1. Paradis ti yingo ayeke nyen? Nyen la a yeke nzoni e leke na bê ti e ti ngbâ ti sara?

 LASO, mbeni Paradis na lege ti fä ayeke na ndö ti sese so asi singo na azo so ayeke na gbâ ti aye ti nzoni ti sara. A si singo na azo kutu mingi so ayeke na tâ siriri. Azo so alï na yâ ti paradis so awe aleke na bê ti ala ti sigi dä lâ oko ape. Ala ye nga ti tene azo mingi aga abungbi na ala na yâ ti pendere ndo so. Pendere ndo wa? Paradis ti yingo! a

2. Nyen la apika bê ti zo mingi na yâ ti paradis ti yingo?

² Na mbeni fason so apika bê mingi, Jéhovah aleke mbeni ndo na lege ti fä so azo ti lo ayeke na yâ ni na siriri nga beoko, atâa so ala yeke na yâ ti dunia ti Satan so ayeke sioni so azo ake terê dä (1 Jean 5:19; Apoc. 12:12). Nzapa ti e so andoye e abâ tongana nyen la aye ti dunia so ayeke sara sioni na azo. Me lo leke ti tene azo ti lo abâ so ala yeke nzoni, tongaso si ala peut ti ngbâ ti sara na lo na ngia. Bible afa paradis ti yingo tongana mbeni “ndo so zo alingbi ti kpe dä ti bata terê ti lo” nga tongana “mbeni yaka so awara ngu nzoni”. (És. 4:6; 58:11). Grâce na tufa ti Jéhovah, azo so ayeke na yâ ti paradis so ayeke na ngia nga ala yeke nzoni na yâ ti akpale ti lâ ti nda ni so.—És. 54:14; 2 Tim. 3:1.

3. Prophétie so ayeke na Ésaïe chapitre 65 aga tâ tënë ândö tongana nyen?

³ Na lege ti prophète Ésaïe, Jéhovah afa dutingo ti azo na yâ ti paradis ti yingo. Mo peut ti wara tënë na ndö ni na Ésaïe chapitre 65 so aga tâ tënë ti kozo ni na ngu 537 kozo na ngoi ti e. Na ngoi ni so, a zi lani aJuif so ayeke na ngbâa  na Babylone na ala kiri na kodro ti ala. Jéhovah asara lani tufa na ndö ti azo ti lo nga lo aidé ala ti sara si gbata ti Jérusalem so abuba akiri aga pendere nga ti sara si temple akiri aga ndo so a voro lo dä na Israël.—És. 51:11; Zach. 8:3.

4. Prophétie so ayeke na Ésaïe chapitre 65 aga tâ tënë laso tongana nyen?

⁴ Prophétie ti Ésaïe so akomanse ti ga tâ tënë ti use ni na ngu 1919, na ngoi so awakua ti Jéhovah ti ngoi ti e asigi na gbe ti ngbâa ti Babylone, ngangu gbata. Na pekoni, paradis ti yingo so akomanse ti mû ndo na ndö ti sese. Awafango tënë ti Royaume so ayapu asigi na gbâ ti acongrégation nga ala maï apendere sarango ye ti aChrétien. Akoli nga na awali so ândö ayeke sara aye ti ngangu na zo nga ayeke na asioni sarango ye ‘ayü fini zo so asara lo alingbi na ye so bê ti Nzapa aye’. (aÉph. 4:24). Ti tâ tënë ni mingi ti anzoni ye so Ésaïe asara tënë ni ayeke ga ande tâ tënë na yâ ti fini dunia. Me même laso, so e yeke na yâ paradis na lege ti fä, e wara anzoni ye mingi. Zia e bâ tongana nyen la paradis ti yingo so aga na e anzoni ye nga ndani so a yeke nzoni e sigi dä lâ oko ape.

DUTINGO TI AZO SO AYEKE NA YÂ TI PARADIS TI YINGO

5. Tongana ti so a tene na Ésaïe 65:​13, anzoni ye wa la e wara na yâ ti paradis ti yingo?

⁵ Ala yeke na nzoni seni nga ala yeke na ngangu. Prophète Ésaïe afa mbeni kota kangbi so ayeke na popo ti fini ti azo so ayeke na yâ ti paradis nga na ti azo so ayeke na yâ ni ape. (Diko Ésaïe 65:13.) Jéhovah amû na awakua ti lo aye kue so ala bezoin ni ti ngbâ nduru na lo. Lo mû na e yingo vulu ti lo, Bible nga na akobe ti yingo tongaso si e peut ti ‘te ye, e nyon ye nga e sara ngia’. (Bâ Apocalypse 22:17.) Me dutingo ti azo so ayeke na yâ ti paradis ti yingo ape ayeke nde mingi, ‘ala yeke na nzara, go ti ala ahule nga kamene asara ala.’ Ala yeke na songo na Nzapa ape.—Amos 8:11.

6. Ambeni cadeau wa la Jéhovah amû na e so Joël 2:​21-24 asara tënë ni? Tongana nyen la e peut ti bâ nzoni dä?

⁶ Na yâ ti prophétie ti Joël, lo sara tënë ti aye so zo abezoin ni, na tapande alê ti kobe, vin nga na mafuta ti olive ti fa so Jéhovah amû mingi na awakua ti lo aye so ala bezoin ni so na popo ni mo yeke wara kobe ti yingo (Joël 2:​21-24). Na tapande, lo mû na e Bible, ambeti ti e, site ti e, abungbi ti congrégation nga na akota bungbi. E peut ti bâ nzoni na lege ti aye so lâ na lâ na a yeke sara si e duti na nzoni seni nga e kiri e wara ngangu.

7. Nyen la asara si “bê ti e ayeke na ngia”? (Ésaïe 65:14).

⁷ Ala yeke na ngia. Awakua ti Nzapa apeut ti “dekongo na ngia” ndali ti so, ala kiri singila mingi na Jéhovah. (Diko Ésaïe 65:14.) Akpengba tâ tënë, azendo so adë bê so ayeke na yâ ti Bible, kpengba beku so e yeke na ni grâce na ye so Christ afuta ti zi e asara si “bê ti e ayeke na ngia”. Tongana e sara lisoro na ndö ti aye so na aita ti e ayeke sara si e yeke biani na ngia.—Ps. 34:8; 133:​1-3.

8. Akota ye use wa la ayeke na yâ ti paradis ti yingo?

⁸ Ndoye nga na beoko so ayeke na popo ti awakua ti Jéhovah ayeke akota ye use so ayeke na yâ ti paradis ti yingo. “Kamba so abungbi ye” so, a aidé e ti imaginé fini na yâ ti fini dunia, ndo so awakua ti Jéhovah ayeke ye ande terê mingi nga ala yeke duti ande beoko mingi ahon ti laso (aCol. 3:14). Mbeni ita-wali afa ye so lo bâ na ndo ti awakua ti Jéhovah na ngoi so lo wara terê na ala ti kozo ni. Lo tene: “Mbi hinga ape tongana nyen la azo ayeke duti na ngia, même na yâ  ti sewa ti mbi. A yeke na popo ti aTémoin ti Jéhovah la mbi bâ ti kozoni azo asara ye na ndoye na popo ti ala.” Zo kue so aye biani ti duti na ngia abezoin ti duti na yâ ti paradis ti e ti yingo. Atâa nyen la azo ti dunia so apensé na ndö ti awakua ti Jéhovah, ala yeke na nzoni iri na gbele Jéhovah nga na azo kue so ayeke voro lo.—És. 65:15.

9. Ésaïe 65:​16, 17 atene nyen na ndö ti aye so asara si e yeke bâ pasi laso so?

⁹ Ala yeke kpô nga ala gi bê ti ala ape. Ésaïe 65:14 atene so azo so asoro ti duti na yâ ti paradis ti yingo ape ayeke “toto ndali ti vundu so ayeke na bê ti ala nga ala yeke toto ndali ti kä so ayeke na bê ti ala.” Me ka ti aye kue so asara si awakua ti Nzapa ayeke bâ pasi? Na nda ni azo ayeke ‘dabe ti ala ande na aye so ape nga Nzapa ayeke kiri ti bi lê ti lo dä pëpe.’ (Diko Ésaïe 65:​16, 17.) Jéhovah ayeke zi ande akpale ti e na nda ni e yeke dabe ti e ande même ape na aye so akpale so asara na e.

10. Ngbanga ti nyen la mo kiri singila ndali ti so mo yeke na pasa ti duti na popo ti aita? (Bâ nga foto.)

¹⁰ Même laso, e bâ so e yeke kpö mingi na ngoi so e yeke na abungbi, kâ e yeke zia li ti e pëpe na ndö ti aye so asara si e gi bê ti e na yâ ti sioni dunia so. E yeke aidé nga aita ti bâ so ala yeke kpö tongana e sara ye na ndoye, e yeke na ngia, e yeke na siriri, e sara nzoni na zo nga e sara ye na ngangu pëpe, so ayeke ambage ti lengo ti yingo ti Nzapa (aGal. 5:​22, 23). E kiri singila mingi na Nzapa so e yeke na yâ ti bungbi ti lo! Azo so angbâ na yâ ti paradis ti yingo ayeke bâ ande zendo ti Nzapa na ndö ti “afini yayu na fini sese” aga tâ tënë kue.

11. Ti gue oko na Ésaïe 65:​18, 19, a yeke nzoni paradis ti yingo so Jéhovah acréé asara e tongana nyen?

¹¹ Ala kiri singila na Nzapa nga ala yeke na ngia mingi. Na pekoni, Ésaïe afa ndani so a yeke nzoni e “dekongo na ngia nga e duti na ngia” na yâ ti paradis ti yingo. Jéhovah la acréé paradis ti yingo so. (Diko Ésaïe 65:​18, 19.) Tongaso, a yeke na lege ni so Jéhovah ayeke sara kua na e ti aidé azo ti sigi na yâ ti abungbi ti dunia so, so ayeke fa na ala tâ tënë ape na ndö ti lo nga ti aidé ala ti ga na yâ ti pendere paradis ti e na lege ti fä. Terê ti e anzere mingi ndali ti anzoni ye so e wara ndali ti so e yeke na yâ ti tâ tënë na e yeke na kota nzara ti fa ni na azo.—Jér. 31:12.

12. Azendo so a sara tënë ni na Ésaïe 65:​20-24 asara mo tongana nyen? Ngbanga ti nyen?

¹² E kiri nga singila na Jéhovah nga beku  so lo mû na e ndali ti so e yeke na yâ ti paradis ti yingo anzere na e mingi. Gbu gï li na ndö ti aye kue so e yeke bâ ande nga e yeke sara ande na yâ ti fini dunia ti Nzapa. Bible atene: “A yeke wara pëpe mbeni molenge so aduti na fini gï teti kete ngoi. A yeke wara nga pëpe mbeni mbakoro so akui kozo ti tene ngangu ti lo ahunzi kue.” E yeke ‘leke ada, na e yeke lango na yâ ni, nga e yeke fâ ayaka ti vigne, na e yeke te lengo ni.’ E yeke “bâ pasi gï senge senge pëpe” ndali ti so ‘Jéhovah ayeke iri tënë nzoni na ndö ti e.’ Lo mû zendo ti mû na e mbeni gigi so na yâ ni e bâ so sioni apeut ti si na e ape, e yeke na ngia nga e hinga ndani so e yeke na fini. “Même kozo si ala toto”, lo yeke hinga ande bezoin ti zo oko oko kue nga lo yeke “mû na aye kue so ayeke na fini ye so ala sara nzara ni.”—És. 65:​20-24; Ps. 145:16.

13. Tongana nyen la Ésaïe 65:25 afa achangement so azo asara na ngoi so ala komanse ti sara na Jéhovah?

¹³ Ala yeke na siriri nga ala yeke nzoni. Grâce na mungo maboko ti yingo ti Nzapa, gbâ ti azo so ayeke lani na asioni sarango ye asara akota changement na yâ ti gigi ti ala. (Diko Ésaïe 65:25.) Ala sara ngangu ti zia lege ti asioni sarango ye ti ala (aRom. 12:2; aÉph. 4:​22-24). Ti tâ tënë ni, awakua ti Nzapa ayeke mbilimbili-kue ape, tongaso ala yeke ngbâ ande ti sara afaute. Ye oko, Jéhovah abungbi “mara ti azo nde nde kue” so aye lo nga so aye amba ti ala asara si ala yeke na siriri nga ala yeke beoko (Tite 2:11). So a yeke mbeni miracle so gï Nzapa so ngangu ti lo ahon angangu kue la apeut ti sara ni.

14. Tongana nyen la Ésaïe 65:25 aga tâ tënë na ndö ti mbeni ita-koli?

¹⁴ Eskê azo apeut biani ti changé asarango ye ti ala? Gbu li na ndö ti tapande so. Mbeni maseka-koli so asara kanga fani mingi na ngoi so lo yeke lani na ngu 20 ayeke lani na asioni sarango ye nga lo yeke sara lani ye ti ngangu na azo. A kanga lo lani ndali ti so lo nzi oto, lo nzi ye na da ti azo nga lo sara ambeni ye so ayeke sioni mingi. Lani, lo yeke lakue nduru ti tiri na azo. Na ngoi so lo mä tâ tënë ti Bible pan nga lo komanse ti ga na bungbi ti aTémoin ti Jéhovah, lo hinga biani ndani so lo yeke na fini so ti tene ti voro Jéhovah na yâ ti paradis ti yingo. Na peko ti so lo wara batême lo ga Témoin, lo yeke gbu ka li na ndö ti lege so Ésaïe 65:25 aga tâ tënë na ndö ti lo. Lo so lani lo yeke tongana bamara so ayeke sara ye ti ngangu na azo, lo ga tongana mbeni molenge ti taba so ayeke na siriri na azo.

15. Ngbanga ti nyen la e ye ti tisa azo ti ga na yâ ti paradis ti yingo? E peut ti sara ni tongana nyen?

¹⁵ Ésaïe 65:13 akomanse na tënë so: “Bâ tënë so Jéhovah, Seigneur ti dunia kue, atene la.” Versê 25 ahunzi na tënë so: “Tënë ti yanga ti Jéhovah la.” Tënë ti lo ayeke ga lakue tâ tënë (És. 55:​10, 11). Paradis ti yingo ayeke dä awe. Jéhovah acréé mbeni sewa ti awakua ti lo so ayeke tâ nde mingi. So e yeke na yâ ti sewa so, e yeke kamême na siriri nga e bâ so e yeke nzoni na yâ ti dunia so sarango ye ti ngangu na zo ayeke dä so (Ps. 72:7). Ndali ti araison so, e ye ti aidé gbâ ti azo ti ga na yâ ti sewa ti e ti Chrétien. E peut ti sara ni tongana e zia li ti e na ndö ti sarango adisciple.—Mat. 28:​19, 20.

LEGE TI AIDÉ AZO TI GA NA YÂ TI PARADIS TI YINGO

16. Nyen la apeut ti aidé azo ti duti na nzara ti ga na yâ ti paradis ti yingo?

¹⁶ E oko oko kue e yeke na mbeni kota kua ti sara ti gboto azo na yâ ti paradis ti yingo. E peut ti sara kua so tongana e mû tapande  ti Jéhovah. Lo yeke gbu azo na ngangu ti ga na yâ ti bungbi ti lo ape. Me na nzoni bê lo “gboto” azo na mbage ti lo (Jean 6:44; Jér. 31:3). Azo so aye biani ti hinga tâ tënë, so amanda ye na ndö ti ndoye ti Jéhovah nga na apendere sarango ye ti lo, ayeke ga na mbage ti lo na bê ti ala wani. Tongana nyen la e peut ti gboto azo na yâ ti paradis ti yingo na lege ti apendere sarango ye ti e nga na nzoni tambela ti e?

17. Tongana nyen la e peut ti gboto azo na yâ ti paradis ti yingo?

¹⁷ Mbeni lege so e peut ti gboto azo na yâ ti paradis ti yingo ayeke ti tene e sara ye na aita ti e na ndoye nga na nzoni bê. Tongana afini zo aga na abungbi ti e, e ye si ala tene mara ti tënë so azo so amä na bê ape so peut-être aga na bungbi na Corinthe ti ândö atene lani. Ala tene lani atene: “Nzapa ayeke biani na popo ti ala.” (1 aCor. 14:​24, 25; Zach. 8:23) Tongaso, e doit ti ngbâ ti sara ye alingbi na wango so, so atene ala “duti na siriri na popo ti ala.”—1 aThes. 5:13.

18. Nyen la apeut ti gboto azo na yâ ti bungbi ti e?

¹⁸ A yeke nzoni lakue e gi ti bâ amba ti e aChrétien tongana ti so Jéhovah ayeke bâ ala. E yeke sara ni na lege so e bâ gï apendere sarango ye ti ala, me pëpe awokongo ti ala so na nda ni a yeke girisa ande. E peut ti leke akpale kue so ayeke na popo ti e na amba ti e na lege ti ndoye tongana lakue e ‘sara nzoni na mba, e bâ mawa ti zo mingi, e pardonné mba na bê ti e kue’. (aÉph. 4:32). Tongana e sara tongaso, azo so aye nga ti tene a sara ye na ala na ndoye ayeke duti na nzara ti ga na yâ ti paradis ti yingo. b

 NGBÂ NA YÂ TI PARADIS TI YINGO

19. (a) Tongana ti so encadré “ Ala sigi lani na yâ ti paradis ti yingo na ala kiri dä” afa, tënë wa la ambeni zo so akiri na yâ ti paradis ti yingo atene? (b) Nyen la a yeke nzoni e leke na bê ti e ti sara? (Bâ nga foto.)

¹⁹ E kiri singila mingi ndali ti paradis ti e ti yingo. A yeke ga pendere ahon ti kozo nga wungo ti azo ti yâ ni so ayeke gonda Jéhovah aga gbani ahon ti kozo. Zia e kiri singila na Jéhovah lakue ndali ti paradis ti yingo so lo leke ndali ti e. Zo kue so aye ti wara ngangu, ti duti na ngia, ti duti kpö nga ti duti nzoni adoit ti ga na yâ ti paradis ti yingo na ti sigi dä lâ oko ape. Me e doit ti sara hange mingi ndali ti so Satan ayeke sara ye kue so lo peut ti sara ti handa e ti sigi dä (1 Pi. 5:8; Apoc. 12:9). E doit ti zia lege na lo ti handa e ape. Zia e sara kue ti bata paradis ti yingo si angbâ pendere, saleté aduti dä ape nga siriri aduti dä.