A dü mbi na Ciudad Mante, mbeni pendere kodoro so ayeke na kodoro-komanda ti Tamaulipas na Mexique. Azo ti gbata ni ayeke azo so ayeke mû ye na azo nga ayeke na nzoni bê. Me mawa ni ayeke so, ndo ni ayeke sioni mingi ngbanga ti so, ambeni zo ayeke dä so kua ti ala ayeke ti sara sioni na azo.

E yeke amolenge-koli osio, na mbi yeke use molenge ni. Babâ na mama ti mbi ahunda si a batize mbi na Eglize Catholique, nga na pekoni mbi lï na yâ ti chorale ti paroisse ti eglize ni. Mbi ye ti nzere na lê ti Nzapa ngbanga ti so mbi sara mbeto ngangu ti tene lo fâ ngbanga na li ti mbi nga ti tene mbi gue na enfer teti lakue lakue.

Na ngoi so mbi yeke na ngu oku, babâ ti e azia e. Ye so ason mbi mingi nga asara si mbi bâ so mbeni ye amanke mbi. Mbi comprendre ape ngbanga ti nyen la lo zia e, lo so e ye lo mingi so! A hunda na mama ti mbi ti gue ti sara kua teti l’heure mingi ti mû na e ye so e bezoin ni, e so e yeke amolenge-koli osio so.

Mbi profité lani na yâ ti aye ni so ti kpe ekole ti gue ti sara kamarade na ambeni molenge. Ala fa na mbi sioni yanga, nyongo manga, nzi nga na tiri. Teti so mbi ye ti komande amba ti mbi, mbi manda boxe, tiri ti pongo, karaté nga mbi manda ti pika ngombe. Mbi ga lani mbeni sioni maseka. A si mingi so mbi na azo e yeke tiri na ngombe, na mingi ni a yeke wara mbi na nda ni na mênë kue na tere ti mbi na a zia mbi tongana kuâ na ndo ti lege. Tâ so vundu la mbi yeke zia lani na bê ti mama ti mbi, na ngoi so lo yeke wara mbi tongaso nga lo yeke yô mbi na loro ti gue na mbi na hôpital!

Na ngoi so mbi yeke na ngu 16, Jorge, mbeni kamarade ti mbi so mbi na lo e kono oko, aga na yanga-da ti e. Lo tene na e so lo yeke Témoin ti Jéhovah na so lo yeke na mbeni ngangu sango ti fa ni na e. Lo sara kua na Bible ti fa aye so lo mä na bê na ni. Lâ oko mbi diko aversê ni so ape, nga a nzere na mbi mingi ti hinga iri ti Nzapa nga na aye so lo leke ti sara. Jorge ahunda ti manda Bible na e. E yeda.

Bê ti mbi adë mingi ti mä tâ tënë na ndo ti tënë ti enfer ti wâ, so ayeke mbeni fango ye so ayeke na yâ ti Bible ape (Psaume 146:4; Zo-ti-fa-tene 9:5). Tâ gi na ngoi  so mbi hinga ni, sioni mbeto ti Nzapa so mbi yeke na ni kozo ahon. Mbi komanse ti bâ lo tongana mbeni Babâ ti ndoye so aye nzoni ti amolenge ti lo.

Tongana mbi yeke gue na li ni na yâ ti mandango Bible ni, mbi bâ so a lingbi mbi changé asarango ye ti mbi, mbi sara tere ti mbi kete nga mbi zia lege ti sarango ye ti ngangu. Wango so ayeke na 1 aCorinthien 15:33 a-aidé lani mbi. A tene: “Ti sara songo na asioni zo ayeke buba anzoni sarango ye ti zo.” Mbi ga ti bâ so, tongana mbi ye ti changé asioni sarango ye ti mbi, a lingbi mbi zia ti sara kamarade na azo so ayeke pusu mbi ti sara asioni ye. Tongaso, mbi changé angbene kamarade ti mbi ni na atâ Chrétien ti yâ ti congrégation, so ayeke azo so tongana ala ye ti leke akpale ti ala, ala yeke tiri ape wala ala yeke sara mbeni ye ti ngangu ape, me ala yeke sara ye alingbi na amama-ndia ti Bible.

Mbeni versê ti Bible so asara ye mingi na ndo ti mbi nga ayeke aRomain 12:17-19. A tene: “Ala kiri sioni teti sioni na mbeni zo pëpe. . . . Tongana lege ni ayeke dä, na ala lingbi ti sara mbeni ye, zia ala duti na siriri na azo kue. . . . Ala wani ala futa kula pëpe. . . . Ndali ti so Mbeti ti Nzapa atene: ‘Jéhovah atene: Mbi la mbi yeke kiri na zo peko ti sioni so lo sara, mbi la mbi yeke kiri na ni.’” Mbi ga ti yeda so a yeke Jéhovah la ayeke fâ ngbanga na fason so lo ye nga na ngoi ni. Yeke yeke, mbi komanse ti zia lege ti sioni gigi ti mbi ni.

Mbi yeke girisa lâ oko ape mbeni ye so asi na mbi na mbeni lakui na ngoi so mbi yeke kiri na yanga-da. Mbeni groupe ti amaseka so ayeke lani awato ti e aga na ndo ti mbi, na chef ti ala agu mbi na mbage ti peko na lo dekongo, lo tene: “Défendre tere ti mo ma!” Mbi tene kete sambela na Jéhovah, ti hunda na lo ti aidé mbi na yâ ti ye ni so. Atâa so mbeni ngangu bibe apusu mbi ti tene mbi na ala e yô dä, mbi wara lege ti sigigi na yâ ti kpale ni so kamême. Na ndade ni, mbi tingbi na chef ti ala ni lo oko. Ngonzo asara mbi, na mbeni ye atene na mbi ti mû lo, me ge encore mbi hunda na Jéhovah na yâ ti bê ti mbi ti aidé mbi ti kanga bê. Tâ mbi ku tere ti mbi na ni ape, maseka ni aga droit na mbage ti mbi na lo tene: “Pardonné mbi na ye so apassé biri na lakui so. Ti vrai ni, mbi ye ti ga tongana mo. Mbi ye ti manda Bible.” So nzerengo tere lani na mbi ti bâ so mbi wara lege ti kanga ngonzo ti mbi! Grâce na ni, lo nga lo komanse ti manda Bible.

Mawa ni ayeke so, na angoi ni so, tanga ti azo ti sewa ti mbi azia lege ti mandango Bible. Me, mbi mû desizion na bê ti mbi kue ti ngbâ ti manda ni na ti zia pëpe si mbeni zo wala mbeni ye asara si mbi kiri na peko. Mbi hinga so, ti bungbi ndo oko na awakua ti Nzapa ayeke soigné akä so ayeke na bê ti mbi nga asara si mbi wara sewa so mbi yeke na bezoin ni. Mbi gue na li ni lakue, na a si na ngu 1991, mbi wara batême, mbi ga Témoin ti Jéhovah.

Mbi yeke lani na vundu na bê ti mbi, mbi ye ti komande na ndo ti azo nga mbi yeke zo so aye sarango ye ti ngangu. Me Mbeti ti Nzapa achangé fini ti mbi kue. Fadeso, mbi yeke fa tënë ti siriri so ayeke na yâ ti Bible na azo kue so aye ti mä ni. Mbi yeke na pasa ti fa tënë ti Nzapa teti l’heure mingi, a sara ngu 23 awe.

Teti mbeni ngoi lani, mbi sara kua tongana volontaire na ndokua ti aTémoin ti Jéhovah ti Mexique. Kâ, mbi tingbi na Claudia, mbeni wali Chrétien so ayapu mingi. Na ngu 1999, mbi na lo e sara mariage. Merci mingi na Jéhovah so lo sara tufa na ndo ti mbi na mungo na mbi mara ti wali so ayeke be-ta-zo so!

Mbi na lo e yeke lani na yâ ti mbeni congrégation ti yanga ti awambongi na Mexique, ti mû maboko na awambongi ti manda ye na ndo ti Jéhovah. Na pekoni, a hunda na e ti gue na kodoro ti Belize ti gue ti manda Bible na azo kâ. Atâa so ge e yeke na ye mingi ape, e yeke na aye so e bezoin ni ti duti na ngia. E peut ti changé ngia ti e ni na mbeni ye ape.

Tongana ngoi ayeke hon, mama ti mbi akiri amanda Bible, na pekoni lo wara batême. Nga yaya ti mbi ti koli, wali ti lo nga na amolenge ti ala ayeke fadeso aTémoin ti Jéhovah. Ambeni ngbene kamarade ti mbi, so mbi fa lani tënë ti Nzapa na ala, ayeke sara nga fadeso na Jéhovah.

Mawa ni ayeke so, ambeni zo ti sewa ti mbi akui ngbanga ti so ala changé pëpe asioni sarango ye ti ala. Tongana mbi kue mbi ngbâ fade gi dä tongaso, mara ti ye so asi na ala so alingbi ti si nga na mbi. Mbi kiri merci mingi na Jéhovah so lo sara si mbi ga nduru na lo nga na awakua ti lo, so ala fa na mbi ti sara ye alingbi na amama-ndia ti Bible, ala sara ni na kangango bê nga na nzoni bê.