Nzapa aleke terê ti e na mbeni fason so gï terê ti e ni wani apeut ti sava. Mbeni ndokua so abâ tënë ti seni (Johns Hopkins Medicine) afa so tongana mbeni zo ayeke na nzoni seni si mbeni ye afâ lo na kä, akpaka terê ti lo wala akpo lo, “terê ti lo akomanse ti sara ambeni ye so ahon gbungo li ti zo ti tene lê ti kä ni akanga, atâa a yeke kete kä wala kota kä.” Terê ti zo ni wani ayeke sara ambeni ye ti tene mênë so ayeke sigi na lê ti kä ni so akaï, nga ti tene kä ni amü.

GBU LI NA NDÖ TI TËNË SO: Tongana Nzapa asara e na mbeni fason so terê ti e wani asara si kä so e wara amü, eskê e peut ti sara nga confiance na zendo so lo mû ti aidé e ti tene avundu ti bê ti e akaï ape? Wasungo Psaume atene: “Azo so kä ayeke na bê ti ala, Lo sara si kä ni amü, nga lo kanga akä ti ala.” (Psaume 147:3). Tongana mo yeke na kota vundu ndali ti mbeni ye so asi na mo ândö wala ndali ti mbeni ye so mo ngbâ ti vivre ni fadeso, nyen la apeut ti aidé mo ti duti sûr so Nzapa ayeke kanga akä ti mo, atâa ayeke laso wala na yâ ti angoi so ayeke ga?

Nzapa amû zendo atene: “Sara mbeto pëpe, ndali ti so mbi yeke na mo. Gi bê ti mo pëpe, ndali ti so mbi yeke Nzapa ti mo. Mbi yeke kpengba mo, ti tâ tënë ni, mbi yeke mû maboko na mo.” (Ésaïe 41:10). Tongana zo ahinga so Nzapa ayeke pensé na lo, ye so ayeke sara si lo yeke na siriri ti bê na lo yeke wara ngangu ti luti na lê ti akpale. Bazengele Paul airi siriri ni so “siriri ti Nzapa so ahon ndö ti bibe kue”. Lo kiri lo tene: “Mbi wara ngangu ti sara aye kue ndali ti lo so lo mû ngangu ni na mbi.”—aPhilippien 4:4-7, 9, 13.

Bible aidé e ti duti na mabe na azendo so Jéhovah amû ndali ti gigi ti kekereke. Na tapande, Apocalypse 21:4, 5 (so a fa ni na lembeti so aga na peko) afa na e nyen la lo yeke sara ande, na ngbanga ti nyen la e peut ti duti na confiance so lo yeke sara ni:

• “Lo yeke mbô ande ngu ti lê kue” na lê ti azo. Jéhovah ayeke kaï ande apasi ti e nga na agingo bê ti e kue, même ati so amba ti e abâ ni tongana kota kpale ape.

• Gbia so ngangu ti lo ahon angangu kue, so “aduti na ndö ti trône” ti gloire ti lo na yayu, ayeke sara kua ande na ngangu ti lo nga na komandema ti lo ti kanga lege na pasi nga ti aidé e.

• Jéhovah adë bê ti e so azendo so lo mû ayeke “atënë so a lingbi ti zia bê dä nga ayeke tâ tënë.” Na lege ti tënë so Jéhovah aye ti fa so tongana azendo so ni mû aga tâ tënë ape, a ye ti fa so ni yeke tâ Nzapa ape.

“ ‘Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.’ Lo so aduti na ndö ti trône ni atene: ‘Bâ, mbi yeke sara si aye kue aga fini.’ Nga lo tene: ‘Mo sû atënë so na mbeti, ndali ti so atënë so ayeke atënë so a lingbi ti zia bê dä nga ayeke tâ tënë.’”—Apocalypse 21:4, 5.

Aye so Nzapa acréé nga na Bible afa na e asarango ye ti terê ti Babâ ti e so ayeke na yayu. A yeke pusu e ti hinga lo na ti ga kota kamarade ti lo. Na mbage, Bible atene: “Ala ga nduru na Nzapa, lo yeke ga ande nduru na ala.” (Jacques 4:8). Kusala 17:27 atene: “Lo yeke yongoro pëpe na e oko oko kue.”

Tongana mo gi ti hinga Nzapa, yeke yeke mo yeke bâ biani so ‘lo yeke bi bê ti lo na ndö ti mo.’ (1 Pierre 5:7). Ti sara mara ti confiance tongaso na Jéhovah ayeke ga na e aye ti nzoni wa?

Bâ tapande ti Toru, na Japon. Mama ti lo so abata lo ayeke mbeni Chrétien, ye oko lo lï na yâ ti groupe ti abandit so a-iri ala ayakuza. Lo tene: “Mbi pensé lani mbi tene Nzapa aye mbi ape, nga so lo zia si azo so mbi hinga ala nga surtout ala so mbi ye ala mingi akui so, mbi bâ ni tongana punition la lo yeke mû na mbi so.” Toru atene so mara ti sioni vie ni so nga mara ti sioni pensé so lo yeke na ni asara si lo ga “mbeni zo so ayeke na mawa ti zo ape nga zo ti sarango ngangu na zo.” Lo fa ye so agbu lani bê ti lo, lo tene: “Ye so mbi ye lani ayeke ti tene mbi kui jeune na peko ti so mbi fâ mbeni zo so iri ti lo awu ahon ti mbi tongaso si iri ti mbi nga kue awu na pekoni.”

 Me, na peko ti so Toru na wali ti lo Hannah amanda Bible, lo sara kota changement na yâ ti gigi ti lo. Hannah atene: “Mbi bâ comment koli ti mbi achangé tâ na lê ti mbi.” Fadeso, Toru atene: “Mbeni Nzapa ayeke dä so ayeke pensé biani na e oko oko kue. Lo ye si zo oko akui ape nga lo ye na bê ti lo kue ti pardonné azo so aye biani ti changé. Lo yeke mä aye kue so e peut ti tene na mbeni zo nde ape me gï na lo awe, nga même aye so mbeni zo nde apeut ti comprendre e na ni ape, lo comprendre ni. Na yâ ti kete ngoi, Jéhovah ayeke zi ande akpale, pasi nga na akota vundu so azo ayeke wara. Même laso, lo yeke aidé e na mbeni fason so e ku terê ti e na ni ape. Lo ye e nga lo yeke aidé e na ngoi so e yeke na yâ ti vundu.”—Psaume 136:23.

Ye so asi na Toru afa so ti hinga so Nzapa apeut ti zi apasi ti e, ti mbo ngu ti lê kue na lê ti e, nga so lo yeke sara ni na yâ ti kete ngoi, amû na e tâ beku teti kekereke nga a-aidé e ti duti nzoni laso. Ni la, atâa so sese asi singo na aye ti sioni, e lingbi ti duti kamême nzoni ngbanga ti so Nzapa ayeke pensé na e.