tene, ti sara ye alingbi na tâ tënë (Jacq. 2:20). Zo so abâ tâ tënë na nene ni  ape alingbi même ti ke aye so afa na lo so mbeni ye ayeke dä biani tongana lo luti nganganga na ndö ti apensé so lo yeke na ni wala lo gi araison ti sara ye alingbi na anzara ti mitele ti lo (2 Pi. 3:3, 4; Jude 18). Ndani la ândö, gbâ ti azo abâ amiracle so a sara me ala kue la amä na bê ape (Nom. 14:11; Jean 12:37). Gï azo so aye biani tâ tënë la si yingo vulu ti Nzapa ayeke sara si ala duti na mabe.—aGal. 5:22; 2 aThes. 2:10, 11.

Gbia David ayeke na popo ti azo so ayeke lani na kpengba mabe (aHéb. 11:32, 33). Ye oko, azo kue ti yâ ti sewa ti David la ayeke lani na kpengba mabe ape. Na tapande, na mbeni ngoi, Éliab, kozo molenge ti babâ ti David, afa so lo yeke na mabe ape na ngoi so lo suku na David ndali ti so lo gi ti hinga ye na ndö ti gingo yanga ti Goliath (1 Sam. 17:26-28). A dü zo dungo na mabe ape nga mbeni zo ayeke wara mabe na lege ti babâ na mama ti lo ape, tongaso kpengba songo ti David na Nzapa la asara si lo yeke lani na mabe.

Na Psaume 27, David afa tongana nyen la lo wara lani mara ti kpengba mabe so (Versê 1). David agbu li lani na ndö ti aye so asi na lo nga na ndö ti lege so Jéhovah asara ye na awato ti lo (Versê 2, 3). Lo bâ lani na nene ni mingi ye so Jéhovah aleke ndali ti vorongo lo (Versê 4). David avoro Nzapa legeoko na amba ti lo awakua ti Nzapa na tabernacle (Versê 6). Lo sambela lani Jéhovah na bê ti lo kue ti tene Lo mû maboko na lo (Versê 7, 8). David aye nga lani ti tene Nzapa afa na lo lege ti Lo (Versê 11). Mabe ayeke lani kota ye mingi na lê ti David, ni la lo hunda ndo, lo tene: “Tongana fade mbi mä na bê pëpe . . . , ka mbi yeke duti na ndo wa?”—Versê 13.

Mo lingbi ti duti na mara mabe so David ayeke na ni tongana mo gi ti duti na mara ti bibe nga na asarango ye so a sara tënë ni na Psaume 27. Ndali ti so tâ hingango ye la ayeke sara si zo aduti na mabe, tongana mo manda mingi Bible nga na ambeti ti e, a yeke duti ngangu mingi na mo ape ti lë mbage ti lengo ti yingo ti Nzapa so (Ps. 1:2, 3). Mû ngoi ti gbu li na ngoi so mo yeke manda ye. Tongana e gbu li na ndö ti aye so e yeke manda, e yeke kiri singila mingi na Jéhovah. Tongana e kiri singila mingi na Jéhovah, e yeke duti na nzara mingi ti sara ye na mabe na lege so e voro lo na ngoi ti abungbi nga e fa tënë ti beku ti e na azo (aHéb. 10:23-25). Na ndö ni, e yeke fa so e yeke na mabe tongana e ngbâ ti “sambela nga [e] nze pëpe”. (Luc 18:1-8). Tongaso, “ngbâ ti sambela [Jéhovah] lakue”, duti na confiance so “lo yeke bi bê ti lo na ndö ti [mo].” (1 aThes. 5:17; 1 Pi. 5:7). Mabe apusu e ti sara ye, na aye so e sara ayeke kpengba mabe ti e.—Jacq. 2:22.

Na lakui so na ndade ni Jésus akui, lo tene na adisciple ti lo, lo tene: “Ala mä na bê na Nzapa, ala mä na bê na mbi nga.” (Jean 14:1). Tongaso, a lingbi e mä na bê na Jéhovah nga na Jésus. Tongana nyen la mo lingbi ti mä na bê na Jésus? Zia e bâ alege ota so mo lingbi ti sara ni.

 Kozoni, bâ ye so a futa ti zi azo tongana cadeau so Nzapa amû na mo. Bazengele Paul atene: “Mbi yeke na [fini] fadeso . . . ndali ti mabe ti mbi na Molenge ti Nzapa, lo so andoye mbi si lo kä terê ti lo na kuâ ndali ti mbi.” (aGal. 2:20). Tongana mo mä na bê na Jésus, mo yeke yeda biani so ye so a futa ti zi azo alingbi ti mû maboko na mo, na lege ni Nzapa ayeke pardonné asiokpari ti mo, a mû na mo beku ti fini ti lakue lakue nga a yeke kota ye so afa so Nzapa aye mo (aRom. 8:32, 38, 39; aÉph. 1:7). Ye so ayeke kpengba mo ti zia pëpe si asioni pensé so mo yeke na ni na ndö ti mo wani awoko mo.—2 aThes. 2:16, 17.

Use ni, ga nduru mingi na Jéhovah na lege ti sambela, mo lingbi ti sara ni grâce na sandaga ti Jésus. Grâce na ye so a futa ti zi azo, e lingbi ti sambela Jéhovah “na sarango tënë na kamene pëpe, . . . si a lingbi ti sara nzoni bê na e nga a sara kota nzobe na e na ngoi so e yeke na bezoin ti tene a mû maboko na e.” (aHéb. 4:15, 16; 10:19-22). Sambela ayeke kpengba e ti dö sese na aye so apusu e ti sara siokpari.—Luc 22:40.

Ota ni, mä yanga ti Jésus. Bazengele Jean atene: “Zo so amä na bê na Molenge ni ayeke na fini ti lakue lakue. Me zo so ake yanga ti Molenge ni ayeke wara ande fini pëpe, me ngonzo ti Nzapa angbâ na ndö ti lo.” (Jean 3:36). Bâ so Jean azia kangbi na popo ti sarango ye na mabe nga na kengo yanga. Tongaso, mo yeke mä na bê na Jésus tongana mo mä yanga ti lo. Mo yeke mä yanga ti Jésus na lege so mo sara ye alingbi na “ndia ti Christ”, so ti tene, aye kue so lo fa nga lo hunda ti tene a sara (aGal. 6:2). Mo yeke mä nga yanga ti Jésus na lege so mo sara ye alingbi na aye so lo fa na lege ti “ngbâa be-ta-zo so ayeke sara ye na ndara”. (Mat. 24:45). Tongana mo mä yanga ti Jésus, mo yeke wara ngangu ti gbu ngangu na yâ ti akpale so ayeke tongana kota pupu ti ngu.—Luc 6:47, 48.

Mbeni lâ, mbeni koli adekongo, lo tene na Jésus, lo tene: “Mbi yeke na mabe! Mû maboko na mbi na ndo so mabe amanke mbi dä!” (Marc 9:24). Koli so ayeke kamême lani na mabe, me lo hinga so lo bezoin ti duti na mabe mingi. Legeoko tongana koli so, e kue na ambeni ngoi e bezoin ti duti na mabe mingi. Nga, e kue e lingbi ti kpengba mabe ti e laso. Tongana ti so e bâ awe, e yeke kpengba mabe ti e tongana e manda Bible nga e gbu li na ndö ni, aye so ayeke sara si e kiri singila mingi na Jéhovah. Mabe ti e ayeke kpengba nga mingi na ngoi so e na amba ti e aChrétien e voro Jéhovah, e fa tënë ti beku ti e na azo nga e ngbâ lakue ti sambela. Na ndö ni, tongana e kpengba mabe ti e, e yeke wara futa so ahon atanga ni kue. Bible awa e, atene: “Ala so mbi ndoye ala mingi, ala sara si ala wani ala kpengba na ndö ti fondation ni so ayeke mabe ti ala so ayeke nzoni ahon tanga ti aye kue . . . tongaso si ala ngbâ na yâ ti ndoye ti Nzapa.”—Jude 20, 21.