Ti Maria, Raül, Arne nga na ambeni zo nde, sambela ayeke mbeni cadeau so ayeke nde mingi. Ala bâ so na lege ti sambela ala peut ti sara tënë na Nzapa, ti kiri merci na lo nga ti hunda lo ti aidé ala. Ala mä na bê na tënë ti Bible so: “Confiance so e yeke na ni na lo ayeke so: Atâa ye wa la e hunda, tongana a gue oko na ye so bê ti lo aye, lo yeke mä e.”​—1 Jean 5:14.

Me ambeni zo ayeda pëpe na tënë ti Bible so. Mbeni koli so iri ti lo Stève atene: “Na temps so mbi yeke na ngu 17, akamarade ti mbi ota akui. Oko akui na yâ ti accident ti oto, na use akui na yâ ti la mer.” Nyen la Stève asara lani? Lo tene: “Mbi sambela Nzapa ti hinga ndani so aye ni so kue asi so, me mbi wara kiringo tënë ni ape. Mbi ngbâ mbi tene: ‘Ngbanga ti nyen ti sambela?’” Gbâ ti azo abâ so  Nzapa akiri tënë na sambela ti ala ape, a sara si ala hunda terê ti ala ngbanga ti nyen la ala doit ti ngbâ ti sambela.

Ambeni raison nga nde ayeke dä so asara si azo abâ sambela na nene ni ape. Ambeni zo atene so, so Nzapa ahinga aye kue, lo hinga abezoin ti e nga na akpale ti e awe, tongaso e bezoin nga ti fa ni na lo ape.

Ambeni zo apensé so Nzapa ake ti mä asambela ti ala ndali ti afaute so ala sara ândö. Jenny atene: “Kota kpale ti mbi ayeke so, mbi bâ so mbi yeke nzoni zo oko ape. Mbi sara lani ambeni ye na mbi regretté, a sara si mbi tene mbi lingbi ti tene Nzapa amä asambela ti mbi ape.”

Mo bâ ti mo sambela tongana nyen? Tongana a si na mo awe ti wara mara ti agingo bê wala akite tongaso na ndö ti sambela, peut-être bê ti mo ayeke dë ti hinga so Bible amû anzoni kiringo tënë na ndö ni. E peut ti sara confiance na Bible; * Bible apeut ti aidé mo ti wara akiringo tënë na ahunda tongana:

• Eskê Nzapa ayeke mä asambela ti e?

• Ngbanga ti nyen la Nzapa akiri tënë na ambeni sambela ape?

• Nyen la mo peut ti sara ti tene Nzapa amä asambela ti mo?

• Aye ti nzoni wa la mo yeke wara ni grâce na sambela?