LUZIA AYEKE MBENI WALI SO GERE TI LO TI MBAGE TI WALI ABUBA. Na temps so lo de kete lo wara kobela ti polio, so ayeke mbeni kobela so zo alingbi ti mû na terê ti mba ti lo hio mingi, na so andu cerveau ti zo. Na ngoi so lo yeke na ngu 16, mbeni wali so lo sara kua na lo atene na lo atene: “Nzapa la apunir mo si gere ti mo abuba so ndali ti so mo mä yanga ti mama ti mo ape nga mo ye lo ape.” Atâa so ye ni asi asara ngu mingi awe, Luzia angbâ ti rappelé tongana nyen la ye ni asara lo lani nzoni oko ape.

NA NGOI SO A FA NA DAMARIS SO LO YEKE NA CANCER TI CERVEAU, babâ ti lo atene na lo atene: “Nyen la mo sara si mara ti ye tongaso asi na mo so? Âmanke mo sara mbeni ye so ayeke tâ sioni mingi la Nzapa apunir mo so.” Tënë ni so asara Damaris vundu mingi.

Depuis giriri la azo ayeke pensé ka atene kobela ayeke punition ti Nzapa so. Mbeni mbeti (Manners and Customs of Bible Lands) atene so na ngoi ti Jésus, azo mingi apensé so “tongana zo awara mbeni kobela, andâ lo wala asewa ti lo asara siokpari la si Nzapa apunir lo na lege ti kobela ni so.” Mbeni mbeti (Medieval Medicine and the Plague) atene nga so angu ngbangbo mingi na peko ti Jésus, “ambeni zo apensé so Nzapa aga lani na asioni kobela so amû ndo ti punir ala ndali ti asiokpari so ala sara.” So lani mbeni sioni kobela afâ gbâ ti azo na Europe na popo ti ngu 1300 ti si na ngu 1400 so, eskê Nzapa la aga na ni ti punir na azo ti sioni? Wala a yeke lani mbeni microbe la asara si kobela so abâ gigi tongana ti so azo so agi nda ti ye na ndö ti seni ti zo afa ni? Ambeni zo ayeke hunda wala eskê Nzapa ayeke punir ka azo na lege ti kobela ndali ti asiokpari so ala sara? *

GBU LI NA NDÖ TI TËNË SO: Ngbanga ti nyen la si Jésus asava lani azo ti kobela, tongana kobela na pasi ayeke punition ti Nzapa? Ka sarango tongaso afa so lo yeke buba lani yâ ti ngbanga so Nzapa ayeke dë na ndö ti azo la ape? (Matthieu 4:23, 24). Lâ oko Jésus agi ti kanga lege pëpe na ye so Nzapa aye ti sara. Lo tene: “Mbi yeke sara lakue aye so anzere na bê ti lo,” nga “mbi yeke sara gï tongana ti so Babâ amû yanga na mbi ti sara.”—Jean 8:29; 14:31.

Bible ayeke polele. Jéhovah Nzapa ayeke “sara ye lakue mbilimbili.” (Deutéronome 32:4). Na tapande, Nzapa ayeke sara lâ oko pëpe si mbeni accident ti avion apassé, na gbâ ti azo akui na yâ ni ndali ti so lo ye ti punir mbeni zo na yâ ti avion ni! Ti fa biani so Nzapa ayeke sara ye na lege ni, Abraham atene so lâ oko Nzapa ayeke “futi azo ti mbilimbili legeoko na azo ti sioni” ape. Lo tene nga so Nzapa ‘alingbi ti sara ye tongaso kete pëpe’. (Genèse 18:23, 25). Bible atene nga so “Nzapa alingbi lâ oko pëpe ti sara ye ti sioni”; lo yeke “sara sioni pëpe.”—Job 34:10-12.

Tongana e bâ pasi, a yeke pëpe Nzapa la apunir e ndali ti mbeni siokpari so e sara. Jésus afa ni polele, na ngoi so lo na adisciple ti lo abâ mbeni koli so a dü lo waziba. “Adisciple ni ahunda lo atene: ‘Rabbi, zo wa la asara siokpari si a dü koli so waziba so? Lo koli ni, wala babâ na mama ti lo? Jésus akiri tene na ala lo tene: ‘Koli so wala babâ na mama ti lo si asara siokpari pëpe, me ye so asi tongaso ti tene a bâ akusala ti Nzapa na yâ ti ye so asi na lo.’”—Jean 9:1-3.

So azo mingi ayeke lani na apensé nde nde so ayeke na lege ni ape na ndö ti tënë ni so, a doit ti étonné adisciple ti Jésus lani so lo tene na ala so, a yeke pëpe ndali ti so koli so wala babâ na mama ti lo la asara siokpari si ye so asi na lo so. Jésus asava lani koli so, me lo fa nga na ndö ni so tënë so azo atene pasi  alondo na Nzapa ayeke mbeni tënë so ayeke na lege ni ape (Jean 9:6, 7). Azo so ayeke bâ pasi na akota kpale ti seni laso ayeke wara dengo bê tongana ala hinga so Nzapa la ayeke na gunda ti pasi ti ala ape.

Mbeti ti Nzapa adë bê ti e

• “Aye ti sioni alingbi ti zia Nzapa na tara pëpe na lo wani lo yeke tara bê ti mbeni zo na aye tongaso pëpe.” (JACQUES 1:13). Na ndö ni, “aye ti sioni” so ayeke si na e azo ngbene ye giriri so, na tapande kobela, pasi, nga na kuâ aga nduru ti hunzi awe.

• Jésus Christ “asava ala kue so terê ti ala ason”. (MATTHIEU 8:16). So Jésus Molenge ti Nzapa asava azo kue so aga na mbage ti lo, lo fa ye so Royaume ti Nzapa ayeke sara ande ndali ti azo na ndö ti sese kue.

• “[Nzapa a]yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—APOCALYPSE 21:3-5.

Ngbanga ti nyen la azo ayeke bâ pasi mingi tongaso? Depuis la azo ayeke hunda terê ti ala na tënë so. Tongana Nzapa la ayeke na gunda ni ape, ka zo wa la ayeke na gunda ni? E yeke kiri tënë na ahunda so na yâ ti mbage so ayeke ga na peko.